Yoba
11 Zofwala+ mwina Naamata waambile’mba:
2 “Nanchi bino byambo byonse kechi bisakukumbulwa nenyi?
Nangwa kwamba byavula ko kulengela muntu koloka nyi?*
3 Nanchi kwabauka kobe kusakuzhindamikapo bantu nyi?
Nanchi kafwako muntu nangwa umo usakukulengulula na mambo a byambo byobe bya mukeyu nyi?+
5 Nanchi inge Lesa waji kwamba
Ne kwisamba ne obewa!+
6 Inge waji kukusolwela byafyamika bya maana,
Mambo maana alumbuluka aji na mbaji yavula.
Po po wakonsha kuyuka’mba Lesa kechi ukavuluka mambo obe amo ne.
7 Nanchi wakonsha kuyuka bintu byazhika bya Lesa
Nangwa kuyuka bintu byonse pa* wa Bulume Bonse nyi?
8 Maana aleepa kukila mwiulu. Ñanyi kintu kyo wakonsha kuba?
Azhika kukila Kilende.* Ñanyi kintu kyo wakonsha kuyuka?
9 Aleepa kukila ntanda
Kabiji abaya kukila kalunga ka mema.
10 Umvwe aye wapita ne kwikazha muntu ne kulenga kije,
Ñanyi wakonsha kumukanya?
11 Mambo aye uyuka kimye bantu kyo bekala bajimbijimbi.
Inge wamona kintu kyatama, nanchi kechi ukekiyuka nenyi?
12 Bino muntu wabula maana wakonsha kuyukatu
Umvwe mbongolo wa mungye wasema muntu.*
13 Nanchi inge wanengezha muchima wobe
Ne kutanyika maboko obe kwi aye.
14 Kabiji umvwe kuboko kobe kubena kuba bintu byatama, kubike kwalepa,
Kabiji kange uswishe bubi kwikala mu matente obe ne.
15 Po po wakonsha kwinuna kilungi kyobe kwa kubula bulema;
Ukemana saka wakosa kwa kubula moyo.
16 Kabiji ukalubako ku makatazho obe;
Ukeavuluka nobe mema apita kala.
17 Bumi bobe bukasama kukila bisama mute pa kushinkamana juba;
Ne mfishi ya bumi bobe ikekala nobe kyeya kya lukelo.
18 Ukekala na muchima washikimana mambo luketekelo ko luji,
Kabiji ukakenkenta konse konse ne kulaala ku matwi nzoo.
19 Ukalaala, kafwako ukakulengesha moyo ne,
Kabiji bantu bavula bakakeba’mba wibobile bibusa.