Ezikyo

18 Kabiji Yehoba wañambijile jikwabo amba: 2 “Nanchi kishimpi kyo babena kwamba mu Isalela kya kuba’mba, ‘Bashabo baja mañanzañanza asasa, bino meno a baana o oba ngwe,’ kyatala mu ka?+

3 “Nkambo Mfumu Yehoba waamba’mba, ‘Byonkatu byo nji na bumi, kechi mukatwajijila kwamba kino kishimpi mu Isalela ne. 4 Umvwai! Myeo* yonse yo yami. Mweo wa shanji ne wa mwana, yonse yo yami. Mweo* ulenga mambo ye ukafwa.

5 “‘Twambe’mba muntu waoloka, uba byawama ne byalumbuluka. 6 Kechi uja kajo ko batapishisha bankishi pa mitumba;+ kuketekela mu bankishi ba bunya* ba bena Isalela ne; kechi ulaala na muka bene+ nangwa kulaala na mwanamukazhi uji ku mwenzhi ne.+ 7 Kechi ukabisha bantu ne,+ bino aye ubwezha bintu byo akwachijilemo ku muntu ye akongwesheshe.+ Kechi wibila mukwabo kintu ne,+ bino aye upana kajo ku baji na nzala+ ne boba babula bya kuvwala wibapa bya kuvwala.+ 8 Kechi ukeba nsubu nangwa kukongwesha kaloba ne,+ kabiji aye kechi uba byatama ne;+ aye uchibila bantu mambo monka mo aolokela.+ 9 Aye ulondela malamuna ami ne kulama mizhilo yami pa kuba’mba obenga bintu mu bukishinka. Muntu uba bino, ye waoloka kabiji kine ukekala na bumi,’+ byo byaamba Nkambo Mfumu Yehoba.

10 “‘Pano twambe’mba, uno muntu uji na mwana ngivi,+ mbanzhi*+ nangwa uba bino bintu bikwabo byatama 11 (nangwa kya kuba shanji kechi uba bino bintu ne) uja kajo ko batapishisha bankishi pa mitumba, ulaala na ba muka bene. 12 Kabiji ukabisha bakajilwa ne bayanji,+ wiba bintu bya bakwabo, kechi ubwezha bintu byo akwachijilemo ne, uketekela mu bankishi ba bunya ne kuba bintu bya bunya,+ 13 ukongwesha kaloba ne kupotesha bintu kuba’mba amwenemo nsubu,+ mwana wa uno mutundu kechi ukekala na bumi ne. Na mambo a bino bintu bya bunya byonse byo auba, aye ukafwa. Mashi anji akamushinkamana mwine.

14 “‘Pano twambe’mba, uno muntu uji na mwana, ne uno mwana umona bintu byonse byatama byuba shanji. Nangwa kya kuba wibimona, aye kechi wibyuba ne. 15 Kechi uja kajo ko batapishisha bankishi pa mitumba; kuketekela mu bankishi ba bunya ba bena Isalela ne; aye kechi ulaala na muka bene ne; 16 kabiji kechi ukabisha bantu ne; kabiji kechi usenda kintu kyo bamulayile kukwachilamo ne; kechi wibila mukwabo kintu ne; aye upana kajo ku baji na nzala ne boba babula bya kuvwala wibapa bya kuvwala; 17 kechi ukabisha muyanji ne; kechi ukongwesha kaloba ne; kechi ukeba nsubu ne. Aye ulondela mizhilo yami ne kulama malamuna ami. Muntu uba bino, kechi ukafwa na mambo a bubi bwa shanji ne. Aye ukekala na bumi. 18 Na mambo a kuba shanji watambwile bintu kya lunkanankana, kwangata mulongo wanji bintu ne kuba bintu byatama ku balongo banji, ukafwa na mambo a bubi bwanji.

19 “‘Bino anweba mukashikisha’mba: “Mambo ka mwana o abujila kuzhatwa na bubi bwa shanji?” Mambo aye wauba bintu byawama ne byaoloka, walondela malamuna ami onse ne kwialama, kine aye ukekala na bumi.+ 20 Mweo* ulenga mambo ye ukafwa.+ Mwana kechi bakamuzhachisha na bubi bwa shanji ne, shanji naye kechi bakamuzhachisha na bubi bwa mwananji ne. Muntu waoloka bakamufweta bunke bwanji na mambo a kuba byaoloka, mubi naye bakamukambula bunke bwanji monka mwayila byubilo byanji byatama.+

21 “‘Pano inge mubi waleka kuba bintu byonse byatama byo aubilenga ne kulama malamuna ami ne kuba byawama ne byaoloka, kine ukekala na bumi. Kechi ukafwa ne.+ 22 Kechi bakamuzhachisha* na bintu byonse byatama byo aubile kala ne.+ Aye ukekala na bumi na mambo a kuba bintu byaoloka.’+

23 “‘Nkambo Mfumu Yehoba waamba’mba, ‘Nanchi amiwa nsekela mu lufu lwa muntu mubi nyi?+ Nanchi kechi nkeba namba aleke kuba bintu byatama kuba’mba ekale na bumi nenyi?’+

24 “‘Bino inge muntu waoloka waleka kuba bintu byawama kabiji watendeka kuba byatama,* ne kuba bintu byonse bya bunya byubapo bantu batama, abya ukekala na bumi nyi? Bintu byonse byawama byo aubilenga kechi nkebivuluka ne.+ Ukafwa na mambo a kubula bukishinka ne na mambo a bintu byatama byo auba.+

25 “‘Bino anweba mukamba’mba: “Jishinda jubilamo Yehoba bintu kechi jaoloka ne.”+ Anweba ba mu nzubo ya Isalela, umvwai kino! Nanchi jishinda jo ngubilamo bintu kechi jaoloka nenyi?+ Nanchi mashinda enu o mubilamo bintu kechi o abula koloka nenyi?+

26 “‘Inge muntu waoloka waleka kuba bintu byawama kabiji watendeka kuba byatama, kabiji wafwa na mambo a kuba bino bintu, kine ukafwa na mambo a bubi bwanji.

27 “‘Kabiji inge mubi waleka kuba bintu byatama kabiji watendeka kuba byawama ne byaoloka, ukapulusha bumi* bwanji.+ 28 Inge wavuluka bintu byonse byatama byo aubilenga ne kuleka kwibyuba, kine ukekala na bumi. Kechi ukafwa ne.

29 “‘Bino bena Isalela bakamba’mba: “Jishinda jubilamo Yehoba bintu kechi jaoloka ne.” Anweba ba mu nzubo ya Isalela, nanchi mashinda ami o ngubilamo bintu kechi aoloka nenyi?+ Nanchi mashinda enu o mubilamo bintu kechi o abula koloka nenyi?’

30 “Onkao mambo, Nkambo Mfumu Yehoba waamba’mba, ‘Nkemuzhachisha anweba bena Isalela pa muntu pa muntu monka mwayila mashinda enu.+ ‘Lapilai, ne kusankilapo bintu byatama byonse byo muba, kuchina’mba byakemulengela kulenga mambo ne kuzhatwa. 31 Sankilaipo byubilo byenu byonse byatama byo muba+ ne kwikala* na muchima wawama ne mupashi mupya,+ mambo ka o mubena kukebela kufwa+ anweba bena Isalela?’

32 “‘Nkambo Mfumu Yehoba waamba’mba, ‘Amiwa kechi nsekela mu lufu lwa muntu nangwa umo ne.+ Onkao mambo, lapilai mwikale na bumi.’”+