Ntendekelo

47 Onkao mambo, Yosefwa wayile na kubuula Felo+ amba: “Batata ne balongo bami, mikooko yabo ne bañombe babo ne bintu byabo byonse, baiya kufuma ku kyalo kya Kenana kabiji baji mu Goshenyi.”+ 2 Wasendelepo balongo banji batanu ne kwibatwala kwi Felo.+

3 Kabiji Felo washikishe balongo ba kwa Yosefwa amba: “Mwingila ñanyi mwingilo?” Abo bamukumbwile’mba: “Atweba bakalume benu twi bakafunga ba mikooko, byonka byajinga bashakulu betu.”+ 4 Kepo bamwambijile Felo amba: “Twaiya kwikala bwenyi mu kino kyalo,+ mambo mu Kenana kafwamo munyemvu wa kujiisha matanga etu atweba bakalume benu, mambo kipowe kya nzala kyabaya bingi.+ Mwane tuswishai atweba bakalume benu twikalenga mu Goshenyi.”+ 5 Kepo Felo aambijile Yosefwa amba: “Bashobe ne balongo bobe baiya kwi obewa. 6 Kyalo kya Ijipita kiji mu maboko obe. Leka bashobe ne balongo bobe bekalenga mu mpunzha yawamisha.+ Bekalenga mu Goshenyi, kabiji umvwe wayukapo banabalume bamo mwi abo bafikilamo, wibatongole bekale bakulama bilelwa byami.”

7 Kabiji Yosefwa waletele Yakoba shanji ne kumufikizha kwi Felo, kabiji Yakoba wapesheshe Felo. 8 Felo washikishe Yakoba amba: “Muji na myaka inga?” 9 Yakoba wakumbwile Felo amba: “Myaka ya kupitañana* kwami ke 130. Myaka ya bumi bwami yakepa kabiji yo myaka ya malwa,+ kabiji kechi yaesakana na myaka ya bwikalo bwa bashakulu bami yo bapitañananga* ne.”+ 10 Byo apwishishe kwamba bino, Yakoba wapesheshe Felo ne kufumako kwi aye.

11 Onkao mambo, Yosefwa walamine bashanji ne balongo banji ne kwibapa mpunzha mu kyalo kya Ijipita, mpunzha yawamisha, mu mpunzha ya Lamasesa,+ monka mwamukambizhizhe Felo. 12 Kabiji Yosefwa wibapelenga bashanji kajo,* balongo banji ne bonse bajinga mu nzubo ya bashanji monka mwayijile kuvula kwa baana babo.

13 Kabiji kajo* kapwile monse mu kyalo mambo kipowe kya nzala kyabayile bingi, kabiji bantu ba mu kyalo kya Ijipita ne ba mu kyalo kya Kenana bapelejilwe na mambo a kipowe kya nzala.+ 14 Yosefwa watambwilenga mali onse ajinga mu kyalo kya Ijipita ne mu kyalo kya Kenana bantu o bapotelengamo kajo,+ kabiji Yosefwa waletelenga ano mali mu nzubo ya kwa Felo. 15 Mu kuya kwa moba, mali a mu kyalo kya Ijipita ne a mu kyalo kya Kenana apwile, kabiji bena Ijipita batatwile kwambila Yosefwa amba: “Tupai kajo! Mambo ka o twafwainwa kufwila ku meso enu? Mambo mali etu apwa.” 16 Kepo Yosefwa ebambijile’mba: “Umvwe mali enu apwa, panainga banyama benu ne amiwa nsakwimupanga kajo, kupimpuzhanya na banyama benu.” 17 Onkao mambo, batatwile kuleta banyama babo kwi Yosefwa, kabiji Yosefwa wibapelenga kajo kupimpuzhanya na bambili, mikooko, bañombe ne bambongolo, ne aye wibapelenga kajo kupimpuzhanya na bilelwa byabo byonse mu yewa mwaka.

18 Awa mwaka byo apwile, bantu baishile kwi aye mu mwaka mukwabo ne kwamba’mba: “Kechi tusakwimufya ne, anweba nkambo yetu, mali ne banyama betu ba kulela byonse twibipana kala kwi anweba. Kafwako kyo twashala nakyo kya kwimupa anweba nkambo ne, kanatu mibiji yetu ne mushiji wetu kwapwa. 19 Mambo ka o twafwainwa kufwila ku meso enu, atweba saka tuji na mushiji wetu? Tupotai, atweba ne mushiji wetu kuba’mba tupimpuzhanye na kajo, kabiji atweba pamo na mushiji wetu tukekala bazha ba kwa Felo. Tupai nkunwa kuba’mba twikale bomi ne kubula kufwa pa kuba’mba mushiji akabule kushalatu ke masala.” 20 Onkao mambo, Yosefwa wapotejile Felo mushiji yense, mambo bena Ijipita bonse bapoteshe majimi abo, mambo kipowe kya nzala kyabayile bingi; kabiji mushiji waikele ke wa kwa Felo.

21 Kabiji bantu bajinga monse mwapelele kyalo kya Ijipita wibavilwijile mu mizhi yajinga kipikipi.+ 22 Bino mushiji wa bañanga kechi wamupotele ne,+ mambo kajo ka bañanga kafumanga kwi Felo, kabiji bajanga kajo ko bebapanga kwi Felo. O ene mambo o babujile kupotesha mushiji wabo. 23 Kepo Yosefwa aambijile bantu amba: “Umvwai, amiwa lelo jino namupotela Felo anweba ne mushiji wenu pamo. Nkunwa yenuye, mwafwainwa kwiibyala mu majimi enu. 24 Umvwe yapanga, mukamupe Felo kipimo kimo kya mu bipimo bitanu,+ pakuba bipimo bina bikekale byenu bya nkunwa ne kajo kenu anweba, ba mu mazubo enu ne baana benu.” 25 Onkao mambo, abo baambile’mba: “Mwapulusha myeo yetu.+ Tubilainga bibusa anweba nkambo yetu, ne atweba tukekala bazha ba kwa Felo.”+ 26 Kepo Yosefwa alengele muzhilo, ye ujiko ne lelo jino mu kyalo kyonse kya Ijipita, wa kuba’mba kipimo kimo kya mu bipimo bitanu, kyo kya kwa Felo. Mushiji wa bañanga ye yenkatu wabujile kwikala wa kwa Felo.+

27 Kabiji bena Isalela baikelenga mu kyalo kya Ijipita monka mu Goshenyi,+ kabiji baikele monka ne kusemununa kabiji bavujile bingi.+ 28 Ne Yakoba waikele mu kyalo kya Ijipita myaka 17, kabiji myaka ya bumi bwa kwa Yakoba yafikile 147.+

29 Juba ja kufwa Isalela byo jafwenyenye pepi,+ waichile mwananji aye Yosefwa ne kumwambila’mba: “Umvwe kya kuba wangubila lusa ne kummwesha butemwe bubula kwaluka ne bukishinka, biika kuboko kobe munshi ya jimbwata jami. Nakusashijilapo, kange ukanzhiike mu Ijipita ne.+ 30 Umvwe nkafwe,* wafwainwa kumfumyamo muno mu Ijipita ne kukanzhiika mu kilende kya bashakulu bami.”+ Byonkabyo, Yosefwa waambile’mba: “Nkobila monka mo mwaambila.” 31 Kepo Yakoba aambile’mba: “Chipa kwi amiwa.” Ne aye wachipile kwi shanji.+ Ponkapo Isalela washakamijile ku mitwe ya mwanya wanji.+