Buku Mutanshi wa Bamfumu
17 Kabiji Elaija*+ mwina Tishibe, ngikazhi wa mu Gileada,+ waambijile Ahaba amba: “Byonkatu Yehoba Lesa wa Isalela byo aji na bumi, yenka ye ñingijila,* mu iye myaka kechi kukekalapo kime nangwa mvula ne, posotu na byambo byami!”+
2 Byambo bya Yehoba byaishile kwi aye amba: 3 “Fumako kuno, uye ku musela ukafyame ku Kimpachiko kya Kelita,* ku musela wa Yodano. 4 Ukatomenga mema mu kakola, kabiji nkatumanga bikwangala bikakuletelanga kajo konkakwa.”+ 5 Ponkapo wayile ne kuba monka mwamwambijile Yehoba; wayile ne kukekala ku Kimpachiko kya Kelita,* ku musela wa Yodano. 6 Kabiji bikwangala byamuletelanga shinkwa ne nyama lukelo, ne shinkwa ne nyama mabanga, kabiji watomenenga mema mu kakola.+ 7 Bino pakupitapo moba, kakola kaumine,+ mambo mu kyalo kechi mwanokelepo mvula ne.
8 Kepo Yehoba amwambijile’mba: 9 “Imana uye ku Zalefwata, wa ku Shidona, ukekale konkakwa. Umvwa! Nkakambizha mwanamukazhi wafwilwa kukupa kajo konkakwa.”+ 10 Onkao mambo, waimene ne kuya ku Zalefwata. Byo afikile ku kibelo kya muzhi, wataaineko mwanamukazhi wafwilwa saka atolaula nsala. Wamubijikile’mba: “Mwane ndetelaipo tumema mu kapu ntome.”+ 11 Byo ayilenga na kuleta mema, wamubijikile’mba: “Mwane mundetelepo ne kashinkwa mu kuboko kwenu.” 12 Kepo mwanamukazhi aambile’mba: “Byonkatu Yehoba Lesa wenu byo aji na bumi, shinkwa mfwaye, njitu na mukono umo wa fulaulo mu mulondo mukatampe ne tumanyi tucheche mu kamulondo kacheche.+ Mbena kutolaula nsala, kabiji byo nsakuya ku nzubo, nsakoshapo shinkwa wami ne wa mwanami wa mulume. Inge tuje, tufwe ne kufwa.”
13 Kepo Elaija amwambijile’mba: “Kange mwakamwe ne. Yainga ku nzubo ne kuba byonka byo mwaamba. Bino patanshi mungoshelepo kashinkwa kanzhingwile kacheche pa bintu byo muji nabyo ne kwikaleta kwi amiwa. Apa bino, moshe shinkwa wenu ne wa mwanenu. 14 Mambo Yehoba Lesa wa Isalela waamba’mba: ‘Fulaulo uji mu mulondo mukatampe kechi ukapwamo ne, ne manyi aji mu kamulondo kacheche kechi akapwamo ne, kufikatu ne juba Yehoba jo akanokesha mvula pa mushiji.’”+ 15 Uno mwanamukazhi wayile ne kuba byamwambijile Elaija, kabiji aye ne Elaija ne ba mu nzubo yanji bajiilenga pa moba avula.+ 16 Fulaulo mu mulondo mukatampe kechi wapwilengamo ne, ne manyi mu kamulondo kacheche kechi apwilengamo ne, monka mwayijile byambo bya Yehoba byo aambile kupichila mwi Elaija.
17 Mu kuya kwa moba, mwana wa mwanamukazhi mwina nzubo wakolelwe kabiji wakolelwe bingi kya kuba ne kufwa wafwile.+ 18 Ponkapo mwanamukazhi waambijile Elaija amba: “Mambo ka o mwangubila* kino, anweba muntu wa Lesa wa kine? Nanchi mwaiya na kumvululamo mambo ami ne kwipaya mwanami nyi?”+ 19 Bino aye wa mwambijile’mba: “Muletai mwanenu.” Ne aye wamutambwile mu maboko a inanji ne kumutwala mu kibamba kya peulu mo aikelenga, ne kumulaajika pa mwanya wanji.+ 20 Wamujijiile Yehoba amba: “Anweba Yehoba Lesa wami,+ nanchi mwaleta bya malwa ne pa uno mwanamukazhi wafwilwa ye mbena kwikala nanji pa kuleka mwananji amba afwe nyi?” 21 Kepo etanyikijile bimye bisatu pa mwana ne kumujijila Yehoba amba: “Anweba Yehoba Lesa wami, nemusashijila, bumi* bwa uno mwana bubwele mwi aye.” 22 Yehoba waumvwine misashijilo ya kwa Elaija,+ ne bumi* bwa mwana bwabwelele mwi aye, kabiji wasangukile.*+ 23 Ponkapo Elaija washikwile mwana ne kumwikizha kufuma mu kibamba kya peulu ne kumuleta mu nzubo ne kumupana kwi inanji; kabiji Elaija wamwambijile’mba: “Talai, mwanenu we ke mumi.”+ 24 Ponkapo uno mwanamukazhi waambijile Elaija amba: “Pano po nayuka namba kine mwi muntu wa Lesa,+ ne kuba’mba byambo bya Yehoba bifuma mu kanwa kenu bya kine.”