Mukivuluka Nyi?
Nanchi mwamwenamo mu kutanga magazini a Kyamba kya Usopa akatataka nyi? Monai inge mwakonsha kukumbula ano mepuzho:
Bwikalo bwa kwa Solomone bwakonsha kwitujimunako byepi?
Lesa wamupesheshe ne kumwingijisha bingi Mfumu Solomone. Mu moba a bukalama bwanji walekele kulondela mizhilo ya Lesa. Solomone wasongwele mwana Felo wabulanga kupopwela Lesa, ne bakwabo banabakazhi bavula bamulengejile kuya mu bupopweshi bwa bubela. Twafwainwa kuchinuzhukanga kutendeka kwikala na miteeto nangwa byubilo byatama pachepache. (Mpitu. 7:1-4; 17:17; 1 Mfu. 11:4-8)—12/15, mapa 10-12.
Mambo ka o twafwainwa kulondela mizhilo ya mu Baibolo?
Aba balondela mizhilo ya mu Baibolo bekala na jiwi ja mu muchima jawama kabiji bakosesha bulunda bwabo mu kisemi. (Sala. 19:8, 11) Pa kuba aba babula kulondela mizhilo ya mu Baibolo javula bayanda na milanguluko.—1/1, mapa 8, 9.
Mambo ka Bena Kilishitu o Babatizhiwilwa kabiji bafikilamo byepi kubatizhiwa?
Lubatizhilo ke jishinda ja kwikelamo na bulunda bwawama ne Lesa. (1 Pe. 3:21) Mu lulombelo lwa pa bunke, twipana kwi Yehoba, ne ku mulaya kuba’mba tukobanga kyaswa muchima wanji mu bwikalo bwetu bonse. Panyuma ya lulombelo, tumwesha patoka kwipana kwetu kupichila mu kubatizhiwa.—4/1, mapa 16, 17.
Mambo ka o twakonsha kwambila’mba kufuma mu myaka kitota kitanshi kuya ne kulutwe, kimye kyonse kwaikalanga bena Kilishitu bashingwa pano pa ntanda?
Mu kishimpi kya kwa Yesu kya “wichi” ne “bincha,” “nkunwa yawama” yaimenejilengako ‘baana ba mu bufumu.’ (Mat. 13:24-30, 38) Bincha byakomejile pamo na wichi kufika ne kimye kya kunowa. Nangwa kya kuba kechi twakonsha kuyuka baimenejilengako wichi ne, bino kyamweka baji pano pa ntanda kufumatu ne kala kufika ne buji lelo.—1/15, jipa 7.
Ñanyi watumine “kabangabanga”?
Ke yewa wakebeshenga kwipaya Yesu saka akiji lukeke—Satana Diabola. Satana utundaika bubela, bumbanzhi ne kwipayañana? O ene mambo Yesu o amutelejile’mba, “wa bubela kabiji ye shanja bubela,” waikele “mbanzhi byo atatwile kwenda mu mashinda anji atama.” (Yoa. 8:44)—4/1 jipa 29.
Ki ka kyakonsha kwitukwasha kuleka kichima?
Bintu byakonsha kwitukwasha kuleka kichima ke bino: Kutemwa balongo ne banyenga yetu, kupwanañana na bantu bakamwa Lesa, kuba byawama ne ‘kusekela pamo na boba basekela.’ (Loma 12:15)—2/15, mapa 16-17.
Nanchi Anasa watongolwa mu mashimikila aamba pe Yesu a mu Mambo Awama ye ñanyi?
Mu kimye kyamanyikilwenga Yesu, Anasa wajinga “Ñanga Mwine Mukatampe.” (Luka 3:2) Anasa wajinga ñanga mukatampe kutendeka nobe mu 6 nangwa 7 C.E., kufika mu 15 C.E., mo bamufumishepo, nangwa byonkabyo, Anasa wakijinga na bulume bukatampe mu Isalela.—4/1 jipa 9.
Ñanyi mafunde a mu Baibolo o twafwainwa kulondela pa kufundako bakwetu?
Patanshi mwafwainwa kuyuka bintu byo biji. Chinuzhukai kukumbula bukiji. Kabiji inge kyakonsheka pesapesai mu mabuku a mu jibumba jetu ja Lesa. Chinuzhukainga kufuukwilako bakwenu.—3/15, mapa 7-9.
Yesu watundaikile bamutelekelenga kuya miseke ibiji. (Mat. 5:41) Watazhizhe mwepi?
Pa kyo kya kimye mu Isalela bena Loma byo balaminenga batemenwe bingi kukanjikizha bantu kwingila mingilo. Byo aambijile bamutelekelenga kuya nabo miseke ibiji, wibatundaikilenga kwingila na lusekelo mingilo ibakambizhanga ba lūsa mwayila mizhilo.—4/1, jipa 9.