Nanchi Mukivuluka Nyi?

Nanchi mwamwenamo mu kutanga magazini a Kyamba kya Usopa akatataka nyi? Monai inge mwakonsha kukumbula ano mepuzho:

• Umvwe mwana ukikoma munda mwainanji wafwa, ukakonsha kusangulwa nyi?

Bumi butendeka pa kwimita. Yehoba wakonsha kusangula bantu ba mafumbi apusana pusana mambo “bintu byonse byakonsheka kubiwa na Lesa.” (Mako 10:27) Pano bino, Baibolo kechi washinkamika kwamba’mba Lesa ukasangula baana bafwila munda saka bakyangye kusemwa ne.—4/15, mapeja 12, 13.

• Mambo ka o twakonsha kumwenamo mu kumona tuzhengekene, bibila, nzhiye ne minsobela?

Bino bilengwa bina biji na maana akatampe. Onkao mambo, bimwesha maana akatampe a Lesa. (Mana. 30:24-28)—4/15, mapeja 16-19.

• Kintu ka kyanema ku Bakamonyi ba kwa Yehoba kyaubiwe myaka 100 yapitapo?

Mu 1909, maofweshi akatampe a Watch Tower Bible and Tract Society, ko kuba’mba kije kya mizhilo kya jibumba kingijisha Bakamonyi ba kwa Yehoba, beavilwile kufuma ku Pittsburgh, Pennsylvania, ne kwiatwala ku Brooklyn, New York, ko aji ne lelo jino.—5/1, mapeja 22-24.

• Mambo ka Baibolo o aambila pa mambo a kwikala na kimye kya kuzhindaminamo?

Umwesha’mba kuzhindamapo kulengela muntu kwikala na mushingi, maana ne milangwe kabiji kumulengela ne kwikala na kimye kya kulanguluka langulukapo. (Sala. 37:7; 63:6; Mana. 11:12)—5/15, mapeja 3-5.

• Bintu ka byatemenwe ba John Wycliffe, William Tyndale, Robert Morrison, ne ba Adoniram Judson?

Bano bonse batemenwe Mambo a Lesa kabiji beatuntulwile mu milaka yaambanga bantu. Ba John Wycliffe ne ba William Tyndale beatuntulwile mu Kizungu, ba Morrison beatuntulwile mu ki Chinese kabiji ba Judson mu ki Burmese (Myanmar).—6/1, mapeja 8-11.

• Bamfumu banga ba Bayudea bajinga na kizaku kya kwingijila mu nzubo ya Lesa?

Bamfumu jikumi na batanu ne bana balaminenga mu bufumu bwa bena Yuda bwa ku kabeta ka ku bulenge kabiji bamfumu bana bo bajingatu na kino kizaku—Asa, Yehoshafwata, Hezekiya ne Yosiya.—6/15, mapeja 7-11.

• Nanchi bena Kilishitu bashingwa baji panopantanda, bonse banengezhako kajo ka ku mupashi nyi?

Ine. Bonse bashingwa na mupashi wa Lesa balenga jibumba ja kalume wakishinka kabiji wa maana, bino aba baji mu jibumba jitangijila bo banengezha kajo ka ku mupashi.—6/15, mapeja 22-24.

• Mambo ka bashilikale bena Loma o bakomokejile kivwalo kya Yesu?

Kimye Yesu kyo afwile, bashilikale bakankelwe kwabana kya kuvwala kyanji. Javula, kya kuvwala kya uno mutundu kyalengwanga na bisapi bibiji byo banungakanya, bino kya kuvwala kya kwa Yesu kyajinga kyabula mifumu, kabiji o ene mambo o kyanemejile.—7/1, peja 22.

• Mambo ka o kyakonsha kwambilwa’mba butemwe kyo kyajinga kine kintu kikatampe kyalengejile Yesu kupusana na bantangi ba bupopweshi?

Bano bantangi balengulwilenga bantu mu kifulo kya kwibatemwa. Kyakijilemo kutama, kechi batemenwe Lesa ne. Bino, aye watemenwe Shanji ne kubila bantu lusa. (Mat. 9:36) Wibakasulukilanga, kwibata muchima ne kifyele.—7/15, peja 15.

• Mambo ka kuyuka bya kulama mali bulongo mu masongola o kukatezha, kabiji ki ka kyakonsha kukwasha bamulume ne mukazhi kulama mali bulongo?

Javula bamulume ne mukazhi bapusenamo mu bya mali na mambo a kubula kwiketekela ne kwikala na nkomeno yapusana. Bintu bina bikwasha kulama mali bulongo ke bino: Itekenyainga umvwe kemwisambe pa bya mali, umvwañanai pa mambo a byo mukengijisha mali, lengai mwaba wa mali a kisemi ne kusala muntu ukapota byobyo bintu bya kwingijisha.—8/1, mapeja 10-12.