Kubala

18 Yehoba waambijile Alona amba: “Obewa, baana bobe ba balume ne kikota kyobe, yenu mukatwikwa mambo a ku nzubo yazhila,+ kabiji obewa ne baana bobe yenu mukatwikwa bubi bwa buñanga bwenu.+ 2 Kabiji ulete kwipi balongo bobe ba mu mukoka wa bena Levi, mukoka wa mushakulu wobe kuba’mba bakengijilenga pamo ne obewa+ ne baana bobe ku tente wa Jikwachi ja Lushimuno.+ 3 Abo bakakwingijilanga ne kwingila mingilo ya ku tente yonse.+ Nangwa byonkabyo, kechi bafwainwa kufwenya kwipi na bipe bya pa mpunzha yazhila ne ku kya kusokelapo bitapisho ne, pa kuba’mba abo ne obewa mukabule kufwa.+ 4 Bakengijilanga pamo ne obewa mingilo ya ku tente wa lusambakeno ne mingilo yonse ya ku tente, kabiji muntu ye babula kuswisha* kechi wafwainwa kufwenya kwipi ne anweba ne.+ 5 Mukengilenga mingilo yenu ya pa mpunzha yazhila+ ne ya ku kya kusokelapo bitapisho+ pa kuba’mba bena Isalela nkabule kwibabuukila bukaji+ jibiji. 6 Amiwa nasala bena Levi balongo bobe kufuma mu bena Isalela kwikala bupe bwenu.+ Bebapana kwi Yehoba kuba’mba bengilenga mingilo ya ku tente wa lusambakeno.+ 7 Obewa ne baana bobe pamo yenu mukengilanga mingilo ya buñanga ku kya kusokelapo bitapisho ne mingilo ya mukachi ka kipembe,+ kabiji yenu mukengilanga uno mwingilo.+ Nemupa mwingilo wa buñanga kwikala bupe bwenu, kabiji muntu ye babula kuswisha* ukeya kwipi bafwainwa kumwipaya.”+

8 Kabiji Yehoba waambijile Alona amba: “Amiwa nakupa mwingilo wa kutala pa bupe bantu bo bapana kwi amiwa.+ Napana kwi obewa ne ku baana bobe bupe bonse bwa bintu byonse byazhila bipana bena Isalela kwikala ke kajo kobe kikupu.+ 9 Abino bikekala byobe byafuma ku milambo yazhijisha ya kusoka pa mujilo: mulambo yense ye bakalambulanga, kubikakotu ne milambo yabo ya kajo+ ne milambo yabo ya bubi+ ne milambo yabo ya mambo+ yo bapana kwi amiwa. Abino ke bintu byazhijisha kwi obewa ne ku baana bobe. 10 Mukebijiilenga mu mpunzha mwazhijisha.+ Baana ba balume bonse bakonsha kujako. Abino bikekala byazhila kwi anweba.+ 11 Abino nabyo ke byobe: bupe bo bapana+ pamo na milambo yonse ya kupepezha+ ya bena Isalela. Nebipana kwi obewa, ku baana bobe ba balume ne ku baana bobe ba bakazhi bo uji nabo kwikala ke kajo kobe kikupu.+ Muntu yense wabula wa muzhilo uji mu nzubo yobe wakonsha kujako.+

12 “Manyi onse awamisha ne binyu byonse byawamisha ne kajo, bya nsomo+ byabo byo bapana kwi Yehoba, nebipana kwi obewa.+ 13 Bipangwa bitanshi kupya bya ku bichi byonse bya mu kyalo kyabo byo bakaleta kwi Yehoba, bikekala byobe.+ Muntu yense wabula wa muzhilo uji mu nzubo yobe wakonsha kujako.

14 “Kintu* kyonse kyo balama kya kwingijisha ku mwingilo wazhila mu Isalela, kikekala kyobe.+

15 “Mubeji wa byonse bipema*+ ye bakaleta kwi Yehoba, nangwa muntu nangwa nyama ukekala ke wobe. Nangwa byonkabyo, mubeji wa muntu ukamukuule,+ ne mubeji wa banyama ba muzhilo ukamukuule.+ 16 Ukamukuule na mali a kukuujilamo kutatwila pa uji na ñondo umo kuya peulu kwesakana na mutengo wa mashekele*+ a siliva atanu mwayila kipimo kya shekele wa pa mpunzha yazhila.* Ko kuba’mba magela* 20. 17 Pakuba mubeji wa ñombe mulume nangwa mubeji wa mukooko mulume nangwa mubeji wa mbuzhi, kechi ukamukuule ne.+ Mambo bazhila. Ukasanse mashi abo pa kya kusokelapo bitapisho+ ne mafuta abo ukeasoke kwikala mulambo wa kusoka pa mujilo wa bwema bwawama* kwi Yehoba.+ 18 Kabiji nyama yabo ikekale ke yobe. Byonkatu biji kakuji ka mulambo wa kupepezha ne kijoma kya kilujo, bikekala ke byobe.+ 19 Bya bupe byonse byazhila bikapananga bena Isalela kwi Yehoba,+ nebipana kwi obewa, ku baana bobe ba balume ne ku baana bobe ba bakazhi bo uji nabo kwikala kajo kobe ka kikupu.+ Luno ke lulayañano lwa mukele* kwi Yehoba, obewa ne baana bobe bo uji nabo.”

20 Yehoba watwajijile kwambila Alona amba: “Mu kyalo kya bena Isalela kechi ukekalamo na buswanyi ne, mukachi kabo kechi ukekalamo na mpunzha ne.+ Mambo amiwa yami kyobe kya kukwabilapo kabiji buswanyi bobe mu bena Isalela.+

21 “Pano napa bena Levi bintu byonse bya bujikumi+ mu Isalela kwikala buswanyi bwabo na mambo a mwingilo ye bengila ku tente wa lusambakeno. 22 Bena Isalela kechi bakeyenga kwipi na tente wa lusambakeno ne, mambo inge bauba kino, bakalenga mambo ne kufwa. 23 Bena Levi bo bakengilanga mingilo ya ku tente wa lusambakeno kabiji bakebatwika mambo abo.+ Ajino ke jilamuna ja myaka kufika ne ku bisemi byenu bya kulutwe kuba’mba bakabule kwikala na bya buswanyi mu bena Isalela.+ 24 Mambo napa bena Levi bupe bupana bena Isalela kwi Yehoba bwa bujikumi kwikala buswanyi bwabo. O ene mambo o naambila namba, ‘Mukachi ka bena Isalela kechi bakekalemo na bya buswanyi ne.’”+

25 Kepo Yehoba aambijile Mosesa amba: 26 “Ubuule bena Levi amba, ‘Mukatambulenga ku bena Isalela bya bujikumi byo nemupa kwikala bya buswanyi byenu byafuma kwi abo.+ Kabiji kufuma ku bino, ne anweba mukatolepo bya bujikumi ne kwibipana kwikala bupe kwi Yehoba.+ 27 Kabiji buno bukekala ke bupe bwenu, uba nobe mwibupana kufuma pa kajo ka pa kipujilo+ nangwa bwafuma mu kya kufiinamo binyu nangwa mu kya kufiinamo manyi. 28 Abino ne anweba byo byo mukapananga bupe kwi Yehoba kufuma mu bya bujikumi byonse byo mukatambula ku bena Isalela. Kabiji kufuma ku byonka bino, mukapanengako bupe kwi Yehoba ne kupa Alona ñanga. 29 Mukapanenga bupe bwapusana pusana kwi Yehoba kufuma mu bya bupe byonse byawamisha byo bakemupanga+ kwikala byazhila.’

30 “Kabiji wafwainwa kwibabuula’mba, ‘Umvwe mwapana bupe bwawamisha, kikekalatu nobe bena Levi bapana bupe bwafuma pa kipujilo nangwa bwafuma mu kya kufiinamo binyu nangwa mu kya kufiinamo manyi. 31 Anweba ne ba mu nzubo yenu mwakonsha kwibijiila pa mpunzha ponse, mambo yo mfweto ya mwingilo wenu wazhila ye mwingila ku tente wa lusambakeno.+ 32 Inge mwapana byawamisha, kechi mukekala na mambo ne. Kabiji kechi mwafwainwa kuzhilulula bintu byazhila bya bena Isalela ne, kuchina’mba mwakafwa.’”+