Mambo ka Masongola Avula kyo Apwila?

“Bafaliseo baishile ko aji na kumweseka’mba, Lelo kizhila mwanamulume kukana mukazhanji pa mambo pa mambo nyi?”—Mateo 19:3.

BANTU bajingako kimye kyajingako Yesu baipwizhe inge masongola afwainwa kupwa. Yesu wibakumbwile’mba: “Kechi mwatangilepo’mba, Aye wibalengele ku ntendekelo, wibalengele mwanamulume ne mwanamukazhi ne kwamba’mba, Kyo kyo akalekela muntu shanji ne inanji, ukalamachila ku mukazhanji; ne abo babiji bakekala ke mubiji umotu, nenyi? Byonkabyo pano kechi baji babiji ne, ke mubiji umotu. Onkao mambo akya kyasambakanya Lesa, muntu kechi ekyabanye ne.”a (Mateo 19:4-6) Kino kibena kumweshatu patoka kuba’mba Lesa wakebelenga’mba masongola akabulenga kupwa.

Mu byalo byavula baji mu masongola babena ‘kwabana’ ne kipelako bekana. Nanchi lujimuno lwa mu Baibolo lwaamba pa masongola lwaleka kwingila nyi? Abya bantu bekana na mambo kuba’mba lunengezho lwa Lesa lwa masongola lwatamine nyi?

Akilangulukai pa kino kyakumwenako: Bisemi bibiji bya bamulume ne mukazhi bapota myotoka ipasha. Kisemi kimo kyendesha ne kulama bulongo motoka. Motoka wabo kechi ufwafwafwa ne. Kisemi kikwabo kechi kyalama bulongo motoka wabo ne, kabiji bamwendesha bibi. Motoka byo afwa bamusankilapo. Ñanyi uji na lukatazho, motoka nyi, inyi benayo? Kwambatu kine bena motoka bo baji na lukatazho.

Kyo kimotu, nangwa kya kuba masongola avula apwa kechi kilumbulula’mba lunengezho lwa masongola lwatamine ne. Kuji bantu bavula baikala bingi bulongo mu masongola, kino kimwesha’mba lunengezho lwa masongola lwawamine. Masongola a uno mutundu alengela bantu kwikala bulongo mu bisemi ne mu bimasamasa. Byonka biji motoka, ne masongola nao akebewa kwialama bulongo pa kuba’mba abule kupwa.

Nangwa kya kuba masongola enu aikala moba acheche nangwa myaka yavula, lujimuno lwa mu Baibolo lwaamba pa bya kukosesha ne kulama bulongo masongola enu lwingila bingi. Monai bya kumwenako mu mutwe walondelapo.

[Tubyambo twa mushi]