Nanchi Lesa uji na Jizhina Nyi?
Bantu javula bakumbula’mba:
▪ “Jizhina janji Nkambo.”
▪ “Kechi uji na jizhina ja kyanji kyanji ne.”
Nga Yesu waambilepo’mba ka?
▪ “Byonkabyo sa mulomba byonka bino amba, Tata wetu wa mwiulu, Jizhina jenu jizhile.” (Mateo 6:9) Yesu wasumininwe’mba Lesa uji na jizhina.
▪ “Amiwa nebayukisha jizhina jenu, kabiji nkejiyukanyikisha, namba butemwe bo mwantemwa amiwa bwikale mwi abo ne amiwa monka mwi abo.” (Yoano 17:26) Yesu wayukanyikishe jizhina ja Lesa.
▪ ‘Kechi mukammona ne, poso mukambe’mba, Atotwe wiya mu jizhina ja Yehoba.’ (Luka 13:35; Salamo 118:26) Yesu waingijishanga jizhina ja Lesa.
LESA aye mwine witubula jizhina janji. Bamunemba saka amba byambo bya kuba’mba: “Amiwa ne Yehoba, ajo jo jizhina jami.”a (Isaya 42:8) Jizhina ja Lesa jatuntululwa mu Kikaonde amba Yehoba jafuma ku jizhina jine ja mulaka wa Kihebelu Lesa jo etumbile mwine. Kampe kyakonsha kwimukumisha pa kuyuka’mba jino jizhina ja Kihebelu janema jitanwa biumbi ne biumbi mu mamanyusikilipiti a Baibolo wa kala. Kwambatu kine, jino jizhina jitanwa mu Baibolo bimye byavula kukila mazhina onse atongolwa.
Bamo bakonsha kukumbula bwipuzho bwa kuba’mba, “Lesa jizhina janji ñanyi?” kupichila mu kwamba’mba, “Nkambo.” Pano bino, kwambatu kine ino nkumbwilo ijitu pamo na yoya ya kukumbula bwipuzho bwa kuba’mba, “Ñanyi wapita bunsaji?’’ ne mukumbu’mba, “waimana pa bunsaji.” Ino yonse kechi mikumbu yafwainwa ne, mambo “Nkambo” ne “waimana pa bunsaji” kechi mazhina ne.
Mambo ka Lesa kyo etusolwejile jizhina janji? Waubile bino pa kuba’mba tukonshe kumuyuka bulongo. Kya kumwenako, muntu wakonsha kutelwa’mba Bakulumpe, Taata nangwa’mba Nkambo, kwesakana na byo kibena kukebewa pa kyokyo kimye. Ano mazhina a mushingi amweshapo bintu bimo pe aye. Po pamotu, mazhina a mushingi nabiji Nkambo, wa Bulume Bonse, Taata, ne Mulenga etulengela kulanguluka pa mbaji yapusana pusana ya mingilo ya Lesa. Pa kuba jizhina ja kyanji kyanji ja kuba’mba, Yehoba jituvululako bintu byonse byo twayuka pe aye. Pano mwakonsha kuyuka Lesa byepi kya kine kwa kubula kuyuka jizhina janji?
Kyanema bingi kuyuka jizhina janji kabiji ne kwijingijisha. Mambo ka? Mambo Baibolo witubula’mba: “Bonse baketa pa jizhina ja Yehoba bakapuluka.”—Loma 10:13; Yoela 2:32.
[Tubyambo twa mushi]
a Umvwe mukeba ndumbulwilo ya mwatala jizhina ja Lesa, ne ene mambo mu ma Baibolo amo kyo mwabujila jino jizhina, mwakonsha kumona mapeja 195-197 mu buku wa Nanchi Baibolo Kine Ufunjisha’mba Ka? wanembwa na Bakamonyi ba kwa Yehoba.
[Mabulañano pa peja 6]
Muntu kimye kimo bakonsha kumutela’mba Bakulumpe, Taata nangwa’mba Nkambo, kwesakana na byo kibena kukebewa pa kyokyo kimye. Pa kuba jizhina ja kyanji kyanji jituvululako bintu byonse byo twayuka pe aye