EZELA

1 Mu mwaka mutanshi wa kwa Kilusa+ Mfumu wa Pelisha, pa kuba’mba byambo bya Yehoba byo aambile kupichila mwi Yelemiya+ bifike, Yehoba walengejile Kilusa Mfumu wa Pelisha kutaya mbila mu bufumu bwanji bonse, ne kunemba wiinembele’mba:+

2 “Kilusa Mfumu wa Pelisha waamba’mba, ‘Yehoba Lesa wa mwiulu wampa bufumu bonse bwa pano pa ntanda,+ kabiji wankambizha kumushimikila nzubo mu Yelusalema+ uji mu Yuda. 3 Yense wa mwi anweba bantu banji bonse, Lesa wanji ekale nanji, kabiji ayenga ku Yelusalema uji mu Yuda akashimukulule nzubo ya Yehoba Lesa wa Isalela, aye ye Lesa wa kine, mwina nzubo yajinga mu Yelusalema.* 4 Muntu yense ubena kwikala mu kyalo kingi,+ konse ko aji, bamukwashe ku bo ekala nabo kinkalankulo* ne kumupa siliva ne ngolode, bipe ne bilelwa pamo na mulambo wa kwifuukwila wa ku nzubo ya Lesa wa kine,+ yajinga mu Yelusalema.’”

5 Kepo bakulumpe ba bikota bya bena Yuda ne bena Benjamina ne bañanga ne bena Levi—bantu bonse bo batundaikile kwi Lesa wa kine—benengezhezhe kuya na kushimukulula nzubo ya Yehoba yajinga mu Yelusalema. 6 Bantu bonse bo baikalanga nabo kinkalankulo bebakwashishe kupichila mu kwibapa* bipe bya siliva ne bya ngolode, bipe, bilelwa ne bintu bya buneme, kununga pa milambo yonse ya kwifuukwila.

7 Mfumu Kilusa walupwile ne bipe bya mu nzubo ya Yehoba, byonka byasendele Nebukaneza kufuma ku Yelusalema kabiji byo akabikile mu nzubo ya lesa wanji.+ 8 Kilusa Mfumu wa Pelisha wibilupwile pangye kabiji bebisopelenga kwi Mitiledate kalama wa mali, yenka wibibajile pa kwibipana kwi Sheshebaza*+ kinemanga wa mu nyaunda ya mu Yuda.

9 Pa kwibibala byajinga bino: bipe bya ngolode byapasha ntumbe byajinga 30, bipe bya siliva byapasha ntumbe byajinga 1,000, ne bipe bikwabo byajinga 29, 10 masanyi acheache afukumana a ngolode ajinga 30, masanyi acheache afukumana a siliva ajinga 410, ne bipe bikwabo byajinga 1,000. 11 Bipe byonse bya ngolode ne bya siliva byajinga 5,400. Sheshebaza wibisendele bino byonse kimye bazha kyo bebalupwile+ mu Babilona kuba’mba bayenga ku Yelusalema.

2 Bano bo bajinga bantu ba mu kibunji bafumine mu bantu bo batwajile mu buzha,+ bonka Nebukaneza Mfumu wa Babilona bo atwajile mu buzha ku Babilona+ kabiji bonka babwelele ku Yelusalema ne ku Yuda, yense wabwelele ku muzhi wanji,+ 2 bonka baishijile pamo ne Zelubabele,+ Yeshua,+ Nehemiya, Selaya, Leeliya, Modekai, Bilishana, Misepala, Bigevwai, Lehumi ne Beana.

Banabalume bena Isalela pa kwibabala bajinga bino:+ 3 baana ba kwa Paloshi bajinga 2,172; 4 baana ba kwa Shefwatiya bajinga 372; 5 baana ba kwa Alaha+ bajinga 775; 6 baana ba kwa Pahata-moabu,+ ba mu baana ba kwa Yeshua ne Yoaba bajinga 2,812; 7 baana ba kwa Elama+ bajinga 1,254; 8 baana ba kwa Zatu+ bajinga 945; 9 baana ba kwa Zakai bajinga 760; 10 baana ba kwa Bani bajinga 642; 11 baana ba kwa Bebai bajinga 623; 12 baana ba kwa Azagada bajinga 1,222; 13 baana ba kwa Adonikama bajinga 666; 14 baana ba kwa Bigevwai bajinga 2,056; 15 baana ba kwa Adini bajinga 454; 16 baana ba kwa Atela ba mu nzubo ya kwa Hezekiya bajinga 98; 17 baana ba kwa Bezai bajinga 323; 18 baana ba kwa Yola bajinga 112; 19 baana ba kwa Hashuma+ bajinga 223; 20 baana ba mu Gibala bajinga 95; 21 baana ba mu Betelema bajinga 123; 22 banabalume ba mu Netofwa bajinga 56; 23 banabalume ba mu Anatota+ bajinga 128; 24 baana ba mu Azamabeta bajinga 42; 25 baana ba mu Kiliata-yealimu, ne ba mu Kefila, ne ba mu Beelota bajinga 743; 26 baana ba mu Lama+ ne ba mu Geba+ bajinga 621; 27 banabalume ba mu Mikimasa bajinga 122; 28 banabalume ba mu Betele ne ba mu Ai+ bajinga 223; 29 baana ba kwa Nebo+ bajinga 52; 30 baana ba kwa Magabishi bajinga 156; 31 baana ba kwa Elama mukwabo bajinga 1,254; 32 baana ba kwa Halima bajinga 320; 33 baana ba kwa Loda, ne ba kwa Hadida ne ba kwa Ono bajinga 725; 34 baana ba mu Yeliko bajinga 345; 35 baana ba kwa Senaa bajinga 3,630.

36 Bañanga+ bo bano: baana ba kwa Yedaya+ ba mu nzubo ya kwa Yeshua+ bajinga 973; 37 baana ba kwa Imela+ bajinga 1,052; 38 baana ba kwa Pashula+ bajinga 1,247; 39 baana ba kwa Halima+ bajinga 1,017.

40 Bena Levi bo bano:+ baana ba kwa Yeshua ne Kadamiela,+ ba mu baana ba kwa Hodaviya bajinga 74. 41 Banyimbi:+ baana ba kwa Asafwa+ bajinga 128. 42 Baana ba bakasopa ba pa bibelo:+ baana ba kwa Shaluma, baana ba kwa Atela, baana ba kwa Talamona,+ baana ba kwa Akuba,+ baana ba kwa Hatita ne baana ba kwa Shobai, bonse pamo bajinga 139.

43 Bakalume* ba ku nzubo ya Lesa bo bano:+ baana ba kwa Ziha, baana ba kwa Hasufwa, baana ba kwa Tabaota, 44 baana ba kwa Kelose, baana ba kwa Shia, baana ba kwa Padona, 45 baana ba kwa Lebana, baana ba kwa Hagaba, baana ba kwa Akuba, 46 baana ba kwa Hagabi, baana ba kwa Shamalai, baana ba kwa Hanana, 47 baana ba kwa Gidela, baana ba kwa Gahala, baana ba kwa Leaya, 48 baana ba kwa Lezina, baana ba kwa Nekoda, baana ba kwa Gazama, 49 baana ba kwa Uza, baana ba kwa Pasea, baana ba kwa Besai, 50 baana ba kwa Asana, baana ba kwa Meunimu, baana ba kwa Nefishimi, 51 baana ba kwa Bakabuku, baana ba kwa Hakufwa, baana ba kwa Hahula, 52 baana ba kwa Bazaluta, baana ba kwa Mehida, baana ba kwa Halasha, 53 baana ba kwa Balakosa, baana ba kwa Sisela, baana ba kwa Tema, 54 baana ba kwa Neziya ne baana ba kwa Hatifwa.

55 Baana ba bakalume ba kwa Solomone bo bano: baana ba kwa Sotai, baana ba kwa Sofeleta, baana ba kwa Peluda,+ 56 baana ba kwa Yaala, baana ba kwa Dakona, baana ba kwa Gidela, 57 baana ba kwa Shefwatiya, baana ba kwa Hatile, baana ba kwa Pokeleta-hazebaimu ne baana ba kwa Ami.

58 Bakalume* bonse ba ku nzubo ya Lesa ne baana ba bakalume ba kwa Solomone bajinga 392.

59 Kabiji bano bafumine ku Telamela, Telahasha, Kelubi, Adona ne Imela, bino bakankelwe kuyuka bikota byabo ne bisemi byabo, kana bajinga bena Isalela nangwa ne:+ 60 baana ba kwa Delaya, baana ba kwa Tobiya ne baana ba kwa Nekoda bajinga 652. 61 Kabiji ba mu baana ba bañanga bo bano: baana ba kwa Hobaya, baana ba kwa Hakoza,+ baana ba kwa Bazilai, yenka wasongwele wa mu baana ba bakazhi ba kwa Bazilai+ mwina Gileada kabiji witumbile jizhina jabo. 62 Bano bakebele kebele byanembwa pa kuba’mba bayuke bisemi byabo, bino kechi bebitaaine ne, onkao mambo, bebakainye kwingila mwingilo wa buñanga.*+ 63 Kinemanga* wibambijile’mba kechi bafwainwa kujako ku bintu byazhijisha ne,+ kanatu kukamweke ñanga ukebepwizhako kupichila mu kwingijisha Ulimu ne Tumimu.+

64 Kipwilo kyonse pamo kyajinga na bantu 42,360,+ 65 kufumyako bazha ba balume ne ba bakazhi, 7,337 bo bajinga nabo; bajinga ne na banyimbi ba balume ne ba bakazhi 200. 66 Bambili babo bajinga 736, ne bamyule babo bajinga 245, 67 bangamela babo bajinga 435, ne bambongolo babo bajinga 6,720.

68 Byo bafikile ku nzubo ya Yehoba mu Yelusalema, bakulumpe ba bikota bamo bapaine milambo ya kwifuukwila+ ku nzubo ya Lesa wa kine, kuba’mba beishimukulule* ponka po yajinga kala.+ 69 Kwesakana na papelejile bulume bwabo, bapaine ku kipao kya mwingilo madilakima* a ngolode 61,000, mpondo* ya siliva 5,000+ ne minkukumba 100 ya bañanga. 70 Kabiji bañanga, bena Levi, ne bantu bamo, banyimbi, bakalama ba bibelo, bakalume* ba ku nzubo ya Lesa, baikele mu mizhi yabo, kabiji bena Isalela bonse bashala baikele mu mizhi yabo.+

3 Ñondo wa butanu na bubiji+ byo afikile ne bena Isalela* byo bajinga mu mizhi yabo, bakonkene pamo mu Yelusalema na mulanguluko umo. 2 Yeshua+ mwana wa kwa Yehozadaka ne bañanga bakwabo ne Zelubabele+ mwana wa kwa Shalachele+ ne balongo banji, baimene ne kushimika kya kusokelapo bitapisho kya Lesa wa Isalela, kuba’mba basokelengapo bitapisho bya kusoka, byonka byo kyanembwa mu Mizhilo ya Mosesa+ muntu wa Lesa wa kine.

3 Kabiji bashimikile kya kusokelapo bitapisho ponka po kyajinga kala, nangwa kya kuba bachiinenga bantu bajinga mu byalo bibazhokolokele,+ kabiji batendekele kulambwilapo bitapisho bya kusoka kwi Yehoba, bitapisho bya kusoka bya lukelo ne bya mabanga.+ 4 Kepo baikele na Kijiilo kya Mimba* monka mo kyanembejilwe,+ kabiji pa juba pa juba batapishenga bitapisho bya kusoka kwesakana na bitapisho byakebewanga pa juba pa juba.+ 5 Byo bapwishishe kuba bino, balambwile milambo ya kusoka ya kimye kyonse+ ne milambo ya pa kutentama kwa bañondo+ ne yoya ya bijiilo+ byonse bya Yehoba byo bazhijikile, kunungapo ne yoya yafumine ku bantu bapaine milambo ya kwifuukwila+ kwi Yehoba. 6 Kufumatu juba jitanshi ja ñondo wa butanu+ na bubiji batendekele kutapisha bitapisho bya kusoka kwi Yehoba, nangwa kya kuba kechi bakyajile kitendekesho kya nzubo ya Yehoba ne.

7 Bapaine mali ku basonga mabwe+ ne ku basendwe,+ kabiji bapaine kajo ne bya kutoma ne manyi ku bena Shidona ne ku bena Tila pa kuleta ku Yopa+ bichi bya sida kufuma ku Lebanoni, mambo Kilusa Mfumu wa Pelisha wibapele luusa.+

8 Mu mwaka wa bubiji kufuma po babwelejile ku nzubo ya Lesa wa kine mu Yelusalema, mu ñondo wa bubiji, Zelubabele mwana wa kwa Shalachele ne Yeshua mwana wa kwa Yehozadaka ne balongo babo bonse, bañanga ne bena Levi, ne bonse bafumine mu buzha+ kuya ku Yelusalema batendekele kwingila mwingilo; batongwele bena Levi kutendekela pa ba myaka 20 kuya peulu kwikala bakapitao ba mwingilo wa ku nzubo ya Yehoba. 9 Onkao mambo, Yeshua ne baana banji ne balongo banji, ne Kadamiela ne baana banji, baana ba kwa Yuda, baingijile pamo mwingilo wa kutangijila boba baingijilenga mwingilo mu nzubo ya Lesa wa kine, pamo na baana ba kwa Henadada,+ baana babo ne balongo babo, bena Levi.

10 Bantungi byo baajile kitendekesho kya nzubo ya Yehoba,+ kepo bañanga bavwajile bivwalo bya buñanga, saka baji na matolompita+ kabiji bena Levi baana ba kwa Asafwa bajinga na nsonsolo, baimene ne kutota Yehoba monka mwibakambizhizhe Davida Mfumu wa bena Isalela.+ 11 Kabiji batatwile kwimba saka bawelela+ ne kutota ne kusanchila Yehoba “mambo wawama; kabiji butemwe bwanji bubula kwaluka ku bena Isalela bo bwa myaka ne myaka.”+ Kepo bantu bonse babijikile ne kutota Yehoba mambo baajile kitendekesho kya nzubo ya Yehoba. 12 Bañanga bavula, bena Levi, bakulumpe ba bikota ne bakote bamwenepo nzubo ya kala+ bajijile na mawi a peulu byo bamwene babena kwala kitendekesho kya ino nzubo, aku bantu bavula saka babijika na lusekelo.+ 13 Onkao mambo, bantu bakankelwe kuyuka lupusano lwajinga pa kubijika kwa lusekelo ne kujila, mambo bantu babijikilenga bingi kya kuba mawi aumvwanyikilenga ne kwalepa.

4 Balwanyi ba Bayudea ne bena Benjamina+ byo baumvwine’mba aba bafuma mu buzha+ babena kushimika nzubo ya Yehoba Lesa wa Isalela, 2 ponkapo basolomokele Zelubabele ne bakulumpe ba bikota ne kwibambila’mba: “Tuswishai twimukwasheko kushimika; mambo byonkatu byo muji, ne atweba tupopwela* Lesa wenu+ kabiji tutapisha kwi aye kufumatu mu moba a Eshadona+ Mfumu wa Asilya, yenka wituletele kuno.”+ 3 Nangwa byonkabyo, Zelubabele ne Yeshua ne bakulumpe ba bikota bya bena Isalela bebambijile’mba: “Kechi mwakonsha kushimika nzubo ya Lesa wetu pamo ne atweba ne,+ mambo atweba bunke bwetu tusakumushimikilayo Yehoba Lesa wa Isalela, byonkatu bitukambizhe Kilusa Mfumu wa Pelisha.”+

4 Kabiji bantu ba mu kyalo batwajijile kulefula* Bayudea ne kwibachinya amba baleke kushimika.+ 5 Bapelenga mali boba babulañana maana kuba’mba bavulañanyenga+ byo bafuukwilepo mu moba onse a kwa Kilusa Mfumu wa Pelisha kufikatu ne kimye Daliusa+ Mfumu wa Pelisha kyo atendekele kulama. 6 Ku ntendekelo ya bukalama bwa kwa Ahaselusa, banembele byambo bya kupamo mambo bangikazhi ba mu Yuda ne ba mu Yelusalema. 7 Kabiji mu moba a kwa Atazakeshi Mfumu wa Pelisha, Bishilama, Mitiledate, Tabele ne balunda nanji bonse banembejile mfumu Atazakeshi; batuntulwile ino nkalata mu Kialamaiki,+ kabiji beinembele mu bisopelo bya Kialamaiki.*

8 * Lehumi kiloolo wa mu kafulumende ne Shimishai munembeshi banembejile ino nkalata Mfumu Atazakeshi ya kupamo mambo ba mu Yelusalema amba: 9 (Yafumine kwi Lehumi kiloolo wa mu kafulumende ne Shimishai munembeshi ne balunda nabo, bamitonyi ne babinemanga babacheche, banembeshi, bena Eleka,+ bangikazhi ba mu Babilonya, bangikazhi ba mu Susa,+ ko kuba’mba bena Elama,+ 10 ne bisaka bya bantu bikwabo byo batwajile mu buzha kwi Asenapa kinemanga wayile nkuwa ne kwibekazha mu mizhi ya mu Samaliya,+ ne bakwabo bajinga mu kibunji kya ku Bushiya bwa Mukola,* pano 11 ino yo nkalata yo bamutumijile.)

“Kwi anweba Mfumu Atazakeshi, kufuma kwi atweba bakalume benu bekala ku kibunji kiji ku Bushiya bwa Mukola: Pano 12 anweba mfumu yukai’mba Bayudea bafumine kwi anweba ne kwiya ko tuji bafika mu Yelusalema. Babena kushimukulula muzhi watama wa bansatuki, kabiji katatakatu bapwishe kushimika masakwa+ ne kuwamisha bitendekesho. 13 Pano anweba mfumu yukai’mba uno muzhi inge bamushimukulule ne masakwa anji apwe, kechi bakapananga musonko, mulambo+ nangwa musonko wa pa mukwakwa ne, kabiji kino kikalengela mali mu bipao bya bamfumu kukepa. 14 Na mambo a kuba tufola mali a ku kipango,* kabiji kechi tubena kukeba bintu byenu anweba mfumu konaika ne, o ene mambo o twatumina ino nkalata kuba’mba anweba mfumu muyuke kino, 15 pa kuba’mba mukebekebe mu buku wa byanembwa bya bashakulu benu.+ Mukebemo mu buku wa byanembwa, po po musakuyuka’mba uno ke muzhi wa bansatuki, boba byatama ku bamfumu ne ku bibunji, kabiji mu yenka uno muzhi mwaikalanga ne boba balengelanga bantu kusatuka mu moba a kala. O ene mambo uno muzhi o bamonawijile.+ 16 Tubena kwimubuula anweba mfumu namba inge uno muzhi bamushimukulule ne masakwa anji apwe, kechi mukekalapo na bulume* pa kibunji kiji ku Bushiya bwa Mukola ne.”+

17 Kepo mfumu atumine mawi kwi Lehumi kiloolo wa mu kafulumende ne Shimishai munembeshi ne ku balunda nabo baikalanga mu Samaliya ne ku bajinga mu kibunji kyajinga ku Bushiya bwa Mukola amba:

“Mutende mwane! Bino 18 nkalata yo mwitutumijile beitangile* bulongo ku meso ami. 19 Ne amiwa nakambizhe namba bakebekebe, kabiji kyatanwa’mba kufumatu ne kala, mu uno muzhi mwajinga kwimena bamfumu, ne bunsatuki bwaubiwenga monka.+ 20 Mwajinga bamfumu ba bulume mu Yelusalema bonka balamanga kibunji kyonse kya ku Bushiya bwa Mukola, kabiji bebapanga musonko, mulambo ne musonko wa pa mukwakwa. 21 Pano kambizhai’mba bano bantu baleke kwingila, pa kuba’mba baleke kushimukulula muzhi posotu nkapane mukambizho. 22 Muteko muchima kuba kino, kuchina’mba bintu bya mfumu byakonaikilako.”+

23 Nkalata yafumine kwi Mfumu Atazakeshi byo beitangile kwi Lehumi ne Shimishai munembeshi ne balunda nabo, ponkapo bayile ku Yelusalema ku Bayudea ne kwibalekesha mu lupata. 24 Kyo kimye mwingilo wa ku nzubo ya Lesa yajinga mu Yelusalema kyo aimene; waimene byonkabyo kufikatu ne mu mwaka wa bubiji wa bukalama bwa kwa Daliusa Mfumu wa Pelisha.+

5 Kepo ngauzhi Hagai+ ne ngauzhi Zekaliya+ munkana wa kwa Ido+ baawile ku Bayudea bajinga mu Yuda ne mu Yelusalema, monka mu jizhina ja Lesa wa Isalela yenka ye bajinga nanji. 2 Kyo kimye Zelubabele+ mwana wa kwa Shalachele ne Yeshua+ mwana wa kwa Yehozadaka kyo batendekele kushimukulula nzubo ya Lesa+ yajinga mu Yelusalema; bangauzhi ba Lesa bajinga nabo saka bebakwasha.+ 3 Pa kyonkakya kimye, Tatenai kinemanga wa kibunji kya ku Bushiya bwa Mukola* ne Shetabozenai ne balunda nabo baishile kwi abo ne kwibepuzha’mba: “Ñanyi wimukambizhe’mba mushimike ino nzubo ne kupwisha kino kishimikwa?”* 4 Kabiji bebepwizhe’mba: “Bantu babena kwingila pa kino kishimikwa mazhina abo bañanyi?” 5 Bino Lesa wasopelenga* bakulumpe ba Bayudea,+ kabiji kechi bebalekeshe ne, kufikatu ne kimye kyo bafwainwe kutuma sawakya kwi Daliusa ne nkalata byo yafwainwe kubwela kufuma kwi mfumu pa mambo a kino.

6 Ino yo nkalata Tatenai kinemanga wa kibunji kya ku Bushiya bwa Mukola ne Shetabozenai ne balunda nanji, babinemanga babacheche ba kibunji kya ku Bushiya bwa Mukola, yo batumijile Mfumu Daliusa; 7 batumine sawakya kwi aye, kabiji banembele amba:

“Kwi ba Mfumu ba Daliusa:

“Mutende mwane! 8 Anweba mfumu yukai kuba’mba twayile ku kibunji kya Yuda ku nzubo ya Lesa wa bulume bonse, kabiji babena kwiishimika na mabwe akatampe, kabiji babikamo ne myamba mu bibumbulu. Bantu babena kwingila mwingilo na kizaku kabiji ubena kuyilakotu palutwe na mambo a kwibikako kwabo. 9 Kabiji twaipwizhe bakulumpe babo amba: ‘Ñanyi wimukambizhe’mba mushimike ino nzubo ne kupwisha kino kishimikwa?’*+ 10 Kabiji twibepwizhe ne mazhina abo pa kuba’mba twimubuule, ne kuba’mba tunembe mazhina a banabalume babena kutangijila.

11 “Betukumbwile’mba: ‘Atweba twi bakalume ba Lesa wa mwiulu ne ntanda, kabiji tubena kushimukulula ino nzubo yo bashimikile kala kene, yonka yo ashimikile mfumu kata wa bena Isalela ne kwiipwisha.+ 12 Nangwa byonkabyo, na mambo a kuba bashakulu betu bamuzhingijishe Lesa wa mwiulu,+ wibapaine mu kuboko kwa kwa Nebukaneza+ Mfumu wa Babilona mwina Kalodeya, yenka wakundwile ino nzubo+ ne kutwala bantu mu buzha ku Babilona.+ 13 Pano bino, mu mwaka mutanshi wa kwa Kilusa Mfumu wa Babilona, Mfumu Kilusa wakambizhe’mba bashimukulule ino nzubo ya Lesa.+ 14 Kabiji Mfumu Kilusa wafumishemo mu nzubo ya lesa wa mu Babilona bipe bya ngolode ne bya siliva bya mu nzubo ya Lesa Nebukaneza byo asendele mu nzubo ya Lesa mu Yelusalema ne kwibileta mu nzubo ya lesa wa mu Babilona.+ Bebipaine kwi Sheshebaza*+ yenka Kilusa ye atongwele kwikala kinemanga.+ 15 Kilusa wamwambijile’mba: “Senda bino bipe. Yanga ukebibike mu nzubo ya Lesa iji mu Yelusalema, kabiji nzubo ya Lesa beishimukulule ponka po yajinga kala.”+ 16 Kepo aye Sheshebaza afikile, kabiji waajile bitendekesho bya nzubo ya Lesa+ iji mu Yelusalema; kabiji batwajijila kwiishimika kufumatu kyokya kimye kufika ne luno, bino bakyangye kwiipwisha.’+

17 “Pano inge kijitu bulongo kwi anweba mfumu, kebakebai mo balamina bya buneme bya ku bufumu mu Babilona, ne kumona inge Mfumu Kilusa wakambizhe’mba bashimukulule nzubo ya Lesa iji mu Yelusalema;+ kabiji mwitubuule kyo musakufuukulapo anweba mfumu.”

6 Kepo Mfumu Daliusa apaine mukambizho, kabiji bakebelekebele mo babikanga* bya buneme mu Babilona. 2 Kabiji bataaine muvungilo mu kishimikwa kyajinga mu Ekabatana, mu kibunji kya Media, kabiji panembelwe uno mukambizho amba:

3 “Mu mwaka mutanshi wa Mfumu Kilusa, Mfumu Kilusa wakambizhe pa mambo a nzubo ya Lesa yajinga mu Yelusalema amba:+ ‘Bakashimukulule nzubo kuba’mba bakatapishengako bitapisho, kabiji bafwainwa kwala bitendekesho byayo; kimino kyayo ikekale makyubichi 60, ne mu bwipi bwayo makyubichi 60,*+ 4 bakeishimike na mikuku isatu ya mabwe akatampe ne mukuku umo wa myamba;+ kabiji mali o bakapana akafume mu nzubo ya mfumu.+ 5 Kabiji bipe bya ngolode ne bya siliva bya mu nzubo ya Lesa byo asendele Nebukaneza mu nzubo ya Lesa yajinga mu Yelusalema ne kwibileta ku Babilona+ bebilubule, pa kuba’mba bakebibike mu mpunzha yabyo mu nzubo ya Lesa mu Yelusalema ne kwibibika monka mu nzubo ya Lesa.’+

6 “Onkao mambo, obewa Tatenai kinemanga wa kibunji kya ku Bushiya bwa Mukola,* ne Shetabozenai ne balunda nobe, ku babinemanga babacheche ba kibunji kya ku Bushiya bwa Mukola,+ kuyangako ne. 7 Kange muvulañanye mwingilo wa yo yo nzubo ya Lesa ne. Kinemanga wa Bayudea ne bakulumpe ba Bayudea bakashimukulula yo yo nzubo ya Lesa ponka po yajinga kala. 8 Kabiji napana uno mukambizho wa bintu byo mwafwainwa kubila bano bakulumpe ba Bayudea pa kushimukulula yo yo nzubo ya Lesa: Mali akafuma mu kipao kya mfumu,+ ne a misonko ya ku Bushiya bwa Mukola, bakeapane bukiji ku bano banabalume kuba’mba bakatwajijile kwingila kwa kubula kuleka.+ 9 Kabiji kintu kyonse kikakebewanga, baana ba bañombe balume+ pamo na mikooko ilume+ ne baana ba mikooko+ ba milambo ya kusoka kwi Lesa wa mwiulu, wichi,+ mukele,+ binyu+ ne manyi+, byonkatu bañanga baji mu Yelusalema byo bakatongola, bakebapenga pa juba pa juba kwa kubula kuleka, 10 pa kuba’mba bakalambulenga milambo kimye kyonse itokesha Lesa wa mwiulu ku muchima ne kulombelako mfumu ne baana banji amba bekalenga na bumi.+ 11 Napana ne uno mukambizho wa kuba’mba, muntu yense ukazhilulula uno mukambizho, bakakulumune mwamba ku nzubo yanji kabiji awo muntu bakamushikule ne kumupopelapo, kabiji nzubo yanji ikaluke ke kyolonyi* kya bantu bonse na mambo a kulenga ano mambo. 12 Kabiji Lesa yenka walengejile jizhina janji kwikala momwa+ akonaune mfumu yense ne bantu bakatanyika kuboko kuba’mba bazhilulule uno mukambizho ne konauna nzubo ya Lesa iji mu Yelusalema. Amiwa Daliusa, yami nakambizha uno mukambizho. Kino kintu kyubiwe bukiji.”

13 Ponkapotu Tatenai kinemanga wa kibunji kya ku Bushiya bwa Mukola, ne Shetabozenai,+ ne balunda nabo baubile byonse byakambizhe Mfumu Daliusa. 14 Kabiji bakulumpe ba Bayudea batwajijile kushimika ne kuyilako palutwe,+ saka bebatundaika ku byaawilenga ngauzhi Hagai+ ne Zekaliya+ munkana wa kwa Ido; bapwishishe kwiishimika na mambo a mukambizho wa Lesa wa Isalela+ ne wa kwa Kilusa+ ne Daliusa+ ne Atazakeshi+ Mfumu wa Pelisha. 15 Bapwishishe kushimika nzubo pa juba ja busatu mu ñondo wa Adala* mu mwaka wa butanu na bumo wa bukalama bwa Mfumu Daliusa.

16 Kepo bena Isalela, bañanga, bena Levi,+ ne bantu bonse bafumine mu buzha bazhijikile* ino nzubo ya Lesa na lusekelo. 17 Kabiji pa kuzhijika ino nzubo ya Lesa bapaine bañombe balume 100, mikooko ilume 200, baana ba mikooko 400, kabiji bapaine bambuzhi balume 12 ba mulambo wa bubi wa bena Isalela bonse, monka mwayijile mikoka ya bena Isalela.+ 18 Kabiji batongwele bañanga mu mabumba abo ne bena Levi mu bipanyi byabo, kuba’mba bengilenga mwingilo wa Lesa mu Yelusalema,+ byonka byo kyanembwa mu buku wa Mosesa.+

19 Kabiji aba bafumine mu buzha baikele na Kijiilo kya Lupitailo pa juba ja bu 14 ja ñondo mutanshi.+ 20 Bañanga ne bena Levi, kwa kubula kwifumyako abo bene, betokeshe abo bene,+ onkao mambo bonse batokele; baipayile banyama ba Kijiilo kya Lupitailo ba bonse bafumine mu buzha, ba bakwabo bañanga ne babo bene. 21 Kepo aba babwelele kufuma mu buzha bajiile nyama, pamo na yense wajinga nabo kabiji wafumineko ku bubipisho bonse bwa bisaka bya bantu ba mu kyalo kuba’mba eye na kupopwela* Yehoba Lesa wa Isalela.+ 22 Kabiji baikele na Kijiilo kya Bashinkwa Babula Mbizho+ moba atanu na abiji saka basangalala, mambo Yehoba wibalengejile kusangalala kabiji walengejile mfumu wa Asilya kwibamwesha muchima wawama,+ kya kuba wibakwashishe* mu mwingilo wa nzubo ya Lesa wa kine, Lesa wa Isalela.

7 Byo bapwishishe kuba bino, mu kimye kya bukalama bwa kwa Atazakeshi+ Mfumu wa Pelisha, Ezela*+ wabwelele. Wajinga mwana wa kwa Selaya,+ Selaya mwana wa kwa Azaliya, Azaliya mwana wa kwa Hilikiya,+ 2 Hilikiya mwana wa kwa Shaluma, Shaluma mwana wa kwa Zadoka, Zadoka mwana wa kwa Ahituba, 3 Ahituba mwana wa kwa Amaliya, Amaliya mwana wa kwa Azaliya,+ Azaliya mwana wa kwa Melayota, 4 Melayota mwana wa kwa Zelahiya, Zelahiya mwana wa kwa Uzi, Uzi mwana wa kwa Buki, 5 Buki mwana wa kwa Abishua, Abishua mwana wa kwa Finease,+ Finease mwana wa kwa Eleaza,+ Eleaza mwana wa kwa Alona+ ñanga mukatampe. 6 Uno Ezela waishile kufuma ku Babilona. Wajinga muntu ukopolola* byambo wayukile* bingi Mizhilo ya kwa Mosesa,+ yonka Yehoba Lesa wa Isalela yo apaine. Mfumu wamupele bintu byonse byo alombele, mambo kuboko kwa Yehoba Lesa wanji kwajinga pe aye.

7 Bena Isalela bamo, bañanga, bena Levi,+ banyimbi,+ bakasopa ba pa bibelo+ ne bakalume* ba ku nzubo ya Lesa,+ bayile ku Yelusalema mu mwaka wa butanu na bubiji wa Mfumu Atazakeshi. 8 Kabiji Ezela wafikile ku Yelusalema mu ñondo wa butanu, mu mwaka wa butanu na bubiji wa mfumu. 9 Pa juba jitanshi ja ñondo mutanshi, waimene lwendo kufuma ku Babilona, kabiji wafikile mu Yelusalema pa juba jitanshi ja ñondo wa butanu, mambo kuboko kwa Lesa wanji kwajinga pe aye.+ 10 Ezela wanengezhezhe muchima* wanji kuba’mba akebekebe Mizhilo ya Yehoba ne kwiilondela,+ ne kufunjisha malamuna ayo ne bunchibamambo mu Isalela.+

11 Ino yo nkalata Mfumu Atazakeshi yo apele Ezela ñanga kabiji muntu ukopolola* byambo, shayuka* wa mikambizho ya Yehoba ne malamuna o apele bena Isalela:

12 * “Atazakeshi+ mfumu wa bamfumu, kwi Ezela ñanga kabiji muntu ukopolola* byambo bya Mizhilo ya Lesa wa mwiulu: Mutende mwane. Kabiji 13 napana mukambizho wa kuba’mba muntu yense wa mu bena Isalela uji mu bufumu bwami ne bañanga babo ne bena Levi ubena kukeba kuya ne obewa ku Yelusalema ayenga.+ 14 Mambo bakutuma kwi mfumu ne babulañana maana banji batanu na babiji kuba’mba ukamone inge Mizhilo ya Lesa yo uji* nayo, babena kwiilondela mu Yuda ne mu Yelusalema, 15 kabiji ukasende siliva ne ngolode, mfumu ne babulañana maana banji byo bapana kwi Lesa wa Isalela, yenka wikala mu Yelusalema, 16 pamo na siliva yense ne ngolode yo utambula* mu kibunji kyonse kya Babilona kubikapotu ne bupe bantu ne bañanga bo bapana ku nzubo ya Lesa wabo, iji mu Yelusalema.+ 17 Kabiji wafwainwa kupota bukiji na ano mali bañombe balume,+ mikooko ilume,+ baana ba mikooko,+ pamo na milambo yabo ya kajo+ ne milambo yabo ya binyu,+ kabiji ukebilambule pa kya kusokelapo bitapisho kya ku nzubo ya Lesa wobe mu Yelusalema.

18 “Kabiji kyonse kyo wamona’mba kyawama kwi obewa ne ku balongo bobe, wakonsha kwikyuba na siliva ne ngolode ikashalapo, monka mwayila kyaswa muchima wa Lesa wobe. 19 Kabiji bipe byonse byo bakupa bya mwingilo wa ku nzubo ya Lesa wobe, ukebibike ku meso a Lesa mu Yelusalema.+ 20 Kabiji bintu byonse bikwabo bikebewa bya ku nzubo ya Lesa wobe byo bakakukebela kupana, ukebipane kufuma mu kipao kya mfumu.+

21 “Amiwa, Mfumu Atazakeshi, napana uno mukambizho ku bonse balama bya buneme mu kibunji kya ku Bushiya bwa Mukola,* kuba’mba bintu byonse byo akemulomba Ezela+ ñanga kabiji muntu ukopolola* byambo bya Mizhilo ya Lesa wa mwiulu mukamupebyo bukiji, 22 kufika ku matalenta* a siliva 100, makolo* a wichi 100, mabbafi* a binyu 100,+ mabbafi a manyi 100,+ ne mukele+ wa kukankalwa kupima. 23 Bintu byonse byakambizha Lesa wa mwiulu byubiwe na mukoyo ku nzubo ya Lesa wa mwiulu,+ pa kuba’mba bukaji bukabule kwiya pa bufumu bwami amiwa mfumu ne baana bami.+ 24 Kabiji nemubuula namba kechi mwafwainwa kusonkesha musonko, mulambo+ nangwa musonko wa pa mukwakwa bañanga ne bena Levi, banyimbi,+ bakasopa ba pa bibelo, bakalume* ba ku nzubo ya Lesa+ ne ba mingilo ba ku ino nzubo ya Lesa ne.

25 “Kabiji obewa Ezela, monka mwayila maana a Lesa* o uji nao, tongola banchibamambo ne bamitonyi bakuchibila bantu mambo bonse baji mu kibunji kya ku Bushiya bwa Mukola, aba bonse bayuka mizhilo ya Lesa wobe; kabiji wafwainwa kufunjisha yense wabula kwiiyuka.+ 26 Kabiji muntu yense ubula kulondela Mizhilo ya Lesa wobe ne mizhilo ya mfumu bafwainwa kumuchibila mambo bukiji, kana kumwipaya, kumupanga, kumulipilisha mali, nangwa kumukasa.”

27 Atotwe Yehoba Lesa wa bashakulu betu, yenka wikibikile mu muchima wa mfumu kya kuwamisha nzubo ya Yehoba iji mu Yelusalema!+ 28 Kabiji wammwesha butemwe bubula kwaluka ku mfumu+ ne ku babulañana maana banji+ ne ku babinemanga bakatampe bonse ba mfumu. Onkao mambo, nachinchikile* mambo kuboko kwa Yehoba Lesa wami kwajinga pe amiwa, kabiji nakonkenye pamo mu bena Isalela banabalume bantangi* ba kuya pamo ne amiwa.

8 Bano bo bajinga bakulumpe ba bikota byabo ne kunembwa kwa bisemi bya boba bayile ne amiwa kufuma mu Babilona mu kimye kya bukalama bwa Mfumu Atazakeshi:+ 2 mu baana ba kwa Finease+ mwafumine Geleshoma; mu baana ba kwa Itamala+ mwafumine Danyela; mu baana ba kwa Davida mwafumine Hatushi; 3 mu baana ba kwa Shekaniya ba mu baana ba kwa Paloshi mwafumine Zekaliya, kabiji wajinga na banabalume 150 bo banembele; 4 mu baana ba kwa Pahata-moabu+ mwafumine Eliwenai mwana wa kwa Zelahiya, kabiji wajinga na banabalume 200; 5 mu baana ba kwa Zatu+ mwafumine Shekaniya mwana wa kwa Yahaziela, kabiji wajinga na banabalume 300; 6 mu baana ba kwa Adini+ mwafumine Ebeda mwana wa kwa Yonafwanyi, kabiji wajinga na banabalume 50; 7 mu baana ba kwa Elama+ mwafumine Yeshaya mwana wa kwa Ataliya, kabiji wajinga na banabalume 70; 8 mu baana ba kwa Shefwatiya+ mwafumine Zebadiya mwana wa kwa Mikela, kabiji wajinga na banabalume 80; 9 mu baana ba kwa Yoaba mwafumine Obadiya mwana wa kwa Yehiela, kabiji wajinga na banabalume 218; 10 mu baana ba kwa Bani mwafumine Shelomita mwana wa kwa Yosifiya, kabiji wajinga na banabalume 160; 11 mu baana ba kwa Bebai+ mwafumine Zekaliya mwana wa kwa Bebai, kabiji wajinga na banabalume 28; 12 mu baana ba kwa Azagada+ mwafumine Yohanana mwana wa kwa Hakatane, kabiji wajinga na banabalume 110; 13 mu baana ba kwa Adonikama,+ bapeleleko, ano o ajinga mazhina abo: Elifeleta, Yeyela ne Shemaya, kabiji bajinga na banabalume 60; 14 ne mu baana ba kwa Bigevwai+ mwafumine Utai ne Zakuli, kabiji bajinga na banabalume 70.

15 Nebakonkenye pamo ku mukola wasangila ku Ahaba,+ kabiji twaikele konkakwa moba asatu. Bino byo napeselepesele bantu ne bañanga, kechi nataainemo bena Levi ne. 16 Onkao mambo, natumine ba kwita Elieza, Aliela, Shemaya, Elenatana, Yaliba, Elenatana, Natana, Zekaliya ne Meshulama batangijilenga bantu, ne Yoyaliba ne Elenatana bonka bajinga bafunjishi. 17 Kepo nebakambizhe kuya kwi Ido ntangi wa mpunzha itelwa’mba Kasifya. Nebabuujile namba bakabuule Ido ne balongo banji, bakalume* ba ku nzubo ya Lesa bajinga mu Kasifya, kuba’mba betuleteleko ba mingilo ba ku nzubo ya Lesa wetu. 18 Na mambo a kuba kuboko kwa Lesa wetu kwajinga pe atweba, baletele muntu wa maana kufuma mu baana ba kwa Mali+ munkana wa kwa Levi mwana wa kwa Isalela, aye Shelebiya,+ ne baana banji ne balongo banji, bantu bonse pamo bajinga 18; 19 ne Hashabiya pamo ne Yeshaya wa mu bena Melali,+ balongo banji ne baana babo, bantu bonse pamo bajinga 20. 20 Ne bakalume* ba ku nzubo ya Lesa bajinga 220, bonka bo bapele mwingilo wa bena Levi kwi Davida ne babinemanga, bonse bo batongwele mazhina.

21 Kepo natayile mbila ya kuzhikilwa na nzala konkakwa ku mukola wa Ahaba, kuba’mba twipelule ku meso a Lesa wetu, ne kumulomba kuba’mba etutangijile pa lwendo lwetu, atweba ne baana betu ne bipe byetu byonse. 22 Naumvwine bumvu kulomba mfumu bashilikale ne boba benda pa bambili kuba’mba betuzhikijile ku balwanyi mu jishinda, mambo twabuujile mfumu amba: “Kuboko kwa Lesa wetu kuji pa bonse bamukeba,+ bino bulume bwanji ne bukaji bwanji buji pa boba bamukana.”+ 23 Onkao mambo, twazhikilwe na nzala ne kusashijila Lesa wetu pa mambo a kino, ne aye waumvwine misashijilo yetu.+

24 Kabiji nasajile bakulumpe 12 ba bañanga, abo ba Shelebiya ne Hashabiya+ pamo na balongo babo jikumi. 25 Kabiji nebapimijile siliva ne ngolode ne bipe, bya bupe byapaine mfumu ne babulañana maana banji ne babinemanga banji ne bena Isalela bonse bajinga kokwa bya ku nzubo ya Lesa wetu.+ 26 Byonkabyo, nebapimijile mu kuboko kwabo matalenta* a siliva 650, bipe bya siliva 100 byaesakana na matalenta abiji, matalenta a ngolode 100, 27 masanyi 20 a acheache afukumana a ngolode afwa madalika* 1,000, ne bipe bibiji bya mukuba wawama, wachila ubembela, kabiji wawama nobe ngolode.

28 Kepo nebambijile’mba: “Mwazhila kwi Yehoba,+ ne bipe nabyo byazhila, kabiji siliva ne ngolode ke mulambo wa kwifuukwila kwi Yehoba Lesa wa bashakulu benu. 29 Mwibilame bulongo posotu mukebipime ku meso a bakulumpe ba bañanga ne bena Levi ne babinemanga ba bikota bya bena Isalela mu Yelusalema,+ mu bibamba* bya mu nzubo ya Yehoba.” 30 Kabiji bañanga ne bena Levi basendele siliva ne ngolode ne bipe byonse byo bebapimijile, kuba’mba bebilete ku Yelusalema ku nzubo ya Lesa wetu.

31 Kepo twafumineko ku mukola wa Ahaba+ pa juba ja bu 12 mu ñondo mutanshi+ ne kuya ku Yelusalema, kabiji kuboko kwa Lesa wetu kwajinga pe atweba, kabiji witupokolwele mu maboko a balwanyi ne ku betubelamijile mu jishinda. 32 Byonkabyo, twafikile ku Yelusalema+ ne kwikalako moba asatu. 33 Kabiji pa juba ja buna, twapimine siliva ne ngolode ne bipe mu nzubo ya Lesa wetu+ ne kwibipana kwi Melemota+ mwana wa kwa Uliya ñanga, kabiji wajinga ne Eleaza mwana wa kwa Finease, ne abo bajinga na bena Levi, Yozabada+ mwana wa kwa Yeshua ne Noadiya mwana wa kwa Binuwi.+ 34 Bintu byonse bebibajile ne kwibipima, kabiji banembele kinemenezhi kya bintu byonse. 35 Aba bafumine mu buzha, bajinga bazha kala, bapaine bitapisho bya kusoka kwi Lesa wa Isalela, bañombe balume 12+ ba bena Isalela bonse, mikooko ilume 96,+ baana ba mikooko balume 77 ne bambuzhi balume 12+ ba mulambo wa bubi; bino byonse byajinga bya mulambo wa kusoka kwi Yehoba.+

36 Kepo twapaine mukambizho wa mfumu+ ku babitumbafumu* ba mfumu ne ku babinemanga ba kibunji kya ku Bushiya bwa Mukola,*+ ne abo bakwashishe bantu ne nzubo ya Lesa wa kine.+

9 Aku bapwishatu kuba bino bintu, babinemanga baishile kwi amiwa ne kwamba’mba: “Bena Isalela ne bañanga ne bena Levi kechi befumyako ku bantu ba mu byalo ne ku byubilo byabo bya bunya,+ bya bena Kenana, bya bena Hiti, bya bena Pelizi, bya bena Yebusi, bya bena Amonyi, bya bena Moabu, bya bena Ijipita+ ne bya bena Amoli ne.+ 2 Abo ne baana babo ba balume basongola baana ba bakazhi ba bano bantu.+ Pano abo baana* bazhila,+ bo babena kupwanañana na bantu ba mu byalo.+ Babinemanga ne bakalama ba kibiji bo bene balenga ano mambo a kubula bukishinka.”

3 Byo naumvwinetu kino kintu, natabwile kivwalo kyami ne mukangyo wami wabula maboko kabiji nayokwele nsuki yami imo ne myevu yami ne kwikala saka nakakilwa. 4 Kepo bantu bonse baakaminwenga* byambo bya Lesa wa Isalela bakonkene ne kunzhokoloka na mambo a kubula bukishinka kwa boba bafumine mu buzha, byo naikele saka nakakilwa kufikatu ne kimye kya mulambo wa kajo wa mabanga.+

5 Kabiji pa kimye kya mulambo wa kajo wa mabanga,+ naimene kufuma po naikele na bulanda, ne kivwalo kyami ne mukangyo wami wabula maboko saka byatabuka, kabiji nafukamine ne kutanyika maboko ami kwi Yehoba Lesa wami. 6 Kabiji naambile namba: “Anweba Lesa wami, naumvwa bumvu kabiji kyankatazha ne kwinuna kilungi kyami kwi anweba Lesa wami, mambo bubi bwetu bwavula kabiji bwakila ne pa mitwe yetu ne mambo etu afika ne mwiulu.+ 7 Kufumatu mu moba a bashakulu betu kufika ne lelo jino, mambo etu abaya;+ kabiji na mambo a bubi bwetu, atweba ne bamfumu betu ne bañanga betu betupana mu maboko a bamfumu ba mu byalo, ne ku mpoko,+ ne mu buzha,+ ne kwitwangata bintu,+ ne kwitulengesha bumvu, byonkatu byo kiji lelo jino.+ 8 Bino mu kakimye kacheche, anweba Yehoba Lesa wetu mwitubila bibusa kupichila mu kupulusha bashalapo ne kwitupa kifulo kyazhikijilwa mu mpunzha yenu yazhila+ kuba’mba meso etu asangalale, anweba Lesa wetu, ne kuba’mba twikale na bulume bucheche mu buzha bwetu. 9 Nangwa kya kuba twibazha,+ anweba Lesa wetu kechi mwitulekelela mu buzha bwetu ne; bino mwitumwesha butemwe bwenu bubula kwaluka ku bamfumu ba Pelisha,+ ne kwitupa bulume jikwabo kuba’mba tushimike nzubo yenu anweba Lesa wetu+ ne kushimukulula byakundauka byayo ne kwitupa nsakwa* ya mabwe mu Yuda ne mu Yelusalema.

10 “Pano anweba Lesa wetu, tusakwamba’mba ka pa kino? Mambo twaleka kulondela mikambizho yenu, 11 yonka yo mwitupele kupichila mu bakalume benu bangauzhi, amba: ‘Kyalo kyo mubena kuya na kutambula ke kyalo kiji na biko na mambo a biko bya bantu ba mu byalo, ne na mambo a byubilo byabo bya bunya byo bayuzhamo kufumatu ko kyatendekela kufika ne ko kyakapela na mambo a bubipisho bwabo.+ 12 Onkao mambo, kange mukasongweshenga baana benu ba bakazhi ku baana babo ba balume ne, nangwa kuswa kusongwesha baana babo ba bakazhi ku baana benu ba balume ne;+ kabiji kechi mukakebenga mutende wabo ne bunonshi bwabo ne,+ pa kuba’mba mukakose ne kuja bintu byawama bya mu kyalo ne kwikitambula kwikala ke kya baana benu kikupu.’ 13 Kabiji bintu byonse byo bitufikila na mambo a byubilo byetu byatama ne mambo etu akatampe, mambo anweba Lesa wetu, kechi mwitubila monka mwayila bubi bwetu ne,+ kabiji mwituswisha atweba tuji pano kupuluka,+ 14 nanchi twafwainwa kulala byepi jibiji mikambizho yenu ne kusongozhanya na bantu boba bino bintu bya bunya?+ Nanchi kechi mwakonsha kwituzhingijila ne kwituvizha kwa kubula nangwa umo ushalapo nangwa kupuluka nenyi? 15 Anweba Yehoba Lesa wa Isalela, mwaoloka,+ mambo atweba twapuluka yetu twashalapo kufika ne lelo jino. Tuji ku meso enu saka tuji na mambo, kyakatazha kwimana kwi anweba na mambo a kino.”+

10 Ezela byo alombelenga+ ne kusolola mambo na kujila saka alaala kinkuvumene ku nzubo ya Lesa wa kine, jibumba jikatampe ja banabalume, banabakazhi, ne baana ba bena Isalela bamuzhokolokele, mambo bantu bajijilenga bingi. 2 Kepo Shekaniya mwana wa kwa Yehiela+ wa mu baana ba kwa Elama+ aambijile Ezela amba: “Twamwesha kubula bukishinka kwi Lesa wetu pa kyo twauba kya kusongola* banabakazhi bangi ba mu bantu ba mu kyalo.+ Nangwa kiji bino, luketekelo ko luji ku bena Isalela. 3 Pano twayai tulayañane lulayañano na Lesa wetu+ kuba’mba tupange bakazhi bonse ne baana bo basema, monka mwayila lutangijilo lwa Yehoba ne lwa boba banemeka* mikambizho ya Lesa wetu.+ Twayai tubile monka mwayila Mizhilo. 4 Imanai, mambo uno ke mwingilo wenu, ne atweba tuji nenu. Kosai ne kwikyuba.”

5 Ponkapo Ezela waimene kabiji wachipishe bakulumpe ba bañanga ne bena Levi ne bena Isalela bonse kuba byo baambile.+ Byonkabyo bachipile. 6 Kepo Ezela afumine ku nzubo ya Lesa wa kine ne kuya ku kibamba* kya kwa Yehohanana mwana wa kwa Eliashiba. Nangwa kya kuba wayile kokwa, kechi wajiilepo kajo nangwa kutoma mema ne, mambo wajijilenga na mambo a kubula bukishinka kwa bantu bafumine mu buzha.+

7 Kepo batayile mbila mu Yuda monse ne mu Yelusalema kuba’mba bantu bonse bafumine mu buzha bakonkane pamo mu Yelusalema; 8 kabiji kwesakana na byafuukwile babinemanga ne bakulumpe, yense wabujile kwiya mu moba asatu bafwainwe kumwangata* bipe byanji byonse, ne kumupanga mu kipwilo kya bantu bonse bafumine mu buzha.+ 9 Onkao mambo, banabalume bonse Bayudea ne bena Benjamina bakonkene mu Yelusalema moba asatu, mu ñondo wa butanu na buna, pa juba ja bu 20 ja ñondo. Bantu bonse baikele mu kipango kya nzubo ya Lesa wa kine, saka bazakama na mambo a ano mambo ne na mambo a mvula mukatampe.

10 Kepo Ezela ñanga aimene ne kwibambila’mba: “Mwamwesha kubula bukishinka byo mwasongola banabakazhi bangi,+ kabiji mwanungapo pa mambo a bena Isalela. 11 Pano sololai mambo enu kwi Yehoba Lesa wa bashakulu benu ne kuba kyaswa muchima wanji. Ipaatulaiko ku bantu ba mu kyalo ne ku bano banabakazhi bangi.”+ 12 Ponkapo kipwilo kyonse kyakumbwile na jiwi ja peulu amba: “Tusakuba byonka byo mwaamba. 13 Nangwa byonkabyo, bantu bavula kabiji kino ke kimye kya mayoo. Kechi bakonsha kwimana pangye ne, ne ano mambo kechi asakupwa mu juba jimo nangwa mu moba abiji ne, mambo twasatuka bingi mu kino kintu. 14 Pano mwane lekai babinemanga betu bemeneko kipwilo kyonse;+ kabiji aba bonse baji mu mizhi yetu basongola banabakazhi bangi bakeye pa kimye kyatongolwa, pamo na bakulumpe ne bamitonyi ba mu mizhi yonse, posotu bukaji bwa Lesa wetu bukafumepo pe atweba na mambo a ano mambo.”

15 Nangwa byonkabyo, Yonafwanyi mwana wa kwa Asahela ne Yazeya mwana wa kwa Tikiba bakaine kino, kabiji bena Levi abo ba Meshulama ne Shabetai,+ baitabizhe byo baambile. 16 Bino aba bafumine mu buzha baubile byo balayañene; kabiji Ezela ñanga ne bakulumpe ba bikota byabo, bonse bo batongwele mazhina, bakonkene kwa bunke pa juba jitanshi ja ñondo wa bujikumi na kwisamba pa ano mambo; 17 kabiji pa juba jitanshi ja ñondo mutanshi bapwishishe kuchiba mambo a banabalume bonse basongwele banabakazhi bangi. 18 Kabiji bataaine’mba baana bamo ba bañanga basongwele banabakazhi bangi:+ mu baana ba kwa Yeshua+ mwana wa kwa Yehozadaka ne balongo banji mwajinga, Maaseya, Elieza, Yaliba ne Gedaliya. 19 Bino balayile* amba bakapanga bakazhi babo, kabiji na mambo o bajinga nao, bapaine mukooko mulume wa mambo abo.+

20 Mu baana ba kwa Imela,+ mwajinga Hanani ne Zebadiya; 21 ne mu baana ba kwa Halima+ mwajinga Maaseya, Elaija, Shemaya, Yehiela ne Uzaya; 22 kabiji mu baana ba kwa Pashula+ mwajinga Eliwenai, Maaseya, Ishimela, Netanela, Yozabada ne Eleasa. 23 Kabiji mu bena Levi, mwajinga Yozabada, Shimei, Kelaya (ko kuba’mba Kelita), Petahiya, Yuda ne Elieza; 24 ne mu banyimbi mwajinga Eliashiba; kabiji mu bakalama ba bibelo mwajinga Shaluma, Telema ne Uli.

25 Kabiji mu bena Isalela ba mu baana ba kwa Paloshi,+ mwajinga Lamiya, Iziya, Malakiya, Miyamina, Eleaza, Malakiya ne Benaya; 26 ne mu baana ba kwa Elama+ mwajinga Mataniya, Zekaliya, Yehiela,+ Abidi, Yelemota ne Elaija; 27 ne mu baana ba kwa Zatu+ mwajinga Eliwenai, Eliashiba, Mataniya, Yelemota, Zabada ne Aziza; 28 kabiji mu baana ba kwa Bebai+ mwajinga Yehohanana, Hananiya, Zabai ne Atalai; 29 ne mu baana ba kwa Bani mwajinga Meshulama, Maluka, Adaya, Yashuba, Sheala ne Yelemota; 30 kabiji mu baana ba kwa Pahata-moabu+ mwajinga Adina, Kelale, Benaya, Maaseya, Mataniya, Bezalela, Binuwi ne Manase; 31 ne mu baana ba kwa Halima+ mwajinga Elieza, Ishiyaja, Malakiya,+ Shemaya, Shimeona, 32 Benjamina, Maluka ne Shemaliya; 33 kabiji mu baana ba kwa Hashuma+ mwajinga Matenai, Matata, Zabada, Elifeleta, Yelemai, Manase ne Shimei; 34 mu baana ba kwa Bani mwajinga Maadai, Amulamu, Uwa, 35 Benaya, Bedeya, Keluhi, 36 Vaniya, Melemota, Eliashiba, 37 Mataniya, Matenai ne Yaasu; 38 ne mu baana ba kwa Binuwi mwajinga Shimei, 39 Shelemiya, Natana, Adaya, 40 Makanadebai, Shashai, Shalai, 41 Azalela, Shelemiya, Shemaliya, 42 Shaluma, Amaliya ne Yosefwa; 43 ne mu baana ba kwa Nebo mwajinga Yeyela, Matitiya, Zabada, Zebina, Yadai, Yoela ne Benaya. 44 Bano bonse basongwele banabakazhi bangi,+ kabiji bapangile bakazhi babo, pamo na baana babo.+