LWIMBO WA SOLOMONE
1 Uno ye lwimbo wa Solomone wakila nyimbo* yonse:+
3 Manyi obe o wishinga anunka bingi bulongo.+
Jizhina jobe jiji nobe manyi o baitulwila panshi.+
O ene mambo bansongwakazhi o bakutemenwa.
4 Nsende;* twaya tunyeme.
Mfumu wantwezha mu bibamba byanji bya mukachi!
Twaya tusekele ne kusangalela pamo.
Twaya twambenga* pa butemwe bobe kukila kwambanga pa binyu.
Kine bansongwakazhi bakutemwa bingi.
5 Anweba baana ba bakazhi ba mu Yelusalema, amiwa nangwa nafiita, bino nalamba bingi.
Nalambatu nobe matente a ku Keda,+ kabiji nobe bisapi bya ku matente+ a kwa Solomone.
6 Kange muntajishe na mambo a byo nafiita ne,
Nafiita na mambo a mute.
Bakolojami ba balume banzhingijiile;
Bañambijile’mba ndamenga majimi a miñanzañanza,
Pano bino, bujimi bwami bwa miñanzañanza nakankelwe kwibulama.
7 Obewa ye natemwa* bingi, mbuule
Ko ujiishisha mikooko yobe,+
Ko wiitwala na kukokoloka pa kushinkamana juba.
Mambo ka o nafwainwa kwikela nobe mwanamukazhi ye bavweta kisapi*
Mu mikooko ya balunda nobe?”
8 “Obewa walamba kukila banabakazhi bonse, umvwe kechi wayuka ne,
Londela mwaya mikooko
Ne kujiishisha baana ba bambuzhi bobe kwipi na matente a bakafunga.”
9 “Obewa mutemwe wami, nakwesakanya ku mbili* wa mukazhi wa ku makalaki a kwa Felo.+
10 Mabuta obe amweka bingi bulongo inge wavwala bya kwikobaika,*
Ne malungo obe byo azenzumukila mu nshingo yobe.
11 Tusakukulengela bya kwikobaika bya ngolode
Yo bavwangakanya na siliva.”
12 “Inge mfumu waikala ku tebulu wanji,
Manyi ami anunka bingi bulongo.+
13 Kyefu wami uji nobe kamutumwa ka manyi a mola anunka bulongo+
Kekala pa kyaji kyami bufuku bonse.
15 “Umvwa! Obewa mutemwe wami, walamba bingi.
Umvwa! Walamba bingi. Meso obe ajitu nobe a bankunda.”+
16 “Umvwa! Obewa kyefu wami wa buya,* kabiji uñumvwisha bingi bulongo ku muchima.+
Mwanya wetu uji nobe mabuula anekena.
17 Nzubo* yetu iji na bisomo bya bichi bya sida,
Ne myamba yayo yo ya bichi bya yunipa.
2 “Byonkatu bikala jiluba jiji mu miba
Byo biji ne mutemwe wami inge uji pa banabakazhi bakwabo.”
3 “Byonkatu bikala kichi kya maepo mu bichi bya mungye,
Byo biji ne mutemwe wami inge uji pa bansongwalume.
Nkebesha bingi kwikala mu kimfutele kyanji,
Kabiji kipangwa kyanji kyatobala bingi pa kwikija.
4 Wantwezhezhe mu nzubo* ya kijiilo,
Kabiji bantu bonse bamwene’mba wantemwa bingi.
6 Mutwe wami washakamina pa kuboko kwanji kwa kipiko,
Kabiji wankumbata na kuboko kwanji kwa kilujo.+
Kange munkanjikizhe nangwa kukolomona butemwe mwi amiwa ne, mwibuleke bukeishile bwine.+
8 Naumvwa kyefu wami ubena kwiya!
Talai! Awa wiyawa,
Ubena kukanjila pa mitumba ne kukilauka peulu ya tutumbatumba.
9 Kyefu wami uji nobe lupaala kabiji nobe mwana nsebula.+
Awa waimana mu bukonde bwa nzubo yetu,
Na kusumbila pa bipenze,
Ubena kutajila pa kyo bapikula.
10 Mutemwe wami ubena kuñambila’mba:
‘Buuka kyefu wami,
Obewa mutemwe wami walamba, lupuka twaya tuyenga.
11 Mona! Mayoo apwa.
Mvula wapwa, waleka kunoka.
12 Bichi byalala buluba mu kyalo,+
Kimye kya kukoopola bichi kyafika,+
Ne kwimba kwa katela kwaumvwanyika mu kyalo kyetu.+
13 Makuyu atanshi apya ku kichi kya mukuyu;+
Miñanzañanza yalala buluba kabiji ibena kununkila.
Buuka kyefu wami, twaya.
Obewa mutemwe wami walamba, twaya.
14 Obewa nkunda wami wikala mu mena a mu mabwe,+
Wikala mu jibwe,
Mbena kukeba kukumona ne kumvwa jiwi jobe,+
Mambo jiwi jobe jawama bingi, kabiji umweka bingi bulongo.’ ”+
15 “Tukwachilaiko balubwala,
Baana ba balubwala babena konauna majimi a miñanzañanza,
Mambo mañanzañanza etu apanga kala.”
16 “Kyefu ye wami, ne amiwa ne wanji.+
Ubena kujiishisha+ mikooko mu maluba.+
17 Juba saka jalemba* ne bimvule saka byazhimañana,
Ubwele bukiji, obewa mutemwe wami,
Waikala nobe lupaala+ nangwa mwana nsebula+ uji pa mitumba itwabanya.*
Nakebele bingi kumumona, pano bino kechi namumwene ne.+
Naubiletu kebee, bino kechi namutaaine ne.
3 Bakasopa bapitañenenga mu muzhi bantaaine.+
Nebepwizhe namba, ‘Mwamumonapo awa ye natemwa* nyi?’
4 Byo nebapitayijile
Namutaaine awa ye natemwa.*
Namukwachile, kabiji kechi namulekele namba ayenga ne
Kufikatu ne byo namuletele mu nzubo ya bamama,+
Mu kibamba kya mukachi kya mu nzubo ya bamama bonka bansemene.
5 Anweba banabakazhi ba mu Yelusalema, nemuchipisha,
Na balupaala ne bansebula ba mungye namba:
Kange munkanjikizhe nangwa kukolomona butemwe mwi amiwa ne, mwibuleke bukeishile bwine.”+
6 “Nanchi ki ka kye kibena kwiya kufuma mu kiselebwa nobe mumbulungwa wa bwishi,
Kyo basansako manyi a mola ne bintu binunka bulongo,
Ne bintu byonse bya bungabunga binunka bulongo bipotesha mupoteshi?”+
7 “Umvwai! Awe ye mwanya wa kwa Solomone.
Bamuzhokoloka ku banabalume makumi atanu na umo,
Babiyangala ba bena Isalela,+
8 Bonse baji na mapoko,
Bonse bebafunjisha bya kulwa nkondo,
Bonse pa muntu pa muntu balama mapoko
A kwizhikijilako ku bintu bilengesha moyo bufuku.”
10 Mashiki wialengele na siliva,
Pa kushakamina pajinga pa ngolode.
Pa kipona kyanji basonejilepo kisapi kyachiluluka kya boya bwa mukooko;
Mukachi bawamishemo bulongo
Ku banabakazhi ba mu Yelusalema.”
11 “Anweba banabakazhi ba mu Ziona, lupukai,
Mumone Mfumu Solomone
Wavwala munchinya* wa masongola wamusonejile bainanji+
Pa juba ja masongola anji,
Jo juba jo aji bingi na lusekelo.”
4 “Umvwa! Obewa kyefu wami, walamba bingi.
Umvwa! Obewa walamba bingi.
Meso obe amwekatu nobe a bankunda inge wizhika kakitambala ku meso.
Nsuki yobe iji nobe bambuzhi bavula
Babena kukunkuluka kufuma ku mitumba ya Gileada.+
2 Meno obe atoka ne kuwama, amwekatu nobe mikooko yo batenda boya
Yo bafumatu na kovwa,
Yonse yasema mapasa,
Kafwako nangwa umo wafwishapo mwana ne.
3 Byatunwa byobe byachilatu nobe tonge wachijisha,
Kabiji jiwi jobe jawama bingi.
Inge wizhika kakitambala ku meso
Mabuta* obe amwekatu nobe tubibese twa kipangwa kya mpomegulanchi.
4 Nshingo yobe+ imwekatu nobe kyamba kya kwa Davida,+
Kyo bashimika na mabwe o batanchika mu mikuku mikuku
Po bakobeka makebo avula bingi,
Makebo onse anzhingwile a babiyangala.+
6 “Juba saka jalemba* ne bimvule saka byazhimañana,
Amiwa nsakuya ku mutumba wa mola
Ne ku katumbatumba kuji bintu binunka bulongo.”+
8 Musongwa wami, twaya tufume ku Lebanoni,
Twaya tufume ku Lebanoni.+
Ufume ku mutumba wa Amaana,*
Ufume ku mutumba wa Senila, ku mutumba wa Helemone,+
Ufume ku mayengo a mabokwe ne ku mitumba kuji bisumpa.
9 Wansenda muchima obewa+ nyenga yami kabiji musongwa wami,
Wansenda muchima pa kuntalatu jimo,
Wansenda muchima na jilungo jimotu ja mu nshingo yobe.
10 Butemwe bobe byo bwawamapo obewa+ nyenga yami kabiji musongwa wami!
Butemwe bobe bwawama kukila binyu,+
Ne bwema bwa manyi o wisansa bwawama kukila kintu kyonse kinunka bulongo!+
11 Ku byatunwa byobe obewa musongwa wami, kuzuuma munzungwe wa buki.+
Buki ne mukaka biji munshi ya lujimi wobe,+
Kabiji bwema bwa bivwalo byobe bumvwanyika nobe bwema bwa ku Lebanoni.
12 Nyenga yami kabiji musongwa wami uji nobe luvimba ye babika ku mashamba,
Mashamba aji mukachi ka luvimba, kabiji nobe mushima ye bazhikapo kintu.
13 Kutenkuma* kobe kuji nobe paladisa* wa mapomegulanchi
Muji bipangwa byawamisha ne bichi bya hena ne bichi binunka bulongo,
14 Bichi bya nada+ ne maluba a safulonyi, maluba a museke+ ne kinamonyi,+
Ne bichi byonse binunka bulongo, nabiji mola ne maalo,+
Pamo na bintu byonse binunka bulongo.+
15 Obewa wi bujimi butupauka mema, mushima wa mema a munyango,
Kabiji wi tukola tupita mema twafuma ku Lebanoni.+
16 Obewa luvula ufumina ku kabeta ka ku buyeke, pupanga;
Obewa luvula ufumina ku kabeta ka ku bulenge, iya.
Pupila* pa bujimi bwami.
Bintu binunka bulongo bikumbane konse konse.”
“Kyefu wami eye mu bujimi bwanji
Kuba’mba aje bipangwa byawamisha bijimo.”
5 “Amiwa natwela mu bujimi bwami,+
Obewa nyenga yami kabiji musongwa wami.
Nasenda manyi a mola ne bintu byami binunka bulongo.+
Naja jipuma jami ja buki ne munzungwe;
Natoma binyu byami ne mukaka wami.”+
“Anweba balunda nami, jai!
Tomai ne kupendwa byambo bya butemwe!”+
2 “Nalaala, pano bino, muchima wami kechi walaala ne.+
Naumvwa mutemwe wami ubena kukonkonsha!”
“Nshinkwileko, obewa nyenga yami, kabiji kyefu wami,
Nkunda wami, obewa wabula kaneneno,
Mambo mutwe wami wazoba na kime,
Nsuki yami yazoba na kamfwa wa bufuku.”+
3 “‘Navuula munkukumba wami.
Nanchi nafwainwa kumuvwala jibiji nyi?
Naowa ku maulu ami.
Abya nafwainwa kwiatokolosha jikwabo nyi?’
4 Mutemwe wami waji kulekako ku kinzhilo,
Kabiji muchima wami waji kulukuta na mambo a aye.
5 Naimene kuba’mba namushinkwileko mutemwe wami;
Maboko ami azobele na manyi a mola,
Saka azunzuluka kufuma ku minwe yami,
Ne kunokela pa kya kushinkwilako kinzhilo.
6 Namushinkwijileko mutemwe wami,
Pano bino, nataaine mutemwe wami waya kala.
Kyankolele bingi* ku muchima byo ayile.*
Naubiletu kebee, bino kechi namutaaine ne.+
Namwichile, pano bino aye kechi wankumbwile ne.
7 Bakasopa bapitañenenga mu muzhi bantaaine.
Bampumine ne kunkozha.
Bakasopa basopanga nsakwa bañangachile kivwalo* kyami kya peulu.
8 Anweba banabakazhi ba mu Yelusalema, nemusashijila namba:
Inge mumutaane mutemwe wami,
Mumubuule’mba mbena kumutonga bingi.”
9 “Mutemwe wobe wawama byepi kukila bakwabo,
Obewa mwanamukazhi walamba kukila banabakazhi bakwenu?
Mutemwe wobe wawama byepi kukila bakwabo,
Kya kuba’mba witusashijilenga kuba bino?”
10 “Mutemwe wami walamba kabiji wachila;
Aye walamba kukila bantu 10,000.
11 Mutwe wanji umweka bulongo nobe ngolode, ngolode yawamisha.
Nsuki yanji imweka bulongo nobe mabuula* a bisonga epikankanya,
Yafiitatu bwii nobe kikwangala.
12 Meso anji amweka nobe a babembe baji ku tukola twa mema,
Babena kowa mu mukaka,
Baikala ku mema avula.
13 Mabuta anji aji nobe mulaala wa bichi binunka bulongo,+
Milumba ya bichi binunka bulongo.
Mivumbo yanji iji nobe maluba abena kuzunzuluka manyi a mola.+
14 Maboko anji abuluñana nobe ngolode, ye babikako mabwe a kisolite.
Jivumo janji jalezhima nobe jiino ja nzovu jo balamikapo mabwe a safila.
15 Maulu anji aji nobe mashiki o balenga na mabwe o baimika mu bitako bya ngolode yawamisha.
Umweka nobe mitumba ya Lebanoni kabiji umweka bulongo kukila bichi bya sida.+
Anweba banabakazhi ba mu Yelusalema, uno ye kyefu wami kabiji ye mutemwe wami.”
6 “Nanchi mutemwe wobe waya pi,
Obewa mwanamukazhi walamba kukila banabakazhi bakwenu?
Nanchi mutemwe wobe wa kuya jepi?
Twayai na kumukeba.”
2 “Mutemwe wami waya ku bujimi bwanji,
Ku milaala ya bichi binunka bulongo,
Na kufunga mikooko ku majimi awama
Ne na kusenda maluba.+
3 Amiwa yami mutemwe wanji,
Ne aye, ye wami.+
Aye ubena kufunga mikooko mu maluba.”+
4 “Obewa kyefu+ wami walambatu nobe muzhi wa Tilaza,*+
Wawamatu nobe Yelusalema,+
Ukumisha bantu byonka byo bakumya mazhita azhokoloka mabandela abo.+
5 Leka kuntala,+
Mambo ubena kundala muchima.
Nsuki yobe iji nobe bambuzhi bavula
Babena kukunkuluka kufuma ku mitumba ya Gileada.+
6 Meno obe atoka kabiji awama nobe mikooko
Yo bafumatu na kovwa,
Yonse yasema mapasa,
Kafwako nangwa umo wafwishapo mwana ne.
7 Inge wizhika kakitambala ku meso, mabuta* obe amwekatu nobe
Tubibese twa kipangwa kya mpomegulanchi.
9 Pajitu nkunda wami umo,+ wabula kaneneno.
Yenka ye batemwa bingi kwi bainanji.
Ye mwana ye batemwisha pa baana bonse.
Bansongwakazhi bamumona ne kumutakaika;
Ba muka mfumu ne bantombo nabo bamutakaika bingi.
10 ‘Ñanyi mwanamukazhi usama* nobe kyeya kya lukelo,
Umweka bulongo nobe ñondo,
Wakematu nobe kyeya kya juba,
Ukumisha bantu byonka byo bakumya mazhita azhokoloka mabandela abo?’”+
11 “Nayile mu bujimi bwa bipangwa biji na mileele+
Na kumona bintu bibena kukoma mu kimpachiko,
Na kumona umvwe miñanzañanza yasapuka,
Kabiji inge bichi bya mapomegulanchi byalala buluba.
12 Nobe mu kukopa kwa jiso,
Bintu byo nakebelenga,*
Byandengejile kukanjila makalaki a babinemanga* bami.”
13 “Bwela, bwela obewa mwina Shulema!
Bwela, bwela,
Kuba’mba tukumone!”
“Mambo ka o mubena kumutajila mwina Shulema?”+
“Aye uji nobe bipanyi* bibiji bibena kuzha!”
7 “Maulu obe amweka bingi bulongo mu makwabilo,
Obewa mwanamukazhi ye banemeka!
Mambwata obe amweka bulongo nobe bya kwikobaika,
Bintu byo balenga ku sendwe wayuka bya kulengalenga.
2 Mukubi wobe umweka nobe nsanyi yafukumana.
Binyu byavwangakana bitanwengatu monka kikupu.
Jivumo jobe jimweka nobe mulumba wa wichi,
Ye bazhokoloshako maluba.
3 Mabele obe amwekatu nobe baana babiji,
Ko kuba’mba mapasa a lupaala.+
4 Nshingo yobe+ imwekatu nobe kyamba kyo bashimika na meno a banzovu.+
Moona wobe umwekatu nobe kyamba kya ku Lebanoni,
Kyatala ku Damasakasa.
5 Minchinya ya ku mutwe wobe imweka nobe mutumba wa Kamela,+
Mfumu wamongola* muchima na mambo a nsuki yobe yalepa.
6 Walamba bingi, kabiji umweka bingi bulongo,
Obewa nsongwakazhi ye natemwa kukila bintu byonse byawama!
7 Obewa walepatu nobe kichi kya bisonga,
Kabiji mabele obe ajitu nobe bizanze bya mañanzañanza.+
8 Naambile namba, ‘Nkakanjila ku kichi kya bisonga
Na kukopolako misampi iji na bipangwa.’
Mabele obe ekale nobe bizanze bya mañanzañanza,
Muya ufuma mu kanwa kobe ekale nobe bwema bwawama bwa maepo,
9 Kabiji kanwa* kobe kekale nobe binyu byawama.”
“Bipitenga bulongo mu kanwa ka mutemwe wami,
Byonka bipita binyu pa mujibu ne kulengela bantu kulaala tulo.
10 Amiwa yami kyefu wanji,+
Kabiji aye ukebesha bingi kummona.
12 Twaya tubuuke lukelokelo, tuye mu majimi a miñanzañanza
Na kumona umvwe miñanzañanza yasapuka,
Umvwe yalala buluba,+
Umvwe bichi bya mapomegulanchi byalala buluba.+
Ko ko nkakumweshesha butemwe bwami.+
Obewa mutemwe wami, nakulamina,
Bipangwa byonse bya katataka ne bya kala.
8 “Nanchi inge wajinga nobe kolojami wa mulume,
Waaminwe ku mabele a bamama!
Umvwe nakutaaine pangye inge nakufyompele,+
Kabiji inge kafwako muntu nangwa umo wakonsheshe kunkalakanya ne.
Inge nakupele binyu byo bavwangamo bintu binunka bulongo kuba’mba utome,
Binyu bya bintonto byafuma ku bipangwa bya mapomegulanchi.
3 Inge mutwe wami washakamijile pa kuboko kwanji kwa kipiko,
Kabiji inge wankumbachile na kuboko kwanji kwa kilujo.+
4 Anweba banabakazhi ba mu Yelusalema, nemusashijila namba:
Kange munkanjikizhe nangwa kukolomona butemwe mwi amiwa ne, mwibuleke bukeishile bwine.”+
5 “Ñanyi we ubena kwiya kufuma mu kiselebwa,
Saka akumbata mutemwe wanji?”
“Amiwa nakubuushishe munshi ya kichi kya maepo.
Bainobe mo baumvwijile bisanso byobe.
Monkamwa aba bakusemene mo baumvwijile bisanso pa kukusema.
6 Umbiike mu muchima wobe nobe katetesho,
Umbiike pa kuboko kobe nobe katetesho,
Mambo butemwe buji na bulume nobe lufu,+
Kabiji bukishinka buji na lunkonena nobe Kilende.*
Bulume bwabo bujitu nobe lubebe lwa mujilo, lo lubebe lwa kwa Yehoba.+
7 Mema avula kechi akonsha kuzhimya butemwe ne,+
Nangwatu mikola nayo kechi yakonsha kwibuzhimañanya ne.+
Umvwe muntu wapana bya bunonshi byanji byonse bya mu nzubo yanji na mambo a butemwe,
Abyo* bakonsha kwibilengulula.”
8 “Tuji na nyenga yetu mwanyike,+
Ukyangye kututuka mabele.
Tukooba byepi na nyenga yetu
Pa juba jo bakamwipanguzha?”
9 “Aye inge yo nsakwa,
Tukashimika peulu yanji kyamba kya siliva,
Bino aye inge kyo kinzhilo,
Tukamushinka na jipulanga ja kichi kya sida.”
10 “Amiwa yami nsakwa,
Kabiji mabele ami aji nobe byamba.
Onkao mambo, kwi aye nji nobe muntu
Waikala mu mutende.
11 Solomone wajinga na bujimi bwa miñanzañanza+ mu Baela-hamona.
Wapaine bujimi ku ba kwibulama.
Bonse pa muntu pa muntu baletelenga mali a siliva 1,000 a bipangwa bya mu bujimi.
12 Amiwa mwine nji na bujimi bwami.
Mali a siliva 1,000, o obe obewa Solomone,
Kabiji mali a siliva 200, a boba balama bipangwa bya mu bujimi.”
13 “Obewa wikala mu majimi,+
Balunda bomvwa byo wamba.
Leka ne amiwa ñumvweko.”+
14 “Endesha, obewa mutemwe wami,
Kabiji nyema lubilo nobe lupaala+
Nangwa nobe mwana nsebula
Uji pa mutumba wa bichi binunka bulongo.”
Nangwa’mba “Lwimbo wawama bingi.”
Mu Kihebelu, “Unkoke.”
Nangwa’mba “tutongaulenga.”
Nangwa’mba “mweo wami ye atemwa.”
Nangwa’mba “kisapi kya majila.”
Nangwa’mba “mbili wami.”
Nangwa, “bya kubika mu nsuki.”
Nangwa’mba “walamba.”
Nangwa’mba “nzubo ikatampe.”
Mu Kihebelu, “nzubo ya binyu.”
Mu Kihebelu, “juba saka japema.”
Nangwa, “kwapela mutumba.” Nangwa’mba “mitumba ya Betela.”
Nangwa’mba “mweo wami ye atemwa.”
Nangwa’mba “mweo wami ye atemwa.”
Nangwa’mba “mweo wami ye atemwa.”
Nangwa’mba “mweo wami ye atemwa.”
Mwanya ye bavweta ye basendelangapo muntu ye banemeka.
Nangwa’mba “maluba; kisochi.”
Nangwa’mba “munshi kwapela kilungi.”
Mu Kihebelu, “juba saka japema.”
Nangwa’mba “Mutumba wajinga kwipi na Lebanoni.”
Nangwa, “kikoba.”
Nangwa’mba “bujimi.”
Nangwa’mba “Pupa pachepache.”
Nangwa’mba “Mweo wami walupukile.”
Nangwa, “Mweo wami wanshile aye byo aambile.”
Nangwa’mba “kitambala.”
Nangwa, “bipanga ku bisonga.”
Mu Kihebelu, “lujimi.”
Nangwa’mba “Muzhi Wawama.”
Nangwa’mba “munshi kwapela kilungi.”
Mu Kihebelu, “utala panshi.”
Nangwa’mba “byakebelenga mweo wami.”
Nangwa’mba “bepana.”
Nangwa’mba “kuzha kwa Mahanaimu.”
Mu Kihebelu, “mutwe wobe.”
Nangwa’mba “wamukasa.”
Mu Kihebelu, “lujimi.”
Nangwa’mba “Shelo,” ko kuba’mba, kilende kya bantu bonse. Monai Mutanchi.
Nangwa, “Aye.”