NKALATA KU BENA FILIPAI

1 Amiwa Paulo ne Timoti, bakalume ba kwa Kilishitu Yesu, kwi anweba bazhijikwa bonse ba mwi Kilishitu Yesu baji mu Filipai,+ pamo na bakalama ne bankwasho mu kipwilo:+

2 Lusa lukatampe ne mutende bifuma kwi Lesa Tata ne Nkambo Yesu Kilishitu bikale pe anweba.

3 Kimye kyonse namusanchila Lesa wami byo nemuvuluka 4 mu milombelo yami ya misashijilo yo nsashijilako anweba bonse. Na lusekelo nemulombelako anweba bonse namisashijilo+ 5 na mambo a kuba mwalengela* mambo awama kwenda bulongo kufumatu kimye kitanshi kufika ne kino kimye. 6 Kabiji naketekela kino kintu namba, awa watendekele kwingila mwingilo wawama mwi anweba, ukamwingila yense+ kufikatu ne ku juba ja Kilishitu Yesu.+ 7 Kyamfwainwa amiwa kulanguluka bino pe anweba bonse, mambo nemuvuluka mu muchima wami, yenka anweba bo baubila lusa lukatampe pamo ne amiwa ne kwikala mu minyololo yami yo bankasa+ ne kulwila mambo awama ne kutambula luusa lwa kwiasapwila.+

8 Lesa ye kamonyi wami pa byo nakebesha kwimumonapo anweba bonse mambo nemutemwa byonkatu Kilishitu Yesu byo emutemwa. 9 Kabiji nalomba ne kino namba, butemwe bwenu buyengatu na kubaya+ pamo na kuyukisha bulongo+ bintu ne kwikala na milangwe yonse;+ 10 kuba’mba muyuke bintu byanemesha,+ pa kuba’mba mwikale babula mambo ne kubula kutuntwisha bakwenu+ kufikatu ne ku juba ja Kilishitu; 11 ne kuba’mba muyule bipangwa bya bololoke bishila mwi Yesu Kilishitu,+ bya kumuletela Lesa lukumo ne lutotelo.

12 Balongo bami, nakeba namba muyuke’mba bintu byammwekejile byalengela mambo awama kukoma, 13 kya kuba kukaswa kwami mu kaleya+ na mambo a Kilishitu kwayukanyikwa+ ku bonse Bakapaso ba ku Kipango kya Mfumu ne bantutu bakwabo. 14 Kabiji balongo bavula ba mwi Nkambo bakosa na mambo a minyololo yami yo bankasa, kabiji bonse babena kuchinchika byo babena kwamba mambo a Lesa kwa kubula moyo.

15 Ibyo kuba’mba bamo babena kusapwila pe Kilishitu na mambo a kichima ne lupato, bino bakwabo babena kusapwila na mambo a muchima wawama. 16 Bano bapelako basapwila Kilishitu mu butemwe, mambo bayuka’mba amiwa natongolwa kwialwila mambo awama;+ 17 Aba batanshi basapwila na mambo a mapata, kechi basapwila na muchima wawama ne, mambo babena kukeba kunkatazha byo nakaswa mu kaleya. 18 Ñanyi bintu bifumamo? Mu mashinda onse bantu o basapwilamo nangwa mu kwibepekezha nangwa mu bukine, Kilishitu babena kumusapwila, kabiji amiwa natemwa pa mambo a kino. Kabiji nkatwajijila kusekela, 19 mambo nayuka kino namba kikandengela kupuluka kupichila mu milombelo yenu ya misashijilo+ ne na bukwasho bwa mupashi ye apana Yesu Kilishitu.+ 20 Kino kyayilamo na bintu byo mbena kutengela ne na luketekelo lwami kuba’mba kechi kikandenga bumvu mu kintu nangwa kimo ne, bino amba na mambo a kukasuluka pa kwamba, byonka byo kikala jonse, Kilishitu luno usakutumbijikwa na mambo a mubiji wami, nangwa nji na bumi nangwa nafwa.+

21 Umvwe naikala mumi, ngikala na mambo a Kilishitu,+ umvwe nafwa yami mmwenamo.+ 22 Pano byo nkiji mumi mu mubiji, nkapanganga bipangwa byavula mu mwingilo wami; pano bino kintu kyo nasalapo kechi nekisolola ku bantu ne. 23 Kabiji bantabankanya ku bino bintu bibiji, mambo nakebesha bingi kukasululwa ne kwikala ne Kilishitu,+ mambo kyo kyakijishamo kuwama.+ 24 Nangwa byonkabyo, kyamfwainwa amiwa kukikala mu mubiji na mambo a anweba. 25 Onkao mambo, naketekela namba nkekalanga ne anweba bonse na mambo a kwimukomesha ne na lusekelo lwiya na mambo a lwitabilo lwenu, 26 pa kuba’mba kutotwa kwenu kubaye mwi Kilishitu Yesu na mambo a amiwa byo nkekala nenu jibiji.

27 Mwafwainwa kumonanga’mba mubena kwikala* bwikalo bwa mwayila mambo awama aamba pe Kilishitu,+ kuba’mba nangwa naiya na kwimumona nangwa mfwako, nkomvwe ne kuyuka’mba mwaimana bakosa mu mupashi umo, na mweo* umo,+ saka mwingijila pamo kuba’mba mwikale na lwitabilo mu mambo awama, 28 ne kubula kwimubisha moyo ku balwanyi benu. Kino kikekala kiyukilo kya lonaiko+ kwi abo, bino kwi anweba kikekala kya lupulukilo;+ kabiji kino kyafuma kwi Lesa. 29 Mambo anweba bemupa uno mwingilo kwimenako Kilishitu, kechi kumwitabilatu ne, bino ne kumanama na mambo a aye.+ 30 Mambo ne anweba mubena kumanama byonka byo mwammwene na kumanama,+ byonka byo mubena kumvwa’mba ne luno nkimanama.

2 Umvwe mwitundaika mwi Kilishitu, umvwe mwitekenesha mu butemwe, umvwe mupwanañana ku mupashi,* umvwe mwitemwa anwe bene na bene ne kwiubila kifyele, 2 ndengelai kwikala na lusekelo lukatampe pa kumwesha’mba muji na mulanguluko umo ne na butemwe bumo saka mwakwatankana,* ne kwikala na mulanguluko umo.+ 3 Kange mubenga bintu na mapata+ nangwa na kwitota kwatu ne,+ bino na muchima wa kwipelula saka mulanguluka’mba bakwenu bemukila,+ 4 saka muta muchima ku bintu bya bakwenu+ kabiji kange mulangulukengatu pa bintu byenu byonka ne.+

5 Ikalai na uno muchima wajingapo ne Kilishitu Yesu,+ 6 aye nangwa kya kuba wajinga nobe Lesa,+ kechi walangulukile’mba kwesakana ne Lesa kyo kintu kyo afwainwe kukebesha ne.+ 7 Bino aye washile bintu byonse byo ajinga nabyo ne kwaluka nobe muzha+ kabiji waikele ke muntu.*+ 8 Kabiji byo aalukile ke muntu, wipelwile mwine ne kukookela kufikatu ne ku lufu+ lwa pa kichi* kya lumanamo.+ 9 Na mambo a kino, Lesa wamupele kifulo kikatampe+ ne jizhina jakila mazhina onse,+ 10 kuba’mba mu jizhina ja Yesu manungo onse akafukame panshi—a bonse baji mwiulu ne a baji pano pa ntanda ne a boba baji munshi ya ntanda+— 11 kabiji njimi yonse yafwainwa kwamba patoka amba Yesu Kilishitu ye Nkambo+ mu kumuletela lukumo Lesa Tata.

12 Onkao mambo, anweba batemwe, byonkatu byo mukookela kimye kyonse, kechi mu kimyetu kyo nji nenu ne, bino ne mu kimye kyo mbula kwikala nenu, ikalainga na moyo ne kuzakama byo mubena kwibikishako kuba’mba Lesa akemupulushe. 13 Mambo Lesa byo kyamutokela ku muchima, ubena kwimukosesha ne kwimupa kizaku ne bulume bwa kwingila. 14 Bintu byonse byo muba, byubainga kwa kubula kunyinyita+ ne mapata,+ 15 pa kuba’mba mwikale babula kaneneno kabiji babula mambo, baana ba Lesa+ babula bulema mu kisemi kyatama kabiji kyaluwankana,+ mo mubena kusama nobe byeya pano pa ntanda,+ 16 saka mwakwachisha ku mambo apana bumi.+ Po po nkekala na lusekelo mu juba ja Kilishitu, byo nayuka’mba kechi nanyemene kyatu nangwa kwingila na ngovu kyatu ne. 17 Pano bino, nangwa kya kuba babena kungichila nobe mulambo wa binyu+ pa kitapisho+ ne mwingilo wazhila ye mwingila na mambo a lwitabilo lwenu, natemwa ne kusekela pamo ne anweba bonse. 18 Ne anweba mwafwainwa kusekela pamo ne amiwa.

19 Naketekela mwi Nkambo Yesu kwimutumina Timoti+ katataka, kuba’mba nkatundaikwe inge nkomvwe byo mubena kwikala. 20 Mambo kechi njipo na muntu mukwabo wa kwimutumina uji na muchima nobe aye ukateshako muchima ku bijikila byenu ne. 21 Mambo bonse babena kukeba kwiubila bintu byabo bene, kechi bintu bya kwa Yesu Kilishitu ne. 22 Bino anweba mwayuka byo elumbulwile mwine, byonka byuba mwana uji na shanji,+ aye waingijile ne amiwa mu kutwala palutwe mambo awama. 23 Onkao mambo, ye ye mbena kwimutumina katataka byo mbena kukipembelela kumona mo nsakwikela. 24 Naketekela mwi Nkambo namba ne amiwa mwine katatakatu nkeye.+

25 Bino pa kino kimye namona namba kyawama kwimutuminako Epafolodita mulongo wami, mukwetu wa mwingilo, mushilikale mukwetu, kabiji muluwe wenu kabiji kalume wami mu byo nakajilwa,+ 26 mambo aye wakebesha bingi kwimumona anweba bonse kabiji wapopomenwa bingi na mambo a kuba mwaumvwine’mba wakolwa. 27 Kine wakolelwe bingi pepi kufwa; bino Lesa wamubijile lusa, kechi aye yenkatu ne, bino ne amiwa pamo, kuba’mba mbule kwikala na bulanda bukatampe. 28 Onkao mambo, mbena kumutuma bukiji, kuba’mba byo mukamumona mukasekele jibiji, ne amiwa nkakepesheko bijikila byami. 29 Byonkabyo, mutambwilai byonka byo mutambwila bonse mwi Nkambo na lusekelo lonse, kabiji saka munemeka bantu ba uno mutundu,+ 30 mambo aye kwashajiletu pacheche kufwa na mambo a mwingilo wa Kilishitu,* kabiji wabikile bumi* bwanji mu kizumba pa kuba’mba añingijile mwingilo ye mwafwainwe kuñingijila mambo kechi mwajinga kuno ne.+

3 Kyapelako, balongo bami, sekelainga mwi Nkambo.+ Kechi kinkatazha kwimunembela bintutu bimo ne, kabiji kino kikemukwasha.

2 Jimukai na bantu baji nobe bakabwa, jimukai na bantu boba byatama; jimukai na bantu batundaika mukanda.*+ 3 Mambo atweba twi ba mukanda wa kine,+ atweba tubena kwingila mwingilo wazhila na mupashi wa Lesa ne kwitotela mwi Kilishitu Yesu+ kabiji kechi twaketekela mu bintu bya ku mubiji ne, 4 inge kuji mukwabo waketekela mu bintu bya ku mubiji, amiwa namukila.

Umvwe muntu mukwabo ulanguluka mwine amba waketekela mu bintu bya ku mubiji, amiwa nji na byavula: 5 bantwajile ku mukanda pa juba ja butanu na busatu,+ amiwa ne wa mu kisaka kya bena Isalela, ne wa mu mukoka wa bena Benjamina, yami Muhebelu+ wasemwa ku Bahebelu; mwayila mizhilo, najinga Mufaliseo;+ 6 mwayila mukoyo, namanyikilenga kipwilo;+ mwayila bololoke bwaimena pa mizhilo, najinga wabula kaneneno. 7 Nangwa byonkabyo, bintu byo namwenangamo, nebimona kwikala ke byatutu* na mambo a Kilishitu.+ 8 Kabiji kunungapo, bintu byonse nebimona kwikala ke byatutu na mambo a kuwama kwine kwa kuyuka Kilishitu Yesu Nkambo yami. Na mambo a aye naela bintu byonse ne kwibimona kwikala binchatu* kuba’mba mmwenemo Kilishitu 9 ne kutanwa mwi aye, kechi na mambo a bololoke bwami bwishila mu kulondela Mizhilo ne, bino ke na mambo a bololoke bwishila mu kwikala na lwitabilo+ mwi Kilishitu,+ bololoke bufuma kwi Lesa bwaimena pa lwitabilo.+ 10 Kyo mbena kukebesha ke kumuyuka ne kuyuka bulume bwamusangwile+ ne kupita mu bintu byo amanamine,+ ne kufwa lufu lo afwilepo,+ 11 kuba’mba mmone umvwe nakonsha kwikala mu lusanguko lutanshi lwa bafwa.+

12 Kechi mbena kwamba namba natambula kala kilambu nangwa’mba nalumbuluka kala ne, bino mbena kwibikishako+ kuba’mba mmone inge nakonsha kutambula akya kyalengejile Kilishitu Yesu kunsala.*+ 13 Balongo bami, kechi nalanguluka namba nekitambula kala ne; bino kokiji kimo kyo nguba: Mvulama bintu bya kunyuma+ ne kukanamina bintu bya kulutwe,+ 14 mbena kunyema namba nkatambule kilambu kya lwito+ lwa mwiulu+ lufuma kwi Lesa kupichila mwi Kilishitu Yesu. 15 Onkao mambo, atweba bonse twakoma ku mupashi+ twikale na uno muchima, kabiji umvwe kya kuba muji na muchima ungi, Lesa ukemusolwela muchima wawama. 16 Nangwa byonkabyo, monka mo twaendelako kala kufika ne pano po tuji, twayai twendenga bulongo monkamo.

17 Balongo bami, kwatankenai pamo mu kundondela+ ne kutajisha aba babena kwenda mwayila bwikalo bo twaikele. 18 Mambo kuji bavula—nebatelanga javula bingi pano luno nebatela saka njila—baikala balwanyi ba kichi* kya lumanamo kya Kilishitu. 19 Mpelo yabo lo lonaiko, kabiji jivumo jabo ye lesa wabo, ne lukumo lwabo bo bumvu bwabo, kabiji bata muchima ku bintu bya pano pa ntanda.+ 20 Bino atweba twi bangikazhi+ ba mwiulu,+ kabiji tubena kutengela mupulushi kufuma mwiulu, aye Nkambo Yesu Kilishitu,+ 21 yenka ukalula mibiji yetu ipelula kwikala* nobe mubiji wanji wa lukumo+ mu bulume bwanji bukatampe bumulengela kukookesha bintu byonse kwi aye mwine.+

4 Onkao mambo, anweba balongo bami bo natemwa, bo nkebesha kumona, lusekelo lwami ne munchinya wami,+ kosai+ mwi Nkambo anweba batemwe bami.

2 Nasashijila Yodia kabiji nasashijila Shinchike namba bekale na mulanguluko umo mwi Nkambo.+ 3 Kine, nakusashijila ne obewa mukwetu wa kine wa mwingilo, kuba’mba ukwashenga bano banabakazhi baingijilenga* ne amiwa na mambo a mambo awama, pamo ne Kilemente ne bonse bakwetu ba mingilo bashala, baji na mazhina abo mu buku wa bumi.+

4 Sekelainga mwi Nkambo kimye kyonse. Nemwambila jibiji namba, Sekelainga!+ 5 Kukooka muchima kwenu+ kuyukanyikwe ku bantu bonse. Nkambo uji pepi. 6 Kange mubambishenga michima yenu na mambo a kintu nangwa kimo ne,+ bino mu bintu byonse mu lulombelo ne milombelo ya misashijilo pamo na kusanta, saka musolola kwi Lesa bintu byo mukeba;+ 7 kabiji mutende+ wa Lesa wakila milanguluko ya bantu ukalama michima+ ne milanguluko yenu kupichila mwi Kilishitu Yesu.

8 Kyapelako, balongo bami, langulukainga* pa bintu bya kine, bintu byanema, bintu byaoloka, bintu bilengela muntu kwilama bulongo, bintu bileta butemwe, bintu bitelwa bulongo, bintu byawamisha, ne bintu byafwainwa kutotwa ku bantu.+ 9 Bintu byo mwafunjile kabiji byo mwatambwile ne kumvwa kabiji byo mwamwene mwi amiwa, byubainga,+ ne Lesa wa mutende ukekala ne anweba.

10 Nasekela bingi mwi Nkambo kuba’mba luno mwatendeka kumvuluka jibiji.+ Nangwa kya kuba mwantele muchima, mwakankelwe kwikalapo na kimye kya kumwesheshamo kino. 11 Kechi mbena kwamba kino na mambo a kuba nakajilwa bintu ne, mambo nafunda kala kusekela mu bintu byonka byo nji nabyo, kechi na mambo a bwikalo bwami byo buji ne.+ 12 Nayuka mwa kwikela umvwe nakajilwa+ nangwa umvwe nji na bintu byavula. Kabiji mu bintu byonse ne mu bwikalo bonse nafunda kyafyamika kya kusekela nangwa naikuta nangwa nafwa nzala, nangwa nji na bintu byavula nangwa mfwabyo. 13 Mambo bintu byonse nji na ngovu ya kwibyuba na mambo a yewa umpa bulume.+

14 Nangwa byonkabyo, mwaubile bingi bulongo byo mwankwashishenga mu kumanama kwami. 15 Anweba bena Filipai mwayuka ne kuba’mba byo mwafunjile mambo awama kimye kitanshi, ne byo nafumine ku Makedonya, kafwako kipwilo kyankwashishe nangwa kutambula bukwasho bwami ne, kanatu anweba yenka;+ 16 mambo byo najinga mu Tesalonika mwantumijile bintu byo nakajilwe, kechi jimotu ne, bino jibiji. 17 Kechi naamba kino na mambo a kukeba kya bupe ne, bino mbena kukeba namba mingilo yenu yawama imuletele bunonshi bwavula. 18 Nangwa byonkabyo, nji na bintu byonse byo nkeba kabiji byavula. Kechi nakajilwapo kintu nangwa kimo ne, mambo natambula kwi Epafolodita+ bintu byo mwantumina, bo bwema bwawama,+ kyo kitapisho kyaitabilwa kitokesha Lesa ku muchima. 19 Kupichila mwi Kilishitu Yesu, Lesa ukemupa bintu byonse byo mwakajilwa+ monka mwayila bunonshi bwa lukumo lwanji. 20 Pano kwi aye Lesa wetu Tata kwikale lukumo myaka ne myaka. Amena.

21 Ñimwinaiko bonse bazhijikwa ba mwi Kilishitu Yesu. Balongo bo nji nabo kuno bemwimuna. 22 Bonse bazhijikwa kikatakata ba mu nzubo ya kwa Kesala,+ bemwimuna.

23 Lusa lukatampe lwa Nkambo Yesu Kilishitu lwikale na muchima ye mumwesha.