Kinungwa Kisamisha Kyeya kya Kilengwa kya ku Hawaii Kitelwa’mba Bobtail Squid

Kilengwa kitelwa’mba Bobtail Squid kya ku kyalo kya Hawaii kikeba bya kuja bufuku kwingijisha kyeya kyo kisamisha. Kino kyeya kilengela bilengwa bikwabo kubula kwikimona. Kyeya kyo kisamisha kipasha na kyeya kya ñondo ne tubangabanga. Kilengela kuba’mba kino kilengwa kisamishenga kyeya ke lukwatankano luji pa tulongolo tujimo tusamisha kyeya. Byonka bingila tulongolo tuji mu kino kilengwa, ne atweba bantu tumwenamo mu bingila tulongolo tuji mu mubiji mu mashinda amo. Tuno tulongolo twakonsha kwitukwashako kwikala na butuntulu bwa mubiji bwawama.

Langulukai pa kino: Kino kilengwa kikala mu mema atooka aji pa makuji a Hawaii. Kyeya kya ñondo ne tubangabanga kilengela kino kilengwa kubula kwikipaya ku bijanyi. Nangwa byonkabyo, kino ki bobtail squid kisamisha kyeya kipasha na kyeya kya ñondo ne tubangabanga kwesakana na byo kitooka ne po kipelela. Kuba bino kwikilengela kufya kimvule pa kuba’mba babulenga kwikimona ku bilengwa bikwabo byo kija. Kilengela kuba’mba ki squid kisamishenga kyeya ke kinungwa kimo kya mubiji mwikala tulongolo twa kyeya tusamisha kyeya kyafwainwa kilengela’mba kibulenga kumweka ku bintu byo kija.

Tuno tulongolo tukwashako kino ki squid kuyuka kimye kya kulaala ne kubuuka. Kino kilengela bashayuka kukeba kuyuka bulongo byo kyalengwa mambo lukwatankano luji pakachi ka tulongolo ne byo tukwasha bilengwa kechi lujitu mu ki bobtail squid monka ne. Mu bilengwa bikwabo nabiji bantu, tuno tulongolo tukwashako mu kukaya kajo pa maola 24 pa juba pa juba. Kuvulañanya bingila tuno tulongolo kwakonsha kulengela muntu kupopomenwa, kwikala na kikola kya shuka, kukizhamo kubaya, ne kwikala na kilabila. Onkao mambo, kufunda bingila tulongolo tuji mu ki squid kwakonsha kukwashako kuyuka bingila mubiji wa muntu.

Mwalangulukapo’mba Ka? Kinungwa kisamisha kyeya kya kilengwa kya ku Hawaii kitelwa’mba Bobtail Squid kyaishileko kine nyi, inyi kyalengelwe?