Masalamo
Kwi ntangi; kwimbila pa Sheminita.* Lwimbo wa kwa Davida.
12 Mpulushai anweba Yehoba, mambo bantu ba kishinka bapwa;
Bantu ba kishinka bazhiya mukachi ka bantu.
2 Bebepa mulwabo;
Na byatunwa byabo bamba byambo bya mulambisha kabiji bamba na michima* ya bujimbijimbi.+
3 Yehoba ukachiba byatunwa byonse byamba bya mulambisha
Ne njimi yamba bya kwitota,+
4 Bonka bamba’mba: “Tukebashinda na njimi yetu.
Twingijisha byatunwa byetu kwamba byo tukeba;
Ñanyi wakonsha kwikala nkambo yetu?”+
5 Yehoba waamba’mba, “Na mambo a kuba bakajilwa bebamanyika,
Ne na mambo a kubinza kwa bayanji,+
Amiwa nkemana ne kwibakwasha.
Nkebapokolola ku boba beboba mukeyu.”*
6 Byambo bya Yehoba byawama;+
Biji nobe siliva yo basungulula bulongo mu kyo basungulwilamo,* ye batubula jitanu na jibiji.
7 Anweba Yehoba, mukebalama;+
Mukebazhikijila pa muntu pa muntu ku kino kisemi myaka ne myaka.
8 Babi benda kwa kubula wa kwibakanya
Mambo baana ba bantu batundaika byubilo byatama.+