Kubala

16 Kabiji Kola+ mwana wa kwa Izahala,+ Izahala mwana wa kwa Kohati,+ Kohati mwana wa kwa Levi,+ waumvwañene ne Datanyi ne Abilama baana ba kwa Eliaba,+ ne Onyi mwana wa kwa Pelete, ba mu mukoka wa bena Lubenyi.+ 2 Bamunenenenga Mosesa abo pamo ne banabalume bena Isalela 250, bakulumpe ba jibumba bo basajile mu kipwilo kabiji banabalume bayile nkuwa. 3 Byonkabyo, bakonkene pamo+ ne kutendeka kunena Mosesa ne Alona ne kwibambila’mba: “Twimukimwa! Jibumba jonse jazhila+ kabiji Yehoba uji mukachi kabo.+ Pano mambo ka o mubena kwitumbijikila pa kipwilo kya Yehoba?”

4 Mosesa byo aumvwine kino, wafukamine ne kukinka kilungi panshi. 5 Kepo aambijile Kola ne bonse bamutundaikilenga amba: “Kesha lukelo, Yehoba ukamwesha patoka uji ku lubaji lwanji,+ wazhila ne wafwainwa kufwenya kwipi kwi aye,+ kabiji muntu yense ye akasala,+ ye ukafwenya kwipi kwi aye. 6 Uba bino: Obewa Kola ne bonse babena kukutundaika,+ mukashikule bya kwapwilamo mujilo,+ 7 kabiji kesha mukabikemo mujilo ne bya kufutumuna kwi Yehoba. Kabiji muntu Yehoba ye akasala+ ye wazhila. Anweba baana ba kwa Levi+ mwakizhamotu!”

8 Kepo Mosesa aambijile Kola amba: “Akyumvwai anweba baana ba kwa Levi. 9 Nanchi kyo kintu kicheche kyauba Lesa wa Isalela kya kwimusala mu jibumba ja bena Isalela+ ne kwimuswisha kufwenya kwipi ne aye, kuba’mba mwingile mwingilo wa Yehoba ku tente wa lusambakeno ne kwimana kulutwe ya jibumba na kwibengijila,+ 10 ne kukuleta kwipi ne aye, pamo na balongo bobe bonse, baana ba kwa Levi nyi? Abya mubena kukeba ne buñanga nyi?+ 11 Na mambo a kino, obewa ne bonse babena kukutundaika bakonkana pamo, mwasatukila Yehoba. Nanchi Alona ye ñanyi pa kuba’mba mumunyinyitenga?”+

12 Kabiji Mosesa watumine wa kuya na kwita Datanyi ne Abilama+ baana ba kwa Eliaba, bino abo baambile’mba: “Kechi twiyeko ne! 13 Nanchi kyo kintu kicheche byo witufumya mu kyalo kyavula mukaka ne buki ne kwitwipayila muno mu kiselebwa nyi?+ Abya ubena kukeba ne kwialula kwikala ke mfumu wetu nyi?* 14 Kechi wituleta mu kyalo kyavula mukaka ne buki+ nangwa kwitupa majimi a buswanyi nangwa majimi a miñanzañanza ne. Nanchi ubena kukeba kusaba meso a bobo bantu nyi? Kechi twiyeko ne!”

15 Onkao mambo, Mosesa wazhingijile bingi ne kwambila Yehoba amba: “Kange mutambule mulambo wabo wa kajo ne. Kechi naangatapo mbongolo nangwa umo kwi abo ne, kabiji kechi nakozhapo muntu nangwa umo mwi abo ne.”+

16 Kepo Mosesa aambijile Kola amba: “Kesha, obewa ne bonse babena kukutundaika mukemane kwi Yehoba, obewa, abo ne Alona. 17 Muntu yense akasende kya kwapwilamo mujilo kyanji ne kubikamo bya kufutumuna, ne muntu yense akalete kwi Yehoba kya kwapwilamo mujilo kyanji, bya kwapwilamo mujilo 250, obewa ne Alona, kabiji muntu yense akasende kya kwapwilamo mujilo kyanji.” 18 Byonkabyo, bonse pa muntu pa muntu bashikwile bya kwapwilamo mujilo byabo ne kubikamo mujilo ne bya kufutumuna, kabiji baimene ku kibelo kya tente wa lusambakeno pamo ne Mosesa ne Alona. 19 Kola byo akonkenye ku kibelo kya tente wa lusambakeno bonse bamutundaikilenga+ mu kusatukila Mosesa ne Alona, lukumo lwa Yehoba lwamwekele ku jibumba jonse.+

20 Kabiji Yehoba waambijile Mosesa ne Alona amba: 21 “Fumaiko ku jino jibumba, nebavizhe pa kimye kimotu.”+ 22 Ponkapo baponene panshi kinkuvumene ne kwamba’mba: “Anweba Lesa, Lesa upana mupashi ku bantu*+ bonse, nanchi mambo a muntu umo o asakwimulengela kuzhingijila jibumba jonse nyi?”+

23 Kepo Yehoba aambijile Mosesa amba: 24 “Buula jibumba amba, ‘Fumaiko ku matente a kwa Kola, Datanyi ne Abilama!’”+

25 Kepo Mosesa aimene ne kuya kwi Datanyi ne Abilama ne bakulumpe+ ba bena Isalela bamulondejile. 26 Mosesa wabuujile jibumba amba: “Nemusashijila namba, fumaiko ku matente a bano bantu babi kabiji kange mukwateko ku kintu kyabo nangwa kimo ne, pa kuba’mba mubule kufwa na mambo a bubi bwabo bonse.” 27 Ponkapo bafumineko ku matente a kwa Kola, Datanyi ne Abilama, kabiji Datanyi ne Abilama balupukile ne kwimana ku bibelo bya matente abo pamo na bakazhi babo, baana ne baana babo babacheche.

28 Kepo Mosesa aambile’mba: “Akino kyo kyo musakuyukilako amba Yehoba ye wantuma kuba bino bintu byonse ne kuba’mba kechi neubila bintu byakeba muchima* wami ne: 29 Umvwe bano bantu bafwe byonkatu bifwa bantu bonse, kabiji umvwe bebakambule byonkatu byo bakambula bantu bonse, ko kuba’mba Yehoba kechi ye wantuma ne.+ 30 Pakuba umvwe Yehoba obe kintu kikyangye kumwekapo kala kwi abo, ne mushiji asame* ne kwibamina ne bintu byabo byonse ne abo baye mu Kilende* saka baji bomi, po po musakuyuka’mba bano bantu balengulula Yehoba.”

31 Byo apwishishetu kwamba bino byambo, mushiji walajikile ponka po baimenejile.+ 32 Kabiji mushiji waasamine* ne kwibamiina pamo na ba mu mazubo abo ne bantu ba kwa Kola+ pamo na bintu byabo byonse. 33 Byonkabyo, abo ne bonse bo bajinga nabo batwelele mu Kilende* saka baji bomi ne mushiji wasumankene peulu yabo, kya kuba baonaikile mukachi ka kipwilo.+ 34 Bena Isalela bonse bebazhokolokele banyemene byo baumvwine miteto yabo, mambo baambile’mba: “Twachina kuba’mba mushiji waketumina ne atweba!” 35 Ponkapo mujilo wafumine kwi Yehoba+ ne kusoka banabalume 250 basokelenga bya kufutumuna.+

36 Kepo Yehoba aambijile Mosesa amba: 37 “Buula Eleaza mwana wa kwa Alona ñanga amba, ashikule bya kwapwilamo mujilo+ biji pa mujilo mambo byazhila. Kabiji umubuule’mba apalañenye mujilo palepako. 38 Bya kwapwilamo mujilo bya banabalume bafwa na mambo a kulenga mambo,* ebibunde nobe tumalata twapapakana kuba’mba aketulamike pa kya kusokelapo bitapisho+ mambo bebiletele kwi Yehoba, kabiji byaikele ke byazhila. Bikekale ke kayukilo ku bena Isalela.”+ 39 Onkao mambo, Eleaza ñanga washikwile bya kwapwilamo mujilo bya mukuba byaletele bantu bo basokele, kabiji bebibunjile kuba’mba bebilamike ku kya kusokelapo bitapisho, 40 byonkatu Yehoba byo amwambijile kupichila mwi Mosesa. Abino byajinga bya kuvululamo bena Isalela amba kafwako muntu nangwa umo ye babula kuswisha* wabula wa mu baana ba kwa Alona wafwainwa kwiya kwipi ne kusoka bya kufutumuna kwi Yehoba+ ne, ne kuba’mba kukabule kwikala muntu uji byonka byajinga Kola ne bantu bamutundaikilenga.+

41 Pa juba jalondejilepo, jibumba jonse ja bena Isalela jatendekele kunyinyita Mosesa ne Alona+ ne kwibambila’mba: “Anweba babiji mwaipaya bantu ba Yehoba.” 42 Jibumba byo jakonkene pamo na kunena Mosesa ne Alona, baalulukile ne kutala kwajinga tente wa lusambakeno, kabiji jikumbi javwetele pa tente ne lukumo lwa Yehoba lwamwekele.+

43 Mosesa ne Alona bayile kulutwe ya tente wa lusambakeno,+ 44 kabiji Yehoba waambijile Mosesa amba: 45 “Anweba, fumaimo mu jino jibumba, nsaka nebepaye pa kimye kimotu.”+ Ponkapo baponene panshi kinkuvumene.+ 46 Kepo Mosesa aambijile Alona amba: “Shikulai kya kwapwilamo mujilo mubikemo mujilo uji pa kya kusokelapo bitapisho+ ne bya kufutumuna muye bukiji ku jibumba ne kwijifuchilako mambo,+ mambo Yehoba wazhingila. Kabiji kinkunka kyatendeka kala!” 47 Ponkapo Alona wikisendele byonkatu byaambile Mosesa, ne kunyemena mu bantu, wataaine kinkunka kyatatula kala kwipaya bantu. Onkao mambo, wabikile bya kufutumuna pa kya kwapwilamo mujilo ne kufuchilako bantu mambo. 48 Waubiletu monka aimena pakachi ka bantu bafwa ne bomi kufikatu ne kinkunka byo kyapwile. 49 Bantu bafwile ku kinkunka bafikile 14,700 kufumyako bantu bafwile na mambo a kwa Kola. 50 Kinkunka byo kyalekele, Alona wabwelele kwi Mosesa ku kibelo kya tente wa lusambakeno.