NKALATA YA BUBIJI KWI TIMOTI

1 Amiwa Paulo mutumwa wa Kilishitu Yesu monka mwaswila muchima wa Lesa, ne mwayila mulaye wa bumi walayilwe kupichila mwi Kilishitu Yesu,+ 2 kwi obewa Timoti mwanami ye natemwa:+

Lusa lukatampe ne kifyele ne mutende bifuma kwi Lesa Tata ne kwi Kilishitu Yesu Nkambo yetu bikale pe obewa.

3 Namusanchila Lesa, ye ñingijila mwingilo wazhila na jiwi ja mu muchima jatoka byonka byaingijilenga bashakulu bami, byo mbula kuleka kukuvuluka mu milombelo yami ya misashijilo bufuku ne mute. 4 Inge navuluka mipolo yobe, nkebesha kukumonapo namba ngyule na lusekelo. 5 Mambo mvuluka lwitabilo lobe lwabula bujimbijimbi,+ lonkalwa lwajingapo na bankambo yobe ba bakazhi ba Loisa ne bainobe ba Yunisa, lo naketekela namba luji ne mwi obewa.

6 Onkao mambo, mbena kukuvululamo namba uteemeshenga nobe mujilo akya kya bupe kya Lesa kyo watambwile kimye kyo nakutentekele maboko.+ 7 Mambo Lesa kechi witupele mupashi wa moyo ne,+ bino witupele wa bulume+ ne wa butemwe ne wa kwitulengela kulanguluka bulongo. 8 Onkao mambo, obewa kechi wikubile bumvu kusapwila ko usapwila pe Nkambo yetu+ nangwa kungubila bumvu amiwa kaili wanji ne, bino byo upita mu bya malwa+ na mambo a mambo awama saka uketekela mu bulume bwa Lesa.+ 9 Aye witupulwishe ne kwitwita kuba’mba twikale bazhijikwa,+ kechi na mambo a mingilo yetu ne, bino na mambo a kufuukula kwanji ne lusa lwanji lukatampe.+ Witupele kino myaka ya kala kupichila mwi Kilishitu Yesu, 10 Bino luno lusa lwa Lesa lwasolokele patoka kimye Mupulushi kyo amwekele aye Kilishitu Yesu,+ yenka wafumyapo lufu+ ne kusamisha kyeya pa bumi+ ne pa bumbulwakubola+ kupichila mu mambo awama,+ 11 o natongwejilwe kwikala musapwishi, mutumwa kabiji mufunjishi.+

12 O ene mambo o mbena kumanamina bino bintu,+ bino kechi nji na bumvu ne.+ Mambo namuyuka ye naitabila kabiji naketekela namba ukalama akya kyo namushila mu maboko anji kufikatu ne pa joja juba.+ 13 Saka ukwachisha ku musango* wa byambo byawama+ byo waumvwine kwi amiwa monka mu lwitabilo ne mu butemwe biya na mambo a kwikala mwi Kilishitu Yesu. 14 Saka ulama kino kintu kyawama kyo bakupele na mupashi wazhila uji mwi atweba.+

15 Obewa wayuka kino amba, banabalume bonse ba mu kibunji kya Asha+ bangalukamo, mwi abo muji ne Figelusa ne Helemojene. 16 Aye Nkambo obile lusa ba mu nzubo ya kwa Onesifolusa,+ mambo aye wankoseshenga javula kabiji kechi waubijile bumvu minyololo yami ne. 17 Bino byo ajinga mu Loma, wankebele bingi ne kuntaana. 18 Aye Nkambo Yehoba* akamubile lusa mu joja juba. Kabiji wayukishatu bulongo mingilo yavula yo aingijile mu Efisesa.

2 Onkao mambo, obewa mwanami,+ ikalanga na bulume mu lusa lukatampe luji mwi Kilishitu Yesu; 2 kabiji bintu byo waumvwine kwi amiwa ne bavula byo bamwene,+ wibipane ku bantu ba kishinka bonka bakonsha kwibifunjisha ne ku bakwabo. 3 Byo uji mushilikale+ wawama wa kwa Kilishitu Yesu, saka upita mu bya malwa.+ 4 Kafwako mushilikale uba* busulu* ne, pa kuba’mba atalwe bulongo ku yewa wamutwezhezhe bushilikale. 5 Kabiji nangwatu mu makayo, muntu ukayako makayo kechi bamuvwika munchinya ne, poso washindañana monka mwayila mizhilo.+ 6 Njimi wingila na ngovu ye wafwainwa kwikala mutanshi kuja bipangwa. 7 Saka ulangulukishapo pa kyo mbena kwamba; Nkambo ukakukwasha kumvwisha* bintu byonse.

8 Vuluka kuba’mba Yesu Kilishitu wasangukile+ mu bafu kabiji wajinga wa mu baana* ba kwa Davida,+ monka mwayila mambo awama o nsapwila,+ 9 o mbena kumanaminapo ne kukashilwapo nobe mbanzhi.+ Nangwa byonkabyo, mambo a Lesa kechi akaswa ne.+ 10 Na mambo a kino, nchinchika bintu byonse na mambo a basalwa,+ kuba’mba nabo bakapulukile mwi Kilishitu Yesu, ne kwikala na lukumo lwa myaka. 11 Bino byambo byo bya kishinka: Kine umvwe twafwijile nanji pamo, ko kuba’mba tukekala na bumi pamo ne aye;+ 12 umvwe saka tuchinchika, tukalama nanji pamo nobe bamfumu;+ umvwe twamukana, naye uketukana;+ 13 umvwe twabula kwikala ba kishinka, aye ukatwajijila kwikala wa kishinka, mambo kechi wakonsha kwikana mwine ne.

14 Saka wibavululamo bino bintu, ne kwibafunjisha * ku meso a Lesa kuba’mba baleke kwipachika pa byambo, mambo kwipachika pa byambo kechi kukwashañana ne, kuvulañanyatu* boba bebyumvwa. 15 Teshakotu muchima ukefikizhe obewa mwine kwi Lesa saka waitabilwa, wa mwingilo wabula ne kya kumulengesha bumvu, saka ufunjisha ne kulumbulula bulongo mambo a bukine.+ 16 Bino kana bya kwambaamba byatu bizhilulula kyazhila,+ mambo biletatu byubilo byavula bilengela kubula kwakamwa Lesa, 17 ne byambo byabo biya na kufukula nobe kilonda kyabola. Haiminusa ne Filitusa baji pa bano bantu.+ 18 Bano banabalume bafuma mu bukine saka bamba’mba lusanguko lwapita kala+ kabiji babena konauna lwitabilo lwa bamo. 19 Nangwa byonkabyo, kitendekesho kyakosa kya Lesa kyatwajijila kwimana kabiji kiji na kano katetesho ka kuba’mba, “Yehoba* wayuka banji,”+ kabiji amba, “Bonse beta pa jizhina ja Yehoba*+ bafumeko ku bintu byabula koloka.”

20 Kabiji mu nzubo ikatampe kechi mujitu bipe bya ngolode ne siliva ne, bino muji ne bya bichi ne bya buchimba, kabiji bimo bya mwingilo wanema, bikwabo bya mwingilo wabula kunema. 21 Onkao mambo, umvwe muntu wipaatula aye mwine ku bino bipe byapelako, ukekala kipe kya mwingilo wanema, kyazhijikwa, kyafwainwa kwingijisha nkambo yanji, kyo banengezhezha jimo kwingilako mingilo yawama. 22 Onkao mambo, china bya kusakasaka bya bwanyike, bino londalondanga bololoke, lwitabilo, butemwe ne mutende ne kukakachila ku boba beta pe Nkambo na muchima watoka.

23 Kabiji wafwainwa kukana mapata a kukosama amwesha bulubi,+ byo wayuka’mba aleta lutobo. 24 Mambo kalume wa Nkambo kechi wafwainwa kutoboka ne, kana kwikala wa lusa* ku bonse,+ wayuka kufunjisha ne kwikanya umvwe bamulenga mambo,+ 25 saka afunjisha na kukooka muchima aba balengulula.+ Apo kampe Lesa ukebalengela kulapila* kuba’mba bayukishe bulongo bukine,+ 26 kabiji amba bakalubuluke michima ne kufumamo mu kakose ka kwa Diabola, byo kiji kuba’mba wibakwachile bomi amba bobenga kyaswa muchima wanji.+

3 Bino uyuke kino amba mu moba a kupelako+ kukeya bimye byakatazha. 2 Mambo bantu bakekala betemwatu abo bene, batemwa mali, bejantula, belundumika, ba mwenga, babula kukookela bansemi, babula kusanta, babula bukishinka, 3 babula butemwe, babula kukeba kumvwañana, ba luntepentepe, babula kwikanya, bashinta, babula kutemwa kyawama, 4 basolola bakwabo, babula kumvwa, betota, batemwa bya kisangajimbwe mu kifulo kya kutemwa Lesa, 5 bamweka nobe baji na munema wa kunemeka Lesa, bino bakana bulume bwa uno munema;+ abano wibavundamine. 6 Mambo mwi abo mo mufuma bantu baya mu mazubo mu bujimuku ne kongola banabakazhi banemenwa na bubi, bo balondela bya kusakasaka byapusana pusana, 7 saka bafunda kimye kyonse bino kwa kubula kuyukisha bulongo bukine.

8 Kabiji byonkatu Yanesa ne Yambelesa byo bamulengulwilenga Mosesa, ne bano nabo byo byo babena kulengulula bukine. Bantu ba uno mutundu baji na milanguluko yatama kabiji Lesa wibakana mambo kechi babena kwenda mu lwitabilo ne. 9 Nangwa byonkabyo, kafwako ko bakafika ne, mambo kukosama kwabo kwamweka ku bonse, byonkatu byo kyajinga ku boba banabalume babiji.+ 10 Pakuba obewa walondela bulongo lufunjisho lwami, bwikalo bwami,+ kikonkwanyi kyami, lwitabilo lwami, butekanye bwami, butemwe bwami, kuchinchika kwami, 11 bya kumanyikwa ne bya malwa nabiji byobya byo napichilemo mu Antioka,+ mu Ikonyuma+ ne mu Lisitila.+ Nachinchikile bino bya kumanama, ne Nkambo wampokolwele mu bino byonse.+ 12 Kabiji bonse bakeba kwikala na munema wa kunemeka Lesa mwi Kilishitu Yesu, nabo bakebamanyikanga.+ 13 Bino bantu babi ne ba bujimbijimbi bakataminangakotu, saka bajimbaika ne kujimbaikwa.+

14 Pakuba obewa utwajijile kulondela bintu byo wafunjile ne byo bakukwashishe kumvwisha kuba’mba witabile,+ mambo wayuka bakufunjishe bino bintu 15 ne kuba’mba kufumatu kimye kyo wajinga lukeke+ wayuka binembelo byazhila,+ byakonsha kukulengela kwikala na maana a kukulengela kupuluka kupichila mu kwikala na lwitabilo mwi Kilishitu Yesu.+ 16 Binembelo byonse byanembelwe na lutangijilo lwa mupashi wa Lesa+ kabiji bikwasha bantu pa kwibafunjisha,+ pa kwibakajipila, pa kwibololako ne pa kwibajimuna mu bololoke,+ 17 pa kuba’mba muntu wa Lesa ekale wafikilamo, winengezha bulongo kwingila mingilo yonse yawama.

4 Nakukambizha ku meso a Lesa ne ku meso a Kilishitu Yesu ukachibila mambo+ bomi ne bafu,+ kimye kyo akamweka+ ne byo akeya mu Bufumu bwanji, amba:+ 2 Sapwilanga mambo a Lesa;+ wiasapwilenga na mukoyo mu bimye byawama ne byakatazha; wibalengulule,+ wibakajipile ne kwibafunda mu butekanye ne na busendwe bwa kufunjisha.+ 3 Mambo kimye kikeya kyo bakakana mafunjisho awama,*+ bino bakobanga bisakasaka michima yabo ne kwivuzhizha bene bafunjishi bakambanga bintu byo bakebatu abo bene kumvwa.+ 4 Bakaleka kumvwa bintu bya bukine ne kuta muchima ku mashimikila a bubela. 5 Pakuba obewa ujimuke mu bintu byonse ne kuchinchika mu bya malwa,+ ingilanga mwingilo wa busapwishi* ne kwingila bulongo mwingilo wobe.+

6 Mambo mbena kwitululwa nobe mulambo wa binyu+ ne kimye kya kukasululwa kwami+ kyafika kala. 7 Nalwa bulwi bwawama,+ nanyema kapela kufika ne ku mpelo,+ kabiji nalama lwitabilo. 8 Kufumatu kino kimye, bantujila kala munchinya wa bololoke,+ Nkambo aye mutonyi waoloka+ ye akamfweta mu joja juba,+ kechi amiwa yenkatu ne, bino ne bonse batemwa kumweka kwanji.

9 Upelawizhe kwiya kuno ko nji. 10 Mambo Demasa+ wangalukamo na mambo a kutemwa bya mu buno bwikalo,* kabiji waya ku Tesalonika, Kelesense naye waya ku Ngalatiya, Titusa naye waya ku Dalamatiya. 11 Nashalatu ne Luka. Ukeye ne Mako mambo aye unkwasha bingi mu mwingilo. 12 Bino Tikikusa+ namutuma ku Efisesa. 13 Pa kukeyanga ukansendeleko mukangyo ye nashile mu Toloasa kwi Kalupusa, ne mivungilo kikatakata ya biseba.

14 Alekesanda sendwe wa mukuba wangubile byatama byavula bingi. Yehoba* ukamufweta monka mwayila mingilo yanji.+ 15 Ne obewa wafwainwa kujimuka nanji, mambo aye walengulwile bingi byambo byetu.

16 Mu kwifumya kwami mu mambo kutanshi, kafwako nangwa umo wañimenejileko ne, bonse bankaine—nalomba namba kange bakebatotolweshe ne. 17 Bino Nkambo waimene kwipi kwi amiwa ne kumpa bulume, kuba’mba kupichila mwi amiwa mwingilo wa kusapwila engijiwe bulongo ne bisaka byonse bya bantu biomvwe;+ kabiji napokolwelwe ku kanwa ka bokwe.+ 18 Nkambo ukampokolola ku mingilo yonse yatama kabiji ukampulusha ne kumfikizha mu Bufumu bwanji bwa mwiulu.+ Kwi aye kwikale lukumo myaka ne myaka. Amena.

19 Uñimwineko Pilisika,+ Akwila ne ba mu nzubo ya kwa Onesifolusa.+

20 Elasatusa+ washajile mu Kolinda, bino nashile Tolofimusa+ ku Miletusa saka akolwa. 21 Upelawizhe kwiya kuno bañondo bamashika saka bakyangye kufika.

Yubulusa wakwimuna ne Pudensa, Linusa, Kaludya ne balongo bonse.

22 Nkambo ekale na muchima ye uji nanji. Kabiji lusa lwanji lukatampe lwikale pe anweba.