Kimye kya Kufikizhiwa kwa Milaye Kikafika

MPITO ya bwikalo bwa bantu imwesha’mba javula bantu balaya bubela. Javula byalo bikankalwa kufikizha lulayañano lo byalayañana na byalo bikwabo, kabiji kino kilengela bantu babo kumanaminamotu kyatu na makondo. Napoleon waambile’mba: “Makafulumende afikizhatu lulayañano umvwe beakanjikizha, nangwa umvwe amona’mba akamwenamo mu kyokyo kintu.”

Ibyepi na milaye ilaya bantu? Kine, kikola bingi ku muchima inge muntu wakankalwa kufikizha mulaye wanji, kikatakata inge muntu ye twayuka kabiji ye twaketekela! Kine, bantu bakankalwa kuba bintu byo balayañana nangwa kubulatu kukeba kwibyuba.

Milaye ya Lesa yapusana bingi na milaye ya bantu. Milaye ya Lesa ya kine kabiji yaketekelwa. Byonse byoalaya Yehoba Lesa wibyuba. Bifikizhiwa kyakine. Isaya 55:11 waamba Lesa byoafikizha byonse byoalaya amba: “Byo bikekala ne byambo byami bilupuka mu kanwa kami; kechi bikabwelatu byatu kwi amiwa ne, poso kuba kyonkakya kyo nafukula, ne kulumbulukila mu kyonkakya kintu kyo nebitumijile.”

Pano nanchi twafwainwa kumonanga byepi milaye ya Lesa yanembwa mu Baibolo? Twafwainwa kwiiketekela kwa kubula ne luzhinaukotu ne. Kyakumwenako, mutumwa Yoano wanembele’mba: “Tala, kya kwikalamo Lesa kiji mu bantu, ne aye ukekala nabo, ne abo nabo bakekala ke bantu banji, ne aye Lesa mwine ukekala nabo, ne kwikala ke Lesa wabo: kabiji aye ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne: bintu bitanshi byapichijila.” (Lumwekesho 21:3, 4) Mwakonsha kukamona ano mapesho umvwe mwauba byaambile Yesu amba: “Buno bo bumi bwa myaka, namba bemuyuke anweba, Lesa yenka wa kine, ne Yesu Kilishitu ye mwatumine.”—Yoano 17:3.