Mwayuka Nyi?

Nga kubala bantu kwalengejile Yesu kusemenwa mu Betelema kwajinga kwa byepi?

Byonka byaamba mambo awama anembele Luka, Kesala Augusatusa wakambizhe kubala bantu mu kyalo kya Loma, “bonsetu bayile mu kwinembesha, au ku muzhi wanji, au ku muzhi wanji.” (Luka 2:1-3) Yosefwa shanja Yesu wa kumushinda wajinga mwina Betelema, lwendo lo bakashile ba Yosefwa ne Maliya lwa kumvwina uno mukambizho lo lwalengejile Yesu kusemenwa mu Betelema. Kuno kunemba bantu mazhina kwibakwashangako kutambula misonko ne kutwezha bashilikale.

Bena Loma byo bashinjile bena Ijipita 30 B.C.E, muteeto wa kubala bantu mu kafulumende wa bena Ijipita saka bamutendekele kala. Bashayuka baamba’mba bena Loma balondejile muteeto wa kubala bantu ne ndamino ya bukalama bwa bena Ijipita mu bufumu bwabo.

Kino kishinka kitanwa mu mukambizho wapaine ndamakyalo wa mu Loma, mwina Ijipita mu 104 C.E. Uno mukambizho uji mu butala bwa mabuku mu Britain, utangwa’mba: “Byo kiji kuba’mba kimye kya kubala bantu pa nzubo pa nzubo kyafika, kyawama kukambizha bonse bekala mu mizhi ingi kubwela kwabo pa kuba’mba mazhina abo anembwe mo alondankena kabiji bakonshe ne kujima po bebapa pa muntu pa muntu.” (Gaius Vibius Maximus, Prefect of Egypt)

Mambo ka Yosefwa kyo akebejilenga kupa Maliya nkalata ya kumukana saka amwipangwizhetu?

Kwesakana na byaamba Mambo awama anembele Mateo, Yosefwa wayukile’mba waimita “Maliya byo bamwipwizhe kwi Yosefwa”, saka bakyangye kwisongola. Kwakubula kuyuka’mba Maliya waimita “ja ku Mupashi Wazhila,” Yosefwa wafwainwa walangulukile’mba kechi walamine bukishinka ne, onkao mambo wafuukwilepo kumukana.—Mateo 1:18-20.

Mu Bayudea bantu beipanguzha bebamonanga’mba besongola. Bino bano babiji kechi baikalanga pamo bamulume ne mukazhi ne, kana byonse bikebwa pa masongola byapwa. Kwipanguzha kwanemene bingi kya kuba umvwe musongoshi waalula muchima na mambo a bintu bimo, ne masongola abula kwikalako, kamwale wakasulukanga kusongolwa ku mukwabo umvwe bamupa nkalata ya kumukana. Inge wamwipanguzha wafwa saka akyangye kumusongola waikalanga kituzhi. Kabiji inge wauba bulalelale saka bamwipanguzha, walenganga mambo a bukende kabiji bamwipayanga.—Mpitulukilo ya mu mizhilo 22:23, 24.

Kyamweka Yosefwa walangulukilepo pa byakonsheshe kufuma mu kumutwala ku meso a bantu bavula. Nangwa kya kuba wakebelenga kumutwala ku kije bino wakebele kumuzhikijila ne kumufumya mu kizumba. Pa kuba’mba obe bino wafuukwilepo kumukaina kumbaji. Mambo wamukazhi wabula kusongolwa uji na mwana umvwe uji na nkalata ya kumukana kimwesha’mba wasongwelwepo kala.

[Kipikichala pa peja 32]

MUKAMBIZHO WA KUBALA BANTU WAPAINE NDAMAKYALO WA MU IJIPITA, MWINA LOMA MU 104 C.E.

[Byambo bya Muntu Ungi]

© The British Library Board, all rights reserved (P.904)