Bintu Byabo Byavula Byakwashishe Bakwabo

MWAJINGA mu mwaka wa 49 C.E. Ba Petelo, Yakoba ne Yoano, “bo bamonanga amba mashiki,” bapele mutumwa Paulo ne Banabasa mwingilo. Bebapele mwingilo wa kuya na kukwasha bena Kilishitu bayanji kimye kyo basapwijilenga ku bantu ba mu bisaka bingi. (Nga. 2:9, 10) Pano uno mwingilo bamwingijile byepi?

Makalata anembele Paulo asolola byo atele muchima ku uno mwingilo. Wanembejile bena Kilishitu ba mu Kolinda amba: “Pa mambo a milambo ya kukwasha bazhijikwa, mwakonsha kulondela mikambizho yo napaine ku bipwilo bya mu Ngalatiya. Pa juba jitanshi mu mulungu, mu mulungu, muntu umo umo atulepo bya milambo mwayila bintu byo aji nabyo, kuchina amba mukonkanyenga milambo saka nafika kala. Bino byo nkafika koko nkemutumina banabalume bo mwaswishishe mu makalata enu kutwala bya bupe byenu ku Yelusalema.”—1 Ko. 16:1-3.

Mu nkalata ya bubiji yo anembejile bena Kolinda, Paulo waambile jibiji pa mambo a milambo. Wibanembejie “kuba amba bintu byenu byavula bikwashe boba bebibula . . . pa kuba amba bonse mwesakane.”—2 Ko. 8:12-15.

Mwingilo wa kukonkanya milambo saka apwa kala, Paulo po po anembejile nkalata bena Kilishitu ba mu Loma mu 56 C.E. Waambile amba: “Mbena kuya ku Yelusalema na kwingijila bazhijikwa. Mambo aba baji mu Makedonya ne mu Akaya kibatokele ku muchima kupana bya bupe bya kukwasha balanda ba mu bazhijikwa bajinga mu Yelusalema.” (Loma 15:25, 26) Pa kupitapo kimye kicheche, Paulo wapwishishe mwingilo ye bamupele, mambo byo abwelele ku Yelusalema, ne pa kumukasa mu uno muzhi waambijile Ndamakyalo wa bena Loma aye Felikisa amba: ‘Naishile ku Yelusalema na kupana mali a kukwasha kisaka kyetu ne kulambula milambo kwi Lesa.’—Byu. 24:17.

Muchima wamwesheshe bena Kilishitu batanshi wamwekela mu byambo byaambile Paulo pa mambo a bena Makedonya. Waambile’mba, batwajijile na ‘kwitusashijila na mukoyo pa mambo a kupana bya bupe.’ Mutumwa watundaikile bena Kolinda kulondelanga byo aubilenga. Waambile’mba: “Bonse pa muntu pa muntu bobe monka mo bafuukwila mu michima yabo, kechi bapane na bulanda nangwa na mambo a kwibakanjikizha ne, mambo Lesa watemwa muntu upana na lusekelo.” Ki ka kyalengejile balongo mu bipwilo kupana na lusekelo? Kyalengejile kechi bakebelenga ‘kukwashatu bazhijikwa mu byo bakajilwa ne, bino ne [kulengela] bantu bavula kusanchila Lesa na mambo a uno mwingilo.’ (2 Ko. 8:4; 9:7, 12) Ne atweba, bino byo bintu bitulengela kwikala bampanyi. Yehoba Lesa uketupesha pa uno mupashi wa bumpanyi, kabiji mapesho anji kine o alengela muntu kunonka.—Mana 10:22.

[Kitenguluzha pa peja 9]

BAMO BYO BAFUUKULAPO KUPANA MIBINGU IBINGULWA KU MWINGILO WA NTANDA YONSE

Byonka byo kyajinga mu moba a mutumwa Paulo, ne lelo jino bavula ‘batulapo bya milambo,’ ko kuba’mba mali amo ne kuya na kwiabika mu tubokoshi twa mibingu panembwa’mba “Mwingilo wa Ntanda Yonse.” (1 Ko. 16:2) Pa ñondo pa ñondo, bipwilo bituma ino mibingu ku ofweshi wa Bakamonyi ba kwa Yehoba uji mu kyalo kyabo. Kabiji mwakonsha kutuma mibingu ku kije kyaswishiwa na muzhilo kingijisha Bakamonyi ba kwa Yehoba mu kyalo kyenu. Pa kuba’mba muyuke jizhina ja kije kyaswishiwa na muzhilo kingijisha Bakamonyi ba kwa Yehoba mu kyalo kyenu, nembelai ku ofweshi wa musampi wa mu kyalo kyenu. Mwakonsha kutana keyala wa ofweshi wa musampi pa intaneti kwingijisha keyala wa www.jw.org. Bupe bo mwakonsha kutuma ke buno:

KUPANA BUPE KWA KUBULA KWAMBA BYO BUKENGILA

• Ke bupe bwa mali, bipe nangwa bintu bikwabo byanema.

• Mwafwainwa kutumina pamo na nkalata ibena kulumbulula kuba’mba ao mali nangwa bipe byo mwatuma bakebingijishe mo bakebela.

KUPANA BUPE NE KUBULAÑANA BYO BUKENGILA

• Ke mali apanwa kuba’mba beengijishe, pano bino, bakonsha kumubwezhezha mwine mwinao inge wiakeba.

• Saka mukyangye kupana bupe, ipuzhai Ofweshi wa Musampi uji mu kyalo kyenu.

KUNENGEZHEZHA JIMO BYA KUPANA BUPE

Kununga pa bupe bwa mali ne bipe, kuji mashinda akwabo a kupainamo mibingu mu kukwasha mwingilo wa Bufumu wa ntanda yonse. Ano mashinda atanchikwa panshipo. Saka mukyangye kutuma mibingu kwingijisha jishinda jo mukeba, patanshi bulai ofweshi wa musampi wa mu kyalo kyenu kuba’mba bamonepo mashinda o bengijisha mu kyokyo kyalo. Byo kiji kuba’mba mizhilo ya kafulumende ne mpaino ya misonko yapusana pusana, kyanema bingi kwipuzha dipatimenti utala pa bya mizhilo ne misonko pa musampi saka mukyangye kusalapo jishinda jawama ja kupainamo bupe.

Kwivimbila: Ke mibingu ipanwa kupichila mu kutongola kije kingijisha Bakamonyi ba kwa Yehoba kuba’mba kyo kikatambula mali a kwivimbila nangwa a penshonyi.

Mali aji ku Kipao: Mali aji ku kipao, bipepala bya kufishishapo mali ku kipao, nangwa mali a muntu watambula penshonyi akonsha kunengezhiwa nangwa kupanwa kimye kya lufu lwanji ku kije kingijisha Bakamonyi ba kwa Yehoba, kwesakana na mizhilo ikebewa ku kyokyo kipao.

Bipe Nangwa Mali a Muntu pa Kampanyi ne Mali a Muntu o Akongwesha Kampanyi: Bino bintu byakonsha kupanwa ku kije kingijisha Bakamonyi ba kwa Yehoba kuba’mba ke bupe bwapanwa bwa kubula kubwezha nangwa amba bakatambule buno bupe inge mwine wafwa.

Bishimikwa ne Mpunzha: Bishimikwa nangwa mpunzha byakonsha kupanwa ku kije kingijisha Bakamonyi ba kwa Yehoba kupichila mu kupana bupe bwa kuba’mba bakebwingijishe mo bakebela, nangwa inge kya kuba muntu wapana nzubo, awa wapana nzubo wakonsha kukitwajijila kwikalamo saka akiji mumi.

Bupe bwa pa Mwaka: Bupe bwa pa mwaka ke lunengezho lulengela muntu kupana mali a penshonyi pa mwaka pa mwaka ku kije kingijisha Bakamonyi ba kwa Yehoba, ko kuba’mba mali o afwainwe aye mwine kutambulanga nangwa yewa ye atongwele kuba’mba akatambulenga oo mali. Awa wapana buno bupe bakamukepesheshako misonko mu yewo mwaka ye atendekelamo kupana bobo bupe.

Buswe ne Mali Afiwa ku Kipamo: Bipe nangwa mali akonsha kupanwa ku kije kingijisha Bakamonyi ba kwa Yehoba kupichila mu kunemba buswe kwesakana na mwayila mizhilo, nangwa kutongola kije kikatambulanga bobo bupe. Luno lunengezho lwakonsha kulengela yewa wapana buno bupe kumukepesheshako misonko.

Monkatu mwatala byambo bya kuba’mba “kunengezhezha jimo bya kupana bupe,” ano mashinda a kupainamo bupe akebewa muntu ukeba kupana buno bupe kwinengezhezha jimo. Onkao mambo, mwafwainwa kwipuzha dipatimenti utala pa bya mizhilo ne misonko pa musampi. Kupichila mu kwingijisha ano mashinda a kupainamo bupe, bavula bakwasha bupopweshi bwetu ne bantu mwaya ntanda kabiji bebabwezhezha mali a misonko o bapainenga pa kupana bobo bupe.

Pa kuba’mba muyukilepo byavula, mwakonsha kunemba nangwa kutuma foni ku Treasury (ofweshi utala pa mali) kwingijisha keyala uji panshipo nangwa mwakonsha kutumina ku ofweshi wa musampi uji mu kyalo kyenu.

TREASURY

Watch Tower Bible and Tract Society of Pennsylvania

P.O. Box 33459

Lusaka 10101

Foni: +260 211 272062