Kubala
5 Yehoba watwajijile kwambila Mosesa amba: 2 “Ukambizhe bena Isalela kufumyamo mu kampu muntu yense uji na mbumba+ ne muntu yense uji na kikola kya kusuuma,+ ne yense waikala wa muzhilo na mambo a kukwata pa mubiji wa muntu* wafwa.+ 3 Mwafwainwa kufumyamo mwanamulume nangwa mwanamukazhi. Wibalupwile pangye ya kampu, pa kuba’mba babule kuzhilulula+ makampu a bantu bo mbena kwikala nabo.”+ 4 Onkao mambo, bena Isalela baubile byonkabyo ne kwibalupwila pangye ya kampu. Bena Isalela baubile byonkatu Yehoba byo abuujile Mosesa.
5 Yehoba watwajijile kwambila Mosesa amba: 6 “Buula bena Isalela amba, ‘Umvwe mwanamulume nangwa mwanamukazhi walenga mambo ne kubula kwikala wa kishinka kwi Yehoba, awo muntu* ukafwa na mambo.+ 7 Awo* muntu wafwainwa kusolola+ mambo o* alengele kabiji akafute mali onse ne kunungapo jimo pa atanu, jimo pa atanu;+ akeapane ku muntu ye alengeleko mambo. 8 Pakuba umvwe muntu ye balengele mambo kechi uji na mulongo wa kutambula mali o bamufuta ne, bafwainwa kwiabwezha kwi Yehoba kabiji akekala ke a kwa ñanga, kufumyakotu mukooko mulume wa kumufuchilako mambo.+
9 “‘Bupe bwazhila bonse+ bukaleta bena Isalela kwi ñanga bwafwainwa kwikala bwa ñanga.+ 10 Milambo yazhila ya muntu umo umo ikekala ya kwa ñanga. Kintu kyonse muntu kyo akapana kwi ñanga kyo kikekala kya kwa ñanga.’”
11 Yehoba waambijile Mosesa amba: 12 “Buula bena Isalela amba, ‘Abino byo byafwainwa kuba muntu, umvwe muka kusongolwa washa mwatawanji ne kubula bukishinka kwi aye. 13 Kabiji umvwe mwanamulume ungi walaala nanji+ kwa kubula mwatawanji kuyuka, ne mambo anji abula kusoloka byo ezhilulula, kabiji inge kafwako kamonyi wa kumushinawina nangwa wamutaaine ne: 14 Mwatawanji wauba mukao ne kuzhinauka bukishinka bwa mukazhanji byo ezhilulula nangwa wauba mukao ne kuzhinauka bukishinka bwa mukazhanji nangwa kya kuba kechi wizhilulula ne, 15 mwatawanji wafwainwa kumuleta kwi ñanga, pamo na mulambo wanji, ko kuba’mba kipimo kimo kya bunga bwa mbaale kya mu bipimo jikumi bitwela mu efa.* Aye kechi wafwainwa kwitulwilapo manyi nangwa binunka bulongo ne, mambo uno ke mulambo wa kajo wa mukao, mulambo wa kajo wa kumuvululako mambo.
16 “‘Kabiji ñanga akasende yewo mwanamukazhi ne kumwimika ku meso a Yehoba.+ 17 Ñanga akatapwile mema azhila mu kipe kya buchimba ne kuwola maloba a mu tente wa lusambakeno ne kubika ano maloba mu mema. 18 Kabiji ñanga akemike uno mwanamukazhi ku meso a Yehoba ne kumwichikulula nsuki kabiji akabike mu maboko a mwanamukazhi mulambo wa kajo wa kuvulukilako, ko kuba’mba mulambo wa kajo wa mukao.+ Kabiji ñanga akalame mu maboko anji mema alula aleta mafingo.+
19 “‘Kabiji ñanga akamuchipishe uno mwanamukazhi ne kumwambila’mba: “Umvwe kafwako mwanamulume ungi ye wilaajile nanji saka wasongolwa, kabiji kechi wamushile mwatawobe+ ne kwizhilulula ne, ko kuba’mba ano mema alula aleta mafingo kechi asakukuba kintu kyatama ne. 20 Bino inge wamushile mwatawobe ne kwizhilulula kabiji walaajile na mwanamulume+ ungi wabula mwatawobe.” 21 Ñanga akamuchipishe mwanamukazhi luchipo lwa mafingo, kabiji ñanga akambile mwanamukazhi amba: “Yehoba akulengele kwikala muntu ye bakatongolanga ku balongo bobe pa kufiñana ne pa kuchipa, kabiji Yehoba alengele kijoma* kyobe kunyana* ne jivumo jobe kuvimba. 22 Ano mema aleta mafingo asakutwela mu mila yobe ne kuvimbisha jivumo jobe ne kulengela kijoma* kyobe kunyana.”* Kabiji mwanamukazhi akambe’mba: “Amena! Amena!”*
23 “‘Kabiji ñanga akanembe mafingo mu buku ne kwiovwa mu mema alula. 24 Kabiji akatomeshe uno mwanamukazhi mema alula aleta mafingo, ne ano mema alula akatwela mwi aye ne kumuletela misongo. 25 Kabiji ñanga akatambule mulambo wa kajo wa mukao+ ku mwanamukazhi ne kupepezha mulambo wa kajo kwi Yehoba, kabiji ñanga akalete mulambo kwipi ku kya kusokelapo bitapisho. 26 Ñanga akashikulepo mukono umo wa mulambo wa kajo kwikala mulambo wa kuvulukilako kabiji akamusoke pa kya kusokelapo bitapisho.+ Inge wapwisha kuba bino, mwanamukazhi akatome ano mema. 27 Byo akamulengela kutoma ano mema, inge uno mwanamukazhi wizhilulwile ne kubula bukishinka ku mwatawanji, ano mema aleta mafingo akatwela mwi aye ne kumuletela misongo ne jivumo janji jikavimba ne kijoma* kyanji kikanyana.* Kabiji mwanamukazhi ukafingwa mu balongo banji. 28 Bino umvwe mwanamukazhi kechi wizhilulwile ne, kabiji watoka, kechi bakamukambula ne, kabiji ukemitanga ne kusema baana.
29 “‘Uno ye muzhilo wa mukao,+ umvwe mwanamukazhi washa mwatawanji ne kwizhilulula saka asongolwa, 30 nangwa umvwe mwanamulume wauba mukao ne kuzhinauka bukishinka bwa mukazhanji; wafwainwa kwimika mukazhanji ku meso a Yehoba, kabiji ñanga wafwainwa kuba ku mwanamukazhi byonse bya mu uno muzhilo. 31 Mwanamulume kechi ukafwa na mambo ne, pakuba mukazhanji ukatwikwa mambo anji.’”