Yoba
20 Zofwala+ mwina Naamata wakumbwile’mba:
2 “O ene mambo milanguluko yami o ibena kunkatezha ne kundengela kwamba
Na mambo a bijikila byo nji nabyo.
3 Naumvwa byambo bya mwenga byo ubena kuñambila;
Kabiji maana* ami o abena kundengela kukukumbula.
4 Kino kintu wafwainwa wikiyukile kala,
Mambo byo byo kyajinga kufumatu kimye muntu* kyo bamulengele pano pa ntanda,+
5 Amba kusangalala kwa babi kechi kukulaila ne
Ne lusekelo lwa bantu babula kwakamwa* Lesa lo lwa kakimye kachechetu.+
6 Nangwa kya kuba buneme bwanji bwafika mwiulu
Ne mutwe wanji wafika mu makumbi,
7 Ukonaika myaka ne myaka nobe bincha bifuma munda mwanji;
Aba bamumwenenga bakamba’mba, ‘Waya pi?’
8 Ukapitatu nobe kiloto, kabiji kechi bakamutaana ne;
Bakamupanga nobe kimwesho kya bufuku.
9 Aba bamumwenenga kechi bakamumonapo jibiji ne,
Ne mpunzha yanji kechi ikamumonapo jibiji ne.+
10 Baana banji bakakeba’mba bebobile bibusa ku bayanji,
Kabiji maboko anji akapana bunonshi bwanji ku bantu bangi.+
11 Bikupa byanji byayujile na bulume bwa bunsongwalume,
Bino abyo* bikalaalatu pamo nanji mu lukungu.
12 Umvwe bintu byatama byumvwanyika kutobala mu kanwa kanji,
Umvwe wibifya munshi ya lujimi wanji,
13 Inge wibileka ne kwibimina ne
Bino wibimumatu mu kanwa,
14 Kajo kanji kakasashila mu kanwa kanji;
Kakekala mu mubiji wanji nobe bulembe* bwa bishipila.
15 Wamina bya bunonshi, bino ukebilasamo;
Lesa ukebifumyamo munda mwanji.
16 Ukaamwa bulembe bwa bishipila;
Meno* a kipiji akamwipaya.
17 Kechi ukamona tukola twa mema ne,
Tukola twa buki ne bbata.
18 Ukalubula bya bunonshi bwanji kwa kubula kwibija;*
Kechi ukamwenamo mu bunonshi bwa mu busulu bwanji ne.+
19 Mambo aye wamanyika bayanji ne kwibasha;
Waangata nzubo yo abujile kushimika.
20 Bino aye kechi ukekala mu mutende ne;
Bunonshi bwanji kechi bukamupokololako ne.
21 Kafwako kintu nangwa kimo kikashalapo kyo akaja ne;
O ene mambo bunonshi bwanji o bukabujila kwikala myaka.
22 Bunonshi bwanji byo bukavula, bijikila bikamuvujila;
Bintu byatama byavula bikamufikila.
23 Byo akekuta,
Lesa* ukatuma bukaji bwanji bukatampe pe aye,
Ukebunokeshesha pe aye kufika ne mu mila yanji.
24 Byo akanyema bilwilo bya kyela kya kapotwe,
Miketo ya buta bwa mukanda bwa mukuba ikamupulankanya.
26 Mfishi ikatampe ibena kupembelela bya bunonshi byanji;
Mujilo ye babula kupupushila ku muntu nangwa umo ukamusoka;
Bya malwa bibena kupembelela bonse bashala mu tente wanji.
27 Jiulu jikasolola bubi bwanji;
Ne ntanda nayo ikamwalukamo.
28 Muyulo ukakwemuna nzubo yanji;
Ukekala ke mukwe mukatampe mu juba ja bukaji bwa Lesa.*
29 Kino kyo kyo bamwabilapo mubi kwi Lesa,
Kyo kya buswanyi Lesa kyo amutongwela.”