Jishinda Jaingijile Bulongo

KU Central Africa kwajingapo bansongwalume basatu bakebele kuya na kutanwa ku kupwila kwa nkambi kwaikejile mu mpunzha yabo. Pano baileko byepi? Palepele makilomita nobe 90, ne mukwakwa naye watamine bingi kabiji ñendelo yashupile bingi. Balangulukile kulombako makinga asatu, bino bakankelwe kutana awama.

Mukulumpe mu kipwilo wa ku mpunzha yabo wamwene byo bakabakene, kepo ebashimisheko nkinga yanji ya kala pano bino yajingatu bulongo. Wibalondolwejile aye ne bakwabo byo baubile kimye kimo pa kuba’mba batanweko ku kupwila kwa nkambi. Uno mukulumpe mu kipwilo wibabujile’mba bonse basatu bengijishetu nkinga imo. Jino jajinga jishinda jawama bingi, pano kyakebewenga kulangulukishapo bulongo bya kuba. Nga bano bantu basatu bakonsheshe kwingijisha byepi nkinga imo?

Pa kuba’mba babule kwenda mu mute, bano balongo bakyanyike basambakene lukelo ne kukasa bipe byabo ku nkinga. Kepo umo pe abo wiipilemo ne kutangilako, bakwabo babiji saka balondela panyuma na kukumpauka. Awa watangijilepo na nkinga byo akyofwele mamita nobe 500, waimene ne kukungika nkinga ku kichi. Pano bino wiishile pamwekelenga kuba’mba bakwabo baishilenga kunyuma beimone kuchina kwiiba ku bangivi. Byo akungikile ino nkinga wabwelele ke ende panshi.

Bakwabo babiji bashajile kunyuma byo bafikile pajinga nkinga, umo wiitolele ne kuya nayo, bino mukwabo wa busatu naye waendele panshi mamita nobe 500 nangwa kukilapo bino kokoko naye wiipyamo ne kuya nayo. Byo banengezhezhe bulongo ne kwibikako, bonse basatu baipipisheko musinso ye bakonsheshe kwendatu panshi. Byo bafikile bamwenejilemo bingi. Bamonañene na balongo ne banyenga yabo ba bwina Kilishitu pa kupwila kwa nkambi, kabiji batemenwe bingi pa kutanwa ku kuno kupwila kwa nkambi. (Mpitu. 31:12) Nanchi ne anweba uno mwaka mukengila papelela bulume bwenu kuba’mba mukatanweko ku kupwila kwa nkambi kukekela mu mpunzha yenu nyi?