Ezikyo
15 Yehoba wañambijile jikwabo amba: 2 “Obewa mwana muntu, nga kichi kya miñanzañanza kyaesakana byepi na bichi bikwabo nangwa na misampi ya bichi bya mungye? 3 Nanchi mwamba ye bafumya ku kino kichi bakonsha kumwingijisha nyi? Nangwa bantu bakonsha kusonga lupopo wa kukobekako bintu kufuma ku uno mwamba nyi? 4 Tala! Bamutaya pa mujilo kwikala ke lukunyi. Kabiji wapya na mujilo konse kubiji ko apelela ne kubabauka pakachi. Nanchi uno mwamba bakonsha kumwingijisha ku kintu kikwabo nyi? 5 Nangwatu saka akyangye kupya kechi bakonsha kumwingijisha ne. Pano inge wapya ne kubabauka, po po akonsha ne kukilamo kubula kwingila!”
6 “Onkao mambo, Nkambo Mfumu Yehoba waamba’mba: ‘Byonkatu byo napana kichi kya miñanzañanza kyamenena mu bichi bya mungye kwikala ke nkunyi, byo byo nkoba ne ku bangikazhi ba mu Yelusalema.+ 7 Amiwa nebazhingijila. Banyema mujilo, pano bino mujilo ukebasoka. Byo nkebazhingijila, po po mukayuka’mba amiwa yami Yehoba.’”+
8 “Nkambo Mfumu Yehoba waamba’mba, ‘Nkalengela kino kyalo kwikala ke masalatu,+ mambo bangalukamo.’”+