Kyaswa Muchima wa Lesa kyo ki Ka?

Lesa ukeba’mba twikalenga mutende ne na lusekelo myaka ne myaka mu paladisa pano pa ntanda!

Nangwa byonkabyo, mwakonsha kwipuzha’mba: ‘Nanchi kino kyakonsha kubiwa nyi?’ Baibolo waamba’mba Bufumu bwa Lesa bukoba kino, kabiji kyo kyaswa muchima wa Lesa kuba’mba bantu bonse bayuke buno Bufumu ne kyaswa muchima wanji kwi atweba.—Salamo 37:11, 29; Isaya 9:7.

Lesa ukeba’mba tumwenemo byawama.

Byonkatu nsemi wamulume wawama byo akeba baana banji kwikala bulongo, ne Shetu wa mwiulu ukeba’mba twikalenga na lusekelo myaka ne myaka. (Isaya 48:17, 18) Walaya’mba, awa “uba kyaswa muchima wa Lesa ukekala myaka ne myaka.”—1 Yoano 2:17.

Lesa ukeba’mba twendenga mu mashinda anji.

Baibolo waamba’mba Mulenga wetu ukeba ‘kwitufunjisha mashinda anji,’ pa kuba’mba ‘twendenga mu mashinda anji.’ (Isaya 2:2, 3) Wakonkanya “bantu ba jizhina janji” kuba’mba bayukanyikishe kyaswa muchima wanji mwaya ntanda yonse.—Byubilo 15:14.

Lesa ukeba atweba bonse kukwatankana kumupopwela.

Bupopweshi bwa Yehoba kechi bwabanya bantu ne, abo bukwatankanya bantu mu butemwe bwa kine. (Yoano 13:35) Bañanyi lelo jino babena kufunjisha banabalume ne banabakazhi mwaya ntanda bya kwingijila Lesa saka bakwatankana? Twimutundaika kutanga uno buloshuwa pa kuba’mba mutane mukumbu wa buno bwipuzho.