Kubala

20 Mu ñondo mutanshi, jibumba jonse ja bena Isalela jaishile mu kiselebwa kya Zini, kabiji bantu batendekele kwikala mu Kadeshi.+ Akuno ko kwafwijile Milyama+ kabiji ko ko bamuzhiikile.

2 Bino kechi kwajinga mema a kutoma jibumba ne,+ kabiji bakonkene pamo na kunena Mosesa ne Alona. 3 Bantu batobweshenga Mosesa+ ne kumwambila’mba: “Nanchi inge twafwiletu kyonkakya kimye kyafwijilemo balongo betu ku meso a Yehoba! 4 Mambo ka o mwaletela kipwilo kya Yehoba mu kino kiselebwa kuba’mba atweba ne banyama betu tufwile monka?+ 5 Kabiji mambo ka o mwitufumishe mu Ijipita ne kwituleta mu ino mpunzha yatama?+ Mu ino mpunzha kechi muji nkunwa, makuyu, mañanzañanza ne mapomegulanchi ne, kabiji kechi muji ne mema a kutoma ne.”+ 6 Kepo Mosesa ne Alona bafumine ku kipwilo kyaimene ku kibelo kya tente wa lusambakeno ne kupona panshi kinkuvumene, kabiji lukumo lwa Yehoba lwamwekele kwi abo.+

7 Ponkapo Yehoba waambijile Mosesa amba: 8 “Shikula kamama ne kukonkanya jibumba. Obewa ne kolojobe Alona, mwambile jibwe ne abo saka bamonako kuba’mba jibwe jimupe mema, kabiji obewa usakwibapa mema kufuma mu jibwe ne kutomesha jibumba ne banyama babo.”+

9 Byonkabyo, Mosesa watolele kamama kajinga kwi Yehoba,+ byonkatu byo amukambizhe. 10 Kepo Mosesa ne Alona bakonkenye pamo kipwilo konka ku jibwe, kabiji wibambijile’mba: “Umvwai, anweba bansatuki! Nanchi twimupe mema kufuma mu jino jibwe nyi?”+ 11 Ponkapo Mosesa watanyikile kuboko kwanji ne kupuma jibiji kamama kanji ku jibwe, kabiji mema atatwile kupokomoka ne jibumba ne banyama babo batatwile kutoma mema.+

12 Kepo Yehoba aambijile Mosesa ne Alona amba: “Na mambo a kuba kechi mwaji kunketekela ne kunzhijika ku bena Isalela ne, kechi mukatwala kino kipwilo mu kyalo kyo nkebapa ne.”+ 13 Ano o mema a ku Meliba*+ konka bena Isalela ko batobokele ne Yehoba, kabiji wizhijikile mukachi kabo.

14 Kepo Mosesa atumine baluwe kufuma ku Kadeshi kuya na kubuula mfumu wa Edomu+ amba: “Abino byo byaamba nkasenu Isalela+ amba, ‘Anweba mwayukishatu bulongo makatazho onse o twapitamo. 15 Bashakulu betu bayile ku Ijipita+ ne kukekalako myaka* yavula,+ kabiji bena Ijipita batatwile kwituyanjisha ne bashakulu betu pamo.+ 16 Twajijiile Yehoba+ ne aye witumvwine kabiji witutumijile malaika+ wa kwitufumya mu Ijipita, kabiji tuji muno mu Kadeshi, muzhi uji ku mupaka wa kyalo kyenu. 17 Mwane tuswishai tupite mu kyalo kyenu. Kechi tusakupita mu majimi nangwa mu majimi a miñanzañanza ne, kabiji kechi tusakutoma mema a mu mishima yenu ne. Tusakupitatu mu Mukwakwa wa Mfumu kwa kubula kwalulukila ku kilujo nangwa ku kipiko, posotu ne byo tusakupita mu kyalo kyenu.’”+

18 Nangwa byonkabyo, Edomu wibambijile’mba: “Kechi musakupita mu kyalo kyetu ne. Inge mupite, nsakwiya na kwimutundaila na mpoko.” 19 Pakuba bena Isalela bamwambijile’mba: “Tusakupitatu mu mukwakwa mukatampe, kabiji umvwe atweba ne banyama betu tutome mema enu, tusakwimulipila.+ Kafwako kintu kikwabo kyo tubena kukeba ne, kanatu kupita kwapwa.”+ 20 Bino aye waambile’mba: “Kechi musakupita ne.”+ Ponkapo Edomu waishile na kwibatundaila saka aji na bantu bavula ne nzhita* yakosa. 21 Byonkabyo, Edomu kechi waswishishe Isalela kupita mu kyalo kyanji ne; onkao mambo, Isalela waalulukile kufuma kwi aye.+

22 Jibumba jonse ja bena Isalela jaimene lwendo kufuma ku Kadeshi kabiji jafikile ku Mutumba wa Hola.+ 23 Kepo Yehoba aambijile Mosesa ne Alona ku Mutumba wa Hola wajinga ku mupaka wa kyalo kya Edomu amba: 24 “Alona bakamutwala kwalaala* balongo+ banji. Aye kechi ukatwelamo mu kyalo kyo nkapa bena Isalela ne, mambo anweba babiji mwalengulwile mukambizho wami pa mambo a mema a ku Meliba.+ 25 Senda Alona ne Eleaza mwananji mukanjile pa Mutumba wa Hola. 26 Umuvuule Alona bivwalo byanji+ ne kwibivwika mwananji aye Eleaza,+ kabiji Alona usakufwila konkakwa.”*

27 Byonkabyo, Mosesa waubile byonkatu byamukambizhe Yehoba, kabiji bakanjijile pa Mutumba wa Hola ne jibumba saka jibamona. 28 Kepo Mosesa avuujile Alona bivwalo byanji ne kuvwika mwananji aye Eleaza. Byo apwishishe kuba bino, Alona wafwijile ponka peulu ya mutumba.+ Kabiji Mosesa ne Eleaza bakunkulukile kufuma ku mutumba. 29 Jibumba jonse byo jamwene’mba Alona wafwa, bena Isalela bonse bamujijile Alona moba 30.+