Kubala
27 Kabiji baana ba bakazhi ba kwa Zelofehada+ mwana wa kwa Hefela, Hefela mwana wa kwa Gileada, Gileada mwana wa kwa Makila, Makila mwana wa kwa Manase, wa mu bisemi bya kwa Manase mwana wa kwa Yosefwa, baishile. Mazhina a baana banji ba bakazhi o ano, Mala, Nowa, Hogala, Milika ne Tiliza. 2 Baimene kwi Mosesa, Eleaza ñanga, ku bakulumpe+ ne ku jibumba jonse konka ku kibelo kya ku tente wa lusambakeno ne kwamba’mba: 3 “Batata bafwijile mu kiselebwa, bino kechi bajinga pa joja jibumba jatundaikilenga Kola+ kusatukila Yehoba ne, bino abo bafwile na mambo a bubi bwabo kabiji kechi basemenepo baana ba balume ne. 4 Nanchi jizhina ja batata jizhiyetu mu kisemi kyabo na mambo a kuba’mba kechi basemenepo mwana wa mulume nenyi? Tupai kya buswanyi mukachi ka balongo ba batata.” 5 Onkao mambo, Mosesa watwajile ano mambo abo kwi Yehoba.+
6 Kepo Yehoba aambijile Mosesa amba: 7 “Baana ba bakazhi ba kwa Zelofehada baambatu bulongo. Wafwainwa kwibapa mpunzha kwikala kya buswanyi mukachi ka balongo ba bashabo, ne kwibapa kya buswanyi kya bashabo.+ 8 Kabiji buula bena Isalela amba, ‘Umvwe muntu wafwa kwa kubula kusemapo mwana wa mulume, kya buswanyi kyanji mwafwainwa kwikipana ku mwananji wa mukazhi. 9 Kabiji umvwe kechi wasemenepo mwana wa mukazhi ne, kya buswanyi kyanji mukekipane ku bakolojanji nangwa ku bankasanji. 10 Kabiji umvwe kechi uji na bakolojanji nangwa bankasanji ne, kya buswanyi kyanji mukekipane ku bashanji ba bakulumpe nangwa ba banyike. 11 Umvwe bashanji kechi bajipo na bakolojabo nangwa bankasabo ne, kya buswanyi kyanji mukekipane ku mulongo wanji wa mu kisemi kimo, ne aye akekiswane. Ajino jo jilamuna jikalondelanga bena Isalela, byonkatu Yehoba byo akambizhe Mosesa.’”
12 Kepo Yehoba aambijile Mosesa amba: “Kanjila ku uno mutumba wa Abalimu,+ umone kyalo kyo nkapa bena Isalela.+ 13 Inge wikimone, usakufwa ne kuya kwalaala* balongo+ bobe, byonkatu byafwile kolojobe Alona,+ 14 mambo jibumba byo jantobweshenga mu kiselebwa kya Zini, kechi mwalondejile mukambizho wami wa kunzhijika kwi abo na mambo a mema ne.+ Ano o mema a ku Meliba+ ku Kadeshi+ mu kiselebwa kya Zini.”+
15 Kepo Mosesa aambijile Yehoba amba: 16 “Anweba Yehoba Lesa upana bumi ku bantu* bonse, tongolai muntu wa kutangijila jibumba 17 yenka ukebatangijilanga mu mingilo yabo yonse kuba’mba jibumba ja Yehoba jikabule kwikala nobe mikooko yabula kafunga.” 18 Onkao mambo, Yehoba waambijile Mosesa amba: “Senda Yoshua mwana wa kwa Nuni uji na muchima wapusanako na wa bakwabo kabiji utenteke kuboko kobe pe aye.+ 19 Kabiji umwimike kwi Eleaza ñanga ne ku jibumba jonse ne kumutongola kwikala ntangi saka bamonako.+ 20 Umupepo ne luusa* lo uji nalo+ pa kuba’mba jibumba jonse ja bena Isalela jimumvwinenga.+ 21 Ne aye ukemananga kwi Eleaza ñanga ukamwipuzhizhangako kwi Yehoba kwingijisha Ulimu+ wa kuchibilamo mambo. Bantu bonse bakalondelanga mikambizho yanji, aye ne bena Isalela bonse bo aji nabo ne jibumba jonse.”
22 Onkao mambo, Mosesa waubile monka mwamukambizhizhe Yehoba. Wasendele Yoshua ne kukamwimika kwi Eleaza ñanga ne ku jibumba jonse. 23 Kabiji wamutentekele maboko ne kumutongola kwikala ntangi,+ byonkatu Yehoba byo aambile kupichila mwi Mosesa.+