Mika
1 Mu moba a kwa Yotamo,+ Ahaza+ ne Hezekiya,+ bamfumu ba mu Yuda,+ Yehoba waambijile Mika*+ mwina Molesheta mu kimwesho kyo amwene pa mambo a Samaliya ne Yelusalema amba:
2 “Umvwai, anweba bantu bonse!
Teshaiko muchima anweba ntanda ne byonse bijimo,
Kabiji Nkambo Mfumu Yehoba ekale kamonyi wa kwimushinawina+
—Yehoba uji mu nzubo yanji yazhila.
3 Mambo umvwa! Yehoba ubena kulupuka mu mpunzha yanji;
Ukekila ne kunyantaula pa mapunzha atuntama a pano pa ntanda.
4 Mitumba ikasunguluka munshi ya maulu anji;+
Kabiji bimpachiko* bikabana
Byonkatu byuba bupula ku mujilo,
Ne mema byo apomokela ku mukolo.
5 Bino byonse bikamweka na mambo a mizhilulwila ya kwa Yakoba,
Na mambo a bubi bwa ba mu nzubo ya Isalela.+
Mizhilulwila ya kwa Yakoba yo yepi?
Nanchi kechi Samaliya nenyi?+
Kabiji mapunzha atuntama a Yuda o epi?+
Nanchi kechi Yelusalema nenyi?
6 Nkalula Samaliya ke mulumba wa bikulukulu bya mungye,
Mpunzha mwa kujima miñanzañanza;
Nkalumwina* mabwe anji mu kimpachiko,
Kabiji bitendekesho byanji nkebisha patoka.
7 Bipashañano byanji bya kusonga bakebilalaulatu byonse,+
Kabiji bya bupe* byanji byonse byo aingijile bakebisoka mu mujilo.+
Nkonauna bankishi banji bonse.
Mambo wibanonkele mu bupite,
Kabiji bakekala jikwabo mfweto ya bapite.”
Kujila kwami kukekala nobe kwa balubwala,
Ne mabingo ami nobe mabingo a baosetelechi.
Kinkunka kyakumbana kukafika ne ku kibelo kya balongo bami, konka ku Yelusalema.+
10 “Kange mubijike kino mu Gata ne;
Kabiji kechi mwafwainwa kujila ne.
Alañanai mu lukungu mu Bete-afula.*
11 Anweba bangikazhi* ba mu Shafila abukai saka muji mulekese kabiji saka mwaumvwa bumvu.
Bangikazhi* ba mu Zanana kechi balupukamo ne.
Mukekala mabingo mu Betezela, kabiji ukaleka kwimukwasha.
12 Mambo bangikazhi* ba mu Malota bapembelela kumona byawama,
Pano bino, bintu byatama byafuma kwi Yehoba ne kwiya ku kibelo kya Yelusalema.
13 Anweba bangikazhi* ba mu Lakishi,+ kashilai kalaki ku bipanyi bya bambili.
Yenu mwajinga ntendekelo ya bubi bwa mwana wa mukazhi Ziona,
Mambo mwi anweba mwatainwe mizhilulwila ya bena Isalela.+
14 Onkao mambo, mukapana bupe bwa kwishajikapo kwi Molesheta-gata.
Mazubo a kwa Akizibu+ ajimbaikile bamfumu ba Isalela.
15 Anweba bangikazhi* ba mu Malesha,+ nkemuletela wa kwimushinda.+
Lukumo lwa Isalela lukafika ne ku Adulama.+
16 Itendai bipepule ne kutenda nsuki na mambo a baana benu bo mwatemwa.
Itendai bipepule nobe mpungu,
Mambo bebafumya kwi anweba ne kwibatwala mu buzha.”+