Kitango 26

Kyakatazha Bingi Kuba Byawama

SAULO byo aubilenga bintu byatama, ñanyi wasekejilenga?— Satana Diabola. Pano bino ne bantangi ba Bayudea nabo basekejilenga. Saulo byo aikele ke mwana wa bwanga wa Mufunjishi Wayukisha ne kutendeka kutelwa’mba Paulo, aba bantangi babupopweshi bamushikilwe bingi. Pano wamona ene mambo o kyakatezha mwana wa bwanga wa kwa Yesu kuba byawama nyi?—

Ñanga Mukatampe aye Ananyasa wakambizhe bantu kumuzhangula Paulo mu kilungi. Kabiji Ananyasa wamutayile Paulo mu kaleya. Kufumatu kimye kyo aikele ke mwana wa bwanga wa kwa Yesu, Paulo wamanaminenga bingi. Kya kumwenako, bantu batama bamupumine Paulo ne kumwasa mabwe akatampe kuba’mba bamwipaye.—Byubilo 23:1, 2; 2 Kolinda 11:24, 25.

Bantu bavula bakakebanga’mba tube bintu byatama bifichisha Lesa ku muchima. Nga obewa, nanchi watemwa byawama nyi? Nanchi watemwisha byawama nangwa kya kuba kino kyakonsha kulengela bakwenu kukushikwa nyi? Kikebewa kwikala wakosa pa kuba’mba ube bino, ke ibyo nenyi?—

Wakonsha kwishikisha’mba: ‘Nga mambo ka bantu o betushikilwa umvwe ke tube byawama? Nanchi kechi bafwainwa kusekela nenyi?’ Ee, byo byo kyafwainwa kwikala. Bantu bamutemenwe bingi Yesu mambo waubanga bintu byawama. Juba jimo, bantu bonse ba mu muzhi bapwijile ku nzubo mo aikalanga. Baishile mambo Yesu wabukilenga bantu babela.—Mako 1:33.

Pano bino kimye kimo bantu kechi bakebanga byafunjishanga Yesu ne. Nangwa kya kuba wafunjishanga bukine, bantu bamo kechi bakebanga ne. Juba jimo byo byo kyamwekele mu Nazala, muzhi mwakomejile Yesu. Waile na kupopwela Lesa mu nshinagoga mwapwilanga Bayudea.

Byo ajinga mu nshinagoga, Yesu waambile jashi jawama bingi ja mu Binembelo. Pa kutendekatu bantu baumvwine bingi bulongo. Bakuminyenga bingi byambo bya bupe byafuminenga mu kanwa kanji. Pano bino kibakatezhe bingi kwitabila mambo baambilenga’mba awe ke nsongwalumetu wakomena mu muzhi wabo.

Bino Yesu waambile bintu bikwabo. Waambile pa kimye Lesa kyo aubijile lusa bantu babujile Bayudea. Yesu byo aambile bino, aba bajinga mu nshinagoga bazhingijile bingi. Wayuka kyalengejile nyi?— Balangulukanga’mba Lesa waubijiletu lusa abo bonka kwapwa. Balangulukanga’mba banema kukila bakwabo. Onkao mambo Yesu byo aambile bino byambo, bamushikilwe. Nanchi wayuka byo bakebelenga kumuba nyi?—

Baibolo waamba’mba: ‘Bamukwachile Yesu ne kumutwala kunsa ya muzhi. Kabiji bamukanjizhizhe peulu ya mutumba kuba’mba bamunyakwile munshi afwe! Bino Yesu wibaposomokele ne kuya waya.’—Luka 4:16-30.

Umvwe wajinga obewa, nanchi wakonsha kubwelako jibiji ku bantu bamo na kwibabula mambo a Lesa nyi?— Kikebewa kuchinchika pa kuba’mba ube bino, ke ibyo nenyi?— Byo papichiletu mwaka umo, Yesu wabwelele ku Nazala. Baibolo washimuna’mba: ‘Wibafunjishenga mu nshinagoga yabo.’ Yesu kechi wikilekele kwamba bukine na mambo a kuchina bantu babujile kutemwa Lesa ne.—Mateo 13:54.

Juba jikwabo ja Sabado, Yesu wajinga pa mpunzha pajinga muntu wajinga na kuboko kwapapa. Yesu wajinga na bulume bwamupele Lesa bwakubuka yewa muntu. Pano bino aba bantu bajingapo bamushupilenga bingi Yesu. Nga Mufunjishi Wayukisha waubilepo byepi?— Patanshi wibepwizhe’mba: ‘Umvwe muji na mukooko, pano bino waponena mukimbo pa juba ja Sabado, kuba mwamutuntulamo nenyi?’

Ee, umvwe mukooko waponena mukimbo pa juba ja Sabado po bakokolokanga, bamufumyangamo. Onkao mambo, Yesu waambile’mba: ‘Kyawama bingi kukwasha muntu pa juba ja Sabado, mambo muntu wanema kukila mukooko!’ Yesu waubile kintu kyawama bingi pa kubuka yewa muntu!

Wamwambijile amba tanyika kuboko kobe. Ponkapotu kuboko kwanji kwabukilwe. Uno muntu byo aikelepo na lusekelo! Pano nga aba bantu bakwabo baumvwine byepi? Nanchi baumvwine bulongo nyi?— Ine. Bamushikilwe bingi Yesu. Balangulukilenga mwakumwipayila!—Mateo 12:9-14.

Byo byo kiji ne ano moba. Nangwa tubepotu byawama byepi, kechi bantu bonse bakonsha kwibitemwa ne. Onkao mambo twafwainwa kuyuka ye twakonsha kutokesha ku muchima. Umvwe tukeba kutokesha Yehoba Lesa ne Mwananji Yesu Kilishitu ku muchima, twafwainwa kubanga byo bafunjisha. Pano umvwe ke tube bino, ñanyi uketushikwa? Ñanyi wakonsha kulengela’mba kitukatazhenga kuba byawama?—

Satana Diabola. Ee, pano nga bañanyi bakwabo?— Aba baitabila bintu byatama mambo bebatwala mungi kwi Diabola. Yesu waambijile bantangi babupopweshi ba mu moba anji amba: “Anweba mwi ba kwa shenu, Diabola, ne bisakasaka shenu musaka kwibyuba.”—Yoano 8:44.

Kuji bantu bavula bingi Diabola bo atemwa. Yesu wibatelele’mba “ba panopantanda.” Nga abe “ba panopantanda” Yesu bo atongwele bo bañanyi?— Akitwaya tumone mu Yoano kitango 15 kyepelo 19. Tutangapo byambo byaambile Yesu amba: “Inge mwaji ba panopantanda inge ba panopantanda bemutemwa, mambo batemwa babo bene: pakuba anweba byo mwabula ba panopantanda, ne amiwa nemusalulula mu ba panopantanda, ba panopantanda bemushikwa.”

Ba panopantanda bashikwa baana ba bwanga ba kwa Yesu ke boba babula baana banji ba bwanga. Mambo ka ba panopantanda o bashikilwa baana ba bwanga ba kwa Yesu?— Twambe bibye. Ino ntanda iji mu maboko a kwa ñanyi?— Baibolo washimuna’mba: “Byonse bya panopantanda biji mu bulume bwa kwa aye mubi.” Uno mubi ke Satana Diabola.—1 Yoano 5:19.

Pano wamona byo kyakatezha kuba byawama nyi?— Satana ne ba panopantanda bo balengela. Pano bino kuji ne kintu kikwabo kilengela. Ubena kwikivuluka nyi?— Mu Kitango 23 kya uno buku twafunjile kuba’mba atweba bonse twaswana bundengamambo. Kikawama bingi umvwe bundengamambo, Diabola, ne ntanda iji mu maboko anji bikafumishiwepo, ke ibyo nenyi?—

Baibolo walaya’mba: ‘Panopantanda pabena kupita.’ Kino kibena kumweshatu patoka’mba aba bonse babula baana ba bwanga ba Mufunjishi Wayukisha kechi bakekalako ne. Kechi bakekala na bumi bwa myaka ne myaka ne. Nanchi wayuka bakekala na bumi bwa myaka ne myaka nyi?— Baibolo watwajijila’mba: “Aye uba kyaswa muchima wa Lesa ukekala myaka ne myaka.” (1 Yoano 2:17) Ee, aba bonkatu boba byawama, aba boba “kyaswa muchima wa Lesa,” bo bakekalanga myaka ne myaka mu ntanda ipya ya Lesa. Nangwa kya kuba kyakatazha, twafwainwa kubanga byawama, ke ibyo nenyi?—

Twaya tutange ne bino binembelo bimwesha’mba kuba byawama kechi kwapela ne: Mateo 7:13, 14; Luka 13:23, 24; ne Byubilo 14:21, 22.

[Kipikichala pa jipa 137]

Ñanyi makatazho apichilengamo Paulo byo aubilenga byawama?

[Kipikichala pa jipa 138]

Mambo ka abe bantu o babena kukebela kumwipaya Yesu?

[Kipikichala pa jipa 141]

Umvwe ino ntanda yapita, ki ka kikamwekela aba boba byawama?