Yesu Wasangwile Mwana Wa Mwanamukazhi Wafwijilwe

Panyuma ya kubuka kalume wa mukulumpe wa bashilikale, Yesu wafumine ku Kapenama ne kuya ku Naina, palepele makilomita 32. Kechi wayile bunke ne. Baana banji ba bwanga ne jibumba jikatampe jamulondejilenga. Kyamweka kyajinga kimye kya mabanga byo banangijilenga kwipi na Naina. Basambakene Bayudea bavula balupwilenga muntu wafwa. Wajinga mwanamulume wafwile ye batwajilenga pangye ya muzhi na kuzhiika.

Inanji uno mwana wamulume wafwile ye wajinga bingi na bulanda pa bonse. Wajinga mwanamukazhi wafwilwa, kabiji uno nsongwalume wafwile ye mwana umotu ye ajinga nanji. Kimye kyafwile mwatawanji, uno mwananji ye ashajile nanji ye wamutekeneshanga. Watemenwe bingi mwananji kabiji mwi aye mo mo akinkile manungo. Pano bino, uno mwananji wamulume naye wafwile. Onkao mambo, kechi washajilepo na muntu wa kumukwasha ne kumutekenesha ne.

Yesu waumvwine bingi lusa pa kumona uno mwanamukazhi ne bulanda bukatampe bo ajinga nabo. Onkao mambo, na kifyele bino na jiwi ja lutundaiko, Yesu waambijile mwanamukazhi amba: “Kileke kujila.” Bino, Yesu kechi wapelejiletu ponkapo ne. Wafwenyenye kwipi ne kukwata ku makila po basendejile mubiji. (Luka 7:13, 14) Kino kyo aubile kyalengejile bantu bajijilenga kwikileka ne kwimana ponkapotu. Bafwainwa beshikishenga mulwabo amba ‘Nanchi kino kyo aamba kyalumbulula ka, kabiji usakubapo ka?’

Nga aba bamulondejilenga Yesu ne kumona saka oba bya kukumya ne kubuka bikola byavula balangulukilenga ka? Kyamweka kechi bakimumwenepo kala Yesu wasangula muntu wafwa ne. Ibyo kuba’mba kala kwajingapo bantu bo basangwile, bino nanchi Yesu naye wakonsheshe kusangula muntu nyi? (1 Bamfumu 17:17-23; 2 Bamfumu 4:32-37) Yesu wakambizhe’mba: “Nsongwalume, nakwambila namba, buka!” (Luka 7:14) Byonkabyo ne nsongwalume wabukile, kabiji waikele watendeka ne kwamba. Yesu wamupaine kwi inanji. Nangwa kya kuba inanji wakuminye, bino wajinga bingi na lusekelo mambo uno mwananji ye yenka ye ashajile nanji.

Bantu byo bamwene’mba uno nsongwalume ke mumi, batatwile kutumbijika Yehoba mwine Upana Bumi ne kwamba’mba: “Ngauzhi mukatampe wamweka mukachi ketu.” Bakwabo bakwatakenye kyaubile Yesu baambilenga’mba: “Lesa wavuluka bantu banji.” (Luka 7:16) Ponkapotu nkuwa ya byo aubile yakumbene mu mizhi yonse ya mu kyokya kyalo, kampe ne mu muzhi wanji wa Nazala, kwalepele makilomita 10 kufuma ku Naina. Ino nkuwa yafikile ne ku kibunji kya Yudea kyajinga ku kabeta ka ku bulenge.

Yoano Mubatizhi wakijinga mu kaleya, kabiji wakebelenga kuyukilapo byavula pa mingilo yaingijilenga Yesu. Yoano bamubuujile ku baana banji ba bwanga mingilo ya kukumya yaubilenga Yesu. Yoano waubilepo ka?