Mitonyi
14 Samisonyi wayile ku Timina, kabiji konkakwa ku Timina wamweneko mwanamukazhi* mwina Filishitiya. 2 Onkao mambo, wabwelele ne kubuula bashanji ne bainanji amba: “Namona mwanamukazhi mwina Filishitiya mu Timina, kabiji mbena kukeba muntambwileye kuba’mba ekale mukazhami.” 3 Bino bashanji ne bainanji bamushikishe’mba: “Nanchi kechi wakonsha kutaana mwanamukazhi mu balongo bobe ne mu bantu betu nenyi?+ Nanchi wafwainwa kuya na kusongola mwanamukazhi mu bena Filishitiya babula kuya ku mukanda nyi?” Bino Samisonyi wakumbwile bashanji amba: “Kamundetelai, mambo ye wantokela ku muchima.”* 4 Bashanji ne bainanji kechi bayukile’mba kino kyafuma kwi Yehoba ne, mambo wakebelenga jishinda ja kulwilamo na bena Filishitiya, mambo bena Filishitiya bo balaminenga bena Isalela pa kyokya kimye.+
5 Onkao mambo, Samisonyi wayile ne bashanji ne bainanji ku Timina. Byo afikile ku bujimi bwa miñanzañanza bwa ku Timina, bokwe waishile ko aji saka abuluma. 6 Kepo mupashi wa Yehoba amulengejile kwikala na bulume,+ kabiji watabwile bokwe pabiji, byonkatu muntu byo akonsha kutabula mwana mbuzhi pabiji na mabokotu. Bino bashanji ne bainanji kechi wibabuujile kintu kyo aubile ne. 7 Kabiji wayile na kwisamba na yewa mwanamukazhi, kabiji uno mwanamukazhi wakimutokejile ku muchima Samisonyi.+
8 Byo abwelelengako jikwabo amba aye nakusenda mwanamukazhi ne kumutwala ku nzubo yanji,+ wasendukile mu jishinda amba amone mubiji wa bokwe wafwile, kabiji mu mubiji wa bokwe wafwa wataainemo nyuki ne buki. 9 Watapijile buki mu maboko anji ne kwibuja byo aendelenga. Byo ataaine bashanji ne bainanji, wibapelepo amba baje. Bino kechi wibabuujile’mba abwa buki wibufumishe mu bokwe wafwa ne.
10 Bashanji bayile ku yewa mwanamukazhi, ne Samisonyi watekele kijiilo konkakwa, mambo bino byo byaubanga bansongwalume. 11 Byo bamumwene, baletele bakabala ba balume 30 ba kwikala nanji. 12 Kepo Samisonyi ebambijile’mba: “Ubai nemweele kishimpi. Inge pa ano moba atanu na abiji a kijiilo mwikishimpulule ne kumbuula mo kyatala, nsakukemupa bivwalo bya linenyi 30 ne bivwalo bikwabo 30. 13 Bino inge mukankalwe kwikilumbulula, mukampa bivwalo bya linenyi 30 ne bivwalo bikwabo 30.” Abo bamwambijile’mba: “Tweele kishimpi kyobe; tubena kukeba kwikyumvwa.” 14 Ne aye wibambijile’mba:
“Mu kijanyi mwafumine kajo,
Kabiji mu kintu kyakosa mwafumine byatobala.”+
Abo bakankelwe kushimpulula kino kishimpi pa moba asatu. 15 Pa juba ja buna, baambijile muka Samisonyi amba: “Mujimbaike mwatawobe+ kuba’mba etubuule mwatala kino kishimpi. Inge ne, tusakukusoka mu mujilo pamo na nzubo ya bashobe. Nanchi mwitwichile kuno kuba’mba mutambule bipe byetu nyi?” 16 Onkao mambo, muka Samisonyi wajijilenga mu kyenyi kyanji amba: “Mwanshikwa; kechi mwantemwa ne.+ Mwaelele balongo bami kishimpi, bino kechi mwandumbulwila mo kyatala ne.” Aye wamwambijile’mba: “Bamama ne batata kechi nebabuulakyo ne! Pano nakonsha kukulumbulwila byepi obewa?” 17 Bino aye watwajijiletu na kumujijila pa moba atanu na abiji a kijiilo. Kepo amubuujile pa juba ja butanu na bubiji, mambo wakijilemo kumukatazha. Ponkapo bantu banji wibashimpulwijile kishimpi.+ 18 Onkao mambo, pa juba ja butanu na bubiji juba saka jikyangye kuzhika,* banabalume ba mu yewa muzhi bamwambijile’mba:
“Ñanyi kintu kyatobala kukila buki,
Kabiji ñanyi kintu kyakosa kukila bokwe?”+
Aye wibakumbwile’mba:
“Inge kechi mwaji kujima na mwana ñombe wami ne,+
Inge kechi mwashimpulula kishimpi kyami ne.”
19 Kepo mupashi wa Yehoba amulengejile kwikala na bulume,+ kabiji wayile ku Ashekelona+ ne kutapa banabalume 30 bajingako ne kusenda bivwalo byabo, kabiji wibipaine ku boba bashimpulwile kishimpi.+ Wazhingijile bingi byo abwelelenga ku nzubo ya bashanji.
20 Muka Samisonyi+ bamupaine ku umo wa mu bakabala banji bo ajinga nabo.+