Meso Akatampe Kanyama Kacheche

BAVULA bamba’mba kamweka bingi bulongo, kabiji bakwabo bamba’mba kapusanako na banyama bakwabo mu mwekelo. Kaji na tumaulu twalepa, boya bwanekena ne meso akatampe abembela. Kalepa masentimita 12.5, kabiji kanema magalamu 114. Ñanyi kanyama ko tubena kwambapo? Kano ke katoonto.

Tusakwisamba pa katoonto ka mu kyalo kya Philippine. Meso, matwi, maboko, maulu ne mukila wa kano kanyama bimweka kwikabayila. Pano inge twikatajisha bulongo tumona kuba’mba bekalengele mu jishinda ja kukumya bingi.

MATWI: Kano kanyama kemika ne kwalulula matwi ako pa kuba’mba komvwe kyongo kya tubintu tucheche. Kino kikakwashako pa kukeba kajo ne kubula kwikepaya ku banyama baja banyama bakwabo. Inge bwaila, matwi a kano kanyama omvwa kyongo kya tunzumbulu, makena, bitokola, tuñonyi ne mabombwe. Inge kaumvwa bino, kalulula mutwe yense pa kuba’mba meso ako akatampe amone bino bintu apa bino kakwata.

MABOKO: Maboko a kano kanyama alengwa mu jishinda ja kwikakwashako kusampa bulongo ku tumisampi tucheche. Kwapela minwe yako kuji makakalwa ekakwashako kukwata bulongo bichi. Kano kanyama nangwatu inge kalaala katwajijilatu kukwata ku kichi. Munshi ya mukila wako muji makakalwa ekakwashako kubula kupona inge kalaala.

MESO: Kafwako nyama uji na meso amubayila byonka biji kano katoonto ne. Meso ako abaya kukila bongo bo kaji nabo. Meso ako kechi aluluka na kutala mumbaji ne, atalatu kulutwe. Nanchi byaikala ano meso bikalengela kubula kumona biji mu mbaji nyi? Ine. Kaji na nshingo yanekena ikakwashako kwalulula mutwe ne kumona mu mbaji ne kunyuma.

AULU: Maulu ako alepa ekakwashako kukiluka palepa mamita 6. Bufuku pa kukwata tulongolo to kaja, kano kanyama kakiluka saka kavungulula minwe yako pa kuba’mba kakwate tulongolo.

Javula tuno tutoonto tufwa bukiji inge betukwata’mba betulele mambo twapijilwa kwikala mungye saka twikwachila tulongolo na kuja, kabiji ne ato twine kechi tukeba kulelwa ku bantu ne. Nangwa byonkabyo, tuno tunyama tukumisha bingi bantu bekala ku Philippine. Bantu bakumya bingi pa kumona byalengwa kano kanyama kabaya meso kekala mu jisaka.