NANCHI MWAYUKA NYI?
Mambo ka o bachimawinanga maulu pa kwipaya tupondo?
Jishimikila ja mu Baibolo jiji mu Mambo Awama jaamba pa kwipaya kwa kwa Yesu ne tupondo tubiji pa kichi jamba’mba: “Bayudea baambijile Pilato kuba amba bebachimaune maulu ne kufumyapo mibiji yabo.”—Yoano 19:31.
Muzhilo wa Bayudea waambile’mba mubiji wa kapondo ye bapopela pa kichi kya lumanamo panyuma ya kumwipaya “kechi akekale bufuku bonse ku kichi ne.” (Mpitulukilo ya mu mizhilo 21:22, 23) Bayudea balondelangatu muzhilo umo ne ku bantu bo baipayanga ku bena Loma. Kwibachimauna maulu kwalengelanga muntu kufwa bukiji pa kuba’mba bamuzhiike juba Sabado saka jikyangye kufika pa kuzhika juba.
Bantu bo baipayanga mu jino jishinda, bebapopelanga misomali mu maboko ne ku maulu pa kichi. Umvwe basumpa kichi, bebashanga saka bapepela ne kumvwa kutanta bingi na mambo a kinemenezhi kya mubiji. Pa kuba’mba bapeme, bafwainwe kukosela ku misomali yo bapopela ku maboko nangwa ku maulu. Umvwe kya kuba bachimauna bikupa bya ku maulu anji, kyakatazhanga kupeema. Panyuma ya bino, bapuungilanga ne kufwa bukiji.
Binzhipunzhipu bebingijishanga byepi kala mu nkondo?
Kinzhipunzhipu kyo kilwilo kyaingijishe Davida kwipayilako Goliata wajinga kiyangala. Kyamweka wafunjile bya kwingijisha kinzhipunzhipu kimye kyo ajinga kafunga wa mikooko byo ajinga mwanyike.—1 Samwela 17:40-50.
Bena Asilya baji na binzhipunzhipu pa kulukuka muzhi wa Yudea wa nsakwa
Bena Ijipita ne bena Asilya baingijishanga kinzhipunzhipu kala. Kino kilwilo kyajinga na mwayi nangwa kisapi kyo bakashijileko mizhinge ibiji. Ubena kwingijisha kinzhipunzhipu wabikangamo jibwe jabaya masentimita 5 kufika ku 7.5 kabiji janema magalamu 250. Washumbanga ne kulekako muzhinge umo pa kuba’mba jibwe jizhipuke na ngovu ne kwasa po bejitazha kwa kubula kutupila.
Mu bya kupoyapoya ku byalo bya ku musela batanamo mabwe avula o baingijishanga mu nkondo kala. Bantu bayukile kutaya mabwe mu nkondo batayanga mabwe mu binzhipunzhipu azhipukanga bingi na bulume (160 kufika ku 240 km/h). Bashayuka bazhinauka umvwe kya kuba kinzhipunzhipu bekilengele nobe buta bwa mukanda, pano bino kyajinga kilwilo kyaipayañananga.—Mitonyi 20:16.