Byambo Bitanshi

Kwi Anweba Mubena Kutanga:

Nanchi mwiumvwa kufwenya kwipi ne Lesa nyi? Bavula balanguluka’mba kino kechi kyakonsheka ne. Bamo baji na moyo wa kuba’mba uji kwalepa; bakwabo nabo beumvwa babula kufwainwa kya kuba balanguluka’mba kechi bakonsha kufwenya kwipi ne aye ne. Pano bino, Baibolo witukambizha mu butemwe’mba: “Fwenyai kwipi ne Lesa, kabiji ne aye ukafwenya kwipi ne anweba.” (Yakoba 4:8) Kabiji wabujishatu bapopweshi banji mu bukishinka’mba: “Amiwa, Yehoba Lesa wobe, nkakukwata pa kuboko kwa kilujo; ye amiwa nakwambila namba: Kuba moyo ne; amiwa nkakukwasha.”—Isaya 41:13.

Pano twakonsha kwibikako byepi kukeba buno bulunda bwa pa muchima na Lesa? Pa kwisampa bulunda buji bonse, patanshi tukimuyuka awo muntu, kukomoka ne kunemeka byubilo byanji byapusanako na bya bakwabo. Onkao mambo, kyanema bingi kufunda byubilo bya Lesa ne mashinda mo ebyubila byonka byo byasololwa mu Baibolo. Umvwe ke tulanguluke languluke Yehoba byo amwesha bino byubilo byanji byonse, kumona Yesu Kilishitu naye byo ebimwesheshe, kumvwisha ne atweba byo twakonsha kwikala nabyo, kiketukwasha kufwenya kwipi ne Lesa. Tukamona’mba Yehoba kine ye yenka wafwainwa kwikala Mfumu wafwainwa pa bilengwa byonse. Kabiji ye Shetu yetukeba atweba bonse. Byo aji wa bulume, bololoke, maana ne butemwe, kechi usha bunke baana banji ba kishinka nangwa pachechetu ne.

Mwane uno buku emukwashe kufwenya kwipi ne Yehoba Lesa, kwisampa nanji bulunda bukabula kupwa pa kuba’mba mukatwajijile na kumutota myaka ne myaka.

Banembi