“Kamwale Mwina Isalela” Mu Moba Etu a Lelo

MU 2006, byo kwashajiletu milungu ibiji kwikala na Kivuluko kya lufu lwa Yesu, ba mu kisemi kya ba Sales bekala mu muzhi wa Praia Grande mu kyalo kya Brazil banembele mutanchi wa bantu bakwita ku Kivuluko. Abigayl wa myaka itanu na umo bamupele pepala wa kwichilapo bantu ku kivuluko kabiji ne kumwipuzha muntu ye akebelenga kupa.

Wakumbwile’mba, “Nsa kupa muntu unsekela moba onse.”

Bansemi bamwipwizhe’mba, “i ñanyi yenkao muntu?”

Wakumbwile’mba, “aba benda pa kakinga ka bilema.”

Byo papichile moba ana, Abigayl wamwesheshe bansemi banji uno mwanamulume. Uno mwanamulume aye Walter waikalangatu pepi na Nzubo ya Bufumu. Watainwe mu mapuso a pa mukwakwa myaka 15 yapitapo amuchimwine musana byo ajinga na myaka 28. Wajinga na bakasopa babiji, mambo wajinga munonshi. Bansemi ba kwa Abigayl byo bamulombele Walter kuba’mba Abigayl esambe nanji, babwelele bamwambila ne kuba’mba mwanabo ukeba kumupa pepala wa kumwichilapo ku Kivuluko.

Ku mpelo ya mwisambo wabo, Abigayl waambile’mba: “Bakwetu bonse mu kipwilo baji na bipepala byavula bya kupa bantu, bino amiwa njitu na kimo. Onkao mambo, yenu bonka bo napa. Umvwe mukabule kwiya, ko kuba’mba kechi njipo na mukwabo ukeya ne. Bino umvwe mukeye, nkatemwa bingi, kabiji Yehoba aye mwine ukakizhamo ne kutemwa.”

Pa juba ja Kivuluko, Bakamonyi ne aye Abigayl bawamishenga pa Nzubo ya Bufumu kuba’mba peye pamweke bulongo mabanga kimye kya Kivuluko. Aja juba mute, Walter wapichilenga na motoka wanji, kabiji byo amwene Abigayl, waambijile dalaivwa wanji kwimika motoka. Washinkwile kipenze ne kwipuzha Abigayl byo aubilenga. Wamukumbwile’mba babena kuwamisha Nzubo ya Bufumu kuba’mba eye afikile mwawama.

Byo kyaubile ke mabanga, Abigayl muchima munda kechi waikelemo ne. Jashi byo jatendekele, wakenkentelengatu’mba amone inge uno Walter waiya. Katanda kano, wamonakotu aye ne bakasopa banji swaa. Watemenwe bingi pa kumumona. Panyuma ya jashi, Walter waambile’mba wajinga pa lwendo lwa kuya ku muzhi mukwabo, bino waalwile mulanguluko wanji ne kwiya na kutanwa ku Kivuluko na mambo a kuba Abigayl wamwichile. Wabwelele wanungapo ne kwamba’mba: “Najikukebesha bingi kuteleka ku jashi.” Walombele Baibolo ne kutendeka kufunda, kabiji ne kutanwa ku kupwila kwa kipwilo.

Mu kuya kwa moba, nyenga ya kwa Walter waambile’mba ubena kukeba bingi kumonañana ne Abigayl, mambo kolojanji umutentemesha bingi. Byo amonañene nanji watemenwe bingi pa kumona’mba Abigayl ke mwanyike wawama bingi muchima. Waambile amba, “pano nayuka ene mambo bakolojami o baikela balusekelo.”

Walter watwajijila kufunda Baibolo ne kutanwa ku kupwila. Ukumbulapo pa kupwila kabiji ne kubulako bakwabo bintu byo afunda. Ee kine, uno kashimbi Abigayl wituvululako kamwale mwina Isalela wakwashishe Nemani kuyuka Lesa wa kine, aye Yehoba.—2 Bamfumu 5:2-14.