Yoba
3 Nanchi aye wakonsha kukusashijila bimye byavula,
Nangwa kukwambila saka atekanya nyi?
4 Nanchi aye wakonsha kulayañana lulayañano ne obewa,
Pa kuba’mba akekale muzha wobe moba onsetu nyi?
5 Nanchi wakonsha kukaya nanji nobe kañonyi
Nangwa kumukasa lutambo kuba’mba baana bobe ba bakazhi bamukaishenga nyi?
6 Nanchi basulu bakonsha kumupota nyi?
Abya bakonsha kumwabanya ku bapoteshi nyi?
7 Nanchi wakonsha kukumbanya kiseba kyanji na byela bya nkona+
Nangwa kukumbanya mutwe wanji na mingele ya kwipayilako masabi nyi?
8 Mukwate na maboko obe;
Ukavuluka byo ukalwa nanji kabiji kechi ukabwezhapo jibiji ne!
9 Luketekelo lwa kuba’mba ukamushinda lo lwatu.
Kumumonatu byo amweka kukakulengela kumuchina.*
10 Kafwako nangwa umo ukeba kumuzhingijisha ne.
Onkao mambo, ñanyi wakonsha kwimana kwi amiwa?+
11 Ñanyi mutanshi kumpapo kintu kuba’mba namubwezhezhekyo?+
Bintu byonse biji pa ntanda byo byami.+
12 Nsakwambapo ne pa mikupa yanji,
Pa bulume bwanji ne mubiji wanji byo alengwa bulongo.
13 Ñanyi wakisubapo kiseba kyanji?
Ñanyi wakonsha kutwela mu kanwa kanji kaasama?
14 Ñanyi wakonsha kwasamika kanwa* kanji?
Meno anji onse alenga moyo.
15 Nyuma yanji iji na mikuku ya mabamba*
Ashinkakana bulongo.
16 Alamankana bingi bulongo
Kya kuba ne mwela kechi wakonsha kutwela ne.
17 Anungakana pamo;
Ekwata kabiji kafwako wakonsha kwialamunkununa ne.
18 Umvwe wachamuna, mufuma kyeya,
Ne meso anji aji nobe mintetenga ya lukelo.
19 Mu kanwa kanji mubesha;
Mufuma ne nsase ya mujilo.
20 Mu myona yanji mufutumuka bwishi,
Nobe mo basungulwila byela mo bataya nsono.
21 Muya wanji wambula mashanga,
Kabiji mu kanwa kanji mufuma lubeebe lwa mujilo.
22 Nshingo yanji iji bingi na bulume,
Kabiji ulengesha bingi moyo.
23 Misunyi yanji ikwata pamo;
Yakosatu nobe kyela, kabiji kafwako wakonsha kwiilamuna ne.
24 Muchima wanji wakosatu nobe jibwe,
Kine, wakosatu nobe jibwe ja kupelelapo.
25 Inge wavundumuka, ne babilobo bachina;
Kabiji inge wapabuka, bakankamanatu.
26 Kafwako mpoko yakonsha kumushinda ne;
Nangwatu jifumo, muketo nangwa mpula.+
27 Umona kyela kya kapotwe nobe lusono,
Ne kya mukuba nobe kichi kyabola.
28 Muketo kechi umulengela kunyema ne;
Mabwe a mu kinzhipunzhipu amwekatu nobe biswaswa kwi aye.
29 Umona kakonkolo nobe lunenge,
Kabiji useka kuvuma kwa mpula.
30 Mu jivumo mwanji mwauba nobe biinga byatwa;
Ulaala pa mateshi ne kumweka nobe kintu kyo bapujilako kajo.+
31 Ulengela mema aji panshi pene kubilauka nobe aji mu mpuki;
Uvwandaula kalunga ka mema nobe manyi aji mu mpuki.
32 Mo apita mushala bintu bibekauka.
Muntu wakonsha kulanguluka’mba panshi pene pa mema paji mvwi.
33 Kafwako kintu kikwabo pano pa ntanda kyaesakana nanji ne,
Kilengwa kibula kuchina.
34 Aye umona bintu byonse bilundumika.
Aye ye mfumu pa banyama bakatampe bonse ba mungye.”