Bakimote Bakaswana Ntanda
Shayuka wa bilengwa na Lesa mwina Frence, aye Jean Marie waambile’mba: “Mfwanyikizha kuba’mba bintu byonse bikaluka ne kubwelatu pa kala. . . . Pano bino kechi katataka ne, pakapita myaka yavula bingi pa kuba’mba bikaluke ke bya mwiulu bipya ne ntanda ipya.”
BANTU bavula balefulwa na bintu byubiwa panopantanda ne bya mu bwikalo, bakeba bingi ntanda kwaluka ke paladisa. Bino kino kechi kilototu ne. Kala kene Baibolo waambile amba ino ntanda ikekala ke Paladisa. Byambo bya kwa Yesu bya kuba’mba: “Ba kimote . . . bakaswana ntanda” ne “Kyaswa muchima wenu kyubiwe pano panshi byonka byo kyubiwa mwiulu,” ke mbaji imo ya Binembelo yayukanyikwa bingi. (Mateo 5:5; 6:10) Nangwa byonkabyo, ano moba bantu bavula kechi baitabila amba ino ntanda ikekala paladisa ikaswana bakimote ne. Bavula betela’mba bena Kilishitu balanguluka’mba paladisa kafwako.
Magazini wa La Vie unembwa mulungu ne mulungu mu mulaka wa ki French walumbulula kine kintu, kikatakata ba mu Chechi ya Katolika kyo babujila kuketekela mu paladisa, kikale pano ponka pa ntanda nangwa mwiulu. Waamba’mba: “Bantu bafunda mafunjisho a mu Katolika pa myaka 1900, mu majashi abo o bamba pa Mulungu ne mu lufunjisho lwa mu masukulu abo kechi bambapo pa paladisa ne.” Kyambiwa ne kuba’mba kine kyambo kya paladisa “kyavulañanya” bingi bantu. Basapwishi bamo batemwa kwikishapo amba mambo “kyamba pa bintu byavula bikasangajika bantu panopantanda.”
Frédéric Lenoir shayuka wa bwikalo bwa bantu, kikatakata bya bupopweshi, aye waamba kuba’mba paladisa ke “mulangulukotu.” Kabiji Jean Delumeau, shayuka wa mpito kabiji nembi wanemba mabuku avula aamba pa uno yenka mutwe, aye ulanguluka kuba’mba milaye ya mu Baibolo kechi ikafikizhiwa ne, ke kifwanyikizhotu. Wanemba’mba: “Ku bwipuzho bwa kuba’mba, ‘Ki ka Paladisa kyo ikaleta?’ bena Kilishitu bakishinka bakumbula’mba: Twasanta bingi kuba’mba Mupulushi wetu wasangulwa, mambo juba jimo atweba bonse tukakwatankana pamo ne kumona lusekelo.”
Nanchi kine kijitu bulongo kwamba’mba ino ntanda ikekala paladisa nyi? Nanchi ntanda ikekala byepi kulutwe na lwendo? Abya mulangulukapo pa kimye kya kulutwe nyi, inyi ne? Ano mepuzho akumbulwa mu mutwe walondelapo.