Buku Mutanshi wa Bamfumu
3 Solomone wajinga muko wa kwa Felo mfumu wa Ijipita. Wasongwele* mwana wa kwa Felo+ kabiji wamuletele mu Muzhi wa Davida+ kufikatu ne byo apwishishe kushimika nzubo yanji mwine,+ ne nzubo ya Yehoba+ ne nsakwa yazhokolokele Yelusalema.+ 2 Bino bantu batwajijile kutapisha pa mapunzha atuntama,+ mambo kufikatu ne kyokya kimye nzubo ya kutumbijikilamo jizhina ja Yehoba kechi bakiishimikile ne.+ 3 Solomone watwajijile kutemwa Yehoba kupichila mu kulama malamuna a shanji aye Davida, pano bino watapishanga ne kusoka milambo pa mapunzha atuntama.+
4 Mfumu wayile ku Gibeona na kutapisha, mambo yo yajinga mpunzha yatuntama yayile bingi nkuwa.*+ Solomone watapishe banyama 1,000 ba bitapisho bya kusoka pa kyokya kya kusokelapo bitapisho.+ 5 Monka mu Gibeona Yehoba wamwekele kwi Solomone mu kiloto bufuku, kabiji Lesa wamwambijile’mba: “Ndombe kintu kyo ukeba’mba nkupe.”+ 6 Ponkapo Solomone waambile’mba: “Anweba mwamwesha batata ba Davida bakalume benu butemwe bukatampe bubula kwaluka, byo baendelenga nenu mu bukishinka ne mu bololoke ne mu koloka kwa muchima wabo. Kabiji mwatwajijila kwibamwesha buno butemwe bukatampe bubula kwaluka kufikatu ne lelo jino byo mwibapele mwana waikala pa jitanda jabo.+ 7 Anweba Yehoba Lesa wami, mwandengela amiwa kalume wenu kwikala ke mfumu ne kuswana batata ba Davida, nangwa kya kuba nemwanyiketu* kabiji kechi nayukisha bintu ne.+ 8 Amiwa kalume wenu mbena kulama bantu benu bo mwasala,+ bantu bavula bingi ba kukankalwa kubala. 9 Onkao mambo, amiwa kalume wenu mpai muchima wa lukookelo kuba’mba nchibilenga mambo bantu benu,+ ne kuyuka kyawama ne kyatama,+ mambo ñanyi wakonsha kuchibila mambo bano bantu benu bavula* bibye?”
10 Kino kintu Solomone kyo alombele kyamutokeshe bingi Yehoba ku muchima.+ 11 Kepo Lesa amwambijile’mba: “Na mambo a kuba walomba kino kintu kabiji kechi waji kulomba’mba wikale myaka* yavula nangwa na bunonshi nangwa’mba balwanyi bobe bafwe* ne, bino walomba milangwe ya kuyuka mwa kuchibila mambo,+ 12 nsakukupa kyo walomba.+ Nsakukupa muchima wa maana kabiji wa milangwe,+ kya kuba byonkatu byo kwabujile kwikalapo kala muntu mukwabo uji nobe obewa ne, kechi kukekalapo muntu mukwabo ukesakana ne obewa ne.+ 13 Kabiji bintu byo wabula kulomba nsakukupabyo,+ bunonshi ne lukumo,+ kya kuba kechi kukekalapo mfumu mukwabo ukesakana ne obewa mu bwikalo* bobe bonse ne.+ 14 Kabiji inge ukendenga mu mashinda ami kupichila mu kulama malamuna ami ne mikambizho yami, byonka byaendelenga shobe Davida,+ nkavuzha ne moba a bumi bobe.”*+
15 Solomone byo apapukile mu tulo, wayukile’mba kyajinga kiloto. Kepo ayile ku Yelusalema ne kwimana ku jikwachi ja lulayañano lwa Yehoba ne kutapisha bitapisho bya kusoka ne milambo ya mutende,+ kabiji bakalume banji bonse wibatekejile kijiilo.
16 Pa kyokya kimye bapite babiji baishile kwi mfumu ne kwimana kwi aye. 17 Mwanamukazhi mutanshi waambile’mba: “Mwane anweba nkambo, amiwa ne uno mwanamukazhi twikala nzubo imo, kabiji nasemene mwana ne aye saka aji monka mu nzubo. 18 Pa juba ja busatu kufuma po nasemejile, uno mwanamukazhi naye wasemene mwana. Twajingatu bunke bwetu, bubiji bwetutu; mu nzubo kechi mwajingapo muntu mukwabo ne. 19 Bufuku, mwana wa uno mwanamukazhi wafwile, mambo wamushachile. 20 Onkao mambo, wabuukile pakachi ka bufuku ne kushikula mwanami ne kumubukata mu kyaji kyanji, amiwa muzha wenu wa mukazhi saka nalaala, kabiji washikwile mwananji wafwa ne kumubika mu kyaji kyami. 21 Byo nabuukile lukelo namba namwamushe mwanami, nataaine’mba wafwa. Onkao mambo, lukelo byo namutajiletajile, namwene’mba kechi ye mwanami ye nasemene ne.” 22 Bino mwanamukazhi mukwabo waambile’mba: “Ine, uno mwana mumi ye wami, pakuba awa wafwa ye wobe!” Bino mwanamukazhi mutanshi waambile’mba: “Ine, awa wafwa ye mwanobe, pakuba mumi ye wami.” Abino byo byo batobokelenga ku meso a mfumu.
23 Kepo mfumu aambile’mba: “Awe ubena kwamba’mba, ‘Uno mumi ye mwanami, pakuba awa wafwa ye mwanobe!’ kabiji mukwabo naye ubena kwamba’mba, ‘Ine, awa wafwa ye mwanobe, pakuba mumi ye wami!’” 24 Mfumu waambile’mba: “Ndetelai mpoko.” Byonkabyo, mfumu bamuletejile mpoko. 25 Kepo mfumu aambile’mba: “Mwana mumi mumwabanye pakachi, mutamba umo mupe mwanamukazhi umo ne mutamba mukwabo mupe mwanamukazhi mukwabo.” 26 Ponkapo mwanamukazhi mwina yewa mwana mumi wamusashijile mfumu, mambo wamubijile bingi lusa mwananji. Waambile’mba: “Nemusashijila anweba nkambo! Mupai mukwetu uno mwana mumi! Kange mumwipaye ne!” Pakuba awa mwanamukazhi mukwabo waambilenga’mba: “Uno mwana kechi usakwikala wami nangwa wobe ne! Lekai bamwabanye pakachi!” 27 Ponkapo mfumu waambile’mba: “Panai uno mwana mumi ku mwanamukazhi mutanshi! Kange mumwipaye ne, mambo awe ye inanji.”
28 Onkao mambo, bena Isalela bonse baumvwine mfumu mo achibijile ano mambo, kabiji bamukuminye* bingi mfumu,+ mambo bamwene’mba maana a Lesa a kuchibila mambo monka mo aolokela ajinga mwi aye.+