Yesu byo Afunjishe Bantu pe aye Mwine
“Yesu kechi wizhinaukile aye mwine ko afumine ne kyo aishijile panopantanda ne, kabiji wayukishetu bulongo ne bintu bya kulutwe.”—AUTHOR HERBERT LOCKYER.
PA KUBA’MBA twitabile ne kuketekela bintu byafunjishe Yesu, patanshi twafwainwa kukimuyuka. Nga Yesu wajinga ñanyi? Wafumine pi? Ñanyi nkebelo yo ajinga nayo mu bwikalo? Tutana mikumbu mu Mambo Awama Mateo, Mako, Luka ne Yoano yaambile Yesu nangwa kya kuba kechi twajingako kimye kyo eyambile ne.
Wajingako kasa akyangye kusemwa panopantanda Kimye kimo Yesu waambile’mba: “Abalahama byo ajinga ukyangye amiwa kasa njipo.” (Yoano 8:58) Abalahama waikeleko myaka 2,000 Yesu kasa akyangye kusemwa. Bino Yesu wajinga konka uno muntu wa lwitabilo aye Abalahama kasa akyangye kusemwa panopantanda. Pano bino kwepi ko ajinga Yesu? Waambile’mba: “Nafumine mwiulu.”—Yoano 6:38.
Mwana Lesa Yehoba uji na bamalaika bavula. Nangwa byonkabyo, Yesu wapusanako. Wilumbulwile mwine amba “mwana Lesa yenkawa umo.” (Yoano 3:18) Bino byambo bilumbulula’mba Yesu ye yenka walengelwe kwi aye mwine Lesa. Mu mwana yenkawa umo Lesa mo alengejile bintu byonse.—Kolose 1:16.
“Mwana muntu” Yesu waingijishe bino byambo javula kutazha kwi aye mwine. (Mateo 8:20) Kechi wajinga malaika wialwile mu bumuntu ne. Bino wajinga muntu. Kupichila mu mupashi wanji, Lesa watuntulwile bumi bwa Mwananji kufuma mwiulu kwiya panopantanda, kulengela Maliya muzhike kwimita. Onkao mambo Yesu wasemenwe walumbuluka, wabula mambo.—Mateo 1:18; Luka 1:35; Yoano 8:46.
Mesiasa walailwe Mwanamukazhi mwina Samaliya waambijile Yesu amba: “Nayuka aye Mesiasa ukeya.” Yesu wakumbwile’mba: “Ye amiwa uno ye wisamba nanji.” (Yoano 4:25, 26) Kyambo kya kuba’mba “Mesiasa” ne kya kuba’mba “Kilishitu” kilumbulula “Mushingwa.” Yesu washingilwe nangwa kutongolwa na Lesa kwingila mwingilo wanema wa kufikizha milaye ya Lesa.
Ene mambo o aishijile Yesu waambile’mba: “Nafwainwa nsapwile mambo awama a bufumu bwa Lesa . . . mambo kyo kyo natuminwe.” (Luka 4:43) Nangwa kya kuba waubijile bantu bintu byawama byavula byo bakajilwe, kusapwila Bufumu bwa Lesa kyo kyajinga kintu kikatampe mu bwikalo bwanji. Tusakwisambapo mu mitwe yalondelapo pa byo afunjishe pa Bufumu.
Kwambatu kine Yesu kechi wajinga nobe atweba ne.a Byonka byo tusakufunda, bwikalo bwanji bwa mwiulu bwalengejile byambo byo ambanga panopantanda kumvwanyika. Kyo kine kintu kyo twafwainwa kubula kukumisha kuba’mba byambo byo asapwijile byafika bingi bantu bavula pa michima.
[Tubyambo twa mushi]
a Inge mukeba kuyukilapo byambo bikwabo pe Yesu ne mwingilo ye aji naye mu nkebelo ya Lesa, monai kitango 4, mu buku wa Nanchi Baibolo Kine Ufunjisha’mba Ka? wanembwa na Bakamonyi ba kwa Yehoba.