Kitango 5

“Uno Ye Mwanami”

UMVWE mwana wauba kintu kyawama, bansemi basekela bingi. Umvwe kashimbi nangwa kalombwana wauba bintu byawama, bashanji batemwa bingi kabiji babula bakwabo amba: “Uno ye mwanami.”

Yesu kimye kyonse uba bintu bitokesha Shanji pa muchima. Onkao mambo Shanji usekela bingi. Nanchi ubena kuvuluka byaubile Shanja Yesu juba jimo kimye Yesu kyo ajinga na baana banji ba bwanga basatu nyi?— Ee, Lesa waambijile baana ba bwanga ba kwa Yesu amba: “Uno ye Mwanami, ye natemwa, mo namwena lusekelo.”—Mateo 17:5.

Kimye kyonse Yesu usekela bingi mu kuba bintu bitokesha Shanji pa muchima. Wayuka kyo obila bino nyi? Mambo watemwa bingi Bashanji. Umvwe muntu ke obe bintu kya kumukanjikizhatu, kechi wakonsha kwibyuba bulongo ne. Pano bino umvwe ke engile na muchima umo, kipela bingi. Nanchi wayuka byo kilumbulula kwingila na muchima umo nyi?— Kilumbulula kwitemenwa obewa mwine kuba kintu.

Nangwatu Yesu saka akyangye kwiya pa ntanda, wipaine kuba kintu kyonse kyakonsheshe kumwambila Shanji. Wakonsheshe kuba bino mambo watemwa shanji, Yehoba Lesa. Yesu waikalanga mwiulu ne Bashanji. Pano bino, Lesa wamupele mwingilo mukatampe bingi wa kwingila. Pa kuba’mba engile uno mwingilo, Yesu wafwainwe kufuma mwiulu. Wafwainwe kusemwa mu bumwana panopantanda. Yesu wipaine kuba kino mambo byo byakebelenga Yehoba.

Pa kuba’mba asemwe mu bumwana panopantanda, Yesu wakebewenga kwikala na inanji. Nanchi wamuyuka wajinga inanja Yesu nyi?— Jizhina janji wajinga Maliya. Yehoba watumine Ngabaliela malaika wanji kufuma mwiulu kwiya na kumwambila Maliya. Ngabaliela wamwambijile’mba ukasema mwana wa mulume. Uno mwana ukatelwanga’mba Yesu. Shanja uno mwana wafwainwe kwikala ñanyi?— Malaika waambile’mba Yehoba Lesa ye ukekala Shanja mwana. O ene mambo Yesu o atelelwa’mba Mwana Lesa.

Nga Maliya waubilepo ka pa kino?— Nanchi waambile’mba, “Kechi mbena kukeba kwikala inanja Yesu nenyi”? Ine, Maliya wipaine kuba byakebelenga Lesa. Pano bino, Mwana Lesa wajinga mwiulu wakonsheshe byepi kusemwa mu bumwana panopantanda? Nga kusemwa kwa kwa Yesu kwapusene byepi na kusemwa kwa baana bonse? Nanchi wayuka nyi?—

Lesa walengele bansemi betu batanshi, ba Adama ne Evwa, kuba’mba bemonenga masongola. Panyuma ya bino mwana po po atendeka kulengeka munda mwa inanji. Bantu bamba’mba kino ke kya kukumya bingi! Ne obewa kampe byo byo ulanguluka.

Lesa waubile kintu kimo kya kukumya kyakila pa kino. Watuntulwile bumi bwa Mwananji kufuma mwiulu ne kwibubika mu jivumo ja kwa Maliya. Lesa kechi waubilepo kino kunyuma ne, kabiji nangwatu luno ukyangye kwikyubapo ne. Kyafuminemo mu kino kya kukumya, Yesu watendekele kukoma mu jivumo ja kwa Maliya byonkatu bikoma ne baana bakwabo mu mavumo a bainabo. Palutwe kacheche, Maliya bamusongwele kwi Yosefwa.

Byo kyafikile kimye kya kusemwa kwa kwa Yesu, ba Maliya ne Yosefwa bayile ku Betelema. Pano bino mu muzhi mwavujile bingi bantu. Kechi kwajingapo kibamba mwa kukonsha kwikala ba Maliya ne Yosefwa ne, onkao mambo bakekele mu kipaka kya banyama. Maliya mo mo asemejile mwana, kabiji Yesu bamubikile mu kijilamo banyama, byonka byo ubena kumona pa kikye kipikichala. Kijilamo banyama, ke momwa mo babika kajo kaja bañombe ne banyamatu bakwabo.

Juba jasemenwe Yesu kwamwekele bintu byawama bingi. Malaika wamwekele ku bakafunga ba mikooko bamo ku bwipi na Betelema. Wibambile’mba, Yesu ke muntu wanema bingi. Malaika waambile’mba: ‘Talai! Mbena kwimubula mambo awama akaletela bantu lusekelo lukatampe. Ja lelo kwasemwa mupulushi wa bantu.’—Luka 2:10, 11.

Malaika waambijile bakafunga ba mikooko amba bakamutana Yesu mu Betelema, saka alaala mu kijilamo banyama. Ponkapo, bamalaika bakwabo mwiulu ne yewa malaika mutanshi batendekele kutota Lesa. Baimbilenga’mba: “Lukumo lwikale kwi Lesa . . . ne panopantanda mutende ekale mu bantu bamutokesha ku muchima.”—Luka 2:12-14.

Bamalaika byo bebashile, bakafunga ba mikooko bayile ku Betelema kabiji bamutaine Yesu. Byo bafikile kokwa bebabujile ba Yosefwa ne Maliya mambo awama onse o baumvwine. Maliya byo kyamuletejilepo lusekelo pa kwipana ne kwikala inanja Yesu!

Palutwe kacheche, ba Yosefwa ne Maliya bamutwajile Yesu ku muzhi wa Nazala. Yesu ko ko akomejile. Byo akomene watatwile mwingilo mukatampe wa kufunjisha. Uno ye wajinga mwingilo Yehoba Lesa ye akebelenga’mba Mwananji engile panopantanda. Yesu wipaine kwingila uno mwingilo mambo watemenwe bingi Shanji wa mwiulu.

Yesu saka akyangye kutendeka mwingilo wanji wa kwikala Mufunjishi Wayukisha, bamubatizhe kwi Yoano Mubatishi mu Mukola wa Yodano. Kimye kya lubatizhilo kwamwekele kintu kya kukumya! Yesu byo atuntukilenga kufuma mu mema, Yehoba waambile mwiulu amba: ‘Uno ye Mwanami, ye natemwa, mo namwena lusekelo.’ (Mateo 3:17) Umvwa byepi umvwe bansemi bobe bakwambila’mba bakutemwa?— Yesu naye waumvwine bingi bulongo byo bamwambijile bino.

Kimye kyonse Yesu waubanga byawama. Kechi wibepekezhanga kwikala muntu ungi ne. Kabiji kechi wabulanga bantu amba ye Lesa ne. Malaika Ngabaliela waambijile Maliya amba Yesu ukatelwa’mba Mwana Lesa. Yesu aye mwine waambile’mba wajinga Mwana Lesa. Kabiji kechi wabulanga bantu amba wayukile bintu byavula kukila Bashanji ne. Waambile’mba: “Batata bo bankila.”—Yoano 14:28.

Nangwatu byo ajinga mwiulu, umvwe bamupa mwingilo kwi Bashanji, Yesu waingilanga. Kechi waitabangatu amba ee mwane nsakwingila, wabwela ke akobe ne byanji ne. Watemenwe Bashanji. Onkao mambo, waumvwanga byaambanga Bashanji. Kabiji byo aishile panopantanda, waubile byonse byamutumine Shanji wa mwiulu kuba. Kechi waubanga bintu bingi ne. O ene mambo Yehoba o amwenamo lusekelo mu Mwananji!

Netuwa tukeba kumutokesha Yehoba pa muchima ke ibyo nenyi?— Onkao mambo twafwainwa kumweshanga’mba kine tumvwina Lesa, byonka byaubile Yesu. Lesa wamba ne atweba kupichila mu Baibolo. Kyatama bingi kwibepekezha nobe tubena kumvwina Lesa, pano bino saka tuba bintu byabula mu Baibolo, ke ibyo nenyi?— Twakonshatu kumutokesha Yehoba pa muchima umvwe twamutemwa kya kine.

Pano tanga bino Binembelo byaamba pa byo twafwainwa kuyuka ne kumwitabila Yesu: Mateo 7:21-23; Yoano 4:25, 26; ne 1 Timoti 2:5, 6.

[Kipikichala pa jipa 33]

Malaika Ngabaliela wamwambijile Maliya amba ka?

[Kipikichala pa jipa 34]

Mambo ka Yesu o babena kumubikila mu kijilamo banyama?

[Kipikichala pa jipa 35]

Malaika umo pa babe wabula bakafunga mikooko ñanyi mambo awama?