LUMWEKESHO LO BAMUMWESHESHE YOANO

1 Lumwekesho lwa Yesu Kilishitu lo bamupele+ kwi Lesa amba akamweshe bakalume banji+ bintu bikamweka palutwe kacheche. Kabiji Yesu watumine malaika ne kwilumwesha kwi kalume wanji aye Yoano mu biyukilo kupichila mwi malaika,+ 2 yenka washimwine mambo a Lesa ne byambo byaambile Yesu Kilishitu, ne bintu byonse byo amwene. 3 Ye wa lusekelo awa utanga na jiwi ja peulu ne kumvwa byambo bya buno bungauzhi ne kulondela bintu byanembwamo,+ mambo kimye kyatongolwa kyafwenya kala pepi.

4 Amiwa Yoano mbena kunembela bipwilo+ bitanu na bibiji biji mu kibunji kya Asha amba:

Mwikale na lusa lukatampe ne mutende bifuma kwi+ “Aye ujipo, wajingapo kabiji ukekalapo,” kabiji bifuma ku mipashi itanu na ibiji+ iji ku jitanda janji. 5 ne kwi Yesu Kilishitu, “Kamonyi wa Kishinka,”+ “mubeji mutanshi kusangulwa mu bafu”+ kabiji “Mfumu wa bamfumu ba pano pa ntanda.”+

Kwi aye witutemwa+ kabiji witupokolwele ku bundengamambo kupichila mu mashi anji+— 6 witwalwile ke bufumu,+ ne bañanga+ kwi Lesa wanji kabiji Shanji— kine, kwi aye kwikale lukumo ne bulume myaka ne myaka. Amena.

7 Talai! Ukeya na makumbi+ kabiji bantu bonse bakamumona, pamo ne boba bamwashile jifumo; kabiji mikoka yonse ya pano pa ntanda ikajila mabingo na mambo a aye.+ Kine kino kikamweka. Amena.

8 “Yami Alefwa ne Omeka,”*+ byo byaamba Yehoba* Lesa, “Aye ujipo, wajingapo kabiji ukekalapo, wa Bulume Bonse.”+

9 Amiwa Yoano, mulongo wenu ulondela Yesu, mbena kupita mu bya malwa byo mubena kupitamo ne anweba,+ mbena kuchinchika byonka byo mubena kuchinchika,+ kabiji tukekala bonse mu bufumu.+ Najinga pa jikuji jitelwa’mba Patamosa mambo naambilenga pe Lesa ne kushimuna pe Yesu.+ 10 Na mambo a mupashi wazhila naishile mu juba ja Nkambo, kabiji naumvwine kunyuma yami jiwi jikatampe nobe ja ntolompita, 11 amba: “Bintu byo usakumona wibinembe mu muvungilo ne kwibituma ku bipwilo bitanu na bibiji: kya mu Efisesa,+ mu Simulina,+ mu Pelegamuma,+ mu Tiyatila,+ mu Saladisa,+ mu Filadelifya+ ne kya mu Laodikea.”+

12 Ponkapo naalulukile namba mmone muntu waambilenga ne amiwa, kabiji byo naalulukile namwene bya kutulapo malampi bya ngolode bitanu na bibiji,+ 13 kabiji pakachi ka bya kutulapo malampi pajinga wipasha na mwana muntu,+ saka avwala kivwalo kyafikile ne ku maulu kabiji pa kyaji kyanji winyingile mushipi wa ngolode wa kisapi. 14 Kabiji nsuki ya ku mutwe wanji yatokeletu too, nobe boya butoka, nobe mabebe, ne meso anji ajinga nobe lubebe lwa mujilo,+ 15 ne maulu anji ajinga nobe mukuba+ ye batubula bulongo mu kisha kya mujilo, kabiji jiwi janji jajinga nobe mpota ya mema avula. 16 Kabiji wajinga na tubangabanga tutanu na tubiji+ mu kuboko kwanji kwa kilujo,+ kabiji mu kanwa kanji mwalupukile mpoko yalepa yatwa kubiji, ne kilungi kyanji kyajinga nobe kusama kwa juba.+ 17 Byo namumwene, ponkapo naponene ku maulu anji nobe nafwa.

Ne aye wantentekele kuboko kwanji kwa kilujo ne kuñambila’mba: “Kuba moyo ne. Amiwa yami Mutanshi+ kabiji Wapelako,+ 18 kabiji nemumi,+ nafwile,+ pano tala! Nemumi myaka ne myaka+ kabiji nji na makii a lufu ne a Kilende.*+ 19 Onkao mambo, nemba bintu byo waji kumona, bintu bijipo ne bikamweka umvwe bino byapita. 20 Akya kyafyamika kyazhila kya tubangabanga tutanu na tubiji to waji kumona mu kuboko kwami kwa kilujo ne bya kutulapo malampi bya ngolode bitanu na bibiji byo bino: Tubangabanga tutanu na tubiji twimenako bamalaika ba mu bipwilo bitanu na bibiji, kabiji bya kutulapo malampi bitanu na bibiji bilumbulula bipwilo bitanu na bibiji.+

2 “Unembele malaika+ wa mu kipwilo kya mu Efisesa+ amba: Awa uji na tubangabanga tutanu na tubiji mu kuboko kwanji kwa kilujo, kabiji upitañana mukachi ka bya kutulapo malampi bya ngolode bitanu na bibiji waamba bino bintu amba:+ 2 ‘Nayuka mingilo yobe, kumanama kobe ne kuchinchika kobe, ne kuba’mba kechi uswisha bantu babi ne, kabiji wibeseka aba betela’mba bo batumwa,+ bino saka babula kwikala batumwa, ne kwibataana’mba bo ba bubela. 3 Kabiji ubena kuchinchika ne kwikala na mukoyo na mambo a jizhina jami+ kabiji kechi wakooka ne.+ 4 Nangwa byonkabyo, kuji kintu kyatama kyo nataana mwi obewa, waleka butemwe bo wajinga nabo patanshi.

5 “‘Onkao mambo, vuluka kifulo kyo wajingapo, ulapile+ ne kwingila mingilo yo waingijilenga patanshi. Umvwe ubule kuba bino, nkeya ko uji ne kwikifumyapo po kikala kya kutulapo lampi kyobe,+ inge wabula kulapila.+ 6 Bino kuji kintu kimo kyo ubena kuba bulongo: washikwa mingilo ya jibumba ja bupopweshi ja Banikolaita+ yo nashikwa ne amiwa. 7 Uji na matwi omvwe bibena kwamba mupashi ku bipwilo amba:+ Awa ushinda+ nkamuswisha kuja ku kichi kya bumi+ kiji mu paladisa wa Lesa.’

8 “Unembele malaika wa mu kipwilo kya mu Simulina amba: Awa ‘Mutanshi kabiji Wapelako,’+ wafwile ne kwikala na bumi jibiji waamba bino bintu amba:+ 9 ‘Nayuka bya malwa byobe ne buyanji bobe—bino wi munonshi+—kabiji nayuka ne mwenga wa boba betela abo bene amba Bayudea saka babula Bayudea, bino abo yo nshinagoga ya kwa Satana.+ 10 Kange wakamwe pa bintu byo waya umaname ne.+ Talai! Diabola ukatwajijila kutaya anweba bamo mu kaleya, kuba’mba mukesekwe pakatampe, kabiji mukamona bya malwa moba jikumi. Wikale wa kishinka kufika ne ku lufu ne amiwa nkakupa munchinya wa bumi.+ 11 Uji na matwi omvwe+ bibena kwamba mupashi ku bipwilo amba: Awa ushinda+ kechi ukafwa lufu lwa bubiji ne.’+

12 “Unembele malaika wa mu kipwilo kya mu Pelegamuma amba: Awa uji na mpoko yalepa yatwa kubiji, waamba bino bintu amba:+ 13 ‘Nayuka ko wikala, ko kuba’mba, konka kuji jitanda ja Satana; pano bino wakwachisha ku jizhina jami,+ kabiji kechi walekele kwitabila mwi amiwa+ nangwatu mu moba a kwa Antipasa, kamonyi wami wa kishinka,+ ye baipayile+ mwi anweba konka kwikala Satana ne.

14 “‘Nangwa byonkabyo, kuji bintu bimo byatama byo nataana mwi obewa, kuba’mba uji na boba bakakachila ku lufunjisho lwa kwa Balamu,+ yenka wafunjishe Belaka+ kubika kya kwituntulako bena Isalela kuba’mba baje bintu byo batapishisha bankishi ne kuba bulalelale.*+ 15 Kabiji uji ne na boba bakakachila ku lufunjisho lwa jibumba ja bupopweshi ja Banikolaita.+ 16 Onkao mambo lapila. Umvwe ubule kuba bino, nkeya bukiji ko uji, kabiji nkalwa nabo na mpoko yalepa ya mu kanwa kami.+

17 “‘Uji na matwi omvwe bibena kwamba mupashi ku bipwilo amba:+ Awa ushinda+ nkamupapo manna afyamika,+ kabiji nkamupa jibwe ja mpemba ne pa jino jibwe panembwa jizhina jipya jo babula kuyuka ku muntu nangwa umo ne, kanatu yenka wijitambula.’

18 “Unembele malaika wa mu kipwilo kya mu Tiyatila+ amba: Mwana Lesa uji na meso aji nobe lubebe lwa mujilo+ ne maulu aji nobe mukuba ye batubula bulongo,+ waamba bino bintu amba: 19 ‘Nayuka mingilo yobe, butemwe bobe, lwitabilo lobe, mwingilo wobe ne kuchinchika kobe, ne kuba’mba mingilo yobe yapelako yawamisha kukila itanshi.

20 “‘Nangwa byonkabyo, kuji kintu kyatama kyo nataana mwi obewa kya kuba’mba waleka mwanamukazhi Yezebeli+ witela’mba ngauzhi, kabiji ufunjisha ne kongola bakalume bami kuba bulalelale*+ ne kuja bintu byo batapishisha bankishi. 21 Namupele kimye namba alapile, bino aye wakana kulapila ku bulalelale* bwanji. 22 Tala! Katatakatu nkamulengele kukolwa kya kukankalwa kubuuka pa mwanya, kabiji aba babena kuba bukende ne aye nkebataya mu bya malwa bikatampe, umvwe abo babula kulapila ku mingilo yanji. 23 Kabiji baana banji nkebepaya na kinkunka, kuba’mba bipwilo byonse bikayuke’mba amiwa yami nkebakeba mu milanguluko ine ya mukachi* ne mu michima, kabiji nkemufweta pa muntu pa muntu monka mwayila mingilo yenu.+

24 “‘Nangwa byonkabyo, anweba bashala muji mu Tiyatila, bonse babula kulondela luno lufunjisho ne boba babujile kuyuka abya byo batela’mba “bintu byazhika bya kwa Satana,”+ nebambila namba: Kechi nsakwimutwikapo kisendwa kikwabo ne. 25 Byonkabyo kwachishai bintu byo muji nabyo kufikatu ne byo nkeya.+ 26 Kabiji awa ushinda ne kulondela bintu byo nakambizha kufika ne ku mpelo, nkamupa luusa lwa pa bisaka bya bantu,+ 27 kabiji uno muntu ukebafunga bantu na kamama ka kapotwe+ ne kwibalalaula nobe bipe bya buchimba, monka mo natambwijile luusa kwi Batata. 28 Kabiji nkamupa ntanda wa ku makya.+ 29 Uji na matwi omvwe bibena kwamba mupashi ku bipwilo.’

3 “Unembele malaika wa mu kipwilo kya mu Saladisa amba: Awa uji na mipashi itanu na ibiji ya Lesa+ ne tubangabanga tutanu na tubiji waamba bino bintu amba:+ ‘Nayuka mingilo yobe, kabiji uji na jizhina ja kuba’mba wi mumi, bino saka wafwa.+ 2 Saka ulaba ne kunkenkenta+ kuba’mba ukoseshe bintu byashalapo byajinga pepi kufwa, mambo namona namba kechi waingila* mingilo yonse ya kupa Lesa wami ne. 3 Onkao mambo, vulukanga bintu byo watambwile ne kumvwa, kabiji saka wibilama ne kulapila.+ Umvwe saka ubula kulaba ne kunkenkenta, amiwa nkeya nobe ngivi+ kabiji kechi ukayuka nangwatu pacheche kimye kyo nkeshilamo kwi obewa ne.+

4 “‘Nangwa byonkabyo, uji na bantu bacheche mu Saladisa babula kutamisha bivwalo byabo,+ kabiji bakendanga ne amiwa mu bivwalo bitoka+ mambo abo bafwainwa uno munema. 5 Awa ushinda+ bakamuvwika bivwalo bitoka,+ kabiji kechi nkafuuta jizhina janji mu buku wa bumi ne,+ bino nkasolola jizhina janji kwi Batata ne ku bamalaika babo.+ 6 Uji na matwi omvwe bibena kwamba mupashi ku bipwilo.’

7 “Unembele malaika wa mu kipwilo kya mu Filadelifya amba: Awa wazhila+ kabiji wa kine+ uji na kii wa kwa Davida,+ ushinkula binzhilo kuba’mba muntu nangwa umo abule kwibishinka, kabiji ushinka kuba’mba muntu nangwa umo abule kwibishinkula, waamba bino bintu amba: 8 ‘Nayuka mingilo yobe—tala! Nakushinkwila kinzhilo muntu nangwa umo kyo akonsha kubula kushinka ne.+ Nayuka’mba uji na bulume bucheche, kabiji walamine byambo byami kabiji waikele wa kishinka ku jizhina jami. 9 Tala! Aba ba mu nshinagoga ya kwa Satana betela’mba Bayudea,+ bino saka babula Bayudea, kabiji babena kubepa bubela—tala! Nkebalengela kwiya na kufukama* ku maulu obe ne kwibabuula’mba nakutemwa. 10 Na mambo a kuba walamine byambo pa mambo a kuchinchika kwami,*+ ne amiwa nkakulama mu kimye kya lweseko+ kyonkakya kikeya pano pa ntanda ponse, kya kwibeseka aba bekala pano pa ntanda. 11 Mbena kwiya bukiji.+ Kwachisha kintu kyo uji nakyo, pa kuba’mba muntu nangwa umo akabule kukwangata munchinya wobe.+

12 “‘Awa ushinda—nkamulengela kwikala jishiki ja mu nzubo ya Lesa wami, kabiji aye kechi ukalupukamo ne, kabiji nkanemba pe aye jizhina ja Lesa wami,+ ne jizhina ja muzhi wa Lesa wami, Yelusalema Mupya+ ufuma mwiulu kwi Lesa wami, ne jizhina jami jipya.+ 13 Uji na matwi omvwe bibena kwamba mupashi ku bipwilo.’

14 “Unembele malaika wa mu kipwilo kya mu Laodikea+ amba: Aye Amena+ kamonyi wa kishinka kabiji wa kine,+ ntendekelo ya bilengwa bya Lesa,+ waamba bino bintu amba: 15 ‘Nayuka mingilo yobe, amba kechi wauba munyango nangwa kutwa kyuya ne. Nanchi inge waubile munyango nangwa kutwa kyuya. 16 Bino byo wauba kyambazhi, ne kuba kyuya+ nangwa munyango ne,+ amiwa nsakukushipamo mu kanwa kami. 17 Mambo obewa wamba’mba, “Amiwa yami munonshi+ kabiji nanonka bintu byonse kechi nakajilwapo kintu nangwa kimo ne,” bino kechi wayuka’mba uji mu malwa, ulenga lusa, wayanda, wi mpofu kabiji uji na bwamba ne, 18 nakukambizha namba pota kwi amiwa ngolode yatubulwa bulongo na mujilo kuba’mba wikale munonshi, ne kupota bivwalo bitoka uvwale pa kuba’mba bumvu bwa bwamba bobe bubule kumweka,+ kabiji upote muchi wa kulamba mu meso+ kuba’mba umonenga.+

19 “‘Aba bonse bo natemwa nebakajipila ne kwibafunjisha.+ Onkao mambo, ikala wa mukoyo ne kulapila.+ 20 Tala! Amiwa naimana pa kibelo saka nkonkonsha. Umvwe muntu waumvwa jiwi jami ne kunshinkwilako, nkatwela mu nzubo yanji ne kujiila nanji pamo kajo ka mulajilo ne aye ukajiila pamo ne amiwa. 21 Awa ushinda+ nkamuswisha kwikala pamo ne amiwa pa jitanda jami,+ byonkatu byo nashinjile ne kwikala+ ne Batata pa jitanda jabo. 22 Uji na matwi omvwe bibena kwamba mupashi ku bipwilo.’”

4 Kepo namwene kinzhilo saka kyashinkuka mwiulu, kabiji naumvwine jiwi jitanshi nobe kuvuma kwa ntolompita saka jiñambila’mba: “Kanjila wiye kuno, kabiji nsakukumwesha bintu bikamweka.” 2 Kabiji ponkapotu mupashi wa Lesa waishile pe amiwa, kabiji mwiulu mwajinga jitanda kabiji pajinga ne waikelepo.+ 3 Ne aye waikelepo wamwekelenga nobe jibwe ja yasipa+ kabiji nobe jibwe ja salajasi,* ne ku jitanda kwazhokolokele kakongolo kamwekelenga nobe jibwe ja emalode.+

4 Kabiji ku jitanda kwazhokolokele matanda 24, ne pa ano matanda namwenepo bakulumpe 24+ bavwajile bivwalo bitoka saka baikala kabiji ku mitwe yabo kwajinga minchinya ya ngolode. 5 Kabiji ku jino jitanda kwafuminenga kubesha kwa mvula,+ ne mawi ne kutatauka kwa mvula;+ kabiji kwajinga malampi a mujilo atanu na abiji ateemenenga, kabiji bino bimenako mipashi itanu na ibiji ya Lesa.+ 6 Kulutwe ya jitanda kwajinga kizhiba kyamwekelenga nobe galashi,+ nobe jibwe ja kilishitala.

Kabiji pakachi ne kuzhokoloka jitanda jonse kwajinga bilengwa byumi bina+ byakumbene meso kulutwe ne kunyuma. 7 Kilengwa kyumi kitanshi kyapashishe bokwe,+ kya bubiji kyapashishe mwana ñombe mulume,+ kya busatu+ kyajinga na kilungi nobe kya muntu ne kilengwa kyumi kya buna+ kyapashishe mpungu.+ 8 Bino byonse bilengwa byumi bina byajinga na byapi bitanu na kimo; kabiji byapi byabyo byonse byakumbene meso ne munshi.+ Kabiji kimye kyonse, mute ne bufuku byamba’mba: “Wazhila, wazhila, wazhila Yehoba*+ Lesa, wa Bulume Bonse, wajingapo, ujipo kabiji ukekalapo.”+

9 Kimye kyonse bino bilengwa byumi kyo bipana lukumo, munema ne sante kwi aye waikala pa jitanda, yenka wikala myaka ne myaka,+ 10 bakulumpe 24+ bafukama kwi aye waikala pa jitanda ne kupopwela awa wikala myaka ne myaka, kabiji bataya minchinya yabo ku jitanda saka bamba’mba: 11 “Anweba Yehoba* Lesa wetu, mwafwainwa kutambula lukumo+ ne buneme+ ne bulume,+ mambo yenu mwalengele bintu byonse+ kabiji na mambo a kyaswa muchima wenu, byaikeleko ne kulengwa.”

5 Kabiji namwene muvungilo wanembwa mukachi ne pangye ye bashinkile na tutetesho tutanu na tubiji wajinga mu kuboko kwa kilujo kwa aye waikele pa jitanda.+ 2 Kabiji namwene malaika wakosa saka abijika’mba: “Ñanyi wafwainwa kushinkula uno muvungilo ne kukasulula tutetesho tujipo?” 3 Kafwako muntu nangwa umo mwiulu nangwa pano pa ntanda nangwa munshi ya ntanda wakonsheshe kushinkula awa muvungilo nangwa kutalamo ne. 4 Amiwa najijile bingi mambo kafwako muntu nangwa umo wakonsheshe kushinkula muvungilo nangwa kutalamo ne. 5 Bino umo wa mu bakulumpe wañambijile’mba: “Kileke kujila. Tala! Bokwe wa mu mukoka wa bena Yuda,+ muzhazhi+ wa Davida,+ washinda+ kuba’mba ashinkule muvungilo ne tutetesho tutanu na tubiji tujipo.”

6 Kabiji namwene mukachi* ka jitanda ne mukachi ka bilengwa byumi bina ne mukachi ka bakulumpe+ saka mwaimana mwana mukooko+ wamwekelenga nobe bamwipaya,+ wajinga na nsengo itanu na ibiji ne meso atanu na abiji, kabiji ano meso emenako mipashi itanu na ibiji ya Lesa+ yo batuma pano pa ntanda ponse. 7 Ponkapo aye wayile ne kutambula muvungilo mu kuboko kwa kilujo kwa yewa waikele pa jitanda.+ 8 Byo atambwile muvungilo, bilengwa byumi bina ne bakulumpe+ 24 bafukamine ku Mwana Mukooko, kabiji mukulumpe yense walamine kyansa ne masanyi afukumana a ngolode ayujile bya kufutumuna. (Bino bya kufutumuna bimenako milombelo ya bazhijikwa.)+ 9 Kabiji baimbilenga lwimbo mupya+ amba: “Obewa wafwainwa kutambula muvungilo ne kushinkula tutetesho tujipo, mambo bakwipayile kabiji wamupotejile Lesa bantu na mashi+ obe kufuma mu mikoka yonse ne mu njimi* ne mu mitundu ya bantu ne mu bisaka bya bantu,+ 10 kabiji wibalula kwikala bufumu+ ne bañanga ba Lesa wetu,+ kabiji bakekala bamfumu+ ba kulama ntanda.”

11 Kabiji namwene ne kumvwa mawi a bamalaika bavula bazhokolokele jitanda ne bilengwa byumi ne bakulumpe, kabiji pa kwibabala bajinga mabumba a mabumba* ne biumbi bya biumbi,+ 12 saka bamba na jiwi ja peulu amba: “Mwana Mukooko ye baipayile+ ye wafwainwa kutambula bulume ne bunonshi ne maana ne ngovu ne buneme ne lukumo ne kutotwa.”+

13 Kabiji naumvwine bilengwa byonse biji mwiulu, ne pano pa ntanda+ ne munshi ya ntanda ne pa kalunga ka mema ne bintu byonse bijimo, saka byamba’mba: “Kwi aye waikala pa jitanda+ ne ku Mwana Mukooko+ kwikale kutotwa, munema,+ lukumo ne bulume myaka ne myaka.”+ 14 Kabiji bilengwa byumi bina byaambilenga’mba: “Amena!” ne bakulumpe bafukamine ne kupopwela Lesa.

6 Kabiji namwene Mwana Mukooko+ byo ashinkwile katetesho kamo pa totwa tutetesho tutanu na tubiji+ kabiji naumvwine kilengwa kimo kya mu byobya bilengwa byumi bina+ saka kyamba na jiwi nobe kutatauka kwa mvula amba: “Yanga!” 2 Ponkapo namwene mbili utoka,+ ne waikelepo wajinga na buta bwa mukanda; kabiji bamupele munchinya+ ne aye wayilenga na kushinda kuba’mba apwishe kushinda.+

3 Byo ashinkwile katetesho ka bubiji, naumvwine kilengwa kyumi kya bubiji+ saka kyamba’mba: “Yanga!” 4 Ponkapo mbili mukwabo uchila walupukile, kabiji awa waikelepo bamupele luusa lwa kufumyapo mutende pano pa ntanda kuba’mba bantu beipaye bene na bene, kabiji bamupele mpoko ikatampe.+

5 Byo ashinkwile katetesho ka busatu,+ naumvwine kilengwa kyumi kya busatu+ saka kyamba’mba: “Yanga!” Ponkapo namwene mbili ufiita, kabiji awa waikelepo wajinga na shikelu wa kupiminako mu kuboko kwanji. 6 Kabiji naumvwine kyaumvwanyikilenga nobe jiwi mu bilengwa byumi bina saka kyamba’mba: “Kipimo kya kwachi* kya wichi kipotwa ndenali* umo+ ne bipimo bisatu bya kwachi bya mbaale nabyo bipotwa ndenali umo; kabiji kange onaune manyi a maolivi ne binyu ne.”+

7 Byo ashinkwile katetesho ka buna, naumvwine kilengwa kyumi kya buna+ saka kyamba’mba: “Yanga!” 8 Ponkapo namwene mbili watokoloka, kabiji awa waikelepo wajinga na jizhina ja kuba’mba Lufu. Ne Kilende* kyamulondejilenga. Kabiji bamupele luusa lwa pa lubaji lumo lwa mbaji ina ya pano pa ntanda lwa kwipayañana na mpoko yalepa, na bipowe bya nzala,+ na kinkunka ne na banyama bakaji.+

9 Byo ashinkwile katetesho ka butanu, namwene myeo*+ munshi ya kya kusokelapo bitapisho+ ya boba bo baipayile na mambo a mambo a Lesa ne na mambo a bukamonyi bo bashimwine.+ 10 Yabijikilenga’mba: “Anweba Nkambo Mfumu, wazhila kabiji wa kine,+ nanchi myaka inga yo mukabula kuchiba mambo ne kwitushinkenya mashi etu na boba bekala pano pa ntanda?”+ 11 Kabiji bebapele munkukumba utoka pa muntu pa muntu,+ ne kwibambila’mba bakokoloke pa kakimye kacheche poso nambala ikakwane ya bakalume bakwabo ne balongo babo bajinga pepi kwipaiwa byonka byo bebepayile abo.+

12 Kabiji namwene byo ashinkwile katetesho ka butanu na bumo, kwaikele kitentanshi kikatampe; ne juba jaalukile ke mfishi nobe kivwalo kya majila kya boya* kabiji ñondo yense wachijile nobe mashi,+ 13 ne tubangabanga twa mwiulu twaponene pano pa ntanda nobe mukuyu uponesha makuyu abishi pa kumusunkenya ku kipupu kikatampe. 14 Kabiji jiulu jayile nobe muvungilo walepa ye bavunga,+ ne mitumba yonse ne makuji onse bebifumishepo po byajinga.+ 15 Kabiji bamfumu ba pano pa ntanda, binemanga, bakulumpe ba bashilikale, banonshi, bilobo, bazha bonse ne bantu bakasuluka bonse bafyamine mu mayengo ne mu mabwe akatampe a mu mitumba.+ 16 Kabiji baambijilenga mitumba ne mabwe akatampe amba: “Tuponenai+ ne kwitufya ku meso a yewa waikala pa jitanda+ ne ku bukaji bwa Mwana Mukooko,+ 17 mambo juba jikatampe ja bukaji bwabo jafika,+ kabiji ñanyi wakonsha kupuluka?”+

7 Bino bintu byo byapichile namwene bamalaika bana saka baimana ku makonka ana a ntanda, saka bakwata luvula luna lwa ntanda, kuba’mba luvula nangwa lumo lubule kupupila pano pa ntanda nangwa pa kalunga ka mema nangwa pa bichi ne. 2 Ponkapo namwene malaika mukwabo saka afuma kuselela* juba, saka akwata katetesho ka Lesa mumi; kabiji wabijikile boba bamalaika bana bo bapele luusa lwa konauna ntanda ne kalunga ka mema, 3 amba: “Kange monaune ntanda nangwa kalunga ka mema nangwa bichi ne, kufikatu ne byo tukapwisha kubika tutetesho+ pa bilungi bya bakalume ba Lesa wetu.”+

4 Kabiji naumvwine nambala ya boba bo babikile tutetesho, bajinga 144,000,+ bo babikile tutetesho kufuma mu mikoka yonse ya bena Isalela:+

5 Ba mu mukoka wa bena Yuda bo babikile tutetesho bajinga 12,000;

9 Bino bintu byo byapichile, namwene jibumba jikatampe jo bakonsha kubula kubala ku muntu nangwa umo, jafumine mu bisaka byonse, mu mikoka yonse, mu mitundu yonse ya bantu ne mu njimi* yonse,+ saka baimana kulutwe ya jitanda ne ku Mwana Mukooko saka bavwala minkukumba itoka;+ kabiji balamine mapambo a bisonga mu maboko abo.+ 10 Kabiji babijikilenga’mba: “Lupulukilo lwetu lufuma kwi Lesa wetu waikala pa jitanda,+ ne ku Mwana Mukooko.”+

11 Bamalaika bonse baimene saka bazhokoloka jitanda ne bakulumpe+ ne bilengwa byumi bina, baponene kinkuvumene kulutwe ya jitanda ne kupopwela Lesa, 12 saka bamba’mba: “Amena! Kutotwa ne lukumo ne maana ne sante ne munema ne bulume ne ngovu bikale kwi Lesa wetu myaka ne myaka.+ Amena.”

13 Kabiji umo wa mu bakulumpe wanshikishe’mba: “Nanchi bano bavwala minkukumba itoka,+ bo bañanyi kabiji bafuma pi?” 14 Ponkapo namukumbwile namba: “Nkambo, yenu mwayuka.” Ne aye wañambijile’mba: “Bano bo boba bafuma mu malwa akatampe,+ kabiji bachapa minkukumba yabo ne kwiitokesha mu mashi a Mwana Mukooko.+ 15 O ene mambo o baimena kulutwe ya jitanda ja Lesa, kabiji babena kumwingijila mwingilo wazhila mute ne bufuku mu nzubo yanji; kabiji awa waikala pa jitanda+ ukavungulwila tente wanji pe abo.+ 16 Ne abo kechi bakafwa jibiji nzala nangwa kilaka ne, kabiji juba kechi jikebasoka, nangwa kyuya ne,+ 17 mambo Mwana Mukooko+ uji ku* jitanda, ukebafunganga+ ne kwibatangijila ku masulo atupauka mema a bumi.+ Kabiji Lesa ukashimuna mipolo yonse ku meso abo.”+

8 Byo ashinkwile+ katetesho ka butanu na bubiji,+ mwiulu mwazhindaminetu nzoo nobe kichika kya jiola jimo. 2 Kabiji namwene bamalaika batanu na babiji+ bemana kwi Lesa, kabiji bebapele matolompita atanu na abiji.

3 Kabiji malaika mukwabo wajinga na kipe kya ngolode kya kufutumwinamo,* waishile ne kwimana ku kya kusokelapo bitapisho,+ kabiji bamupele bya kufutumuna+ byavula kuba’mba ebipane pa kya kusokelapo bitapisho+ kulutwe ya jitanda pamo na milombelo ya bazhijikwa bonse. 4 Bwishi bwa bya kufutumuna kufuma mu kuboko kwa malaika bwayile ku meso a Lesa pamo na milombelo+ ya bazhijikwa. 5 Bino ponkapotu malaika washikwile kya kufutumwinamo, ne kuyuzhamo mujilo umo wajinga pa kya kusokelapo bitapisho ne kumusukumwina pa ntanda. Kabiji kwajinga kutatauka kwa mvula ne mawi ne kubesha+ ne kitentanshi. 6 Kabiji bamalaika batanu na babiji bajinga na matolompita atanu na abiji,+ benengezhe kwiavumya.

7 Malaika mutanshi wavuminye ntolompita yanji. Kabiji kwanokele mvula wa mabwe ne mujilo wavwangakene na mashi, kabiji bebitayile pa ntanda;+ ne lubaji lumo lwa mbaji isatu ya ntanda lwapile, ne lubaji lumo lwa mbaji isatu ya bichi lwapile, ne nsono yonse ya munyemvu yapile.+

8 Malaika wa bubiji wavuminye ntolompita yanji. Kabiji kintu kyajinga nobe mutumba mukatampe kyateemenenga mujilo, bekitayile mu kalunga ka mema.+ Ne lubaji lumo lwa mbaji isatu ya kalunga ka mema lwaalukile ke mashi;+ 9 ne lubaji lumo lwa mbaji isatu ya bilengwa byumi* bya mu kalunga ka mema byafwile,+ kabiji lubaji lumo lwa mbaji isatu ya maato lwaonaikile.

10 Malaika wa busatu wavuminye ntolompita yanji. Kabiji kabangabanga kakatampe kateemenenga nobe nsoko kafumine mwiulu, ne kuponena pa lubaji lumo lwa mbaji isatu ya mikola ne pa masulo atupauka mema.+ 11 Jizhina ja kano kabangabanga ke Kichi Kyalula. Ne lubaji lumo lwa mbaji isatu ya mema alujile nobe kichi kyalula, ne bantu bavula bafwile na ano mema, mambo alujile.+

12 Malaika wa buna wavuminye ntolompita yanji. Ne lubaji lumo lwa mbaji isatu ya juba ne ñondo ne lwa tubangabanga belupumine,+ kuba’mba lubaji lwabyo lumo lwa mbaji isatu belufichishe+ ne lubaji lumo lwa mbaji isatu ya juba lubule kwikala na kyeya mute, ne bufuku nabo byonkabyo.

13 Kabiji namwene ne kumvwa mpungu saka apita pakachi ka jiulu na kubijika amba: “Malwa, malwa, malwa+ ku boba bekala pa ntanda na mambo a kuvuma kwa matolompita ashalako a bamalaika basatu baji pepi kuvumya matolompita abo!”+

9 Malaika wa butanu wavuminye ntolompita yanji.+ Kabiji namwene kabangabanga kufuma mwiulu kaponejile pa ntanda, kabiji bekapele kii wa pa kanwa* ka kalengwa kabula kupela.+ 2 Kashinkwile pa kanwa* ka kalengwa kabula kupela, ne pa kanwa* pafutumukilenga bwishi nobe bwishi bwa mu kisha kya mujilo kikatampe, kabiji juba jafiichile+ ne mwela naye pamo, na mambo a bwishi bwafutumukilenga pa kanwa* kako. 3 Kabiji monka mu bwishi mwafumine nzhiye yaishile pa ntanda,+ kabiji beipele luusa lujipo na tuminye twa pa ntanda. 4 Kabiji beyambijile kubula konauna nsono ya pa ntanda nangwa bijimwa bikwabo nangwa bichi, kanatu konauna bantu babula katetesho ka Lesa pa bilungi byabo.+

5 Kabiji nzhiye beyambijile kubula kwibepaya, kana kwibamanyika pa bañondo batanu, kabiji kumanyikwa kwabo kwajinga nobe kutanta kumvwa muntu ye basuma ku kaminye.+ 6 Mu oa moba bantu bakakeba lufu, bino kechi bakelutaana ne, kabiji bakakeba kufwa, bino lufu lukebanyema.

7 Ino nzhiye yapashishe bambili bo banengezha kuya ku nkondo;+ kabiji pa mitwe yayo pajinga byamwekelenga nobe minchinya ya ngolode, ne bilungi byayo byamwekelenga nobe bya bantu, 8 bino nsuki yayo yajinga nobe nsuki ya mwanamukazhi. Ne meno ayo ajinga nobe a bokwe,+ 9 kabiji pa byaji byayo pajinga byela bya pa kyaji byajinga nobe byela bya kapotwe. Ne kilulumo kya byapi byayo kyaumvwanyikilenga nobe kilulumo kya makalaki a bambili babena kuya lubilo ku nkondo.+ 10 Kabiji yajinga na mikila iji na muna ya bulembe nobe tuminye, kabiji mikila yayo yajinga na bulume bwa kukozha bantu pa bañondo batanu.+ 11 Kabiji iji na mfumu, malaika wa kalengwa kabula kupela.+ Mu Kihebelu jizhina janji Abadoni,* bino mu Kingiliki uji na jizhina ja kuba’mba, Apolyona.*

12 Malwa atanshi apita kala. Talai! Kwashala malwa abiji akwabo+ abena kulondela pa bino bintu.

13 Malaika wa butanu na bumo+ wavuminye ntolompita+ yanji. Ponkapo naumvwine jiwi jimo kufuma mu lusengo wa kya kusokelapo bitapisho+ kya ngolode kyajinga kwi Lesa 14 saka jambila malaika wa butanu na bumo wajinga na ntolompita amba: “Kasulula bamalaika bana bo bakashila pa mukola mukatampe wa Ufelata.”+ 15 Ne aba bamalaika bana, bonka bo batongwejile jimo akya kimye, juba, ñondo ne mwaka, bebakasulwile’mba bepaye lubaji lumo lwa mbaji isatu ya bantu.

16 Kabiji nzhita ya benda pa bambili yajinga mabumba abiji a mabumba;* Naumvwine kuvula kwabo. 17 Kabiji bino byo byajinga bambili bo namwene mu kimwesho ne boba baikelepo: Bajinga na byela bya pa kyaji byamwekelenga kuchila ne bya kifufya ne bya kibobo, ne mitwe ya bambili yajinga nobe mitwe ya mabokwe,+ ne mu tunwa twabo mwafumine mujilo ne bwishi ne luya lwa mabwe ateema mujilo. 18 Jibumba jimo ja mabumba asatu a bantu bejipayile ku bino binkunka bisatu, ku mujilo ne ku bwishi ne ku luya lwa mabwe ateema mujilo byafuminenga mu tunwa twabo. 19 Mambo bulume bwa bano bambili bwajinga mu tunwa twabo ne ku mikila yabo, mambo mikila yabo iji nobe miloolo kabiji iji na mitwe, kabiji ku bino bintu ko ko bakozhañena.

20 Bino bantu bashajilepo bo babujile kwipaya na ino myalo, kechi balapijile ku mingilo ya maboko abo ne; kechi balekele kupopwela bandemona ne bankishi ba ngolode ne ba siliva ne ba mukuba ne ba mabwe ne ba bichi ne, bintu bibula kumona nangwa kumvwa nangwa kwenda.+ 21 Kabiji kechi balapijile ku byubilo byabo bya kwipayañana nangwa bya buñanga bwa lubuko nangwa bulalelale* nangwa bwivi ne.

10 Kabiji namwene malaika mukwabo wakosa saka ekila kufuma mwiulu, saka avwala jikumbi ne kakongolo ku mutwe wanji, kabiji kilungi kyanji kyajinga nobe juba,+ ne maulu anji ajinga nobe mimbulungwa ya mujilo, 2 kabiji mu kuboko kwanji mwajinga kamuvungilo ko bavungulwile. Wanyanchile kulu kwanji kwa kilujo pa kalunga ka mema ne kwa ku kipiko wikunyanchile pa mushiji, 3 kabiji wabijikile na jiwi ja peulu byonkatu bibuluma bokwe.+ Kabiji byo abijikile, mawi a kutatauka kutanu na kubiji+ aambile.

4 Akwa kutatauka kutanu na kubiji byo kwaambile, nakebelenga kunemba, bino naumvwine jiwi mwiulu+ na kuñambila’mba: “Shinka na katetesho abya bintu byaamba akwa kutatauka kutanu na kubiji, kabiji kange wibinembe ne.” 5 Malaika ye namwene saka anyanta kulu kumo pa kalunga ka mema ne kukwabo pa mushiji, wasuntwile kuboko kwanji kwa kilujo, 6 kabiji wachipile mu jizhina ja yewa wikala myaka ne myaka,+ yenka walengele jiulu ne bintu bijimo, ne ntanda ne bintu bijimo, ne kalunga ka mema ne bintu bijimo amba:+ “Lesa kechi ukabanda ne. 7 Bino mu oa moba awa malaika wa butanu na bubiji+ byo akoba amba avumye ntolompita,+ kyafyamika kyazhila+ akya Lesa kyo aambile kwikala mambo awama ku bakalume banji bangauzhi,+ kine kikafika.”

8 Kabiji naumvwine jiwi kufuma mwiulu+ saka jiñambila jikwabo amba: “Yanga, ukatambule aka kamuvungilo ko bavungulula kaji mu kuboko kwa yewa malaika wanyanta kulu kumo pa kalunga ka mema ne kukwabo pa mushiji.”+ 9 Ponkapo nayile kwi malaika ne kumwambila’mba ampe kamuvungilo. Aye wañambijile’mba: “Tambula uje,+ kabiji kasakuluzha munda mobe, pakuba mu kanwa kobe kasakutobala nobe buki.” 10 Natambwile aka kamuvungilo kwi malaika ne kwikaja,+ kabiji mu kanwa kami katobele nobe buki,+ bino byo napwishishe kwikaja, munda mwalujile. 11 Kabiji bañambijile’mba: “Wafwainwa kwaula jibiji pa mambo a mitundu yonse ya bantu ne bisaka bya bantu ne njimi* ne bamfumu bavula.”

11 Kabiji bampele jitete jajinga nobe kamama+ kabiji wañambijile’mba: “Imana upime nzubo yazhila ya Lesa ne kya kusokelapo bitapisho ne aba bapopwelamo. 2 Pakuba kipango kiji pangye ya nzubo yazhila ya Lesa, wikishepo kabiji kange wikipime ne, mambo bekipana ku bisaka bya bantu, kabiji muzhi wazhila+ bakamunyantaula pa bañondo 42.+ 3 Nkalengela bakamonyi bami babiji kwaula pa moba 1,260 saka benyinga bisapi bya majila.” 4 Bano babena kwimenwako na bichi bibiji bya maolivi+ ne bya kutulapo malampi+ bibiji kabiji baimana ku meso a Nkambo wa ntanda.+

5 Umvwe muntu akakebe kwiboba kintu kyatama, mujilo ukafuma mu tunwa twabo ne kusoka balwanyi babo. Kine umvwe muntu akakebe kwiboba kintu kyatama, bino byo byo bakamwipaya. 6 Bano baji na luusa lwa kushinka mwiulu+ kuba’mba mvula abule kunonka+ mu moba a kwaula kwabo, kabiji baji na luusa lwa kwalula mema ke mashi+ ne kupuma ntanda na binkunka byapusana pusana monka mo bakebela.

7 Byo bakapwisha kushimuna bukamonyi, lukinyama ukalupuka mu kalengwa kabula kupela, ukalwa nabo ne kwibashinda ne kwibepaya.+ 8 Kabiji mibiji yabo yafwa ikalaala mu mukwakwa mukatampe wa mu yewa muzhi mukatampe ye batela mu kifwanyikizho amba Sodoma ne Ijipita, monka mo baipayijile Nkambo yabo pa kichi. 9 Kabiji ba mu mitundu ya bantu ne ba mu mikoka ne ba mu njimi* ne ba mu bisaka bya bantu bakatala pa mibiji yabo yafwa pa moba asatu ne kichika,+ kabiji bakakana kubika mibiji yabo mu kilende. 10 Kabiji aba bekala pa ntanda bakasekela pa mambo a lufu lwabo, kabiji baketuminanga bya bupe abo bene na bene, mambo bano bangauzhi babiji bamanyikilenga boba bekala pa ntanda.

11 Byo papichile moba asatu ne kichika, mupashi wa bumi wafumine kwi Lesa watwelele mwi abo,+ kabiji baimene, ne bonse bebamwene baubile bingi moyo. 12 Kabiji baumvwine jiwi kufuma mwiulu saka jibambila’mba: “Kanjilai mwiye kuno.” Ne abo bayile mwiulu mu jikumbi kabiji bebamwene* ku balwanyi babo. 13 Mu kyonkakya kimye kwaikele kitentanshi kikatampe, ne lubaji lumo lwa mbaji jikumi ya muzhi lwakundukile; ne bantu 7,000 bafwile na kitentanshi, ne bashajilepo baubile bingi moyo ne kupa Lesa wa mwiulu lukumo.

14 Malwa a bubiji+ apita kala. Talai! Malwa a busatu abena kupelawizha kwiya.

15 Malaika wa butanu na bubiji wavuminye ntolompita yanji.+ Kabiji kwaumvwanyikile mawi mwiulu saka amba’mba: “Bufumu bwa pa ntanda bwaaluka ke Bufumu bwa Nkambo yetu+ ne bwa Kilishitu+ wanji, kabiji aye ukekala mfumu myaka ne myaka.”+

16 Kabiji bakulumpe 24+ baikele kwi Lesa pa matanda abo, baponene kinkuvumene ne kupopwela Lesa, 17 ne kwamba’mba: “Twimusanchila anweba Yehoba* Lesa, wa Bulume Bonse, ujipo+ kabiji wajingapo, mambo mwamwesha bulume bwenu bukatampe ne kutendeka kulama nobe mfumu.+ 18 Bino, bisaka bya bantu byazhingijile ne anweba mwibimwesheshe bukaji bwenu, kabiji kimye kyatongolwa kyafikile kya kuchibila mambo bafwa ne kya kufweta+ bakalume benu bangauzhi+ ne bazhijikwa ne boba bakamwa jizhina jenu, bacheche ne bakatampe, ne kya konauna boba babena konauna ntanda.”+

19 Kabiji nzubo yazhila ya Lesa iji mwiulu yashinkukile, ne jikwachi ja lulayañano lwanji jamwekele mu nzubo yanji yazhila.+ Kabiji kwajinga kubesha kwa mvula ne mawi ne kutatauka kwa mvula ne kitentanshi ne mvula mukatampe wa mabwe.

12 Mwiulu mwamwekele kiyukilo kikatampe: Mwanamukazhi+ wavwajile juba, kabiji ñondo wajinga munshi ya maulu anji, kabiji munchinya wa tubangabanga 12 wajinga ku mutwe wanji, 2 kabiji wajinga na jimi. Wajijilenga bingi na mambo a bisanso ne misongo ya pa kusema.

3 Kabiji mwiulu mwamwekele kiyukilo kikwabo. Kwajinga nsuñunyi mukatampe uchila,+ wajinga na mitwe itanu na ibiji ne nsengo jikumi, ne pa mitwe yanji pajinga tubondo* tutanu na tubiji; 4 kabiji kiminzo kyanji kyakokele lubaji lumo lwa mbaji isatu ya tubangabanga+ ne kwitutaya pa ntanda.+ Kabiji uno nsuñunyi wajinga kwipi na mwanamukazhi+ wajinga pepi kusema kuba’mba umvwe aseme, aje mwana.

5 Kabiji mwanamukazhi wasemene mwana wa mulume,+ ukafunganga bisaka bya bantu byonse na kamama ka kapotwe.+ Ne mwananji bamusompwele* ne kumutwala kwi Lesa ne ku jitanda janji. 6 Kabiji mwanamukazhi wanyemejile mu kiselebwa, mo bamunengezhejile mpunzha kwi Lesa kabiji bamujiishishenga monkamwa moba 1,260.+

7 Kabiji mwiulu mwabuukile nkondo: Mikela*+ ne bamalaika banji balwile na nsuñunyi, ne uno nsuñunyi ne bamalaika banji balwile nabo 8 bino bakankelwe kushinda,* kabiji kechi mwajingapo mpunzha mwiulu ya kwikalamo abo ne. 9 Onkao mambo, nsuñunyi mukatampe+ bamutayile panshi, yenka aye muloolo wa kala,+ utelwa’mba Diabola+ kabiji Satana,+ yenka ubena kujimbaika bantu ba pano pa ntanda+ ponse; bamutayile pa ntanda+ ne bamalaika banji bebatayile pamo nanji. 10 Naumvwine jiwi jikatampe kufuma mwiulu amba:

“Pano Lesa wetu waleta lupulukilo+ ku bantu, bulume bwanji bwasoloka kabiji Bufumu bwanji+ bwaikajikwa ne Kilishitu wanji watendeka kwingijisha luusa lwanji, mambo mushinawishi wa balongo betu bamutaya panshi, yenkaye wibapamo mambo kwi Lesa wetu mute ne bufuku!+ 11 Kabiji bamushinjile+ na mambo a mashi a Mwana Mukooko+ ne na mambo a mambo a Lesa o bashimwinenga+ kabiji kechi bachiine kutaya myeo*+ yabo amba basakufwa ne. 12 Onkao mambo, sekelai anweba meulu ne anweba mwikalamo! Malwa kwi anweba ntanda ne kalunga ka mema,+ mambo Diabola waikila ko muji, saka azhingila bingi, mambo wayuka’mba washalatu na kakimye kacheche.”+

13 Pano nsuñunyi byo amwene’mba bamutaya pa ntanda,+ wamanyikile yewa mwanamukazhi+ wasemene mwana wa mulume. 14 Bino uno mwanamukazhi bamupele byapi bibiji bya mpungu mukatampe,+ kuba’mba atumbuke ne kuya mu kiselebwa ku mpunzha yo bamunengezhejile, ko bakamujiisha pa kimye kimo ne bimye bibiji ne kichika kya kimye*+ kumufumya ku muloolo.+

15 Kabiji muloolo wapaajile mema ku mwanamukazhi kufuma mu kanwa kanji nobe mukola, kuba’mba mukola amulobeshe. 16 Bino ntanda yaishile na kukwasha mwanamukazhi, kabiji yaasamine ne kumina mukola wapaajile nsuñunyi kufuma mu kanwa kanji. 17 Kabiji nsuñunyi wamuzhingijile bingi mwanamukazhi ne kuya na kulwa na boba bashajilepo ba mu baana* banji+ bonka balondela mikambizho ya Lesa kabiji baji na mwingilo wa kushimuna bukamonyi pe Yesu.+

13 Ne aye* waimene pa busenga bwa ku kalunga ka mema.

Kabiji namwene lukinyama+ watuntukilenga mu kalunga ka mema,+ wajinga na nsengo jikumi ne mitwe itanu na ibiji, kabiji ku nsengo yanji kwajinga tubondo* jikumi, bino pa mitwe yanji panembelwe mazhina a mwenga. 2 Awa lukinyama ye namwene wapashishe kisumpa, bino maulu anji apashishe a mbeyala, ne kanwa kanji kajinga nobe ka bokwe.+ Kabiji nsuñunyi wapele uno lukinyama bulume bwanji, ne jitanda janji ne luusa lwanji lukatampe.+

3 Namwene mutwe wanji umo ye bakozhezhe bingi, bino kilonda kyanji kyabayile, kyapwile,+ kabiji bantu bonse ba pa ntanda bamulondejilenga uno lukinyama saka bakumya. 4 Kabiji bamupopwejilenga nsuñunyi, mambo wapele luusa awa lukinyama, ne awa lukinyama bamupopwejilenga saka bamba’mba: “Ñanyi waesakana nanji uno lukinyama, kabiji ñanyi wakonsha kulwa nanji?” 5 Kabiji bekipele kanwa kaambilenga byambo bya kwilundumika ne bya mwenga, kabiji bekipele luusa lwa kwingila pa bañondo 42.+ 6 Ponkapo waasamine ne kwambila Lesa byambo bya mwenga,+ kutuka jizhina janji ne mpunzha mo ekala, ne boba baji mwiulu.+ 7 Kabiji bamuswishishe kulwa na bazhijikwa ne kwibashinda+ kabiji bamupele luusa lwa pa mikoka yonse, mitundu yonse, njimi* yonse ne bisaka bya bantu. 8 Bonse bekala pa ntanda bakamupopwela. Kufumatu ku ntendekelo ya pano pa ntanda, kafwako nangwa umo wanembwa jizhina janji mu buku wa bumi+ wa Mwana Mukooko ye baipayile ne.+

9 Uji na matwi omvwe.+ 10 Umvwe umo wafwainwa kuya mu buzha, ukaya mu buzha. Kabiji umvwe umo akepayañane na mpoko,*+ bakamwipaya na mpoko. Kino kikebewa bazhijikwa+ kuchinchika+ ne kwikala na lwitabilo.+

11 Kabiji namwene lukinyama mukwabo saka afuma panshi, wajinga na nsengo ibiji yapashishe ya mwana mukooko, bino watendekele kwamba nobe nsuñunyi.+ 12 Kabiji wajinga na luusa lonse lwa yewa lukinyama mutanshi+ aye saka amonako. Kabiji ulengela ntanda ne bekalamo kupopwela awa lukinyama, yenkawa wajinga na kilonda kyapwile.+ 13 Kabiji uba biyukilo bikatampe, ne kulengela mujilo kufuma mwiulu kwiya pa ntanda ne bantu saka bamona.

14 Kabiji ujimbaika bekala pa ntanda, na mambo a biyukilo byo bekiswishishe kumwesha ku yewa lukinyama saka abuula bekala pa ntanda amba, balenge kipashañano+ kya yewa lukinyama wajinga na mutwe ye bakozhezhe na mpoko, bino wakosele.+ 15 Ne aye bamuswishishe kupana muya* ku kipashañano kya yewa lukinyama, kuba’mba kipashañano kya lukinyama kyambenga ne kwipaisha bonse bakana kupopwela akya kipashañano kya yewa lukinyama.

16 Kabiji ukanjikizha bantu bonse—bacheche, bakatampe, banonshi, bayanji, baana ba bene ne bazha—kutambula kayukilo pa maboko abo a kilujo nangwa pa bilungi byabo,+ 17 ne kuba’mba kafwako muntu nangwa umo wakonsha kupota nangwa kupotesha ne, kanatu yenkawa uji na kayukilo ne jizhina+ ja yewa lukinyama nangwa nambala ya jizhina janji.+ 18 Muntu wafwainwa kwikala na maana pa kuba’mba akwatakanye kino: Awa uji na milangwe abale nambala ya yewa lukinyama, mambo yo nambala ya muntu, ino nambala yanji ke 666.+

14 Kabiji namwene Mwana Mukooko+ saka aimana pa Mutumba wa Ziona,+ na ba 144,000+ baji na jizhina janji ne ja Shanji+ pa bilungi byabo. 2 Kabiji naumvwine jiwi kufuma mwiulu nobe mpoota ya mema avula kabiji nobe kutatauka kwa mvula; ne jiwi jo naumvwine jajinga nobe ja banyimbi babena kwimba pa byansa byabo. 3 Kabiji baimbilenga lwimbo waumvwanyikilenga nobe lwimbo mupya+ kulutwe ya jitanda ne ku bilengwa byumi bina+ ne ku bakulumpe,+ kabiji kafwako muntu nangwa umo wakonsheshe kufunda awa lwimbo ne, kanatu ba 144,000+ bo bapotele pano pa ntanda. 4 Bano kechi bezhilulwile na banabakazhi ne; abo bo bakatanda.+ Bano bo boba balondela Mwana Mukooko konse konse ko aya.+ Bano bebapotele+ kufuma mu bantu kwikala bya nsomo+ kwi Lesa ne ku Mwana Mukooko, 5 ne mu kanwa kabo kechi mwatainwe byambo bya bubela ne; kechi baji na bulema ne.+

6 Kabiji namwene ne malaika mukwabo saka apita pakachi ka jiulu,* kabiji wajinga na mambo awama a myaka ne myaka a kusapwila ku bekala pa ntanda, ku bisaka bya bantu byonse ne ku mikoka yonse ku ba njimi* yonse ne ku mitundu yonse ya bantu.+ 7 Waambilenga na jiwi jikatampe amba: “Akamwai Lesa ne kumupa lukumo, mambo kimye kyanji kya kuchibilamo mambo kyafika,+ onkao mambo, popwelainga awa walengele jiulu ne ntanda ne kalunga ka mema+ ne masulo a mema atupauka.”

8 Kabiji malaika wa bubiji walondejilepo waambile’mba: “Wapona! Babilona Mukatampe+ wapona,+ yenka walengela ba mu bisaka bya bantu byonse kutoma binyu bibindankanya* muchima bya bulalelale*+ bwanji!”

9 Ne malaika mukwabo wa busatu wibalondejile saka abijika’mba: “Umvwe muntu upopwela awa lukinyama+ ne kipashañano kyanji, ne kutambula kayukilo pa kilungi kyanji nangwa pa kuboko kwanji,+ 10 ukatoma binyu bya bukaji bwa Lesa byabula kuweluka byo baitulwila mu katomeno ka bukaji bwanji,+ kabiji bakamumanyika na mujilo ne na luya lwa mabwe ateema mujilo+ konka ku bamalaika bazhila ne ku Mwana Mukooko. 11 Kabiji bwishi bwa kumanyikwa kwabo bukafutumukangatu myaka ne myaka,+ kabiji bakebamanyika mute ne bufuku kwa kubula kuleka aba bapopwela lukinyama ne kipashañano kyanji ne yense watambula kayukilo ka jizhina janji.+ 12 Kino kikebewa bazhijikwa kuchinchika,+ bonka balondela mikambizho ya Lesa ne kukosela mu lwitabilo+ lwabo mwi Yesu.”

13 Kabiji naumvwine jiwi kufuma mwiulu amba, “Nemba’mba: Bo ba lusekelo aba bafwila mwi Nkambo+ kufuma luno kuya ne kulutwe. Ne aye mupashi waamba’mba, bakokoloke ku mingilo yabo yakosa, mambo bintu byo baubile bibalondela.”

14 Kabiji namwene jikumbi jitoka ne waikelepo wamwekelenga nobe mwana muntu,+ saka avwala munchinya wa ngolode ku mutwe wanji ne mu kuboko kwanji mwajinga kikwakwa kyatwa.

15 Kabiji malaika mukwabo walupukile mu nzubo yazhila ya Lesa, saka abijika ku yewa waikele pa jikumbi amba: “Tanyika kikwakwa kyobe unowe, mambo kimye kya kunowa kyafika, kabiji kajo ka kunowa pa ntanda kapya.”+ 16 Ne yewa waikele pa jikumbi watanyikile kikwakwa kyanji pa ntanda ne kunowa kajo ka pa ntanda.

17 Kabiji malaika mukwabo walupukile mu nzubo yazhila ya Lesa iji mwiulu, ne aye wajinga na kikwakwa kyatwa.

18 Ne malaika mukwabo walupukile mu kya kusokelapo bitapisho, kabiji wajinga na luusa pa mujilo. Kabiji wabijikile ku yewa wajinga na kikwakwa kyatwa amba: “Tanyika kikwakwa kyobe kyatwa ne kubungizha pamo bizanze bya muñanzañanza wa pa ntanda, mambo mañanzañanza akyo apya kala.”+ 19 Malaika watanyikile kikwakwa kyanji pa ntanda ne kubungizha pamo muñanzañanza wa pa ntanda, ne kumutaya mu kya kufiinamo binyu kikatampe kya bukaji bwa Lesa.+ 20 Banyantawile pangye ya muzhi mu kya kufiinamo binyu, ne mashi apokomokele kufuma mu kya kufiinamo binyu afikile pa ntambo yo bakashila bambili kabiji afikile palepa bibanza* 1,600.

15 Kabiji namwene kiyukilo kikwabo mwiulu, kikatampe kabiji kya kukumya kya bamalaika batanu na babiji+ bajinga na binkunka bitanu na bibiji. Bino binkunka byo byapelako, mambo mu bino binkunka mo mwapwila bukaji bwa Lesa.+

2 Kabiji namwene kyamwekelenga nobe kalunga ka mema ka galashi+ kavwangakene na mujilo, namwene ne boba bashinjile+ yewa lukinyama ne kipashañano kyanji+ ne nambala ya jizhina janji+ baimene kwipi na kalunga ka mema ka galashi saka balama byansa bya Lesa. 3 Baimbilenga lwimbo wa kwa Mosesa+ kalume wa Lesa ne lwimbo wa Mwana Mukooko+ amba:

“Anweba Yehoba* Lesa wa Bulume Bonse,+ mingilo yenu yo ikatampe kabiji ya kukumya.+ Anweba Mfumu wa myaka,+ mashinda enu aoloka kabiji a kine.+ 4 Anweba Yehoba,* ñanyi ukabula kwimwakamwa ne kutumbijika jizhina jenu, mambo anweba bunke bwenu yenu wa kishinka?+ Mambo bisaka bya bantu byonse bikeya ne kupopwela ko muji,+ mambo mizhilo yenu yaoloka yasoloka.”

5 Kepo namwene mpunzha yazhila ya mu tente wa lushimuno+ saka yashinkuka mwiulu,+ 6 kabiji bamalaika batanu na babiji+ bajinga na binkunka bitanu na bibiji balupukile mu nzubo yazhila, saka bavwala bivwalo bya linenyi byatoka ne kukema kabiji benyingile pa byaji byabo mishipi ya ngolode ya bisapi. 7 Kimo kya mu bilengwa byumi bina kyapele bamalaika batanu na babiji michiba ya ngolode itanu na ibiji yayujile na bukaji bwa Lesa+ yenka wa myaka ne myaka. 8 Kabiji nzubo yazhila yakutankene bwishi na mambo a lukumo lwa Lesa+ ne na mambo a bulume bwanji, kabiji kafwako nangwa umo wakonsheshe kutwelamo ne, kufikatu ne byobya binkunka bitanu na bibiji+ bya bamalaika batanu na babiji byo byapwile.

16 Kabiji naumvwine jiwi jikatampe kufuma mu nzubo yazhila+ saka jambila bamalaika batanu na babiji amba: “Yainga muketulwile pa ntanda masanyi afukumana atanu na abiji a bukaji bwa Lesa.”+

2 Malaika mutanshi wayile ne kuketulwila nsanyi yanji yafukumana pa ntanda.+ Kabiji bilonda bikatampe bikokota+ byaishile pa bantu bajinga na kayukilo ka yewa lukinyama+ ne bapopwejilenga kipashañano kyanji.+

3 Malaika wa bubiji naye waitulwijile nsanyi yanji yafukumana pa kalunga ka mema.+ Kabiji mema aalukile ke mashi+ nobe a muntu wafwa, ne bilengwa byumi* byonse byafwile, kine byonse byajinga mu kalunga ka mema.+

4 Malaika wa busatu naye waitulwijile nsanyi yanji yafukumana pa mikola ne pa masulo a mema atupauka.+ Kabiji byonse byaalukile ke mashi.+ 5 Naumvwine malaika wajinga na luusa pa mema saka amba’mba: “Anweba yenka mujipo kabiji mwajingapo,+ yenka wa kishinka,+ waoloka, mambo anweba mwaleta luno luzhachisho,+ 6 mambo baichijile mashi a bazhijikwa ne a bangauzhi,+ kabiji mwibapa mashi amba batome;+ kino kyo kintu kibafwainwa.”+ 7 Kabiji naumvwine kya kusokelapo bitapisho saka kyamba’mba: “Anweba Yehoba* Lesa, wa Bulume Bonse,+ luzhachisho* lwenu lo lwa kine kabiji lwaoloka.”+

8 Malaika wa buna waitulwijile nsanyi yanji yafukumana pa juba,+ ne juba bejiswishishe kusoka bantu na mujilo. 9 Kabiji bantu bebasokele ku kyuya kikatampe, bino baubile mwenga jizhina ja Lesa, yenka uji na luusa pa bino binkunka, kabiji kechi balapijile nangwa kumupa lukumo ne.

10 Malaika wa butanu waitulwijile nsanyi yanji yafukumana pa jitanda ja yewa lukinyama. Kabiji bufumu bwanji bwaalukile ke mfishi,+ ne abo batendekele kwisuma pa majimi abo na mambo a misongo, 11 bino abo bamubilenga mwenga Lesa wa mwiulu na mambo a misongo ne bilonda byabo, kabiji kechi balapijile ku mingilo yabo ne.

12 Malaika wa butanu na bumo waitulwijile nsanyi yanji yafukumana pa mukola mukatampe wa Ufelata,+ ne mema aumine+ kuba’mba banengezhezhe jimo jishinda ja bamfumu+ bakafuma kuselela juba.*

13 Kabiji namwene byambo bisatu byatama bya mipashi* byapashishe mabombwe saka bilupuka mu kanwa ka nsuñunyi+ ne mu kanwa ka yewa lukinyama, ne mu kanwa ka ngauzhi wa bubela. 14 Bino byambo bya mipashi bifuma ku bandemona kabiji byuba bya kukumya,+ ne kuya ku bamfumu ba pano pa ntanda ponse mu kwibakonkenya pamo ku nkondo+ ya aja juba jikatampe ja Lesa wa Bulume Bonse.+

15 “Talai! Mbena kwiya nobe ngivi.+ Ye wa lusekelo awa ulaba ne kukenkenta+ kabiji ulama bivwalo byanji bya peulu, kuba’mba abule kwenda bwamba ne bantu bakamona pa bumvu bwanji.”+

16 Kabiji bebakonkenye pamo ku mpunzha itelwa mu Kihebelu amba Amagedonyi.*+

17 Malaika wa butanu na bubiji waitulwijile nsanyi yanji yafukumana mu mwela. Ponkapo jiwi jikatampe jafumine mu nzubo yazhila+ yajinga ku jitanda amba: “Kyaubiwa!” 18 Kabiji kwajinga kubesha kwa mvula ne mawi ne kutatauka kwa mvula, kabiji kwaubiwe kitentanshi kikatampe kikyangye kumwekapo kala kufumatu kimye bantu kyo balengelwe pano pa ntanda,+ kabiji kino kitentanshi kine kyabayile bingi. 19 Muzhi mukatampe+ waabenepo pasatu, kabiji mizhi ya bisaka bya bantu yakundukile; ne Lesa wavulukile Babilona Mukatampe+ amba amupe katomeno muji binyu bya bukaji bwanji.+ 20 Kabiji makuji onse anyemene, ne mitumba nayo kechi yamwekele ne.+ 21 Ne mvula wa mabwe akatampe afumine mwiulu ne kuponena bantu,+ jibwe jimo janemene nobe talenta* umo, kabiji bantu bamubilenga mwenga Lesa na mambo a kinkunka kya mvula wa mabwe kibafikijile,+ mambo kino kinkunka kyabayile bingi.

17 Malaika umo mu boba bamalaika batanu na babiji bajinga na masanyi afukumana atanu na abiji+ waishile ne kuñambila’mba: “Iya kuno, nsakukumwesha luzhachisho lwa yewa pite mukatampe waikala pa mema avula,+ 2 ye baubile nanji bulalelale*+ bamfumu ba pa ntanda, kabiji bantu bekala pa ntanda wibalengejile kupendwa na binyu bya bulalelale* bwanji.”+

3 Kabiji wantwajile mu kiselebwa na bulume bwa mupashi. Kabiji namwene mwanamukazhi waikele pa lukinyama wachijisha wajinga na mazhina onse a mwenga ne mitwe itanu na ibiji ne nsengo jikumi. 4 Uno mwanamukazhi wavwajile byachiluluka+ ne byachijisha kabiji wikobaikile bya ngolode, bya mabwe a buneme ne bamangalite,+ kabiji mu kuboko kwanji mwajinga katomeno ka ngolode kayujile bintu bya bunya ne byatama bya bulalelale* bwanji. 5 Pa kilungi kyanji panembelwe jizhina jafyamika ja kuba’mba: “Babilona Mukatampe, inanji bapite+ ne inanji bya bunya bya pa ntanda.”+ 6 Kabiji namwene uno mwanamukazhi saka apendwa mashi a bazhijikwa ne mashi a bakamonyi ba kwa Yesu.+

Byo namumwene, nakuminye bingi. 7 Onkao mambo, malaika wanshikishe’mba: “Mambo ka o wakuminya? Nsakukubuula kyafyamika kya uno mwanamukazhi+ ne yewa lukinyama wamusenda uji na mitwe itanu na ibiji ne nsengo jikumi:+ 8 Awa lukinyama ye waji kumona, wajingapo kala, pakuba luno ufwapo, pano bino katatakatu afume mu kalengwa kabula kupela,+ kabiji bakamonauna. Kabiji bantu bekala pa ntanda babula kunembwa mazhina abo mu muvungilo wa bumi+ kufumatu ku ntendekelo ya pano pa ntanda—bakakumya bingi kimye kyo bakamona yewa lukinyama byo ajingapo kala, pano luno ufwapo, bino ukekalapo.

9 “Muntu wafwainwa kwikala na maana pa kuba’mba akwatakanye kino: Aya mitwe itanu na ibiji,+ imenako mitumba itanu na ibiji, ponka paikala awa mwanamukazhi. 10 Kabiji kuji bamfumu batanu na babiji: Batanu bapona kala, umo ukiji ponka, ne mukwabo ukyangye kufika; bino byo akafika, ukekalatu kakimye kacheche. 11 Kabiji awa lukinyama wajingapo kala bino ufwapo,+ ye mfumu wa butanu na busatu, bino wafuma mu bamfumu batanu na babiji, kabiji bakamonauna.

12 “Ne aya nsengo jikumi yo waji kumona, imenako bamfumu jikumi bakyangye kutambula bufumu, bino batambula luusa lwa kwikala bamfumu pa jiola jimo pamo na yewa lukinyama. 13 Bano bonse baji na mulanguluko umo, onkao mambo bapana bulume ne luusa lwabo ku yewa lukinyama. 14 Bano bakalwa na Mwana Mukooko,+ bino na mambo a kuba aye ye Nkambo wa bankambo kabiji Mfumu wa bamfumu,+ Mwana Mukooko ukebashinda.+ Kabiji aba bo aji nabo baitwa ne kusalwa kabiji ba kishinka, nabo bakoba byonkabyo.”+

15 Wañambijile’mba: “Aa mema o waji kumona, paikala pite, emenako mitundu ya bantu ne mabumba ne bisaka bya bantu ne njimi.*+ 16 Kabiji aya nsengo jikumi+ ne awa lukinyama byo waji kumona,+ bikamushikwa pite+ ne kumonauna ne kumuvuula, kabiji bikaja nyama yanji ne kumusokatu pelu na mujilo.+ 17 Mambo Lesa wabika mu michima yabyo kuba kyaswa muchima wanji,+ kine, kuba’mba bifikizhe mulanguluko wabyo umo kupichila mu kwibalengela kupa yewa lukinyama bufumu ne luusa lwabo,+ kufikatu ne byambo bya Lesa byo bikobiwa. 18 Kabiji awa mwanamukazhi+ ye waji kumona wimenako muzhi mukatampe uji na bufumu bulama bamfumu ba pa ntanda.”

18 Bino byo byapichile, namwene malaika mukwabo saka afuma mwiulu na luusa lukatampe, ne lukumo lwanji lwasamine pa ntanda. 2 Kabiji wabijikile na jiwi jakosa amba: “Wapona! Babilona Mukatampe wapona,+ kabiji waaluka ke mpunzha mwa kwikala bandemona, mwa kwikala mipashi* yatama ne bintu byonse bya biko ne bañonyi bo bashikwa!+ 3 Mambo binyu bya bulalelale* bwanji bibindankanya* muchima, byalengela bisaka bya bantu byonse kupendwa,+ kabiji bamfumu ba pa ntanda baubile nanji bulalelale,+ ne bapoteshi* ba pa ntanda baikele banonshi na mambo a bintu byanji byavula bya buneme byo abula kubila bumvu.”

4 Kabiji naumvwine jiwi jikwabo kufuma mwiulu amba: “Anweba bantu bami, lupukaimo mwi aye,+ inge kechi mukeba kwivwangamo mu bubi bwanji ne, kabiji inge kechi mukeba kupitamo mu binkunka byanji ne.+ 5 Mambo bubi bwanji bwafika ne mwiulu,+ kabiji Lesa wavuluka byubilo byanji byatama.*+ 6 Mumubile monka mo aubilanga bakwabo,+ kine, pa bintu byo aubilenga mumubikilepo ne bikwabo bya byonkabyo;+ bintu byo avwangakenye mu katomeno+ mumuvwangilemo ne bikwabo bya byonkabyo.+ 7 Monka mo etumbijikile mwine ne kwikala na bintu bya buneme byo abula kubila bumvu, mumanyikilai monkamo ne kumulengela kujila. Mambo wamba mu muchima wanji amba: ‘Amiwa nemfumu wa mukazhi uji pa jitanda, kabiji kechi nemwanamukazhi wafwilwa ne, kabiji kechi nkajilapo ne.’+ 8 O ene mambo mu jubatu jimo binkunka byanji bikamufikila, lufu ne kujila ne nzala, kabiji bakamusokatu pelu na mujilo,+ mambo Yehoba* Lesa wamuzhachishe, ye wakosa.+

9 “Kabiji bamfumu ba pa ntanda baubile nanji bulalelale* ne kwikala nanji mu bintu byanji bya buneme byo abula kubila bumvu, bakamujila ne kuba bulanda byo bakamona bwishi bwa kupya kwanji. 10 Bakemanatu palepa byobya na mambo a kuchina kumanama kwanji ne kwamba’mba: ‘Kyatama bingi, kyatama bingi, obewa muzhi mukatampe,+ Babilona obewa muzhi wakosa, mambo kuzhatwa kobe kwa kufikila mu jiolatu jimo!’

11 “Kabiji bapoteshi ba pa ntanda nabo bamujijilenga ne kujila mabingo, mambo kafwako wa kupota bipe byabo byonse ne, 12 bipe byonse bya ngolode, bya siliva, bya mabwe a buneme, bya bamangalite, bisapi bya linenyi byawamisha, bisapi byachiluluka, bisapi byalezhima, ne bisapi byachijisha; ne bintu byonse byo basonga ku bichi; ne bintu byonse byalengwa kufuma ku meno a banzovu, ne ku bichi byawamisha, bya mukuba, bya kapotwe, ne bya mabwe a myalamyala; 13 ne bya kichi kya kinamonyi, binunka bulongo bya ku India, bya kufutumuna, manyi a anunka bulongo, bya kufutumuna binunka bulongo, binyu, manyi a maolivi, fulaulo wawama, wichi, bañombe, mikooko, bambili, bikochikala, bazha ne bantu.* 14 Kine bipangwa byawama obewa* byo wakebanga byakunyema, ne kajo konse kawama ne bintu byawamisha byapwa, kabiji kechi bikamwekapo jibiji ne.

15 “Bapoteshi bapoteshenga bino bintu, bonka banonkele na mambo a aye, bakemana palepa byobya na mambo a kuchina kumanama kwanji kabiji bakamujila ne kujila mabingo, 16 amba, ‘Kyatama bingi, kyatama bingi, obewa muzhi mukatampe, wavwajile kisapi kya linenyi kyawamisha ne kyachiluluka ne kyachijisha, kabiji wikobaikile bya buneme bya ngolode ne bya mabwe a buneme ne bya bamangalite,+ 17 mambo buno bunonshi bobe bukatampe bebonauna mu jiolatu jimo!’

“Kabiji bakulumpe bonse ba maato ne bonse benda mu maato ne bakyabusha ne bonse bamwena mali mu mwingilo wa pa kalunga ka mema, baimene palepa byobya 18 kabiji batamine muteto byo bamwene bwishi bwafuminenga po apijilenga ne kwamba’mba: ‘Ñanyi muzhi uji nobe uno muzhi mukatampe?’ 19 Bepukwilenga lukungu ku mitwe yabo ne kutama miteto saka bajila ne kujila mabingo amba: ‘Kyatama bingi, kyatama bingi, obewa muzhi mukatampe, mo baikejile na bunonshi aba bonse baji na maato pa kalunga ka mema na mambo a bunonshi bwanji, mambo bamonauna mu jiolatu jimo!’+

20 “Sekelai na mambo a aye, anweba meulu,+ ne anweba bazhijikwa+ ne batumwa ne bangauzhi, mambo uno mwanamukazhi Lesa wimuzhachishishaye!”+

21 Kabiji malaika wakosa washikwile jibwe jajinga nobe mpelo ikatampe ne kwijitaya pa kalunga ka mema ne kwamba’mba: “Bino byo byo bakamutaya panshi bukiji Babilona muzhi mukatampe, kabiji kechi ukamwekapo jibiji ne.+ 22 Kabiji jiwi ja banyimbi baimbilenga pa byansa ne ja bañomba ne ja bavumya mimpempe, ne ja bavumya matolompita kechi jikomvwanyikapo jibiji mwi obewa ne. Kabiji kafwako sendwe wingila mwingilo yense ukatanwa mwi obewa jibiji ne, kabiji mpelo kechi ikomvwanyikapo jibiji mwi obewa ne. 23 Kabiji kyeya kya lampi kechi kikamwekapo jibiji mwi obewa ne, ne jiwi ja musongoshi ne ja musongwa kechi jikomvwanyikapo jibiji mwi obewa ne; mambo bapoteshi bobe bo bajinga bakulumpe bene pa ntanda, kabiji bisaka bya bantu byonse byaongwelwe na mambo a byubilo byobe bya kupopwela mipashi.+ 24 Mwi aye mwatainwe mashi a bangauzhi, a bazhijikwa+ ne a bonse bo baipayile pa ntanda.”+

19 Bino bintu byo byapichile, naumvwine kintu kyaumvwanyikilenga nobe kyungwe kya jibumba jikatampe mwiulu. Baambilenga’mba: “Totai Yehoba!*+ Lupulukilo, lukumo ne bulume byo bya kwa Lesa wetu, 2 mambo luzhachisho lwanji lo lwa kine kabiji lwaoloka.+ Mambo wamuzhachisha awa pite mukatampe waongwelenga bantu ba pa ntanda na bulalelale* bwanji, kabiji aye washinkanya nanji na mambo a mashi a bakalume banji aji ku maboko anji.”*+ 3 Ponkapo baambile ja bubiji amba: “Totai Yehoba!*+ Ne bwishi bwa yewa pite butwajijila kufutumuka myaka ne myaka.”+

4 Kabiji bakulumpe 24+ ne bilengwa byumi bina+ bafukamine ne kupopwela Lesa waikala pa jitanda amba: “Amena! Totai Yehoba!”*+

5 Kabiji jiwi jafumine ku jitanda amba: “Mutotainga Lesa wetu, anweba bakalume banji+ bamwakamwa, bacheche ne bakatampe.”+

6 Kabiji naumvwine kyaumvwanyikilenga nobe kyungwe kya jibumba jikatampe kabiji nobe mpota ya mema avula kabiji nobe kutatauka kukatampe kwa mvula. Baambilenga’mba: “Totai Yehoba,*+ mambo Yehoba* Lesa wetu, wa Bulume Bonse+ watendeka kulama nobe mfumu!+ 7 Twayai tusangalale ne kumupa lukumo, mambo masongola a Mwana Mukooko afika, kabiji mukazhanji winengezha kala. 8 Uno mukazhanji bamuswisha kuvwala kisapi kya linenyi kyawamisha, kyakema kabiji kyatoka—mambo kino kisapi kimenako byubilo byaoloka bya bazhijikwa.”+

9 Kabiji wañambijile’mba, “Nemba’mba: Bo ba lusekelo aba bo baita ku kijiilo kya mabanga kya masongola a Mwana Mukooko.”+ Kabiji wambuujile’mba: “Bino byambo bya Lesa bya kine.” 10 Ponkapo nafukamine ku maulu anji kuba’mba namupopwele. Bino aye wañambijile’mba: “Jimuka! Kange ube kino ne!+ Amiwa nekalume mukwenu kabiji wa balongo bobe baji na mwingilo wa kushimuna bukamonyi pe Yesu.+ Popwela Lesa!+ Mambo kushimuna bukamonyi pe Yesu kyo kishina kya bungauzhi bonse.”+

11 Namwene mwiulu saka mwashinkuka, kabiji namwene mbili utoka.+ Ne yewa waikelepo utelwa’mba, wa Kishinka+ kabiji wa Kine.+ Kabiji monka mu bololoke mo mo achibila mambo kabiji mo mo alwila nkondo.+ 12 Meso anji lo lubebe lwa mujilo,+ ne pa mutwe wanji pajinga tubondo* twavula. Kabiji uji na jizhina janembwa jabula kuyuka muntu nangwa umo ne, kanatu aye mwine, 13 kabiji wavwala kivwalo kya peulu kyo basombesha* na mashi, kabiji bamutela jizhina ja kuba’mba, Mambo+ a Lesa. 14 Ne mazhita a mwiulu amulondejilenga pa bambili batoka, saka bavwala bisapi bya linenyi byawamisha kabiji byatokatu too. 15 Kabiji mu kanwa kanji mwalupukile mpoko yalepa yatwa+ ya kwipayilako bisaka bya bantu, kabiji ukebafunga na kamama ka kapotwe.+ Kabiji unyantaula mu kya kufiinamo binyu kya bukaji bukatampe bwa Lesa wa Bulume Bonse.+ 16 Pa kivwalo kyanji kya peulu, ponka pa jimbwata janji, paji jizhina janembwa’mba, Mfumu wa bamfumu kabiji Nkambo wa bankambo.+

17 Kabiji namwene malaika saka aimana mu juba, kabiji wabijikile ne kwita bañonyi bonse bapita pakachi* ka jiulu amba: “Konkenai kuno ku kijiilo kikatampe kya mabanga kya Lesa,+ 18 kuba’mba muje mibiji ya bamfumu ne ya bakulumpe bene ba bashilikale ne ya babilobo+ ne ya bambili ne ya bendapo+ ne mibiji ya bantu bonse, baana ba bene, bazha, bacheche ne bakatampe.”

19 Kabiji namwene awa lukinyama ne bamfumu ba pa ntanda ne mazhita abo saka bakonkana pamo kuba’mba baye na kulwa na yewa waikele pa mbili ne nzhita yanji.+ 20 Ne yewa lukinyama bamukwachile pamo na yewa ngauzhi wa bubela+ waubilenga bya kukumya ku meso anji mo ajimbaikijilenga aba bajinga na kayukilo ka yewa lukinyama+ ne boba bapopwelanga kipashañano kyanji.+ Byo bakijinga bomi, abano bonse babiji bebatayile mu kizhiba kiteema mujilo ne mabwe ateema mujilo.+ 21 Pakuba aba bashajilepo bebepayile na mpoko yalepa yalupukile mu kanwa ka yewa waikele pa mbili.+ Kabiji bañonyi bonse baikuchile mibiji yabo.+

20 Kabiji namwene malaika saka afuma mwiulu wajinga na kii wa kalengwa kabula kupela+ ne munyololo mukatampe mu kuboko kwanji. 2 Wakwachile awa nsuñunyi+ yenka muloolo wa kala,+ aye Diabola+ kabiji Satana,+ ne kumukasa myaka 1,000. 3 Kabiji wamutayile mu kalengwa kabula kupela+ ne kushinkapo ne kubikapo katetesho, kuba’mba abule kujimbaika jibiji bisaka bya bantu kufikatu ne yoya myaka 1,000 byo ikapwa. Ino myaka inge yapwa, wafwainwa kukasululwa pa kakimye kacheche.+

4 Kabiji namwene matanda ne boba baikelepo bebapele luusa lwa kuchiba mambo. Namwene ne myeo* ya boba bo baipayile na mambo a kushimuna pe Yesu ne na mambo a kusapwila pe Lesa, ne boba babujile kupopwelako awa lukinyama nangwa kipashañano kyanji, kabiji babujile kutambulako kayukilo pa bilungi byabo ne pa maboko abo.+ Kabiji baikele bomi jibiji ne kulama pamo ne Kilishitu+ mu bufumu myaka 1,000. 5 (Aba bafu bashajilepo+ kechi baikele na bumi jibiji ne, poso aya myaka 1,000 byo yapwile.) Luno lo lusanguko lutanshi.+ 6 Ye wa lusekelo ne kuzhila awa ukekala mu lusanguko lutanshi;+ lufu lwa bubiji+ kechi luji na luusa pa bano ne,+ bino abo bakekala bañanga ba Lesa+ ne ba kwa Kilishitu kabiji bakekala bamfumu ne kulama pamo ne aye myaka 1,000.+

7 Kabiji aya myaka 1,000 byo ikapwatu, Satana bakamukasulula mu kaleya kanji, 8 kabiji aye ukaya na kujimbaika abya bisaka bya bantu biji ku makonka ana a ntanda, Gogi ne Magogi, ne kwibakonkenya pamo ku nkondo. Bano bakavula bingi nobe busenga bwa ku kalunga ka mema. 9 Kabiji bayile monse monse mwapela ntanda ne kuzhokoloka kampu wa bazhijikwa ne muzhi ye batemwa. Bino mujilo wafumine mwiulu ne kwibasoka bonse.+ 10 Kabiji Diabola wibajimbaikilenga bamutayile mu kizhiba kya mujilo ne mabwe ateema mujilo, monka muji awa lukinyama+ ne ngauzhi wa bubela;+ kabiji bakebamanyikanga* mute ne bufuku myaka ne myaka.

11 Kabiji namwene jitanda jikatampe jitoka ne waikelepo.+ Ntanda ne jiulu byanyemene kufuma kwi aye,+ kabiji kechi byataaine pa kwikala ne. 12 Kabiji namwene bantu bafwile bakatampe ne bacheche saka baimana kulutwe ya jitanda, kabiji mivungilo beivungulwile. Bino muvungilo mukwabo bamuvungulwile; uno ye muvungilo wa bumi.+ Bafwa bebachibijile mambo monka mwayijile mingilo yabo kwesakana na bintu byanembelwe mu mivungilo.+ 13 Kabiji kalunga ka mema kasolwele bantu bafwijilemo, ne lufu ne Kilende* byasolwele bafu bajingamo, kabiji bebachibijile mambo pa muntu pa muntu monka mwayijile byubilo byabo.+ 14 Kabiji lufu ne Kilende* bebitayile mu kizhiba kya mujilo.+ Kino kilumbulula lufu lwa bubiji,+ kizhiba kya mujilo.+ 15 Kabiji yense ye babujile kunemba mu buku wa bumi,+ bamutayile mu kino kizhiba kya mujilo.+

21 Kabiji namwene jiulu jipya ne ntanda ipya;+ mambo jiulu ja kala ne ntanda ya kala byapichijila,+ ne kalunga ka mema+ kechi ko kakiji ne. 2 Kabiji namwene muzhi wazhila, Yelusalema Mupya, saka ekila kufuma mwiulu kwi Lesa+ saka enengezha nobe musongwa wavwajila bulongo mwatawanji.+ 3 Ponkapo naumvwine jiwi kufuma ku jitanda amba: “Tala! Tente wa Lesa uji na bantu, ne aye ukekala nabo, ne abo bakekala ke bantu banji. Ne Lesa mwine ukekala nabo.+ 4 Kabiji ukashimuna mipolo yonse ku meso abo,+ ne lufu, mabingo, kujila ne misongo kechi bikekalako jibiji ne.+ Bintu bya kala byapichijila.”

5 Kabiji awa waikele pa jitanda+ waambile’mba: “Tala! Mbena kulenga bintu byonse kwikala ke bipya.”+ Kabiji waamba’mba: “Nemba, mambo bino byambo bya kishinka* kabiji bya kine.” 6 Kabiji wañambijile’mba: “Byonse byaubiwa! Amiwa yami Alefwa ne Omeka,* yami ntendekelo ne mpelo.+ Yense ufwa kilaka nkamupa masulo atupauka mema a bumi a bupetu.*+ 7 Yense ushinda ukaswana bino bintu, ne amiwa nkekala Lesa wanji ne aye ukekala mwanami. 8 Pakuba ba moyo, babula lwitabilo,+ boba bya bunya, bambanzhi,+ boba bulalelale,*+ bapopwela mipashi, bapopwela bankishi ne bonse ba bubela+ bakebataya mu kizhiba kiteema mujilo ne mabwe ateema mujilo.+ Kino kilumbulula lufu lwa bubiji.”+

9 Malaika umo mu boba bamalaika batanu na babiji bajinga na masanyi afukumana atanu na abiji ayujile binkunka bitanu na bibiji+ byapeleleko, waishile ne kuñambila’mba: “Iya, kabiji nsakukumwesha musongwa, muka Mwana Mukooko.”+ 10 Onkao mambo, wansendele na bulume bwa mupashi kuya ku mutumba mukatampe walepa, kabiji wammwesheshe Yelusalema muzhi wazhila saka ekila kufuma kwi Lesa+ 11 wajinga na lukumo lwa Lesa.+ Kubeka kwanji kwajinga nobe kwa jibwe ja buneme, kabiji nobe kubeka kwa jibwe ja yasipa.+ 12 Uno muzhi wajinga na nsakwa ikatampe yalepa kabiji yajinga na bibelo 12 ne bamalaika 12 baimene ponka, kabiji pa bino bibelo panembelwe mazhina a mikoka 12 ya bena Isalela. 13 Ku musela kwajinga bibelo bisatu, ku kabeta ka ku buyeke nako kwajinga bibelo bisatu, ku kabeta ka ku bulenge kwajinga bibelo bisatu ne ku muzhika nako kwajinga bibelo bisatu.+ 14 Nsakwa ya uno muzhi nayo yajinga na mabwe 12 pa kitendekesho, kabiji pa ano mabwe panembelwe mazhina 12 a batumwa 12+ ba Mwana Mukooko.

15 Awa wañambijilenga, walamine jitete ja ngolode ja kupiminako kuba’mba apime muzhi ne bibelo byanji ne nsakwa yanji.+ 16 Kabiji uno muzhi waesakenetu monse, ne mu bula bwanji mwaesakenetu pamo na mu bwipi bwanji. Kabiji wapimine muzhi na jitete, bibanza 12,000;* mu bula, mu bwipi ne mu kimino monse mwaesakene. 17 Kabiji wapimine ne nsakwa makyubichi 144,* monka mwayila kipimo kya muntu, kabiji kyo kipimo kya malaika. 18 Nsakwa yashimikilwe na mabwe a yasipa,+ ne muzhi wajinga wa ngolode yajinga nobe galashi. 19 Bitendekesho bya nsakwa ya muzhi bebiwamishe bulongo na misango yonse ya mabwe a buneme: kitendekesho kitanshi kyajinga kya mabwe a yasipa, kya bubiji kyajinga kya mabwe a safila, kya busatu kyajinga kya mabwe a kalesedone, kya buna kyajinga kya mabwe a emalode, 20 kya butanu kyajinga kya mabwe a sadonisi, kya butanu na bumo kyajinga kya mabwe a salajasi, kya butanu na bubiji kyajinga kya mabwe a kisolite, kya butanu na busatu kyajinga kya mabwe a mbelilo, kya butanu na buna kyajinga kya mabwe a topaze, kya bujikumi kyajinga kya mabwe a kisopase, kya bujikumi na bumo kyajinga kya mabwe a yakinto, kya bujikumi na bubiji kyajinga kya mabwe a ametesete. 21 Kabiji bibelo 12 byajinga bya bamangalite 12; kibelo kyonse kyalengelwe na mangalite umo. Kabiji mukwakwa wa mu muzhi wajinga wa ngolode yawamisha nobe galashi.

22 Kabiji kechi namwenemo nzubo ya Lesa mu yewa muzhi ne, mambo Yehoba* Lesa wa Bulume Bonse+ ye nzubo yanji yazhila, ne Mwana Mukooko pamo. 23 Kabiji uno muzhi kechi wakebewenga juba nangwa ñondo kusaminamo ne, mambo lukumo lwa Lesa lo lwasamijilemo,+ kabiji lampi wanji wajinga Mwana mukooko.+ 24 Kabiji bisaka bya bantu bikendanga mu kyeya kyanji,+ ne bamfumu ba pa ntanda bakaletamo lukumo lwabo. 25 Bibelo byanji kechi bakebishinka mu kimye kya mute kyonse ne, mambo bufuku kechi bukekalamo ne.+ 26 Kabiji bakaletamo lukumo ne buneme bwa bisaka bya bantu.+ 27 Pakuba bintu byonse byatama kechi bikekalamo ne, kabiji muntu yense uba bya bunya ne bya bujimbijimbi kechi ukatwelamo ne;+ kanatu bonkaba banembwa mu muvungilo wa bumi wa Mwana Mukooko bo bakatwelamo.+

22 Kabiji wammwesheshe mukola wa mema a bumi,+ atoka nobe jibwe ja kilishitala, saka afuma ku jitanda ja Lesa ne ja Mwana Mukooko+ 2 ne kupita mukachi ka mukwakwa wanji mukatampe. Ku bushiya ne bushiya bwa mukola kwajinga bichi bya bumi byapangilenga bipangwa 12, byapangilenga pa ñondo pa ñondo. Kabiji mabuula abyo ajinga a kubukilako bisaka bya bantu.+

3 Kabiji mu uno muzhi kechi mukekala mafingo jibiji ne. Bino jitanda ja Lesa ne ja Mwana Mukooko+ jikekala mu uno muzhi, ne bakalume banji bakamwingijilanga mwingilo wazhila; 4 kabiji bakamona kilungi kyanji,+ ne jizhina janji jikekala pa bilungi byabo.+ 5 Bufuku kechi bukekalamo ne,+ kabiji kechi bakakeba kyeya kya lampi nangwa kya juba ne, mambo Yehoba* Lesa ukebasamishisha kyeya,+ kabiji bakekala bamfumu bakalamanga myaka ne myaka.+

6 Wañambijile’mba: “Bino byambo bya kishinka* kabiji bya kine;+ ne aye Yehoba,* Lesa watangijile bangauzhi na mupashi wazhila,+ watumine malaika wanji kumwesha bakalume banji bintu byafwainwa kumweka palutwe kacheche. 7 Tala! mbena kwiya bukiji.+ Ye wa lusekelo yense ulama byambo bya bungauzhi bya mu uno muvungilo.”+

8 Amiwa Yoano yami naumvwine ne kumona bino bintu. Byo nebyumvwine ne kwibimona, naponejile ku maulu anji namba namupopwele malaika wammwesheshe bino bintu. 9 Bino aye wañambijile’mba: “Jimuka! Kange ube kino ne! Amiwa nekalume mukwenu kabiji wa balongo bobe bangauzhi ne boba balama byambo bya mu uno muvungilo. Popwela Lesa.”+

10 Kabiji wañambijile’mba: “Kange ushinkepo katetesho pa byambo bya bungauzhi biji mu uno muvungilo ne, mambo kimye kyatongolwa kyafwenya kala pepi. 11 Awa uba byabula koloka atwajijile kuba bintu byabula koloka, ne yewa uba bya bunya atwajijile kuba bya bunya. Bino awa waoloka atwajijile kwikala waoloka, ne yewa wazhila atwajijile kwikala wazhila.

12 “‘Tala! Amiwa mbena kwiya bukiji, ne mfweto yo mpana nji nayo, ya kupa muntu yense monka mwayila mingilo yanji.+ 13 Amiwa yami Alefwa ne Omeka,*+ yami mutanshi kabiji wapelako, yami ntendekelo ne mpelo. 14 Bo ba lusekelo aba bachapa bivwalo byabo,+ pa kuba’mba bekale na luusa lwa kuja bipangwa ku bichi bya bumi+ ne kuba’mba batwele mu muzhi kupichila mu bibelo byanji.+ 15 Pangye paji bakabwa* ne boba bapopwela mipashi ne boba bulalelale* ne bambanzhi ne bapopwela bankishi ne bonse batemwa bubela ne kwibwamba.’+

16 “‘Amiwa Yesu, natuma malaika wami kwimushimwina bino bintu kuba’mba bipwilo bimwenemo byawama. Amiwa yami muzhazhi wa mu baana ba kwa Davida+ kabiji yami ntanda wa ku makya watokesha.’”+

17 Kabiji mupashi ne musongwa+ babena kwamba’mba: “Iyai!” ne yense ubena kumvwa naye ambe’mba, “Iyai!” kabiji yense wafwa kilaka eye;+ ne yense wasaka, atambule mema a bumi a bupetu.+

18 “Amiwa mbena kushimuna ku yense umvwa byambo bya bungauzhi biji mu uno muvungilo namba: Umvwe muntu wanungako ku bino bintu,+ Lesa naye ukamunungilapo binkunka byanembwa mu uno muvungilo;+ 19 kabiji inge muntu wafumyamo byambo mu uno muvungilo wa bungauzhi, Lesa naye ukamwangata kyo bamwabilapo kyanembwa mu uno muvungilo, kechi ukamuswisha kuja bipangwa bya ku bichi bya bumi ne,+ kabiji kechi ukamuswisha kutwela mu muzhi wazhila ne.+

20 “Awa ushimuna bino bintu waamba’mba, ‘Kine, amiwa mbena kwiya bukiji.’”+

“Amena! Iyai, Nkambo Yesu.”

21 Lusa lukatampe lwa Nkambo Yesu lwikale pa bazhijikwa.