Nanchi Mushukilwapo Bimye Bimo bya Kubulako Bakwenu pa Mambo a Lwitabilo Lwenu Nyi?
“NANCHI bukine ko buji nyi?” Uno ye mutwe baana basukulu ye bebabujile kunembapo mu kwikyombesha kwajingako mu Poland. Mikambizho ya kunembelamo uno mutwe yajinga ya kuba’mba: “Kechi tukeba bukine ne. Kafwako wibukeba ne. Bukine kechi bumweka nangwa kumweka ne.” Mwana wa sukulu umo wa myaka ya kusemwa 15 wa jizhina ja Agata, kabiji Kamonyi wa kwa Yehoba, wafukwile kwingijisha kano ka kimye kwamba ku bakwabo pa mambo a lwitabilo lwanji.
Agata saka akyangye kunemba kino kibaba, patanshi wakilombele kwi Yehoba kuba’mba amukwashe, apa bino po po atendekele kukeba byambo byalamachile ku uno mutwe. Wibitaine mu Kyamba kya Usopa kya July 1, 1995. Waambilepo ne pa bwipuzho Pontiusa Pilato bo aipwizhe Yesu amba: “Nanchi bukine bo buka?” (Yoano 18:38) Buno bwipuzho bo aambilepo bwamwesheshe kubula kuketekela mu bukine. Kyajinga nobe ubena kwamba’mba: ‘Bukine kyo ki ka? Mambo bukine kechi kobuji ne!’ Agata wanembele’mba: “Bwipuzho bwa kwa Pilato bwamvulwileko mwaijile mutwe ne mikambizho mwa kunembela kino kibaba.
Kabiji waambilepo ne kuba’mba kintu muntu umo kyo amona amba kya kine mukwabo wakonsha kwikimona’mba kya bubela. Kabiji ne kuba’mba kino kyakonsha kwikala ‘kya kine’ ku bonse babiji. Washikishe mepuzho nabiji a kuba’mba: “Bañanyi bakonsha kukanjila ndeke umvwe kya kuba twayuka kuba’mba mizhilo ilumbulula bintu byo byenda mu lwelele ya bubela?” Kepo aambile’mba Baibolo waamba’mba “Bishinka bitulengela kuketekela’mba Byambo bya Lesa bya kine.” Waambilepo ne luketekelo lwanji kuba’mba aba bakeba bukine mu butekanye bakebutana.
Agata watambwile pepala (diploma) wa kumwesha’mba wauba bulongo pa byo anembele, kabiji wajinga ne na jishuko ja kwamba kino kibaba ku bakwabo mu sukulu. Bakwabo bo afunda nabo baswile kwibafunjishanga lufunjisho lwa Baibolo. Agata wasekejile bingi byo aingijishe kano ka kimye kusapwila pa mambo a lwitabilo lwanji ku bakwabo bavula. Ee, kumonapo bimye bya kubulako bakwetu pa mambo a lwitabilo lwetu mwakonsha kufuma byawama. Nga anweba, bimye ka byo mukeba kusapwila pa mambo a lwitabilo lwenu ku bakwenu?