Buku wa Bubiji wa Samwela
23 Abino byo byambo byapeleleko bya kwa Davida:+
“Byambo bya kwa Davida mwana wa kwa Yese,+
Kabiji byo byambo bya muntu ye basuntwile peulu,+
Mushingwa+ wa Lesa wa kwa Yakoba,
3 Lesa wa Isalela+ waambile;
Aye Jibwe ja Isalela waambile kwi amiwa amba:
‘Inge muntu ubena kulama bantu waoloka,+
Kabiji ubena kulama na kwakamwa Lesa,+
4 Kulama kwanji kwikala nobe kyeya kya lukelo inge juba jasama,+
Mwiulu saka mwabula makumbi.
Kabiji kuji nobe mute usama inge mvula wachibika,
Ne kulengela nsono kumena pa mushiji.’+
5 Nanchi bino kechi byo biji nzubo yami kwi Lesa nenyi?
Mambo aye walayañana ne amiwa lulayañano lwa myaka,+
Lo anengezha bulongo.
Na mambo a kuba’mba luno lulayañano lulumbulula lupulukilo lwami ne byonse byo nsekelamo,
Nanchi kechi kyo kikamulengela kwilufikizha nenyi?+
6 Bino bantu batutu bebataya+ nobe miba,
Mambo kechi bakonsha kwiikwata na maboko ne.
7 Inge muntu ukeba kwiikwata,
Wafwainwa kwikala na kyela ne na musako wa jifumo,
Kabiji bafwainwa kwiisokatu yonse mu mujilo mu mpunzha yayo.”
8 Ano o mazhina a bilobo bya kwa Davida:+ Yoshebe-bashebete mwina Takemona wajinga mukulumpe wa basatu.+ Ye walwile na bantu 800 ne kwibepaya na jifumo pa kimye kimo. 9 Walondejile pe aye, wajinga Eleaza+ mwana wa kwa Dodo,+ mwana wa kwa Ahoa yenka wajinga pa bilobo bisatu byajinga ne Davida kimye kyo banunushishenga bena Filishitiya. Bakonkene konkakwa amba balwe, kabiji banabalume bena Isalela byo banyemene, 10 aye waimenetu ne kutwajijila na kutapa bena Filishitiya kufikatu ne mukoko wanji byo akookele, kabiji kuboko kwanji kwakakachijile mpoko.+ Onkao mambo, Yehoba wibashinjile* bingi aja juba;+ kabiji bantu baalulukile ne kumulondela kuba’mba basende bipukulwa bya boba bo batapile.
11 Walondejile pe aye wajinga Shama mwana wa kwa Age mwina Halala. Bena Filishitiya bakonkene pamo ku Lehi, kwajinga bujimi bwa nkunde ichila; kabiji bantu banyemene na mambo a bena Filishitiya. 12 Bino aye waimenetu pakachi ka bujimi ne kwibuzhikijila kabiji watwajijile kutapa bena Filishitiya, kya kuba Yehoba wibalengejile kwibashinda.*+
13 Mu bena mizhi 30 mwafumine bena mizhi basatu, bayile kwi Davida ku jiyengo ja ku Adulama+ mu kimye kya kunowa, kabiji kipanyi* kya bena Filishitiya kyatebelejile mu Kimpachiko* kya Lefwaimu.+ 14 Pa kyokya kimye Davida wajinga mu nkonkoso,+ kabiji bashilikale ba bena Filishitiya bajinga mu Betelema. 15 Kepo Davida atendekele kutonga’mba: “Nanchi inge natomapo mema a mu mushima* uji kwipi na kibelo kya Betelema!” 16 Ponkapo abya bilobo bisatu byatwelele na lupata mu kampu wa bena Filishitiya ne kutapula mema mu mushima* wajinga kwipi na kibelo kya Betelema ne kumuletelao Davida; bino aye wakaine kwiatoma kabiji wiechijile panshi kwi Yehoba.+ 17 Waambile’mba: “Anweba Yehoba, kechi kyayilamo amiwa kuba’mba ngube kino kintu ne! Nanchi nafwainwa kutoma mashi+ a bano banabalume baji kubika bumi* bwabo mu kizumba nyi?” Onkao mambo, wakaine kwiatoma. Bino byo bintu byaubile bilobo byanji bisatu.
18 Abishai+ mulongo wa kwa Yoaba mwana wa kwa Zeluya+ ye wajinga mukulumpe wa bakwabo basatu; ye walwile na bantu 300 ne kwibepaya na jifumo, kabiji wayile nkuwa nobe aba basatu.+ 19 Aye bamunemekele bingi kukila bakwabo basatu kabiji wajinga mukulumpe wabo, pano bino kechi waesakene pamo na boba basatu batanshi ne.
20 Benaya+ mwana wa kwa Yehoyada wajinga muntu wachinchikile* bingi waubile bintu byavula mu Kabizele.+ Watapile baana babiji ba kwa Aliela mwina Moabu, kabiji watwelele mu kimbotela pa juba janokele mabebe ne kwipaya bokwe.+ 21 Kabiji watapile mwina Ijipita wazamine bingi. Nangwa kya kuba mwina Ijipita wajinga na jifumo mu kuboko kwanji, aye wayileko na kichi ne kwangata jifumo mu kuboko kwa mwina Ijipita ne kumwipaya na jonka jifumo janji. 22 Bino byo bintu byaubile Benaya mwana wa kwa Yehoyada, kabiji naye wayile nkuwa nobe byobya bilobo bisatu. 23 Nangwa kya kuba bamunemekele bingi kukila bakwabo makumi asatu, kechi waesakene pamo na boba basatu ne. Nangwa byonkabyo, Davida wamutongwele kwikala mukulumpe wa nzhita yanji yamulamanga.
24 Asahela+ nkasa ne kolo ne Yoaba wajinga umo wa mu boba makumi asatu: Elanane mwana wa kwa Dodo mwina Betelema,+ 25 Shama mwina Haloda, Elika mwina Haloda, 26 Heleza+ mwina Paleta, Ila+ mwana wa kwa Ikeshi mwina Tekoa, 27 Abieza+ mwina Anatota,+ Mebunai mwina Hushata, 28 Zalimonyi mwina Ahoa, Mahalai+ mwina Netofwa, 29 Heleba mwana wa kwa Beana mwina Netofwa, Itai mwana wa kwa Libai mwina Gibea wa mu bena Benjamina, 30 Benaya+ mwina Pilatona, Hidai wa ku kimpachiko kya Gaasha,+ 31 Abi-alabona mwina Alabata, Azamabeta mwina Bahulimu, 32 Eliyaba mwina Shalabonyi, baana ba kwa Yashenyi, Yonafwanyi, 33 Shama mwina Halala, Ahiama mwana wa kwa Shalala mwina Halala, 34 Elifeleta mwana wa kwa Ahashibai mwana wa mwina Maakata, Eliama mwana wa kwa Ahitofela+ mwina Gilo, 35 Hezelo mwina Kamela, Palai mwina Alaba, 36 Igala mwana wa kwa Natana wa ku Zoba, Bani mwina Gadi, 37 Zeleka mwina Amonyi, Nahalai mwina Beelota yenka wasendanga bilwilo bya kwa Yoaba mwana wa kwa Zeluya, 38 Ila mwina Itila, Galeba mwina Itila,+ 39 ne Uliya+ mwina Hiti, kabiji bonse pamo bajinga 37.