Baibolo Yakonsha Kukosesha Masongola Enu
BAMO batemwa bingi inge baumvwa kyambo kya masongola. Bakwabo nabo inge bekyumvwa bomvwa ne ku muchima bwii. Mwanamukazhi umo uji mu masongola wajilañene kuba’mba: “Amiwa ñumvwatu nobe twikana na balume bami, mambo ñumvwa nobe bandekelela kabiji kimye kyonse ñumvwa bingi mukose na mambo a kushalatu bunke uba nobe kechi njipo ne na mukwetu ne.”
Kika kilengela bantu babiji kwitala bibi, bino saka bachipile luchipo kuba’mba baketemwa ne kwilama? Kintu kikatampe kilengela ke kubula kuyuka mutembo wa masongola. Munembeshi wa byambo bya kipatela waambile’mba: “Tutwela mu masongola kwa kubula kufunda byo aji ne.”
Kipamo kya The National Marriage Project kyalengele ba Rutgers University mu New Jersey, U.S.A, kyapeselepesele ne kutana kuba’mba bantutu bacheche bo bafunda bya kwikala mu masongola. Bakulumpe batangijile uno mwingilo, banembele’mba: “Mu kuno kupesapesa, kyatanyiwe kuba’mba baana bavula bakomena mu masongola a bansemi yabo abula lusekelo, kabiji bakwabo nabo bakoma na bansemi bekaine kala. Bayuka kya kine masongola abula lusekelo, bino kechi bayuka masongola a lusekelo byoaji ne. Bamo bakonsha kulumbululakotu amba masongola awama ke oa ‘apusanako na masongola a bansemi yami abula lusekelo.’”
Nanchi bena Kilishitu kuba batanyiwa mu makatazho a masongola nenyi? Nabo bakonsha kutanyiwamo. Mambo ne bena Kilishitu bamo ba mu myaka kitota kitanshi nabo bebafunjileko ‘kuleka kukeba kukasuluka’ amba bafumemo mu masongola. (1 Kolinda 7:27) Kya kine kuba’mba masongola a bantu babiji bambulwakoloka ekala na makatazho awo, pano bino tuji na bukwasho. Kulondela mafunde a mu Baibolo, kwakonsha kukwasha banabalume ne banabakazhi baji mu masongola kwitemwa.
Kya kine, Baibolo kechi yaikelako amba ipanengatu mikambizho ya masongola ne. Pano bino, na mambo akuba yanembeshiwa kwi Aye watendekeshe masongola, twakonsha kuketekela mafunde ajimo amba akonsha kwitukwasha. Kupichila mwi ngauzhi Isaya, Yehoba waambile’mba: “Amiwa ne Yehoba Lesa wenu, yenka wimufunjisha’mba mukamwenemo byawama, kabiji wimutangijila mu jishinda jo mwafwainwa kuyamo. Mama! inge mwakokejile mikambizho yami, inge mutende wenu waikajile nobe mukola, kabiji inge bololoke bwenu bwaikajile nobe manyaki a pa kalunga ka mema.”—Isaya 48:17, 18.
Nanchi butemwe bwajinga pakachi kenu ne mukwenu wa mu masongola bwatendeka kubwela panyuma nyi? Nanchi mwakaswa mu masongola abula butemwe nyi? Mwanamukazhi umo waikala mu masongola pa myaka 26 waambile’mba: “Kyakatazha bingi kulumbulula makatazho apitamo bantu baji mu masongola a uno mutundu. Kabiji makatazho a uno mutundu kechi apwa ne.” Mu kifulo kya kukeba’mba musankilepo masongola enu omwabula kutemwa ne, nga mambo ka akubula kufuukulapo kubapo kintu kimo kuba’mba atwajijile? Mutwe walondelapo walumbulwila bamulume ne mukazhi mafunde amu Baibolo byoakonsha kukwasha masongola abo mu kintu kimo, ko kuba’mba kukashijilwa mu masongola abo.