Yelemiya
4 Yehoba waamba’mba, “Umvwe obewa Isalela wa bwela,
Umvwe wabwela kwi amiwa
Ne kufumya bankishi bobe ba bunya kwi amiwa,
Ko kuba’mba ukaleka kwendauka.+
2 Kabiji inge wachipa amba,
‘Byonkatu Yehoba byo aji na bumi!’ byo amwesha bukine, bunchibamambo bwaoloka ne bololoke,
Ko kuba’mba bisaka bya bantu ukebipesha,
Kabiji biketotelanga mwi aye.”+
3 Mambo Yehoba waambila bena Yuda ne Yelusalema amba:
“Chipulai mushiji ye bakyangye kuchipulapo,
Kabiji kange mubyalenga nkunwa mu miba ne.+
4 Itokeshai anwe bene kwi Yehoba,
Ne kufumya bintu byatama mu michima yenu,+
Anweba bena Yuda ne anweba mwikala mu Yelusalema,
Kuchina’mba bukaji bwami bwakambuka nobe mujilo
Wakukankalwa kuzhimya,
Na mambo a byubilo byenu byatama.”+
5 Sapwilai kino mu Yuda ne kutaya mbila mu Yelusalema.
Bijikai ne kuvumya lusengo mu kyalo kyonse.+
Bijikai na jiwi ja peulu ne kwamba’mba: “Ikonkanyai pamo,
Kabiji twayai tunyemene mu mizhi iji na masakwa akosa.+
6 Imikai kiyukilo* mu Ziona.
Pelawizhai kunyemenamo kange mubande ne,”
Mambo mbena kuleta bya malwa kufuma ku kabeta ka ku buyeke,+ bya malwa bikatampe.
Wafuma ko ekala ne kwiya na konauna kyalo kyenu.
Mizhi yenu bakeyonaunatu pelu, kafwako ukashalamo ne.+
8 Onkao mambo, nyingai kisapi kya majila,+
Jilainga* ne kuwowakana,
Mambo bukaji bwa Yehoba kechi bwafumapo pe atweba ne.
9 Yehoba waamba’mba, “Pa joja juba, muchima wa mfumu ukazumba,*+
Ne muchima* wa babinemanga banji pamo;
Bañanga bakakumya bingi, ne bangauzhi bakakankamanatu.”+
10 Ponkapo naambile namba: “Mama, anweba Nkambo Mfumu Yehoba! Kine anweba mwatwala mungi bano bantu+ ne ba mu Yelusalema pamo, byo mwaamba’mba, ‘Mukekala mu mutende,’+ bino mpoko saka iji pa mijibu yetu.”*
11 Pa kyokya kimye, mukambila bano bantu ne ba mu Yelusalema amba:
“Mwela wa kyuya ufumina ku mitumba yabulapo bintu ya mu kiselebwa
Ukasenda mwana wa mukazhi wa* balongo bami;
Kechi ukeya na kululula nangwa kutokesha kajo ne.
12 Yami ntuma mwela upuupa na bulume.
Pano amiwa nkamba byambo bya kwibazhachisha.
13 Umvwai! Mulwanyi ukeya nobe mvula wafinda,
Ne makalaki anji aji nobe kanzhimbiji.+
Bambili banji banyema bingi kukila bampungu.+
Malwa etu mambo betonauna!
14 Obewa Yelusalema, fumya bubi buji mu muchima wobe pa kuba’mba upuluke.+
Nanchi obewa ukatwajijilatu kukakachila ku bintu byatama nyi?
15 Mambo kuji ubena kwamba kufuma ku Danyi,+
Kabiji ubena kutaya mbila ya bya malwa kufuma ku mitumba ya Efelaimu.
16 Byambe ku bisaka bya bantu;
Mubuulai Yelusalema.”
“Bakasopa* babena kwiya kufuma ku kyalo kya kwalepa,
Kabiji bakamba na mawi abo a peulu bintu bikamwekela mizhi ya Yuda.
17 Yehoba waamba’mba, “Bakamulukukila konse konse nobe bakasopa balama majimi,+
Mambo aye wansatukila.”+
18 “Bintu byo muba ne byubilo byenu bikemubwelela.+
Bya malwa bikatampe bikemufikila,
Mambo bunsatuki bwenu bwafika ne ku michima yenu!”
19 Mama nafwa,* mama nafwa!
Muchima* wami ubena kukola bingi.
Muchima wami ubena kukulunkunta bingi.
20 Babena kwambatu pa bya malwa byonkatu,
Mambo kyalo kyonse bekyonauna.
Matente ami beonaunatu nobe mu kukopa kwa jiso.
Kabiji mu kimyetu kicheche, bipembe bya ku tente wami nabyo bebyonauna.+
22 Mambo bantu bami bakosama;+
Kechi bangyuka ne.
Bo baana bakosama babula kuyuka bintu.
Abo bajimukatu* mu kuba bintu byatama,
Bino kechi bayuka kuba byawama ne.
23 Natajile mu kyalo, kechi mwashajilepotu kintu nangwa kimo ne, kabiji kyashalatu masala.+
Natajile bya mwiulu, kabiji kechi byapainenga kyeya ne.+
24 Namwene mitumba saka itenkena,
Ne tutumbatumba saka tujikima.+
25 Byo nakenkentele, kechi namwenepo muntu nangwa umo ne,
Kabiji bañonyi bonse bazhimañene.+
26 Byo natajilenga, namwene bujimi bwa bipangwa saka bwaaluka ke jisaka,
Ne mizhi yonse yajingamo beikundwile.+
Yehoba ye waubile kino,
Na mambo a bukaji bwanji bukatampe.
27 Mambo Yehoba waamba’mba: “Kyalo kyonse kikashalatu masala,+
Bino amiwa kechi nkekyonaunatu pelu kyonse ne.
Kikamweka mambo yami naamba kabiji yami nafuukula,
Kabiji kechi nkabwezhamo muchima* nangwa kubula kwikyuba ne.+
29 Na mambo a mituutu ya bantu benda pa bambili ne kyungwe kya baji na mata a mukanda,
Ba mu mizhi bonse banyemenemo.+
Ne kukafyama mwavimba,
Kabiji bakanjijile pa mabwe.+
Mu mizhi yonse bantu banyemenemo,
Kya kuba kafwako muntu nangwa umo washajilemo ne.”
30 Pano ñanyi kintu kyo usakuba byo bakonauna?
Obewa wavwajilenga bivwalo bichila,
Ne kwikobaika bya ngolode,
Kabiji wishingilenga bifiita* mu meso obe.
Pano bino, wiwamishengatu kyatu,+
Mambo bakambwe bobe bakwalukamo;
31 Mambo amiwa naumvwa kubinza nobe kwa mwanamukazhi wakolwa,
Naumvwa bya malwa nabiji byobya bikalapo na mwanamukazhi ubena kusema mwana wa bubeji,
Kukoloma kwa mwana wa mukazhi Ziona ubena kukankalwa kupema bulongo.
Aye watanyika maboko anji ne kwamba’mba:+
“Malwa o ami, mambo amiwa nakooka* na mambo a bambanzhi!”