Buneme bwa Mambo Awama ku Mpunzha ko Muji

ANO moba, tumvwa javula bantu na kwamba’mba: “Mafunde a bwina Kilishitu kechi akwasha ne. Kechi akonsha kwingila mu ino ntanda ya bantu bapusana pusana ne.” Pano bino, mu mwisambo wajingako pakachi ka ntangi wa Bahindu aye Mohandas K. Gandhi ne Ndamakyalo wa India aye Lord Irwin, besambile pa kintu kyapusana na bilanguluka bavula. Lord Irwin washikishe Gandhi kintu kyo alangulukile’mba kyo kyakonsha kupwisha makatazho pakachi ka kyalo kya Great Britain ne kya India. Gandhi watolele Baibolo ne kuzhikula pa kitango kya butanu mu Mateo ne kwamba’mba: “Umvwe kyalo kyobe ne kyami kebilondele mafunjisho afunjishe Kilishitu mu Jashi janji ja pa Mutumba, tukapwisha makatazho kechi a byalo byetutu byonka ne, bino ne a panopantanda ponse.”

Aja jashi jaamba pa kukeba kwikala muntu wa bumupashi ne kwikala kimote, muntu wa mutende, wa lusa ne watemwa bololoke. Kechi jakanyatu kwipayañana konka ne, bino jaamba ne pa kubula kuzhingijila bakwetu, kabiji kechi jakanyatu bukende ne, bino jakanya ne milanguluko ya lwiso. Jakanya byubilo bilengela kwikana pa kubula mambo ako kulengela mazubo konaika ne kulengela baana kumanama. Jitubula’mba: ‘Temwai bemushikwa, panai ku balanda, kuzhachisha bakwenu ne, ubilai bakwenu bintu byo mukeba abo kwimubila.’ Ano mafunde onse umvwe bantu ke beengijishe, akonsha kwibalengela kwikala bulongo. Umvwe bantu bavula mo mwikela ke balondele ano mafunde, kimasamasa kyenu kikawama.

Bakamonyi ba kwa Yehoba batundaika bakwabo kulondela ano mafunde. Baibolo ufunjisha kunemeka masongola. Baana babo bebafunjisha mafunde awama. Kisemi bekimona kwikala kintu kyanema bingi. Bisemi byakwatankana bilengela lukwatankano mu kimasamasa ne mu ntanda. Mu bwikalo bwa bantu muji byakumwenako bya mabufumu aponenenga na mambo a kubula kukosa kwa bisemi ne kuvujilako kwa byubilo byatama. Umvwe bantu ne bisemi ke bilondele mafunde a bwina Kilishitu afunjisha Bakamonyi ba kwa Yehoba, banyike bakepeshako kuba byubilo byatama kabiji ne bumbanzhi bukakepanako mu kimasamasa kyenu.

Lukatazho lumo luji mu bimasamasa ne mu mikoka ya bantu ke misalululo ya bikoba. Bino mutumwa Petelo waambile’mba: “Nayuka namba aye Lesa kechi utala ku bilungi bya bantu ne: pakuba ne mu mikoka yonse ya bantu, aye wamwakamwa, ne kuba byaoloka, ye waitabilwa kwi aye.” Kabiji Paulo wanembele’mba: “Ka kuji Muyudea nangwa Mungiliki ne; ka kuji muzha nangwa mwana bene ne: ka kuji mwanamulume nangwa mwanamukazhi ne; mambo bonse mwi umo mwi Kilishitu Yesu.” (Byubilo 10:34, 35; Ngalatiya 3:28) Bakamonyi ba kwa Yehoba byo byo balondela. Bantu ba mikoka ne bikoba byonse bekala ne kwingijila pamo pa maofweshi abo akatampe, pa misampi yabo ne mu bipwilo byabo.

Mu Africa, mitundu imo kechi ikala pamo kwakubula milukuchi ne. Pano bino, pa kubuñana kwa Bakamonyi ba kwa Yehoba bantu bafuma mu mitundu yapusana pusana baja, kulaala ne kupopwela pamo mu buumo. Babinemanga ba kafulumende bakumya bingi umvwe bamona bibye. Kyakumwenako kya lukwatankano lwa bena Kilishitu bakine bekyambilepo mu pepala wa byambo wa New York Amsterdam News wa August 2, 1958. Kyalengejile’mba bambe bino ke na mambo a kumona kukonkana kwa byalo ko twaambapo kala kwatainwe Bakamonyi bavula bingi mu muzhi wa New York City.

“Bantu bafita, batoka, ne bakibobo kufuma mu bwikalo bonse kabiji ne mu mapunzha onse a panopantanda baikelengatu pamo bulongo . . . Bakamonyi kufuma mu byalo 120 babena kwikala ne kupopwela pamo mu mutende, kumwesha bena America byo kyapela kwikala na bantu ba mitundu ingi. . . . Kuno kukonkana kwabo kubena kumwesha bantu byo bakonsha kwingila ne kwikala pamo.”

Bavula bakonsha kwamba’mba mafunde a bwina Kilishitu kechi engila ku bantu ba ano moba ne. Pano ñanyi mafunde akwabo akwasha bantu pa kino kimye kabiji akebakwasha ne kulutwe? Mafunde a bwina Kilishitu umvwe ke mwiengijishe, akonsha kwimukwasha bingi ko mwikala kabiji o akalengela kukwatankanya ‘mikoka yonse, bisaka byonse ne mitundu yonse ya bantu’ panopantanda ponse mu bukalama bwa Bufumu bwa Lesa byo bukalamanga bantu.—Lumwekesho 7:9, 10.

[Blurb on page 23]

Bantu ba mitundu ne bikoba byonse bengijila pamo

[Blurb on page 24]

Mafunde a bwina Kilishitu akwasha bingi. Inge ne, ñanyi mafunde akwabo akwashapo kala bantu?