Mepuzho Kufuma Kubatanga

Kimye ka Satana kyo bamwelele kufuma mwiulu?—Lum. 12:1-9.

Nangwa kya kuba buku wa mu Baibolo wa Lumwekesho kechi waamba kine kimye Satana kyo bamwelele kufuma mwiulu ne, bino waamba pa bintu bimo byakonsha kwitukwasha kumona kimye kyo bamwelele kufuma mwiulu. Kintu kitanshi kyatongolwa mu bibye bintu bimo ke kusemwa kwa Bufumu bwa Bumesiasa. Kyalondejilepo “mwaji nkondo mwiulu,” kabiji Satana bamushinjile ne kumwela kufuma mwiulu.

Binembelo byamweshatu patoka kuba’mba mu 1914 kyo kimye ‘myaka ya Bangetila’ kyo yapwile ne Bufumu po po bwaikajikilwe.a (Luka 21:24) Papichile kimye kyabaya byepi kufuma mu uno mwaka kwiya kufika kimye kyo kwaikele nkondo mwiulu yalengejile Satana kumwela?

Lumwekesho 12:4 waamba’mba: “Aye nsuñunyi [Satana] waimene mu kyenyi kya mwanamukazhi, yenkawa wasakile kusema, amba pa kusema mmine mwananji.” Kino kimwesha kuba’mba Satana wakebelenga konauna bukiji bukiji Bufumu bwaikajikilwe aku busemwatu. Nangwa kya kuba Yehoba wamukainye Satana kubula kufikizha mulanguluko wanji mubi wa konauna Bufumu, Satana watwajijiletu na kukeba konauna bobwa Bufumu. O ene mambo “Mikela ne bamalaika banji” o babujijile kutaya kimye kumupanga nsuñunyi ne bamalaika banji mwiulu pa kuba’mba bakabule kuba kyatama ku Bufumu. Kino kibena kumwesha kuba’mba Satana bamushinjile ne kumwela panyumatu ya kwikajikwa kwa Bufumu mu 1914.

Kintu kikwabo kyo twafwainwa kulangulukapo ke kya lusanguko lwa bena Kilishitu bashingwa, byonkatu Binembelo byo byamwesha kuba’mba luno lusanguko lwatendekele panyumatu ya kwikajikwa kwa Bufumu.b (Lum. 20:6) Byo kiji kuba’mba balongo ba kwa Kilishitu bashingwa kechi bebatongolapo kuba’mba bajinga na Yesu mu kulwa nkondo na nsuñunyi ne bamalaika banji ne, ko kuba’mba nkondo yajinga mwiulu ne kwelwa kwa kwa Satana ne bamalaika banji yafwainwa yapwile kimye balongo ba kwa Kilishitu bashingwa kyo batendekele kusangulwa.

Onkao mambo, Baibolo kechi waamba mu kushinkamika kimye kine kyaelelwe Satana ne bandemona banji kufuma mwiulu ne. Nangwa byonkabyo, kyamweka kuba’mba bebapangile panyumatu ya kwikajikwa kwa kwa Yesu Kilishitu pa bufumu mwiulu mu 1914.

[Tubyambo twa mushi]