Kala Twajinga Misuka—Pano Twi Mikooko!

Sakina neamiwa twaikalangatu pamo kimye kyo twajinga bakashimbi. Sakina wajinga wabaya, amiwa najinga mucheche wakepa kamubiji. Twatobokanga bingi kimye kyonse, pano juba jimo twalwile kyakuba mwane twipezha. Kufumatu jojo juba kechi twaambañananga nangwa kwiimuna ne. Mu kupita kwa kimye, bonse twaabene kuyuka ne kukaji mukwenu ne.

Byonatatwile kufunda Baibolo na Bakamonyi bakwa Yehoba mu 1994, bumuntu bwami bwaalukilenga pachepache. Nakuminye bingi pa kumonañana ne Sakina pa juba ja kupwila kwiikajila mu muzhi wa Bujumbura, mu Burundi panyuma ya kupitapo myaka ina. Natemenwetu kumumonapo, bino lwimu lwetu kechi lwajinga lwa butemwe ne. Kyaubatu nobe mu kiloto zhiku, nanchi ne aye wajinga pa boba bailenga kulubatizhilo jonkaja juba! Ne aye waalwile bingi bumuntu bwanji. Walekele bitaala ubatu nobe kechi ye muntu yenatobokanga nanji kikupu ne. Byo kyawaminepo pa kumumona byoepainenga kwi Lesa pa mvula-bantu mu lubatizhilo lwa mu mema!

Byoatuntukile mu mema, namutundaijile na kumupakata ne kumunongotwela namba: “Wavuluka byotwipumpwile, ayi?” Aye’mba: “Ee, navuluka, bino abyo kebyalunyuma luno nemuntu mupya.”

Atweba bonse babiji tuji bingi na lusekelo pa kutana bukine bwa Baibolo bupwañanya bantu pamo, bwitukwasha kwalula bumuntu bwetu bwa bumusuka ne kwikala na bwa mikooko yakwa Kafunga Mukatampe, Yehoba Lesa. Ee kine, bukine bwa mu Baibolo bwalula bwikalo bwa bantu.