Buku wa Bubiji wa Bamfumu

6 Jibumba ja bangauzhi+ jaambijile Elisha amba: “Angi talai! Ino mpunzha po tubena kwikala itukepela. 2 Mwane tuswishai tuye ku Yodano. Atweba bonse pa muntu pa muntu tukateme myamba ne kulenga mwa kwikala konkakwa.” Wibambijile’mba: “Yainga.” 3 Umo waipwizhe’mba: “Nanchi musakuya ne atweba bakalume benu nyi?” Aye wakumbwile’mba: “Nsakuya nenu.” 4 Byonkabyo, wayile nabo, kabiji bafikile ku Yodano ne kutendeka kutema bichi. 5 Umo byo atemenenga kichi, kapasa kazokokejile mu mema, ne aye wajijile’mba: “Yoyoyo nkambo, kajingatu ka kusenga!” 6 Muntu wa Lesa wa kine wamwipwizhe’mba: “Kaji kuponena pepi?” Aye wamumwesheshe po kaponejile. Kepo atemene ka kichi ne kwikataya ponkapa ne kapasa kaselukile. 7 Wamwambijile’mba: “Katole.” Byonkabyo, watanyikile kuboko kwanji ne kwikatola.

8 Kabiji mfumu wa Silya wayile na kulwa nkondo na bena Isalela.+ Waumvwañene na bakalume banji amba: “Pa mpunzha kananga po po nkatebelela ne anweba.” 9 Kepo muntu wa Lesa wa kine+ atumine mawi kwi mfumu wa Isalela amba: “Jimukai kuchina’mba mwakapita pa ino mpunzha, mambo ko kubena kuya bena Silya.” 10 Onkao mambo, mfumu wa Isalela watumine mawi ku mpunzha ko bamujimwineko ku muntu wa Lesa wa kine. Watwajijile kumujimunako, kabiji bimye byavula* aye kechi wayileko ne.+

11 Kino kyazhingijishe mfumu* wa Silya, onkao mambo, waichile bakalume banji ne kwibambila’mba: “Mbuulai! Ñanyi uji ku lubaji lwa mfumu wa Isalela?” 12 Kepo kalume wanji umo aambile’mba: “Kafwako nangwa umo, nkambo mfumu! Pakuba Elisha ngauzhi wa mu Isalela ye ubuula mfumu wa Isalela bintu byo mwamba kukachi kwenu.”+ 13 Waambile’mba: “Yainga mukayuke ko aji pa kuba’mba nkatume bakumukwata.” Kepo bamubuujile’mba: “Uji ku Dotanyi.”+ 14 Ponkapo watumineko bambili ne makalaki a nkondo, pamo na nzhita ikatampe; bakafikile bufuku ne kuzhokoloka muzhi.

15 Wa mwingilo wa muntu wa Lesa wa kine byo alupukijile pangye lukelokelo, wamwene nzhita ne bambili ne makalaki a nkondo saka byazhokoloka muzhi. Ponkapo wa mwingilo wamujijiile’mba: “Yoyoyo, nkambo! Tusakuba byepi?” 16 Bino aye wamwambijile’mba: “Kuchina ne!+ Mambo baji ne atweba bavula kukila bo baji nabo.”+ 17 Kepo Elisha alombele’mba: “Anweba Yehoba, labishai meso anji kuba’mba amone.”+ Ponkapo Yehoba walabishe meso a wa mwingilo ne aye wamwene! Wamwene kibunji kya mitumba kyonse saka kyakumbana bambili ne makalaki a nkondo a mujilo+ saka amuzhokoloka Elisha.+

18 Bena Silya byo bakunkulukilenga kwiya kwi aye, Elisha walombele kwi Yehoba amba: “Napopwela, pofulai meso a kino kisaka kya bantu.”+ Byonkabyo, wibapofwile meso, byonkatu byalombele Elisha. 19 Kepo Elisha ebambijile’mba: “Jino kechi jo jishinda ne, kabiji uno kechi ye muzhi ne. Ndondelai nemutwale ku muntu ye mubena kukeba.” Bino aye wibatwajile ku Samaliya.+

20 Byo bafikile mu Samaliya, Elisha waambile’mba: “Anweba Yehoba, labishai meso abo kuba’mba bamone.” Onkao mambo, Yehoba walabishe meso abo, ne abo bamwene’mba baji monka mukachi mu Samaliya. 21 Mfumu wa Isalela byo ebamwene, waambijile Elisha amba: “Tata, nanchi nebatape nyi, nebatape nyi?” 22 Bino aye waambile’mba: “Kange mwibatape ne. Nanchi anweba mutapa bantu bo mwakwata buzha na mpoko yenu ne na buta bwenu bwa mukanda nyi? Bapai kajo ne mema kuba’mba baje ne kutoma+ kabiji babwele kwi nkambo yabo.” 23 Byonkabyo, wibatekejile kijiilo kikatampe, ne abo bajiile ne kutoma, kabiji byo bapwishishe wibalekele’mba babwele kwi nkambo yabo. Kabiji mazhita a bena Silya+ kechi abwelelepo jibiji mu kyalo kya bena Isalela ne.

24 Kepo Benehadada mfumu wa Silya akonkenye pamo bashilikale banji bonse* ne kuya na kuzhokoloka muzhi wa Samaliya.+ 25 Onkao mambo, mu Samaliya mwaikele kipowe kya nzala kikatampe,+ kabiji muzhi bamuzhokolokele kufikatu ne mutengo wa mutwe wa mbongolo+ byo afikile mashekele a siliva 80, ne kipimo kimo kya mu bipimo bina bitwela mu kabu* kya bichololo bya ngalamwe byo kyafikile mashekele a siliva atanu. 26 Mfumu wa Isalela byo apichilenga peulu ya nsakwa, mwanamukazhi wamujijiile amba: “Tukwashai, anweba nkambo mfumu!” 27 Aye waambile’mba: “Inge Yehoba wabula kwimukwasha, kwepi ko nakonsha kufumya bukwasho? Ku kipujilo nyi? Nangwa ku kya kufiinamo binyu nangwa ku kya kufiinamo manyi nyi?” 28 Mfumu wamwipwizhe’mba: “Ñanyi lukatazho lo uji nalo?” Uno mwanamukazhi wakumbwile’mba: “Awe mwanamukazhi wañambijile’mba, ‘Leta mwanobe wa mulume, kabiji tusakumuja lelo, kabiji wami tukamuja kesha.’+ 29 Kepo twatekele mwanami ne kumuja.+ Juba jalondejilepo namwambijile namba, ‘Leta mwanobe wa mulume kuba’mba tumuje.’ Bino aye wafile mwananji.”

30 Mfumu byo aumvwinetu byaambile uno mwanamukazhi, watabwile bivwalo byanji.+ Byo apichile peulu ya nsakwa, bantu bamumwene saka anyinga kisapi kya majila mukachi ka bivwalo* byanji. 31 Kepo aambile’mba: “Kine Lesa ankambule, inge kya kuba mbule kumuchibako mutwe Elisha mwana Shafwata lelo jino!”+

32 Elisha waikele mu nzubo yanji pamo na bakulumpe. Kabiji mfumu watumine muntu watangijileko kulutwe, bino uno muluwe saka akyangye kufika, Elisha waambijile bakulumpe amba: “Mwamona uno mwana mbanzhi+ amba watuma muntu wa kunchiba mutwe nyi? Mukenkentenga muluwe byo asakwiya, mushinke kinzhilo kabiji mwikikwachijile saka kyashinkika kuchina’mba wakatwela. Nanchi ayo kechi mituutu ya nkambo yanji uji kunyuma yanji nenyi?” 33 Byo akyambilenga nabo, muluwe waishile kwi aye, kabiji mfumu waambile’mba: “Ano malwa afuma kwi Yehoba. Mambo ka o nafwainwa kutwajijila na kupembelela Yehoba?”