Nanchi Mikumbu Yanema Nyi?

“Mukayuka bukine, ne bukine bukemukasulula.”—YOANO 8:32.

MU BAIBOLO muji bukine bwakonsha kwitukasulula ku mafunjisho aluwankana nangwa’mba aluwika bantu aamba pe Yesu. Nanchi byo twaitabilamo pe Yesu byanema nyi? Ee, byanema bingi. Yehoba wibinemeka bingi. Yesu naye wibinemeka bingi. Ne atweba twafwainwa kwibinemeka.

● Mambo ka o byanemena kwi Yehoba? Mambo “Lesa butemwe.” (1 Yoano 4:8) Yehoba ukeba’mba twikalenga myaka ne myaka na lusekelo. Yesu waambile’mba: “Mambo Lesa byo ebatemwishe ba pano pa ntanda wapaine Mwananji yenkawa umotu, kuba amba bonse bamwitabila kechi bakonaike ne, poso bakekale na bumi bwa myaka.” (Yoano 3:16) Lesa watumine Mwananji kwiya na kwitupokolola ne kwitulengela kwikala na jishuko ja kukekala myaka ne myaka pano pa ntanda mu Paladisa byonka byakebelenga Lesa mwine ku ntendekelo. (Ntendekelo 1:28) Lesa ukebesha bingi kupana bumi bwa myaka ku bafunda bukine pa Mwananji ne kwikela mwayila byo bafunda.—Loma 6:23.

● Mambo ka Yesu o ebinemekela? Yesu naye watemwa bingi bantu. Wamwesheshe byo atemwa bantu byo epaine kwiya na kwitufwila. (Yoano 15:13) Wayukile kuba’mba ubena kunengezha jishinda ja kupulukilamo bantu. (Yoano 14:6) Nanchi kyalubwa kuba’mba Yesu ukeba’mba bantu bavula bakapuluke nyi? Ine, o ene mambo, o akambizhizhe baana banji ba bwanga bakine kufunjisha bantu mwaya ntanda yonse kyaswa muchima wa Lesa ne byo akoba.—Mateo 24:14; 28:19, 20.

● Mambo ka o byanemena kwi atweba? Akilangulukai pa bintu byo mwanemeka bingi mu bwikalo bwenu, nabiji bumi ne kisemi kyenu? Nanchi mukeba kisemi kyenu ne anweba bene kwikala bulongo ne kubula kukolwa nyi? Yehoba kupichila mwi Yesu wimupa anweba ne balongo benu luketekelo lwa kwikala myaka ne myaka mu ntanda ipya mukabula misongo ne buyanji. (Salamo 37:11, 29; Lumwekesho 21:3, 4) Nanchi kechi mukeba kwikala bino nenyi? Umvwe ibyo, mwafwainwa kubapo bimo pa kuba’mba mukekale buno bwikalo.

Tangai jikwabo kinembelo kyanembwa kuntatwilo kyaamba’mba: “Mukayuka bukine, ne bukine bukemukasulula.” Bukine pe Yesu ne pa mwingilo wanji mu kufikizha kwa kyaswa muchima wa Lesa bwakonsha kwitukasulula ku buzha bwatama bingi—buzha bwa bundengamambo ne lufu. Bino pa kuba’mba mukasululwe, mwafwainwa ‘kuyuka bukine.’ Nga mambo ka akubujila kufunda byavula pa buno bukine ne pa byo mukamwenamo na balongo benu? Bakamonyi ba kwa Yehoba bakaswa kwimukwasha.