Mfumu Munonshi Wakankelwe Kusala Bintu Byawama

NSONGWALUME munonshi wajinga mfumu umo walaminenga bingi mizhilo kabiji muntu wa bupopweshi. Byo aishile kwi Yesu, waponejile ku maulu anji ne kumwipuzha’mba, “Mufunjishi wawama, i ki ka kyawama kyo nsakuba namba mmone bumi bwa myaka?”

Yesu pa kumukumbula waambile’mba, pa kuba’mba ekale na bumi bwa myaka uno muntu wafwainwe kulama mikambizho ya Lesa. Uno munonshi byo aipwizhe Yesu amba amubule bulongo byo afwainwe kuba, Yesu waambile’mba: “Kwipayañana ne, Kuba bukende ne, Kwiba ne, Kwibabepela bantu ne, Unemeke bashobe ne bainobe; kabiji, Utemwe mukwenu byonka byo witemwa obe mwine.” Ino mikambizho itanshi itanwa mu Mizhilo yo bapele Mosesa. Uno Nsongwalume waambile’mba: “Abyo byonse nebilama: Kyo nabulwa i ki ka?”—Mateo 19:16-20.

Yesu “wamutemenwe” ne kwamba’mba: “Kuji kintu kimo kyo mwabulwa, yainga mukapoteshe byonse byo muji nabyo, mukebape balanda, kabiji mukekala na bunonshi mwiulu, kabiji mwiye mundondele.”—Mako 10:17-21.

Uno nsongwalume watalañene na mulanguluko wakatazha bingi. Wafwainwe kuba ka? Nanchi wafwainwe kwipana ne kusankilapo bya bunonshi bwanji ne kwikala mwana wa bwanga wa kwa Yesu nyi, inyi wafwainwe kukakachila ku bya bunonshi bwanji? Abya wafwainwe kwibikila nsabo pano panshi nyi, inyi kwibikila nsabo mwiulu? Kino kechi kyajinga kintu kyapelele kwi aye kuba ne. Bino watemenwe bingi bintu bya ku mupashi, mambo walaminenga Mizhilo kabiji waipwizhe ne bintu bikwabo bikebewa pa kuba’mba obilwe bibusa kwi Lesa. Wafukwilepo kuba ka? “Wafumineko na bulanda mambo aye wajinga na bunonshi bwavula.”—Mako 10:22.

Uno mfumu kechi wafuukwile bulongo ne. Umvwe wafuukwile kwikala mwana wa bwanga wa kishinka wa kwa Yesu inge watambwile bumi bwa myaka bo akebelenga. Bino kechi twayuka kyamumwekejile uno nsongwalume ne. Kyo twayukakotu ke kya kuba’mba byo papichile myaka makumi ana, nzhita ya bena Loma yaonawine muzhi wa Yelusalema ne lubaji lwabaya lwa muzhi wa Bayudea. Bayudea bavula baonawinwe kuvwangakotu ne bunonshi bwabo.

Kupusanako na uno nsongwalume mfumu, mutumwa Petelo ne baana ba bwanga bakwabo basajilepo kintu kyawama. Abo ‘balekele byonse’ ne kulondela Yesu. Kuno kufuukulapo kwibalengejile kumwenamo byawama! Yesu wibabujile kuba’mba bakatambula byavula kukila bintu byo bashile. Kabiji bakaswana bumi bwa myaka ne myaka. Kufuukulapo ko baubile kechi kwibaletejile bijikila ne.—Mateo 19:27-29.